Haꞌojabꞌ tet Komam Jahawil chonhxiwi
8
Yalni Komam Jahawil wetan:—Iti hunu teꞌ niman aqꞌinteꞌ, kat hawaniko nime tzꞌibꞌ habꞌan yinh teꞌ, chatzꞌibꞌnheniko tzotiꞌ Maher-salal-hasbaz,a xhi Komam.
2 Wanikojan kawanh ebꞌyaꞌ winaj kaw yijen chaqꞌ isbꞌa yinh huneꞌ tiꞌ, haꞌ ton yaꞌ sacerdote Urías yebꞌ yaꞌ Zacarías, iskꞌahol yaꞌ Jeberequías. 3 Lahwi tuꞌ inwayan yebꞌ wixalan ix ischejabꞌ Komam Dios, ispitzkꞌati nichꞌan unin yinh ix, haxa yapni istzꞌayikal xin ispitzkꞌa nichꞌan yunin ix winaj. Yalni Komam wetan: «Haꞌ nichꞌan hakꞌahol tiꞌ Maher-salal-hasbaz chawako isbꞌihoj. 4 Hayet yalanhto maxhto chiyal nichꞌan unin tiꞌ mam yebꞌ miyay, kat yilaxilo isqꞌalomal Damasco, kat yelqꞌalaxpaxto isqꞌalomal Samaria, kat yilaxto tet naj rey Asiria,» xhi Komam wetan.
5 Istzotelpaxo Komam wetan hunelxa:
6 «Yuto yintanhekanilto konhobꞌ tiꞌ haꞌ niman Siloé,b haꞌ kaw nanhkꞌulal chibꞌelwi,
yaqꞌni tzalaho iskꞌul anma yinh naj rey Rezín yebꞌ yaꞌ iskꞌahol naj Remalías.
7 Yuxin chiwatijan ha haꞌ yibꞌanh ebꞌnaj yinh kaw niman, yebꞌ xin ha haꞌ kaw aykano yip.
Chichꞌibꞌkanh haꞌ, kat ismalilo haꞌ yul isbꞌeh.
Haꞌ haꞌ tuꞌ, haton naj rey Asiria, yet chihul naj yinh sunil yip yinh konhobꞌ.
8 Chiꞌapni haꞌ yinh Judá kat isnohkanh haꞌ,
masanto chiꞌahapno yinh isnuqꞌ anma,
kat isbꞌelwito haꞌ hakaꞌto chislebꞌato xikꞌ haꞌ yibꞌanh konhobꞌ,
chismajnayo haꞌ sunil sat hatxꞌotxꞌ, hach Emanuel.
9 Kutxbꞌaweko hebꞌa hex nimeta konhobꞌ,
kat heyok yinh howal, yajaꞌ xin chextanhiloj.
Abꞌewe hunteqꞌan tzotiꞌ tiꞌ hex konhobꞌla kaw nahat ay hex,
waxanhka iqꞌbꞌil hemunlabꞌal yet howal
waxanhka kaw kꞌul cheyuteko iskꞌalil heyiktaj,
wal xin masan chextanholoj.
10 Haꞌ tzet chenah hewatxꞌen chiꞌuchkꞌalaxtoj,
haꞌ tzet cheyala mach chiyij isbꞌa,
yuto ayko Komam Dios jetbꞌihojanh,» xhi Komam wetan.
11 Haꞌ Komam Jahawil yinh kaw ip ok tzabꞌno winhan, yalni wetan tato mach chu wok tzujnojan yinta isbꞌeybꞌal anma yul konhobꞌ tiꞌ, yalni Komam hakaꞌ tiꞌ: 12 «Mach chalahtinhe habꞌa hawalni yebꞌ ebꞌnaj hawet konhobꞌ tiꞌ, ta chikolwa Asiria, yebꞌpaxo xin mach chaxhxiwpaxo tet hunteqꞌan bꞌay chixiw ebꞌnaj. 13 Wal xin Hanin, Yahawil yinh sunil, nimanojabꞌ yelapno inbꞌihan yul hasat, nanonanh wetan yebꞌ xiwanh wetan. 14 Haxa haninan chinokan nhahil bꞌay chisje hakolni habꞌa; yajaꞌ wal yinh anma Israel yebꞌ yinh anma Judá, haninan chinokan chꞌenal bꞌay chitxaqꞌmohi, hak tuꞌ chiwukojan xol kat yaykꞌayi, yebꞌ hakaꞌ txꞌanh lasu yet latzꞌabꞌ chiwukojan xol anma ay bꞌey Jerusalén. 15 Haꞌ xol anma tuꞌ txꞌiꞌal mak chitxaqꞌmohi kat yaykꞌayi kat istanhkaniloj, txꞌiꞌal mak chilekta yu txꞌanh, kat ismajikano yul txꞌanh.
16 Hex inkuywomtiꞌan,
haꞌ hunteqꞌan chejbꞌanile tiꞌ kꞌulojabꞌ chu hekꞌubꞌankanoj,
hak tuꞌ xin machi to nahul heyu.
17 Wal hinan xin chiwechmahan yinh Komam Jahawil,
waxanhka konhisbꞌejkano Komam, hanhonh titnajonh yinh yaꞌ Jacob,
yajaꞌ yinhnhe Komam chikawxi inkꞌulan.
18 Hanintiꞌan yebꞌ ej inkꞌaholan konhyakojanh Komam Dios yecheloj yebꞌ
kꞌaybꞌalkꞌulehal jukojanh xol anma Israel yu Komam Jahawil kaw aykano yip,
Komam ay bꞌey wonhan Sión.c
19 Tato chiyal anma teyet hakaꞌ tiꞌ:
“Qꞌambꞌewe hebꞌa tet ebꞌnaj chisqꞌumle isbꞌa tet ispixan kamom, yebꞌ tet ebꞌnaj ahbꞌelom chisahsoni,” ta xhi.
Chepajtze tet:
“¿Tom mach chisqꞌambꞌe konhobꞌ tet isDios xin?
¿Tom chu isqꞌambꞌen isbꞌa anma itzitz tet kamom?” kexchi.
20 ¡Ilwej tzet xhi ley yebꞌ chejbꞌanile yet Komam Dios:
ta mach lahano yebꞌ tzet chal hunteqꞌan anma tiꞌ,
mach ayoko xol issajilqꞌinal, chal tuꞌ!
21 Haꞌ anma tiꞌ chiyil isyaꞌtajil sat txꞌo txꞌotxꞌ,
kat yaqꞌlen wahil, chitij ishowal, kat istzꞌaktiꞌnhen ebꞌnaj isrey yebꞌ isDiosal yu wahil,
chiyinikanh sat ebꞌnaj yu ishowal,
22 haxa yet chilni ebꞌnaj txꞌo txꞌotxꞌ, hanhe isyaꞌtajil, bꞌiskꞌulal, qꞌejholo,
yebꞌ isyaꞌil chꞌilcha yu ebꞌnaj, kat iskankano majno ebꞌnaj xol qꞌejholo,» xhi Komam.