23
Hak tuꞌ yu iskutxbꞌaniko yaꞌ rey Josías sunil ebꞌnaj ichamta winaj sat txꞌotxꞌ Judá yebꞌ ebꞌnaj ay bꞌey Jerusalén. 2 Isto yaꞌ rey yebꞌ sunil ebꞌnaj Judá yebꞌ sunil anma ah Jerusalén, yebꞌ ebꞌyaꞌ sacerdote yebꞌ ebꞌyaꞌ ischejabꞌ Komam Dios yebꞌ sunil konhobꞌ, anma ay yelapnoj, anma mach yelapnoj; isto sunil yul Yatut Komam Jahawil, yawtelax tzet ayayo yul yumal Istzotiꞌ Komam, yabꞌen sunil anma tuꞌ, haꞌ ton huneꞌ hum ilcha yul Yatut Komam. 3 Yahwano yaꞌ rey, yok linhno yaꞌ yinh pilal istaqꞌweniko yaꞌ yibꞌanh sata Komam Jahawil tato chiꞌoktzujno ebꞌnaj yinh tzet chal Komam Jahawil tuꞌ, yebꞌ ta chiskꞌubꞌa ebꞌnaj chejbꞌanile, yebꞌ kuybꞌanile yebꞌ Istzotiꞌ Komam yinh sunil yanma, yebꞌ sunil isnabꞌal, yebꞌ ta chisyije ebꞌnaj tzet tꞌinhbꞌabꞌilkano yu Komam tzꞌibꞌnhebꞌilkano yul hum tuꞌ, istaqꞌwenkano sunil konhobꞌ isyijeni.Ishel yaꞌ Josías bꞌeybꞌale txꞌoj
4 Lahwi tuꞌ yalni yaꞌ rey Josías tet yaꞌ Hilcías, yahawil yinh ebꞌyaꞌ sacerdote, yebꞌ ebꞌyaꞌ yet iskabꞌ sacerdote, yebꞌ ebꞌnaj tanhem pulta, tato chiyilti ebꞌnaj yul Yatut Komam Jahawil sunil munlabꞌal chiꞌokniko yet chiyinayo isbꞌa anma tet tioxh Baal, yebꞌ tet tioxh Asera, yebꞌ tet yechel sunil tzet chitzejtzon satkanh. Isnhuslaxto sunil munlabꞌal tuꞌ yintalto Jerusalén bꞌey akꞌal Cedrón, yilaxto istanhil bꞌey Bet-el. 5 Yinipaxilo yaꞌ rey tuꞌ ebꞌnaj issacerdotehal tioxh ayko ismunil yu ebꞌnaj rey, isreyal Judá, yu isnhusni teꞌ pom iswiꞌla wonhan yulaj konhobꞌ yet Judá, yebꞌ yinhla ishoyanil Jerusalén. Yinipaxilo yaꞌ rey ebꞌnaj sacerdote chinhusni teꞌ pom tet tioxh Baal, tet tzꞌayik, yebꞌ tet ixahaw, yebꞌ tet yechel Zodíaco yebꞌ tet sunil tzet chitzejtzon ay yul satkanh. 6 Ischejni yaꞌ rey Josías yilaxpaxilti tioxh Asera yul Yatut Komam Jahawil, yilaxpaxilto yintalto konhobꞌ Jerusalén, isnhuslaxto bꞌey akꞌal Cedrón, istixhlaxto istanhil tuꞌ yibꞌanh bꞌay mujan kamom anma. 7 Yuchkꞌanpaxto yaꞌ rey Josías bꞌay ay ebꞌix ix txꞌoj ye iswiꞌ chiyiyo isbꞌa tet istioxh ayikto yul Yatut Komam Jahawil, bꞌay chischem ebꞌix qꞌap mantiado yet tioxh Asera.
8 Yalnipaxo yaꞌ rey Josías tato chiꞌilaxti sunil ebꞌnaj sacerdote ay yulajla konhobꞌ sat txꞌotxꞌ Judá. Yok yaꞌ Josías yuchkꞌanoto ismexhahil yet xahanbꞌal aykanh iswiꞌla wonhan bꞌay chisnhus ebꞌnaj sacerdote tuꞌ teꞌ pom; ichiti yaꞌ yuchkꞌanto yet xahanbꞌal bꞌey Geba masanta bꞌey Beerseba. Yuchkꞌanpaxto yaꞌ rey ismexhahil xahanbꞌal aykanh bꞌey ispultahil naj Josué, gobernador yinh konhobꞌ, ayko yinh yetkