Tzotiꞌ halbꞌilkano yinh konhobꞌ Babilonia
13
Tzotiꞌ yal Komam Dios yinh Babilonia tet yaꞌ Isaías, iskꞌahol yaꞌ Amoz, yalni Komam:2 «Awekanh bandera yinh iswiꞌ hunu witz kaw nahat yekanh,
hal-laxojabꞌi tato chiꞌok ebꞌnaj soldado howal,
cheyeni heqꞌabꞌ tet ebꞌnaj ta chꞌokto ebꞌnaj yul ispulta ebꞌnaj
kaw ay yelapno yul konhobꞌ tuꞌ.a
3 Inchejan ebꞌnaj soldado sikꞌbꞌilxalo wuhan,
wawtenan ebꞌnaj winaj kaw helankano yinh howal,
haꞌ ebꞌnaj chinchejan isyenolo inhowalan,
kaw xin chitzala ebꞌnaj yilni isqꞌaqꞌal wipan.
4 Xanhe chiwejcha ebꞌnaj iswiꞌ witz hakaꞌto txꞌiꞌal konhobꞌ chiwejchahi;
chiwejchapaxo ebꞌnaj xolaj nime konhobꞌ yuto kutxanxako ebꞌnaj,
lanhan yahwi isbꞌi hunun majan ebꞌnaj soldado
chito howal tuꞌ yu Komam Yahawil kaw aykano yip.
5 Chitit ebꞌnaj bꞌey hunteqꞌan nime konhobꞌ kaw nahat ay bꞌey islahobꞌal txꞌo txꞌotxꞌ,
haꞌ hun Komam Jahawil chihul yebꞌ ebꞌnaj,
chisyenilo ishowal Komam, chistanhtzenilo huneꞌ txꞌotxꞌ tuꞌ.
6 ¡Aweko yul henuqꞌ heyoqꞌi yuto kawilxa yeti istzꞌayikal
bꞌay chiyati Komam Jahawil isyaꞌtajil!
¡Haꞌ huneꞌ niman kꞌayilal tuꞌ, haꞌ Komam Dios kaw aykano yip chiꞌanitij!
7 Yuxin chipáxilo yip isqꞌabꞌ sunil anma,
kat ispax yip yanma ebꞌnaj winaj.
8 Kat isxiwkanh, kat yok bꞌiskꞌulal yinh,
chiyabꞌen ebꞌnaj isyaꞌil isyaꞌtajil,
hakaꞌ yet chitit isyaꞌil iskꞌul ix ix yet chiwatxꞌi iskꞌul.
Toxanhe chikꞌay iskꞌul ebꞌnaj chiyilniko sat hunun yetbꞌi
chikajpulilo sat ebꞌnaj yu txꞌixwilal.
9 Lanhanxa yul istzꞌayikal bꞌay chiyati Komam Jahawil isyaꞌtajil,
haꞌ huneꞌ tzꞌayik tuꞌ kaw xiwkilalkanoj,
yuto chiyati Komam ishowal, haꞌ ishowal tuꞌ kaw aykano ismay,
chikankano tzꞌinhno txꞌotxꞌ tuꞌ yet chistanhtzenilo Komam anma mulum ay sat txꞌotxꞌ.
10 Hayet huneꞌ tzꞌayik tuꞌ, haꞌ sunil txꞌumel chitzejla yul satkanh
matxa chitzejtzoni yet chiꞌahiloj,
kat isqꞌejholilo yoj tzꞌayik yet chiꞌahiloj matxa chimujlipaxo yoj ixahaw.b
11 Chiwayojan isyaꞌtajil yibꞌanh anma ay sat sunil yibꞌanhqꞌinal tiꞌ yu ismul,
chiwanipaxayojan isyaꞌtajil yibꞌanh anma txꞌoj yu istxꞌojal;
chintanhtzelojan isloloꞌal ebꞌnaj winaj kaw loloꞌ,
chiwinayojan ebꞌnaj kaw kanhye chute isbꞌa yu yip.
