Tzetaj yaqꞌ Komam Dios yilaꞌ yaꞌ Isaías yebꞌ yet yawtelax yaꞌ
6
Haꞌ yinh habꞌil yet iskam yaꞌ rey Uzías wilnihan Komam Dios Jahawil; tzꞌonhanayo yul istzꞌonhobꞌal kaw nahat yekanh yebꞌ kaw aykano ismay, isnohilo yul yatut yu ishojanil istel xil isqꞌap.a 2 Haxa yibꞌanh Komam xin aykanh kawanh ebꞌnaj serafín, wajebꞌ isxikꞌ hunun, kabꞌebꞌ isxikꞌ ebꞌnaj chimajchen sat, haxa kabꞌebꞌxa isxikꞌ ebꞌnaj xin ayko yenhelo yoj, haxa kabꞌebꞌxa xin haꞌ chiꞌokniko yu ebꞌnaj yet chiꞌekꞌi.b 3 Chalni ebꞌnaj tet hunun hakaꞌ tiꞌ:«¡Machi istxꞌojal yinh Komam, machi istxꞌojal yinh,
machi istxꞌojal Komam Yahawil kaw aykano yip.
Nohnalo sat txꞌo txꞌotxꞌ yu isqꞌaqꞌal yip Komam!» xhi ebꞌnaj.
4 Isbꞌilikanh ispultahil Yatut Komam yu yip yul isnuqꞌ mak tzotel tuꞌ, isnohilo yul Yatut Komam yu nhubꞌ.
5 Yuxin walan hakaꞌ tiꞌ: «¡Kꞌanchꞌan hinan!
¡Chinkamojan yuto mawilan Komam Rey,
Komam Yahawil kaw aykano yip!
Hanintiꞌan anma hinan,
haꞌ tzotiꞌ chiꞌelti yul intiꞌan mach kꞌuloj,
ayinayojan xol anma mach kꞌulo tzet chiꞌelti yul istiꞌ,» kinchihan.
6 Yapni huneꞌ naj serafín inkꞌatanhan, iqꞌbꞌil huneꞌ tzaqꞌaqꞌ yu naj yu chꞌen tenaza,
haꞌ tzaqꞌaqꞌ tuꞌ yikanh naj yibꞌanh ismexhahil yet xahanbꞌal.
7 Yaniko naj tzaqꞌaqꞌ tuꞌ yinh intiꞌan,
yalni naj wetan:
—Haꞌ huneꞌ tzaqꞌaqꞌ tiꞌ maꞌok yinh hatiꞌ,
yuxin maꞌel hamul tinanh, makaxhsajbꞌikano yinh hamul, xhi naj wetan.
8 Lahwi tuꞌ wabꞌenan yul isnuqꞌ Komam Jahawil, yalni hakaꞌ tiꞌ:
—¿Mak chinchejtojan? yebꞌ xin ¿mak chiꞌok kochejabꞌoj? xhi Komam.
Intaqꞌwihan:
—Ayinan Mamin, chejintojan, kinchihan.
9 Yalni Komam wetan:
—Asiꞌ kat hawalni tet konhobꞌ tiꞌ:
“Hex tiꞌ waxanhka kaw cheyabꞌe, yajaꞌ mach chetxumu;
yinh kaw yeli cheyila, yajaꞌ machi nachalo heyu tzet cheyil tuꞌ,” kachi tet ebꞌnaj.
10 Etato isnabꞌal huneꞌ konhobꞌ tiꞌ,
kat hamajchen istxikin, chawaniko yenhel sat,
haxinwal mach chil yu isbꞌaqꞌ sat yebꞌ xin mach chiyabꞌe yu istxikin,
mach chistxum isbꞌa yanma, mach chisbꞌejpaxkano istxꞌojal,
hak tuꞌ xin matxa chiꞌanhchahi, xhi Komam wetan.c
11 Inqꞌambꞌenan tet Komam:
—¿Hayebꞌ tzꞌayik chiwalikꞌojan huneꞌ tiꞌ, Mamin? kinchihan.
Istaqꞌwi Komam wetan:
—Chawalikꞌoj masanto yet chiꞌuchkꞌalaxayo ej konhobꞌ,
yet matxa anma ay yulajla konhobꞌ tuꞌ,
yebꞌ yet matxa ebꞌnaj winaj ay yulajla yatut,
yebꞌ yet chikan tzꞌinhno txꞌo txꞌotxꞌ.
12 Masanto yet hanin Yahawilintiꞌan
chiwaqꞌ sajlemotojan ebꞌnaj winaj yulaj konhobꞌ kaw nahat,
yebꞌ kaw txꞌiꞌal konhobꞌ chikan tzꞌinhno sat txꞌo txꞌotxꞌ tiꞌ.
13 Ta xin ayto anma chikankanoj,
ta chitokan 10 (islahonhebꞌ) majan xol konhobꞌ chitanhtzelaxopaxiloj,
yaj txumkꞌanabꞌilo hakaꞌ teꞌ hih maka teꞌ encina,
hayet chiqꞌajlaxayo teꞌ chiwolni xeꞌ teꞌ tuꞌ hunelxa,
hak tuꞌ chiyu haywanhoxa mak chinsikꞌilojan yet chitanhilo inkonhobꞌan, xhi Komam.