Kolchalo konhobꞌ Judá yul isqꞌabꞌ naj rey Senaquerib
19
Hayet yabꞌen yaꞌ Ezequías tzet yal ebꞌnaj tuꞌ, istzilnito yaꞌ xil isqꞌap, yaniko yaꞌ xilqꞌape yet bꞌiskꞌulal yinh, yokto yaꞌ yul Yatut Komam Jahawil. 2 Ischejnito yaꞌ rey tuꞌ naj Eliaquim, naj chitanhen yatut yaꞌ rey. Ischejlaxpaxto naj Sebna, naj istzꞌibꞌlom yaꞌ, yebꞌ ebꞌyaꞌ sacerdote, ayko xin xilqꞌape yet bꞌiskꞌulal yinh ebꞌyaꞌ, isto ebꞌyaꞌ yilno yaꞌ Isaías ischejabꞌ Komam Dios, yaꞌ iskꞌahol yaꞌ Amoz. 3 Yalni ebꞌnaj tet yaꞌ: «Tinanh ayonhiko yinh istzꞌayikal isyaꞌtajil yebꞌ bꞌiskꞌulal yebꞌ chibꞌahlax Komam Dios; lahan jeko hakaꞌ hunu ix ix lanhanxa ispitzkꞌa yunin, matxa xin yip ix, hak tuꞌ je tinanh. 4 Xam yabꞌe Komam Jahawil haDiosal, sunil bꞌahwal yal naj Rabsaces, naj ischejabꞌ naj rey Asiria yinh Komam Dios itzitz, tzettam saqꞌal ta chayo Komam Dios isyaꞌtajil yibꞌanh ebꞌnaj yu tzet yal ebꞌnaj yinh Komam, yuxin txahlanh jinh makonh ayonhtokꞌo yul kokonhobꞌ tiꞌ, xhi yaꞌ Ezequías,» xhi ebꞌnaj.5 Hayet yalni ebꞌnaj ischejabꞌ yaꞌ rey Ezequías tet yaꞌ Isaías sunil tuꞌ. 6 Istaqꞌwi yaꞌ Isaías: «Hak tiꞌ cheyute heyalni tet yaꞌ heyahawil tuꞌ, haꞌ Komam Dios halni hakaꞌ tiꞌ: “Mach chaxhxiw yu tzet hawabꞌe tuꞌ yet kinisbꞌahnihan ebꞌnaj ischejabꞌ naj rey Asiria. 7 Haninan chiwalan tato chiwakojan huneꞌ espíritu yet xiwkilal yinh naj, yuxin hayet chiyabꞌeno naj hunu tzet ye tuꞌ, kat ispaxto naj sat istxꞌotxꞌ, hayet chiꞌapni naj bꞌey iskonhobꞌ, kat inchejnihan potxꞌlaxo naj yu chꞌen espada,” xhi Komam,» xhi yaꞌ Isaías.
8 Haxa yet ismeltzo naj ischejabꞌ naj rey Asiria tuꞌ, yilni naj tato matxa naj isreyal Asiria tuꞌ bꞌey konhobꞌ Laquis, yuxin meltzoto naj, ischahni isbꞌa naj yebꞌ naj rey bꞌey konhobꞌ Libna yet lanhan yaniko naj rey howal yinh konhobꞌ Libna. 9 Haꞌ bꞌey tuꞌ xin yabꞌe naj rey Asiria tato tit naj rey Tirhaca isreyal Etiopía yanoko howal yinh naj, yuxin meltzo naj rey tuꞌ, ischejni naj ischejabꞌ bꞌey halno tet yaꞌ Ezequías: 10 «Hak tiꞌ cheyute heyalni tet yaꞌ Ezequías, isreyal Judá: “Haꞌ haDiosal bꞌay chikawxi hakꞌul tonhe chiyako leqꞌtiꞌal tawet chalni tato mach chako konhobꞌ Jerusalén yul inqꞌabꞌan hanin isreyal Asiria tiꞌ. 11 Hach tiꞌ xahawabꞌe tzet xaꞌutelax ej konhobꞌ yu ebꞌnaj isreyal Asiria, hatokꞌanabꞌ hach chachkolcha yul inqꞌabꞌan. 12 ¿Tom iskolilo isdiosal hunteqꞌan nime konhobꞌ iskonhobꞌ yul isqꞌabꞌ wichmaman, haꞌ ton konhobꞌ Gozán, konhobꞌ Harán, konhobꞌ Resef, yebꞌ ebꞌnaj iskꞌahol naj Edén ay bꞌey Telasar? 13 ¿Tzet tanhkano naj isreyal Hamat, naj isreyal Arfad, yebꞌ naj isreyal Sefarvaim, naj isreyal Hena yebꞌ naj isreyal Iva,” xhi naj isreyal Asiria?» xhi ebꞌnaj chejabꞌ tuꞌ.
