10
¡Kꞌanchꞌan ebꞌnaj chiꞌanilto ley mach toholoj,chiyetan ebꞌnaj konhobꞌ.
2 Mach chiswatxꞌe ebꞌnaj istoholal yinh anma mebꞌaꞌ;
anma chiyeta yanma yul inkonhobꞌan machi yelapno yul sat ebꞌnaj,
chiyinilo ebꞌnaj tzetaj ay ebꞌix hunix mebꞌaꞌ,
chiyelqꞌanpaxilo ebꞌnaj tzetaj ay nixhte unin machi ismam machi ismiꞌ!
3 Haꞌ hex tiꞌ ¿tzet cheyute hebꞌa yinh istzꞌayikal isyaꞌtajil?
¿Mak yinh chikawxi hekꞌul yu kexiskolni
yet chihul ebꞌnaj nahat chitit yanoko howal teyinh?
¿Bꞌaytuꞌwal cheyakano hemay?
4 Ta machijinan texol,
chiꞌel hepixan xol ebꞌnaj presowom,
kat hekami kat heyaykꞌay xol anma kamom.
Yajaꞌ machnhetaj tuꞌ yuto maxhto chiꞌekꞌayo ishowal Komam;
wal xin lemanti ishowal,
lehanto isqꞌabꞌ yanayo isyaꞌtajil teyibꞌanh.
Haꞌ Asiria ismunlabꞌal Komam Dios yehi
5 Yalni Komam: «¡Haꞌ Asiria,
haꞌ inkꞌaxan yebꞌ invarahan yet chitit inhowalan,
haꞌ Asiria tuꞌ chinqꞌanan yaqꞌayo isyaꞌtajil yibꞌanh mak bꞌay chitit inhowalan!
6 Haꞌ chinchejtojan yanoko howal yinh huneꞌ niman konhobꞌ kaw manhkꞌom;
haꞌ chinchejtojan yinh konhobꞌ tuꞌ yu inhowalan yu yelqꞌalaxilo isqꞌalomal,
kat yokkano yul isqꞌabꞌ kat isxanhobꞌtanheni,
hakaꞌ chu isxanhobꞌtanhelax tzꞌotzꞌew yulaj bꞌeh,» xhi Komam.
7 Waxanhka mach chisnah yebꞌ mach chiꞌekꞌ yinh yanma naj rey ah Asiria
tato xin haꞌ ayko yinh isnabꞌal,
haꞌ istanhtzenilo txꞌiꞌal nime konhobꞌ.
8 Yuto chiyal naj rey Asiria tuꞌ hakaꞌ tiꞌ:
«Haꞌ sunil ebꞌnaj yahawil yeko yinh insoldadohan,
¿tom mach reyo ebꞌnaj sunil?
9 ¿Tom mach lahano konhobꞌ Calno hakaꞌ konhobꞌ Carquemis?
Yebꞌ xin ¿tom mach lahanopaxo konhobꞌ Hamat hakaꞌ konhobꞌ Arfad?
Yebꞌpaxo ¿tom mach lahanpaxo konhobꞌ Samaria hakaꞌ konhobꞌ Damasco?
Wal xin lahan.
10 Hunteqꞌan konhobꞌ tuꞌ yebꞌ istioxh okkano yul inqꞌabꞌan.
Haꞌ istioxhal hunteqꞌan nime konhobꞌ tuꞌ,
kaw aykano yip sata istioxh konhobꞌ Jerusalén yebꞌ konhobꞌ Samaria.
11 Hakaꞌ wutehan konhobꞌ Samaria yebꞌ istioxh,
hak tuꞌ chiwutepaxojan konhobꞌ Jerusalén yebꞌ istioxh,»
xhi naj isreyal Asiria.
