Yet chipitzkꞌa Komam Jahawil yebꞌ yet chꞌok Komam Yahawil
9
Yajaꞌ mach sunilbꞌalo tiempo chikankano anma ayko yinh isyaꞌtajil tinanh xol qꞌejholoj, hakaꞌ yu yet yalanhtokanoj, yet yalaxayo isyaꞌtajil yibꞌanh txꞌotxꞌ Zabulón yebꞌ txꞌotxꞌ Neftalí yinh hunteqꞌan tzꞌayik, yajaꞌ xin chiꞌay iskꞌulal iskꞌul Komam yibꞌanh bꞌeh chiꞌapni bꞌey haꞌ mar, isqꞌaxebꞌikꞌto haꞌ Jordán, bꞌey Galilea bꞌay ay anma mach Israeloj.2 Haꞌ konhobꞌ ayko xol qꞌejholoj, chiyil issajilqꞌinal,
haꞌ anma ayxako yinh isbꞌelal kamikal chitzejla sajilqꞌinal yibꞌanh.
3 Xahawaqꞌ chꞌibꞌo isbꞌisil anma, xahawaqꞌpaxo niman tzalahilal tet,
chiyaqꞌni tzalaho iskꞌul tasataj,
hakaꞌ tzalahilal yet chiyinikanh sat istzꞌunubꞌ,
maka hakaꞌ tzalahilal yet chispohnikanh ebꞌnaj soldado qꞌalomal yinh.
4 Yuto hach hawilo anma tiꞌ yalanh isyaꞌtajil bꞌay ayko chejabꞌoj,
hatanhtzenilo konhobꞌ bꞌay ayko chejabꞌo tuꞌ,
hakaꞌtikꞌa yinh huneꞌ tzꞌayik bꞌay hatanhtzelo ebꞌnaj Madián.
5 Yuto sunil noꞌ xanhabꞌ chiyako ebꞌnaj soldado yinh yoj yet chito yinh howal,
yebꞌ sunil xilqꞌape bꞌakbꞌiliko chikꞌ yinh chisnhusto qꞌa qꞌaꞌ hakaꞌ istzꞌato telaj.
6 Yuto xapitzkꞌa nichꞌan winaj unin koxol,
xaꞌaqꞌlax huneꞌ nichꞌan winaj unin jet,
chiꞌaqꞌlax ismunil yok yahawiloj.a
Haꞌ nichꞌan unin chiꞌalaxiko isbꞌiho hakaꞌ tiꞌ:
Komam Aqꞌom kuybꞌanile chikꞌay kokꞌul jilni,
Komam Dios kaw aykano yip,
Komam Mame yinh sunilbꞌal ej tiempo,
Komam Jahawil yet aqꞌankꞌulal.
7 Hayet chiꞌok Jahawilal yebꞌ aqꞌankꞌulal chiyaqꞌa,
mach istanhbꞌal.
Chiꞌok reyalo selelo yaꞌ rey David,
haꞌ ismunil yinh yahawilal tuꞌ kaw chiyiqꞌkanokanh yip sikꞌlebꞌil,
chiswatxꞌen iskꞌulal yebꞌ istoholal tinanh yebꞌ yinh sunilbꞌal ej tiempo.
Haꞌ huneꞌ tiꞌ chiyij isbꞌa yuto ochebꞌilonh yu Komam Yahawil kaw aykano yip.b
Ishowal Komam Jahawil chitit yibꞌanh Israel
8 Yalilto Komam Jahawil tzotiꞌ kaw how yibꞌanh yuninal yaꞌ Jacob,
haꞌ tzotiꞌ yal Komam tuꞌ aykꞌay yibꞌanh ebꞌnaj Israel.
9 Haꞌ huneꞌ tuꞌ chiyohtanhelo sunil konhobꞌ;
konhobꞌ Efraín yebꞌ anma ay bꞌey Samaria;
haꞌ hunteqꞌan anma tuꞌ kaw loloꞌ istzoteli,
nime anma chute isbꞌa yet chalni hakaꞌ tiꞌ:
10 «Ta chiꞌay wuyna jatut ayko txꞌotxꞌ ladrillo yinh tiꞌ,
haxa chꞌen chꞌen paqꞌbꞌil chijako seleloj,
taka chiqꞌato teꞌ patzabꞌ higo ayko ispatzabꞌilo jatut,
haxa teꞌ cedro chijako seleloj,» xhi.
11 Yajaꞌ haꞌ Komam Jahawil chiꞌaniti hunteqꞌan ebꞌnaj
chichiwa iskꞌul yinh naj rey Rezín yaqꞌaꞌko howal yinh Israel,
chiskutxbꞌaniko Komam hunteqꞌanxa ebꞌnaj winaj yet howal yinh.