14 Ischahnilo yaꞌ rey Ezequías teꞌ carta tet ebꞌnaj ischejabꞌ naj rey Asiria, yilni yaꞌ teꞌ carta tuꞌ. Lahwi tuꞌ isto yaꞌ bꞌey Yatut Komam Jahawil, islebꞌanto yaꞌ teꞌ carta tuꞌ sata Komam Jahawil. 15 Istxahli yaꞌ Ezequías tet Komam Jahawil, yalni yaꞌ yinh istxah: «Mamin, isDiosal Israel, ayachiko xol ebꞌnaj querubín, hachnhechꞌan isDiosal sunil konhobꞌ ay sat txꞌo txꞌotxꞌ. Hach tiꞌ watxꞌenhe satkanh yebꞌ txꞌo txꞌotxꞌ. 16 Mamin, hajbꞌa hatxikin kat hawabꞌeni, haj isbꞌaqꞌ hasat kat hawilni. Abꞌe yalni naj Senaquerib tzotiꞌ txꞌoj tawinh hach Dios itzitz. 17 Yeli Mamin, haꞌ ebꞌnaj rey Asiria tuꞌ txꞌiꞌal nime konhobꞌ xaꞌistanhtzelo ebꞌnaj yebꞌ ej istxꞌotxꞌ konhobꞌ tuꞌ. 18 Isnhusnito ebꞌnaj istioxhal hunteqꞌan nime konhobꞌ xol qꞌa qꞌaꞌ, yuto mach dioso hunteqꞌan istioxhal tuꞌ, yuto winaj ebꞌnaj watxꞌenhe yu isqꞌabꞌ yinh te teꞌ, yebꞌ yinh chꞌen chꞌen, yuxin tanhtzelaxiloj. 19 Wal tinanh xin Mam Wahawil, kaw chikoqꞌananh tawet, kolonhanh yul isqꞌabꞌ naj rey Asiria tuꞌ yunhe yohtanhenilo sunil konhobꞌ ay sat txꞌo txꞌotxꞌ tiꞌ tato hachnhechꞌan hach tiꞌ Dios hach, Wahawilan,» xhi yaꞌ Ezequías yinh istxah.
20 Lahwi tuꞌ ischejnito yaꞌ Isaías, yaꞌ iskꞌahol yaꞌ Amoz, yalno tet yaꞌ rey Ezequías: «Hak tiꞌ chiyute yalni Komam Jahawil, isDiosal Israel: “Haꞌ tzet haqꞌan wetan yinh naj Senaquerib, isreyal Asiria mawabꞌehan,” xhi Komam.
21 »Hak tiꞌ mayu yalni Komam yinh naj rey Asiria tuꞌ:
“Haꞌ ix qꞌopo ah Sión mach hawelapno yul sat ix,
chitzebꞌi ix ah Jerusalén tawintaj, chisyumni iswiꞌ ix.a
22 ¿Mak hawaqꞌ tako iskꞌul, mak yinh hawal tzotiꞌ txꞌoj?
¿Mak anmahil kaw ip hawako yul hanuqꞌ yinh?
¿Mak xin nahat kaxhtꞌanhxilto yibꞌanh?
Wal xin haꞌ yinh Komam Jahawil, isDiosal Israel, Komam machi istxꞌojal yinh.
23 Hachej ebꞌnaj hachejabꞌ bꞌahwal yinh Komam Jahawil, hawalni:
‘Kinahtojan iswiꞌla witz yebꞌ sunil incarruajehan yet howal,
iswiꞌla witz bꞌay kaw nahat yekanh ay bꞌey Líbano, inqꞌajnayojan teꞌ nime cedro kaw nahat yekanh istel,
yebꞌ teꞌ tzꞌisis kaw saqꞌalkano jilni.
Kinahapnojan iswiꞌla witz kaw nahat yekanokanh bꞌay kaw pim yehayo teꞌ qꞌebꞌtaj.
24 Hanintiꞌan, inholan kꞌuh, wukꞌnihan ha haꞌ ilcha yul kꞌuh tuꞌ sat txꞌotxꞌ nan konhobꞌal.
Haꞌ yibꞌanh ha haꞌ bꞌay wayo ispaqꞌanil wojan ay bꞌey Egipto tajkanh wuhan,’ kachi,” xhi Komam.
25 Yalni Komam hakaꞌ tiꞌ: “Yajaꞌ ¿tom mach hawohtajoj tato hanintiꞌan Dios hinan? Wuhan yuxin chiyu sunil tiꞌ.
Hatax yet payxa halbꞌilkano wuhan tato chu hunteqꞌan tiꞌ,
haꞌ tinanh xin lanhan yijni isbꞌa wuhan.
