Chejbꞌanile yaqꞌ yaꞌ Isaías tet yaꞌ Acaz
7
Haꞌ yinh istzꞌayikal yaꞌ Acaz isreyal Judá, yaꞌ Acaz iskꞌahol yaꞌ Jotam, yaꞌ Jotam iskꞌahol yaꞌ Uzías, yaniko naj Rezín, isreyal Siria yebꞌ yaꞌ Peka iskꞌahol naj Remalías isreyal Israel howal yinh Jerusalén, yu isqꞌoji ebꞌnaj yinh, yajaꞌ machi qꞌoji ebꞌnaj.2 Haꞌ huneꞌ tiꞌ apni isqꞌumal tet yuninal yaꞌ David, yal-lax hakaꞌ tiꞌ:
—Haꞌ ebꞌnaj Siria yebꞌ ebꞌnaj Efraín iskutxbꞌako isbꞌa ebꞌnaj yu yaniko howal teyinh, xhi.
Hayet yabꞌen yaꞌ rey Acaz yebꞌ konhobꞌ huneꞌ tuꞌ, isluylunkanh yu xiwkilal hakaꞌ isbꞌili teꞌ qꞌebꞌtaj ay iswiꞌla witz yu nime jaqꞌeqꞌ.a 3 Yuxin yal Komam Jahawil tet yaꞌ Isaías:
—Asiꞌ tinanh, chachabꞌayo habꞌa yebꞌ yaꞌ rey Acaz, chawinito hakꞌahol Sear-jasub tawintaj. Chachah habꞌa yebꞌ yaꞌ Acaz tuꞌ bꞌay chitxꞌahlax qꞌap qꞌap. 4 Chawalni tet yaꞌ hakaꞌ tiꞌ: “Chawil habꞌa, okanh yinh aqꞌankꞌulal, mach chaxhxiwi, mach chikabꞌkonkanh hawanma yu naj Rezín yebꞌ yu ebꞌnaj ah Siria, yebꞌpaxo yu yaꞌ iskꞌahol naj Remalías. Haꞌ ebꞌnaj tuꞌ kaw lemanti ishowal ebꞌnaj tawinh, yajaꞌ lahan ebꞌnaj hakaꞌ kabꞌebꞌ teꞌ tilen nhubꞌxanhe chiꞌel yinh. 5 Haꞌ ebꞌnaj sirio yebꞌ konhobꞌ Efraín yebꞌ yaꞌ iskꞌahol naj Remalías tuꞌ islahtiꞌnhe ebꞌnaj istxꞌojal yu yaniko howal tawinh chalni ebꞌnaj hakaꞌ tiꞌ: 6 ‘Tonh jaqꞌaꞌko howal yinh Judá kat jaqꞌni xiwoj, kat kopohnikanh Judá tuꞌ jinh, kat janiko iskꞌahol naj Tabeel isreyaloj,’ xhi ebꞌnaj,” xhi Komam. 7 Yajaꞌ haꞌ Komam Jahawil chihalni hakaꞌ tiꞌ:
“Machi bꞌaqꞌinh chiyuhi,
mach chij isbꞌa tzet chꞌekꞌ yinh isnabꞌal ebꞌnaj tuꞌ.
8 Yuto haꞌ huneꞌ ayko yipo iskꞌul Siria,
haꞌ ton konhobꞌ Damasco, haxapaxo huneꞌ ayko yipo iskꞌul Damasco,
haꞌ ton naj rey Rezín.
Walpaxo konhobꞌ Efraín haꞌ yinh 65 (howebꞌ iskanhwinaj) habꞌil tinanh chitanhiloj,
matxa konhobꞌo chꞌelkanikoj.b
9 Haꞌ huneꞌ ayko yipo iskꞌul konhobꞌ Efraín,
haꞌ ton Samaria,
haxa huneꞌ aypaxiko yipo iskꞌul Samaria,
haꞌ ton yaꞌ iskꞌahol naj Remalías.
Tato mach cheyayto yul heyanma winhan chextanhpaxiloj, kachi,” xhi Komam.
10 Ischejnipaxo Komam Jahawil yaꞌ Isaías yalno tet yaꞌ rey Acaz hakaꞌ tiꞌ:
11 —Qꞌan tet Komam Jahawil haDiosal hunu yechel chiyeni yinh tzet chu iskolwa tawinh, ta hunu kaw nahat yehayto yul iskꞌul txꞌo txꞌotxꞌ, maka nahat yekanto yibꞌanh satkanh, xhi yaꞌ Isaías.