12 Haꞌ bꞌay chiꞌahilo tzꞌayik chitit ebꞌnaj sirio,
haxa bꞌay chito tzꞌayik chitit ebꞌnaj filisteo,
kat istanhilo ebꞌnaj Israel yu ebꞌnaj,
hakaꞌto chisbꞌiqꞌayto ebꞌnaj, yajaꞌ machnhetaj tuꞌ,
yuto maxhto chiꞌekꞌayo ishowal Komam,
wal xin kaw lemantoti ishowal,
yuto leyanto isqꞌabꞌ yanayo isyaꞌtajil yibꞌanh ebꞌnaj.
13 Yajaꞌ mach meltzo konhobꞌ tuꞌ yul isqꞌabꞌ Komam.
Waxanhka alaxayo isyaꞌtajil yibꞌanh ebꞌnaj yu Komam,
maxhtikꞌa issayilo ebꞌnaj Komam Yahawil yinh sunil.
14 Chiyilo Komam Jahawil ebꞌnaj winaj iswiꞌehal yehi
yebꞌ ebꞌnaj islahobꞌal yekano xol ebꞌnaj Israel,
hakaꞌ yilaxilo iswiꞌ yebꞌ isnhe hunu no noqꞌ,
yebꞌ hakaꞌ chu isqꞌajlaxikꞌo teꞌ palma kat istzokꞌlaxpaxkanh teꞌ ah,
hak tuꞌ chiꞌutelax ebꞌnaj yinhnhe huneꞌ tzꞌayik yu Komam.
15 Haꞌ ebꞌnaj ichamta winaj,
yebꞌ ebꞌnaj kaw ay yelapno yul sat anma,
haꞌ ebꞌnaj tuꞌ iswiꞌehal;
haxa ebꞌnaj chisbꞌaliko isbꞌa ischejabꞌo Komam
chiqꞌaytzen anma yinh leqꞌtiꞌal, haꞌ ebꞌnaj tuꞌ isnhe yekanoj.
16 Yuto haꞌ ebꞌnaj isgobernadoral konhobꞌ tiꞌ,
leqꞌtiꞌ ebꞌnaj,
haxa konhobꞌ xin lanhan iskꞌayto yu ebꞌnaj.
17 Yuxin mach chitzala Komam Jahawil yinh ebꞌnaj tzehtaj,
yebꞌ yinh nixhte unin machi ismam machi ismiꞌ;
mach chitzalapaxo iskꞌul yinh ebꞌix hunix,
yuto haꞌ sunil anma tuꞌ leqꞌtiꞌ yebꞌ kaw txꞌojkanoj,
hanhkꞌanhe tzotiꞌ matzet chaqꞌa haꞌ chiꞌelti yul istiꞌ sunil;
machnhetaj tuꞌ yuto maxhto chiꞌekꞌayo ishowal Komam,
wal xin kaw lemanti ishowal, lehanpaxto isqꞌabꞌ yanayo isyaꞌtajil.
18 Yuto haꞌ istxꞌojal konhobꞌ xayiqꞌkanh yip
hakaꞌ yiqꞌnikanh yip hunu bꞌolobꞌ chinhusnito teꞌ telaj yebꞌ teꞌ txꞌix,
kat isnhusnito nime qꞌebꞌtaj, chishoyni isbꞌa istxꞌojal ebꞌnaj tuꞌ
hakaꞌ yekꞌ petpon kajtuxkum xol nhubꞌ.
19 Yu ishowal Komam Yahawil kaw aykano yip,
yuxin qꞌejholilo sat txꞌo txꞌotxꞌ.
Chinhuslaxto konhobꞌ xol qꞌa qꞌaꞌ, hakaꞌ isnhuslaxto teꞌ telaj,
matxa chitzꞌay iskꞌul ebꞌnaj winaj yinh yuxhtaj.
20 Hunun mak chiꞌelqꞌawi yinh yet anmahil,
yajaꞌ maxhtikꞌa chiyiqꞌ iskꞌul; chiwaꞌi, yajaꞌ maxhtikꞌa chinoh iskꞌul,
haꞌ hunun mak tuꞌ xin chiskꞌuxayto yet anmahil.
21 Haꞌ Manasés chiyaqꞌ howal yinh Efraín,
haxa Efraín chiyaqꞌ howal yinh Manasés,
haxa kabꞌebꞌ konhobꞌ tuꞌ chiyaqꞌ howal yinh konhobꞌ Judá.
Yajaꞌ maxhnhetaj yu tuꞌ xaꞌekꞌayo ishowal Komam,
wal xin kaw lemanti ishowal, leyanto isqꞌabꞌ Komam yanayo isyaꞌtajil.