Haꞌ istoholal chiswatxꞌe Komam Mesías yet chiꞌok Yahawoj
11
Hakaꞌ chu iswolni hunu xeꞌ te teꞌ,hak tuꞌ chu ispitzkꞌa hunu yaꞌ yikꞌal yaꞌ Isaí.
2 Haꞌ yaꞌ tuꞌ ayayo Yespíritu Komam Jahawil yibꞌanh,
kaw ay ishelanil, yebꞌ yitzꞌatil iswiꞌ,
chiyaqꞌ kuybꞌanile, yebꞌ xin kaw ay yip,
kaw aykano tzet yohtaj,
yebꞌ xin kaw ay yelapno Komam Jahawil yul sat.
3 Chiskuy yaꞌ anma yu ishelanil yinayo isbꞌa tet Komam Jahawil,
chiyil yaꞌ yinh tzet chiꞌeliko anma, yajaꞌ maxhtaj yu tzet chiyil yaꞌ yu isbꞌaqꞌ sat,
yebꞌ tzet chiyabꞌe yu istxikin.
4 Wal xin chiyil yaꞌ yinh tzet chiꞌeliko anma mebꞌaꞌ yinh kaw istoholal,
chiyilnipaxo tzet chꞌeliko anma chewchotanhe ay sat txꞌo txꞌotxꞌ yinh kaw istoholal.
Haꞌ xin yu tzotiꞌ chꞌelti yul istiꞌ chiꞌay isyaꞌtajil yibꞌanh anma ay sat txꞌo txꞌotxꞌ.
Haꞌ yip istzotiꞌ tuꞌ chꞌaqꞌni kamo anma chiwatxꞌen istxꞌojal.
5 Haꞌ istoholal yebꞌ isyelal, haꞌ chiswatxꞌe,
hakaꞌto haꞌ ayko istxꞌambꞌalo yinh yiktaj.
6 Hayet hunteqꞌan tzꞌayik tuꞌ, hun chꞌekꞌ noꞌ oj yebꞌ noꞌ meꞌ,
hun chiskotbꞌa isbꞌa noꞌ tzitzbꞌalam yebꞌ noꞌ chiw,
hun chiꞌekꞌpaxo noꞌ nixhte yunin wakax yebꞌ noꞌ bꞌalam,
yebꞌ ej no noqꞌ yet ej nha, haꞌ xin hunu nichꞌan unin chitanhen noꞌ.
7 Hun chiꞌekꞌpaxo noꞌ wakax lowo yebꞌ noꞌ oso,
huneꞌnhe chꞌay kotno nixhte yunin noꞌ.
Haxa noꞌ bꞌalam, chꞌim chislo noꞌ hakaꞌ noꞌ wakax.
8 Haꞌ nixhte unin chitotxutxwi,
chisajchi bꞌay ay isnhachꞌen noꞌ miꞌe labꞌa;
haxa nixhte unin tolto el yinh im chato isqꞌabꞌ yibꞌanh holan bꞌay chiway noꞌ labꞌa,
yajaꞌ matzet chꞌutelax yu noꞌ.
9 Machi hunu isyaꞌil nitam hunu istxꞌojal chꞌetanto wonhan Sión,
huneꞌ wonhan sikꞌbꞌililo yu Komam,
yuto sunil anma sat yibꞌanhqꞌinal tiꞌ chinohilo yul iswiꞌ yu yitzꞌatil iswiꞌ Komam Jahawil,
hakaꞌ isnohnajil haꞌ mar yu ha haꞌ.
10 Haꞌ yinh huneꞌ tzꞌayik tuꞌ,
hakaꞌ chu iswolni hunu xeꞌ te teꞌ,
hak tuꞌ chu ispitzkꞌa hunu yaꞌ yikꞌal yaꞌ Isaí.
Haꞌ yaꞌ tiꞌ, lahan hakaꞌ hunu bandera chiꞌalaxkanh xol konhobꞌ,
sunil anma xin chisaynilo yaꞌ, haꞌ bꞌay chiꞌehikꞌoj kaw ay ismay.
11 Hayet huneꞌ tiempohal tuꞌ chisyepaxilo Komam Jahawil yip isqꞌabꞌ,
chiyaqꞌni meltzoho hunelxa hanikꞌxa iskonhobꞌ kantokano bꞌey Asiria,
bꞌey Egipto, bꞌey Patros, bꞌey Etiopía, bꞌey Elam,
bꞌey Sinar yebꞌ bꞌey Hamat,
yebꞌ bꞌey konhobꞌ ayayo istiꞌla haꞌ mar.
12 Chꞌalaxkanh bandera yu isyelaxilo tet ej konhobꞌ
ta lanhan iskutxiko ebꞌnaj Israel pujanilto yulajla konhobꞌ bꞌay ayko chejabꞌoj,
kat iskutxbꞌalaxpaxiko anma ah Judá sajleminato yul sunil sat yibꞌanhqꞌinal tiꞌ.
13 Chꞌekꞌayo ishowal Efraín, kat istanhilo ebꞌnaj ayko ishowal yinh konhobꞌ Judá.
Haꞌ konhobꞌ Efraín matxa chiꞌok ishowal yinh konhobꞌ Judá,
haxa konhobꞌ Judá matxa chiꞌokpaxo ishowal yinh konhobꞌ Efraín.
14 Haꞌ ebꞌnaj Judá yebꞌ ebꞌnaj Efraín
chito lemna ebꞌnaj yinh ebꞌnaj filisteo ayko yinh yetkꞌulal bꞌay chiꞌahilo tzꞌayik,
kat isqꞌoji ebꞌnaj yinh ebꞌnaj filisteo tuꞌ,
chiyinipaxilo ebꞌnaj isqꞌalomal ej konhobꞌ ay yinh yetkꞌulal bꞌay chito tzꞌayik.
Chꞌok ebꞌnaj Edom yebꞌ ebꞌnaj Moab ischejabꞌo ebꞌnaj,
kat yokpaxo ebꞌnaj Amón yijemal tet ebꞌnaj.
15 Chiyaqꞌni tajokanh Komam Jahawil huneꞌ isqꞌabꞌ haꞌ mar ay bꞌey Egipto.
Chanilto Komam isqꞌabꞌ yibꞌanh haꞌ niman haꞌ, yu xobꞌ istiꞌ
kaw ay yip hakaꞌ hunu niman jaqꞌeqꞌ,
ispohkanh Komam haꞌ yeliko haꞌ yinh hujebꞌ,
hak tuꞌ xin chu yekꞌto anma yiktabꞌal haꞌ,
machi xin chilo ebꞌnaj isxanhabꞌ yet chꞌekꞌto.a
16 Hayet chimeltzo haywanhxa ebꞌnaj iskonhobꞌ Komam Jahawil kankano bꞌey Asiria,
kaw ay huneꞌ niman bꞌeh chiꞌilchalo yu ebꞌnaj
hakaꞌ yu yel ebꞌnaj konhobꞌ Israel bꞌey Egipto.