12 Istaqꞌwi yaꞌ rey Acaz:
—Mach chinqꞌanan, mach chiwilwepaxojan Komam Jahawil, xhi yaꞌ.
13 Yalni yaꞌ Isaías tet yaꞌ:
—Abꞌewe tinanh, hex yuninal yaꞌ David tiꞌ:
¿Tom hanikꞌnhe yul hesat heyaqꞌni tibꞌayo anma,
cheyochenpaxo heyaqꞌni tibꞌayo inDiosalan?
14 Wal xin haꞌ kaw Komam Dios Jahawil chꞌaqꞌni huneꞌ yechel teyet:
Ay huneꞌ ix qꞌopo maxhto hunu winaj chiyiqꞌle,
yajaꞌ yinh ix chipitzkꞌati huneꞌ nichꞌan unin,
haꞌ nichꞌan winaj unin chipitzkꞌa tuꞌ Emanuel chiyij isbꞌi.c
15 Hayet nichꞌanto naj, chislo naj noꞌ queso yebꞌ noꞌ kabꞌ
masanto yet chiyohtanhelo naj bꞌaytet kꞌul yebꞌ bꞌaytet txꞌoj.
16 Hayet maxhto chiyohtanhelo naj bꞌaytet kꞌul yebꞌ bꞌaytet txꞌoj,
haꞌ istxꞌotxꞌ ebꞌnaj kawanh rey bꞌay chachxiw tiꞌ chikankano tinhna ischukil.
17 Chiyati Komam Jahawil tawibꞌanh yebꞌ yibꞌanh hakonhobꞌ,
yebꞌ yibꞌanh yuninal yaꞌ David huneꞌ tzꞌayikal bꞌay chihul isyaꞌtajil,
maxhto bꞌay chiyuhi yettax yinilo isbꞌa Efraín yinh Judá.
Chal yelapnoj haꞌ ton isyaꞌtajil chihul yu naj rey Asiria.
18 Haꞌ yinh huneꞌ tzꞌayik tuꞌ chixuqꞌabꞌli Komam Jahawil tet noꞌ us
bꞌay kaw nahat islahobꞌal istiꞌla ha haꞌ bꞌey txꞌotxꞌ Egipto,
yebꞌ tet isnoqꞌal noꞌ ajan ay bꞌey txꞌotxꞌ Asiria.
19 Kat yuli kat ye satla akꞌal bꞌay machi anma, yebꞌ yulaj chꞌen nhachꞌen,
yebꞌ xolaj teꞌ txꞌix yebꞌ yinhla ishobꞌanil te teꞌ.
20 Haꞌ yinh huneꞌ tzꞌayik tuꞌ chiskꞌupilo Komam xil hewiꞌ yu chꞌen navaja kꞌamnhebꞌil,
kat yilaxilo xil hewiꞌ, yebꞌ xil heyoj, yebꞌ xil hekelem,
haꞌ ton isyaꞌtajil chihul teyinh yu ebꞌnaj ay isqꞌaxebꞌikꞌto ha haꞌ,
haꞌ huneꞌ tiꞌ chitit yu naj rey Asiria.
21 Haꞌ yinh hunteqꞌan tzꞌayik tuꞌ haꞌ mak ay hunu ismiꞌ iswakax yebꞌ kakꞌonho ismeꞌ,
22 kaw niman queso chislo, yuto kaw niman noꞌ lech chiyaqꞌ noꞌ,
yinh kaw yeli haꞌ mak chikolchakano xol howal sat txꞌo txꞌotxꞌ tiꞌ chislo noꞌ queso yebꞌ noꞌ kabꞌ.
23 Haꞌ yinh huneꞌ tiempohal tuꞌ,
haꞌ tzꞌunubꞌ bꞌaytikꞌa ay mil yoj teꞌ uva,
yebꞌ mil siclo plata istohol, haxanhe teꞌ txꞌix yebꞌ komon telaj chichꞌibꞌo sat.
24 Haxanhe ebꞌnaj ustem noqꞌ chiꞌapni bꞌey tuꞌ yebꞌ islitꞌ,
yuto haꞌ sunil sat txꞌotxꞌ haxanhe teꞌ txꞌix yebꞌ komon telaj chichꞌibꞌkanh.
25 Haꞌ bꞌay tzalanlaj bꞌay chiꞌalaxiko chꞌen asarón,
matxa mak chimunla yu chixiw tet teꞌ txꞌix, yebꞌ tet teꞌ komon telaj,
haxanhe noꞌ wakax yebꞌ ej no noqꞌ chiꞌekꞌ lowoj.