12 Yajaꞌ hayet xayij isbꞌa sunil tzet chiyoche Komam Jahawil iswatxꞌeꞌ bꞌey wonhan Sión yebꞌ bꞌey Jerusalén, chiyaniti Komam isyaꞌtajil ispajo isloloꞌal yebꞌ iskanhil ye naj rey Asiria. 13 Yuxin yal naj rey hakaꞌ tiꞌ:
«Haꞌ sunil hunteqꞌan tiꞌ yu wipan yebꞌ yu inhelanilan yuxin inwatxꞌehan,
yuto kaw aykano innabꞌalan. Wilojan istxꞌotxꞌ ej konhobꞌ,
winipaxilojan isqꞌalomal, inqꞌojihan yinh ebꞌnaj rey
yu wipan hakaꞌ yip ebꞌnaj kaw helan yinh howal.
14 Ilcha ej isqꞌalomal ej konhobꞌ wuhan,
hakaꞌ yilcha hunu yatut chꞌik,
yebꞌ hakaꞌ jinito ishos noꞌ chꞌik bꞌejbꞌilkano yatut,
hak tuꞌ yu winilojan sunil txꞌo txꞌotxꞌ;
machi xin hunu mak bꞌili,
machi mak ishaj istiꞌ yel yaw,» xhi naj rey tuꞌ.
15 Yajaꞌ xin ¿tom ekꞌbꞌal yelapno chꞌen eche sata mak chiꞌokniko chꞌen yu?
Maka ¿tom ekꞌbꞌal yelapno chꞌen sierra sata mak chiꞌokniko chꞌen yu?
Maka ¿tom haꞌ teꞌ qꞌojoch chiꞌaqꞌni bꞌilo hunu anma?
¡Machoj; wal xin haꞌ huneꞌ anma tuꞌ chibꞌilen teꞌ!
16 Yuxin haꞌ Komam Yahawil yinh sunil,
chiꞌinilo yip ebꞌnaj winaj kaw aykano yip.
Chitanhayo ismay naj rey, hakaꞌ chu istanhayo hunu tzet ye tuꞌ yu qꞌa qꞌaꞌ.
17 Haꞌ Komam Dios issajilqꞌinal Israel,
Komam machi istxꞌojal;
yinhnhe huneꞌ tzꞌayik chistanhtzelo Komam ebꞌnaj Asiria,
hakaꞌ chu istzꞌato teꞌ txꞌix yebꞌ teꞌ telaj.
18 Haꞌ iskꞌulchꞌanil isqꞌebꞌtalaj yebꞌ iskꞌulal istxꞌotxꞌ ebꞌnaj,
chisnhuskanto Komam yinh hunelnhe.
Haꞌ ebꞌnaj asirio tuꞌ chisnhusto Komam yanma ebꞌnaj
kat isnhusnito Komam isnimanil ebꞌnaj;
hakaꞌ ebꞌnaj yaꞌay chitanhtzelaxiloj yu yabꞌil.
19 Hanikꞌxanhe teꞌ qꞌebꞌtaj chikankanoj,
yuxin xayu isbꞌischa teꞌ yu hunu nichꞌan unin.
20 Haꞌ yinh huneꞌ tiempohal tuꞌ haꞌ haywanhxa yuninal yaꞌ Jacob kantokanoj bꞌey Israel,
hunteqꞌan kolchakanoj matxa chu iskawxi iskꞌul yinh huneꞌ konhobꞌ aniko howal yinh tuꞌ.
Wal xin haꞌ Komam Jahawil, Komam machi istxꞌojal,
isDiosal Israel, haꞌ yinh chikawxi iskꞌul konhobꞌ Israel yinh isyelal.
21 Haꞌ haywanh yuninal yaꞌ Jacob chimeltzohoj,
chimeltzoko yul isqꞌabꞌ Komam Dios,
Komam kaw aykano yip.
22 Hex konhobꞌ Israel,
waxanhka matxa chexbꞌischahi,
hakaꞌ isbꞌisil yarenahil haꞌ mar, yajaꞌ haywanhxanhechꞌan hex chexmeltzotij.
