Bꞌit bꞌay chꞌaqꞌlax yuchꞌandiosal
12
Haꞌ yinh huneꞌ tzꞌayik tuꞌ chawal hakaꞌ tiꞌ: «Mam Jahawil,chachinbꞌitnhehan yuto waxanhka tit hahowal winhan,
yajaꞌ xaꞌekꞌayo hahowal tuꞌ, haxa yaqꞌlobꞌal inkꞌulan chawaqꞌa.
2 Haꞌ Komam Dios inkolomalan yehi,
tꞌinhan wekojan yul isqꞌabꞌ yuxin mach chinxiwan,
yuto yinhxa Komam chikawxi inkꞌulan.
Chinbꞌitnhehan bꞌit tet Komam Jahawil, yuto haꞌ inkolomalan,» kachi.
3 Cheyihti haꞌ haꞌ yul isnuqꞌ yinh tzalahilal,
haꞌ haꞌ tuꞌ xin chꞌaqꞌni Kolbꞌanile teyet.
4 Cheyalnipaxo yinh huneꞌ tzꞌayik tuꞌ hakaꞌ tiꞌ:
«Bꞌitnanhwe tet Komam Jahawil, cheyawten isbꞌi teyinh.
Halwekꞌo tet ej konhobꞌ tzetaj iswatxꞌe Komam,
chenanitij tato kaw aykano yelapno isbꞌi Komam.
5 Bꞌitnhewe salmo tet Komam Jahawil yuto xaꞌiswatxꞌe nimeta kꞌaybꞌalkꞌule,
haꞌ huneꞌ tiꞌ yilal yohtanhenilo sunil anma ay sat txꞌo txꞌotxꞌ tiꞌ.
6 Hex ah Sión bꞌitnanhwej, kat hetzalahi,
yuto haꞌ Komam Dios machi istxꞌojal,
isDiosal Israel kaw nimankano yelapno koxol,» kexchi.