Yechel teꞌ tzꞌunubꞌ uva
5
Wal tinanh chinbꞌitnhehan bꞌit chitzotel yinh istzꞌunubꞌ uva huneꞌ mak kaw ochebꞌil wuhan.Istzꞌunubꞌ huneꞌ mak tuꞌ, haꞌ ton teꞌ uva ayayo sat huneꞌ txꞌotxꞌ qꞌeyan kaw kꞌul.
2 Yinh bꞌabꞌelal,
ispeyo naj istxꞌotxꞌ tuꞌ,
iskutxbꞌankanh naj sunil chꞌen chꞌen,
istzꞌunni naj teꞌ uva kaw kꞌul sat istxꞌotxꞌ tuꞌ.
Iswatxꞌenkanh naj huneꞌ nha kaw nahat yukanh bꞌay chiꞌok naj chitanhen tzꞌunubꞌ tuꞌ,
iswatxꞌenpaxo naj bꞌay chixanhlaxilti yal teꞌ.
Kaw xin echmabꞌil yu naj yaqꞌni teꞌ uva sat,
yajaꞌ tolal xin haꞌ sat teꞌ xoltelajil uva yaqꞌ teꞌ.
3 Yuxin yal naj yahaw uva tuꞌ hakaꞌ tiꞌ:
«Wal tinanh hex ah Jerusalén yebꞌ hex winaj ah Judá,
ilwej mak ay ismul yinh huneꞌ tiꞌ,
¿tom haninan, mato teꞌ uva tiꞌ?
4 ¿Aytom hunuxa tzet wal wutenan yu iswatxꞌilo intzꞌunubꞌtiꞌan?
Wal xin echmabꞌil sat teꞌ kꞌul wuhan, ¿tzet yinh xin haꞌ sat teꞌ xoltelajil uva mayaqꞌ teꞌ?
5 Wal tinanh xin chiwalan teyet tzet chiwutehan intzꞌunubꞌtiꞌan,
chiwuchkꞌalojan ispeyabꞌil yu istanhilo teꞌ,
chinwuyilojan iskꞌubꞌal yu isxanhobꞌtanhelax teꞌ.
6 Chikankano intzꞌunubꞌan ischukil, matxa chiꞌel istajinal xol teꞌ, matxa chiꞌel yaqꞌinal teꞌ,
kat ischꞌibꞌkanh te txꞌix yebꞌ teꞌ howla telaj xol teꞌ.
Matxa chinchejan moyan yaqꞌayo nhabꞌ yibꞌanh intzꞌunubꞌan,»
xhi naj yahaw tzꞌunubꞌ tuꞌ.
7 Yinh kaw yeli haꞌ istzꞌunubꞌ uva Komam Yahawil yinh sunil,
haꞌ ton anma Israel, haxa anma Judá xin,
istzꞌunubꞌ Komam kaw saqꞌal jilni yehi.
Haꞌ iskꞌulal yechma Komam yinh,
yajaꞌ haꞌ istxꞌojal iswatxꞌe; yoche Komam istoholal,
yajaꞌ el yaw anma yu isyaꞌtajil chiswatxꞌele yinh hunun.a
Isyaꞌtajil chitit yibꞌanh anma txꞌoj isbꞌeybꞌal
8 ¡Kꞌanchꞌan ebꞌnaj chiyiqꞌ txꞌiꞌal nha yebꞌ ebꞌnaj chiyiqꞌ txꞌiꞌal txꞌotxꞌ,
masanta chismajayo sunil! ¿Tom xin hechukilchꞌan ay hex sat txꞌo txꞌotxꞌ tiꞌ?
9 Xawabꞌehan isqꞌumal yu Komam Jahawil kaw aykano yip.
Chalni Komam ta chikankano tzꞌinhno txꞌiꞌal yatut ebꞌnaj.
Haꞌ sunil nime nha yebꞌ nha kꞌulchꞌan jilni machi anma chikan yul.
10 Haꞌ 50 (lahonhebꞌ yoxkꞌal) txꞌanhil teꞌ uva, howebꞌnhe litro vino chiyaqꞌa;
haxa 10 (lahonhebꞌ) saco ixim hinhat trigo, huneꞌnhe saco ixim chiyaqꞌa.
11 ¡Kꞌanchꞌan ebꞌnaj kaw sahabꞌ chiꞌahi yu isto ukꞌu teꞌ hunelxa,
chiꞌah aqꞌbꞌal yexnheto yekꞌ ukꞌuj,
masanto chiqꞌaxnakanh isnimanil yu teꞌ ukꞌe tuꞌ!
12 Hayet chiyekꞌtzen ebꞌnaj nime qꞌinh chiꞌok teꞌ arpa,
chiꞌok vihuela, teꞌ tinabꞌ, yebꞌ teꞌ suꞌ, chiyukꞌnipaxo ebꞌnaj vino,
mach xin chꞌekꞌ isnabꞌal ebꞌnaj yinh tzettaj chiswatxꞌe Komam Jahawil
yebꞌ yinh tzetaj chisye Komam yu isqꞌabꞌ.
13 Yuxin chꞌilaxto inkonhobꞌan preso yu nan konhobꞌal yuto machi isnabꞌal;
chitanhilo ebꞌnaj ay yelapno yu wahil,
chikamilo hunteqꞌan anma yu tajintiꞌal.
14 Yuxin hakaꞌto chischꞌibꞌnheto yul iskꞌul kambꞌal chiskꞌabꞌnikanh istiꞌ,
kat isbꞌiqꞌnayto ebꞌnaj winaj kaw ay yelapnoj,
kat isbꞌiqꞌlaxpaxayto anma yu, kat istanhilo isloloꞌal anma bꞌay chaqꞌ tzalaho iskꞌul.