Nabꞌilxa yul kꞌayilal teyibꞌanh, haꞌ kaw istoholal haꞌ chiwatxꞌelax teyinh.
23 Yuto haꞌ Komam Dios Yahawil kaw aykano yip,
nabꞌilxa yu istanhtzenilo sunil tzet ay sat txꞌo txꞌotxꞌ yul konhobꞌ tiꞌ.
24 Wal xin haꞌ Komam Yahawil yinh sunil, chalni hakaꞌ tiꞌ:
«Hex inkonhobꞌan ay bꞌey Sión, mach chexxiw tet ebꞌnaj Asiria,
waxanhka chexismaqꞌ ebꞌnaj yu teꞌ kꞌax kat yinikanh ebꞌnaj isqꞌojoch teyinh,
hakaꞌ kexutelax bꞌey Egipto,
25 yajaꞌ hanikꞌxanhe kat yekꞌayo inhowalan yebꞌ ischiwa inkꞌulan teyinh,
kat intanhtzenilojan ebꞌnaj Asiria tuꞌ,» xhi Komam.
26 Chiyahti Komam Jahawil kaw aykano yip,
isyaꞌtajil yibꞌanh ebꞌnaj hakaꞌ yet ismaqꞌlaxkamo ebꞌnaj Madián bꞌey chꞌen niman chꞌen bꞌey Oreb,
chiyinikanh iskꞌax yibꞌanh haꞌ mar,
hakaꞌ yu yul isbꞌelal Egipto.
27 Haꞌ yinh huneꞌ tiempohal tuꞌ chiꞌilaxilo ijatz ayko yibꞌanh hewixikꞌ yu ebꞌnaj,
chexbꞌejtzolaxkano yinh chejabꞌoj,
hakaꞌ chu isbꞌejtzolax hunu noꞌ wakax yet chiqꞌahto teꞌ yugo ayko yibꞌanh isnuqꞌ noqꞌ.
Chexbꞌejtzolaxi yuto sikꞌbꞌil hex wuhan yet yalaxayo aceite yibꞌanh hewiꞌ.
28 Ebꞌnaj Asiria, masanta apni ebꞌnaj bꞌey Ajat,
yekꞌto ebꞌnaj bꞌey Migrón,
haꞌ bꞌey Micmas ok ebꞌnaj isbꞌisaꞌ issoldado.
29 Yekꞌto ebꞌnaj bꞌay kawil yehati yich haꞌ,
isqꞌaxponikꞌto ebꞌnaj yibꞌanh haꞌ;
yok ebꞌnaj iswatxꞌenokanh iscampamento bꞌey Geba,
isluylunkanh ebꞌnaj ah Ramá yu xiwkilal,
yelkanh ebꞌnaj ah Gabaa,
haꞌ ton iskonhobꞌ yaꞌ Saúl.
30 Elojabꞌ heyaw yinh ip hex ah Galim, abꞌewe yel aw tuꞌ hex ah Lais,
haxa hex ah Anatot kꞌanchꞌan hex.
31 Elkanh anma ah Madmena,
yelpaxokanh anma ay bꞌey Gebim.
32 Chiꞌapni istzꞌayikal bꞌay chixew ebꞌnaj Asiria bꞌey Nob;
chiyaniko ebꞌnaj ishowal yinh anma ay bꞌey Sión,
yinh tzalan Jerusalén.
33 Haꞌ Komam Jahawil kaw aykano yip,
chiyilo isqꞌabꞌ te teꞌ yu sunil yip, chisqꞌajnikanh teꞌ nime qꞌebꞌtaj kaw nime istel,
haꞌ teꞌ qꞌebꞌtaj kaw nime istel tuꞌ chiꞌaykꞌaykano teꞌ sat txꞌotxꞌ.a
34 Chisqꞌajikꞌo Komam ispimal qꞌebꞌtala yu chꞌen eche,
kaw chibꞌili yay ej teꞌ qꞌebꞌtaj bꞌey Líbano yu Komam.