12 Kaw kꞌulchꞌan chiꞌelkaniko ebꞌnaj winaj wuhan
hakaꞌ chꞌen oro chꞌen kaw kꞌul;
ekꞌbꞌal kꞌulchꞌan chiꞌelkaniko anma hakaꞌ chꞌen oro chitit bꞌey Ofir.
13 Yuto chintzikobꞌtanhehan satkanh,
chiwaqꞌni bꞌilojan txꞌo txꞌotxꞌ,
chishekꞌni isbꞌa txꞌotxꞌ yul yehobꞌal yu inhowalan,
hanintiꞌan Yahawil kaw aykano yip.
Haꞌ yinh huneꞌ tzꞌayik tuꞌ kaw chitij lemna inhowalan.
14 Haꞌ anma lahan chubꞌ hakaꞌ noꞌ miꞌe sajche chitzumbꞌelaxikꞌoj,
maka hakaꞌ noꞌ meꞌ machi istanhehomal,
hunun mak chimeltzo yul iskonhobꞌ,
hunun mak chꞌelkanh kat isto satla istxꞌotxꞌ.
15 Makxanhetikꞌa chiꞌilchahi chitejlaxkamo yu chꞌen lanza,
makxanhetikꞌa chiyaqꞌ tzabꞌaꞌ isbꞌa chitejlaxkamo yu chꞌen espada.
16 Haꞌ yinh sat ebꞌnaj mame chimaqꞌlaxkamo yuninal ebꞌnaj sat txꞌotxꞌ,
kat yelqꞌalaxilti tzetaj ay ebꞌnaj yul yatut,
kat yipiko ebꞌnaj soldado yinh yixal ebꞌnaj.
17 Chiwatojan ebꞌnaj ah Media yaqꞌaꞌ howal yinh ebꞌnaj.
Haꞌ hunteqꞌan ebꞌnaj soldado tuꞌ machi nichꞌano ismunil chꞌen plata yul sat ebꞌnaj,
haktikꞌapax tuꞌ chꞌen oro, mach chiyelapno yul sat ebꞌnaj.
18 Chislitꞌkamo ebꞌnaj, ebꞌnaj tzeh yu isbꞌaqꞌ teꞌ litꞌ,
machi tzꞌay iskꞌul ebꞌnaj yinh nixhte unin chipitzkꞌahi,
machi yaqꞌ nimankꞌulal ebꞌnaj yinh yuninal ebꞌnaj.
19 Haꞌ konhobꞌ Babilonia, haꞌ kaw kꞌulchꞌankano xol sunil nime konhobꞌ,
kaw ismay ebꞌnaj caldeo yehiko Babilonia tuꞌ,
yajaꞌ chintanhtzelojan hakaꞌ yu intanhtzenilojan konhobꞌ Sodoma yebꞌ Gomorra.
20 Matxa chiꞌehayo anma bꞌey Babilonia tuꞌ,
matxa bꞌaqꞌinh chꞌok konhobꞌal hunelxa,
matxa chiswatxꞌekanh ebꞌnaj árabe ismantiado ok yatuto bꞌey tuꞌ;
matxa bꞌaqꞌinh chiskutxbꞌa ebꞌnaj noꞌ meꞌ yul ispeyabꞌ bꞌey tuꞌ.c
21 Wal xin iswaybꞌal noꞌ xoltelajil noqꞌ ay sat txꞌotxꞌ desierto chukaniko Babilonia tuꞌ,
haꞌ yatut ebꞌnaj chꞌok iswaybꞌalo noꞌ sahbꞌen yebꞌ noꞌ pop,
kat xin yekꞌpaxo noꞌ avestruz bꞌey tuꞌ,
haꞌ bꞌey tuꞌ chꞌah tꞌujla noꞌ xoltelajil chiw.
22 Haꞌ yul ispalacio ebꞌnaj chiꞌel yaw noꞌ hiena,
haxa yul nha kaw kꞌulchꞌan jilni, haxanhe noꞌ oj chiꞌehikꞌoj.
Yapnixa istzꞌayikal bꞌay chikꞌaykanh Babilonia,
matxa chihitzto yoj,» xhi Komam.