15 Kat yel ispixan ebꞌnaj winaj
kat yalaxayo isyaꞌtajil yibꞌanh ebꞌnaj kat yilaxayo ebꞌnaj kaw chiyikanh isbꞌa.
16 Yajaꞌ wal Komam Jahawil kaw aykano yip,
chiꞌilaxokanh yinh iskꞌulal, kat yal-laxi tato kaw kꞌulkano Komam Dios,
Komam machi istxꞌojal yu istoholal chiswatxꞌe.
17 Chitanhelax noꞌ meꞌ bꞌaytikꞌa chitanhelaxi,
haxa istzꞌunubꞌ ebꞌnaj qꞌalom toxanhe aykano ischukil,
haxa anma nan konhobꞌal chilonitoj.
18 ¡Kꞌanchꞌan ebꞌnaj chisnhikꞌti istxꞌojal yu leqꞌtiꞌal,
chishatxnikꞌo ebꞌnaj ismul hakaꞌ isnhikꞌnikꞌo noꞌ wakax teꞌ carruaje.
19 Chalni ebꞌnaj: «Tijabꞌ yinh anhe tzetaj chiswatxꞌe Komam Dios, kat jilni;
tijabꞌ iskuybꞌanil Komam machi istxꞌojal yinh, isDiosal Israel,
kokawilal yu johtanheniloj!» xhi.
20 ¡Kꞌanchꞌan ebꞌnaj chalni tato istxꞌojal haꞌ kaw kꞌul,
haxa iskꞌulal xin chalpaxo ebꞌnaj txꞌojal; chanipaxiko sajilqꞌinal qꞌejholohal,
haxa qꞌejholo xin chalpaxo ebꞌnaj sajqꞌinalil,
chalnipaxo ebꞌnaj hunteqꞌan kaw kꞌah, chiꞌal,
haxa chiꞌ chalpaxo ebꞌnaj kꞌahil!
21 ¡Kꞌanchꞌan ebꞌnaj ay ishelanil yul yet,
yebꞌ ebꞌnaj kaw ay isnabꞌal yul yet!
22 ¡Kꞌanchꞌan ebꞌnaj chal isbꞌa winajil yu niman vino chukꞌu,
yebꞌ xin ebꞌnaj kaw ipom chissom tzet chukꞌu,
23 ebꞌnaj chichahni melyu yu chala tato ebꞌnaj mulum mach ismul,
chiꞌetlipaxo ebꞌnaj yinh anma mach ismul!
24 Yuxin hakaꞌ isnhusnito xaj qꞌa qꞌaꞌ teꞌ sah yebꞌ teꞌ chꞌim,
hak tuꞌ chu istanhkanilo ebꞌnaj, hakaꞌ chu istzꞌato xeꞌ teꞌ telaj,
kat ismeltzoko isxumakil teꞌ pojojal, hak tuꞌ chitanhkano ebꞌnaj,
yu isyah ebꞌnaj chejbꞌanile yal Komam Jahawil kaw aykano yip,
isyahnipaxo ebꞌnaj istzotiꞌ Komam mach istxꞌojal yinh, Komam isDiosal Israel.b
25 Yu huneꞌ tuꞌ yuxin tit lemna ishowal Komam Jahawil yinh iskonhobꞌ,
yaniti Komam isyaꞌtajil yibꞌanh yu yip isqꞌabꞌ, yaqꞌni kamoj.
Isxiwkanh ej wonhan,
iskankano pakꞌno isnimanil kamom yulajla bꞌeh.
Yajaꞌ xin maxhto chꞌekꞌayo ishowal Komam yinh ebꞌnaj,
wal xin leyantohilto isqꞌabꞌ Komam yanayo isyaꞌtajil yibꞌanh ebꞌnaj.
26 Chanikanh Komam bandera bꞌay ay hunteqꞌan konhobꞌla kaw nahat yetoj,
kat isxuqꞌabꞌli tet anma ay istiꞌla yul sat yibꞌanhqꞌinal tiꞌ.
Haꞌ ebꞌnaj tuꞌ xin chul lemna yinh anhe.
27 Haꞌ xol anma tuꞌ machi mak sikinaj, machi mak chitxaqꞌmohi,
machi mak chiwaykanh, machi mak chitit mutzꞌna iswayanh,
machi hunu mak chipumulo iskꞌalil yiktaj,
machi hunu mak chilijmoto istxꞌanhal isxanhabꞌ.
28 Haꞌ islitꞌ kaw ayahti ye, haxa isteꞌal yet islitꞌ tuꞌ kotxbꞌabꞌil, kaw kꞌul yehi.
Haꞌ yoj ischeh anma tuꞌ kaw kaw hakaꞌ chꞌen chꞌen,
haꞌ isyantahil iscarruaje lahan isbꞌili hakaꞌ isbꞌili kajtuxkum.
29 Haꞌ yul isnuqꞌ, lahan hakaꞌ yul isnuqꞌ noꞌ bꞌalam,
chiꞌel yaw hakaꞌ noꞌ nixhte yunin bꞌalam chinhetxꞌla yeh yet chistzabꞌnayo ischibꞌe,
chiyinito ischibꞌe tuꞌ yinh istꞌinhanil,
machi mak xin chu yinilo tet.
30 Haꞌ yinh istzꞌayikal bꞌay chiꞌel yaw hunteqꞌan konhobꞌ tuꞌ yinh Israel,
hakaꞌ isbꞌili haꞌ mar.
Haꞌ anma chiꞌok tꞌanhno yinh konhobꞌ tiꞌ,
chiyil qꞌejholo yebꞌ isyaꞌtajil ayayo yibꞌanh;
haxa yul satkanh chitanhkanh issajilqꞌinal yu moyan.