Yu tuꞌ xin chisje hawaqꞌni ekꞌoyaꞌ yanma anma, kat hatzabꞌnipaxayo konhobꞌ ayko iskꞌubꞌal, kat hawuchkꞌantoj.
26 Haꞌ anma ay yul hunteqꞌan konhobꞌ tuꞌ, mach kaw yip,
xiwkanh, issomchato isnabꞌal, lahan elkaniko hakaꞌ teꞌ komon telaj chitajiloj,
hakaꞌ istajilo teꞌ itah kaw yax, yebꞌ hakaꞌ istajilo nixhte telaj chichꞌibꞌ yibꞌanh txꞌotxꞌ texa iswiꞌla nha
yalanhto maxhto chiꞌok isxumakil,
hak tuꞌ elkaniko hunteqꞌan konhobꞌ tuꞌ.
27 Wohtajan bꞌay ay hach, wohtajan bꞌay chaxhekꞌi,
wohtapaxojan ta ayko hahowal winhan.
28 Wal xin yu ayko hahowal winhan, wabꞌenpaxojan hawinikanh habꞌa,
yuxin chiwakojan huneꞌ chꞌen argolla yinh hatxam,
kat wanikojan freno yinh hatiꞌ, kat kach waqꞌni meltzohojan yul bꞌeh bꞌay kaxhtita,” xhi Komam,» xhi yaꞌ Isaías.
29 Yalnipaxo yaꞌ Isaías tet yaꞌ rey Ezequías:
«Haꞌ hun tiꞌ chiꞌok yechelo yinh tzetaj chiyubꞌ;
haꞌ huneꞌ habꞌil tiꞌ yebꞌ hunabꞌ, chewah ixim trigo tonhe chiyalnhe isbꞌa,
yajaꞌ wal yinh yox habꞌil xin hexxa chetxih hetrigo,
kat hekutxbꞌaniko ixim yet xaqꞌanbꞌilo ixim, chetzꞌunni teꞌ uva, cheloni sat teꞌ.
30 Haꞌ anma Judá kantokano bꞌey txꞌotxꞌ Judá,
lahan chiꞌelkaniko hakaꞌ te teꞌ kaw kꞌul chu istokano isxeꞌ yul txꞌotxꞌ, kat yaqꞌni sat.
31 Ay xin haywanh anma chikolchakano bꞌey Jerusalén, bꞌey wonhan Sión.
Hak tuꞌ chiyute isbꞌa yu iskꞌulchꞌanil iskꞌul Komam Jahawil, Komam kaw aykano yip.
32 Chalnipaxo Komam Jahawil yinh naj rey Asiria hakaꞌ tiꞌ:
“Mach chiꞌok naj yul konhobꞌ tiꞌ, machi litꞌ chisqꞌojpaxti naj yinh,
mach chihulpaxo naj yaqꞌaꞌ howal yinh yebꞌ yescudo,
mach chiswatxꞌepaxo naj bꞌay chiskol isbꞌa yinh ishoyanil konhobꞌ tiꞌ.
33 Haꞌtikꞌa yul bꞌeh bꞌay chitit naj, haꞌ tuꞌ chimeltzopaxo naj,
mach chiꞌokti naj yul konhobꞌ tiꞌ,” xhi Komam Jahawil.
34 Chalpaxoj: “Hanintiꞌan chintanhehan konhobꞌ tiꞌ,
kat inkolnihan yu iskꞌulal inkꞌulan winhan,
yebꞌ yinh yaꞌ David inchejabꞌan,” xhi Komam,» xhi yaꞌ Isaías.
35 Hayet huneꞌ aqꞌbꞌal tuꞌ xin to yángel Komam Jahawil istanhtzelo 185 mil ebꞌnaj soldado Asiria bꞌey iscampamento, haxa yet issajbꞌilo xin yilni ebꞌnaj Asiria tuꞌ ta toxanhe pakꞌponbꞌato isnimanil ebꞌnaj soldado sat txꞌotxꞌ. 36 Hayet yilni naj rey Senaquerib huneꞌ tuꞌ, isto naj, ismeltzoto naj bꞌey Nínive, haꞌ tuꞌ xin kankano naj. 37 Haxa yet huneꞌ tzꞌayik yet ayikto naj yul yatut tioxh Nisroc, isdios naj, yapni naj Adramelec yebꞌ naj Sarezer, kawanh iskꞌahol naj, istejnokamoj naj yu chꞌen espada, yelkanh ebꞌnaj; isto ebꞌnaj sat txꞌotxꞌ Ararat. Yok naj Esar-hadón iskꞌahol naj rey seleloj.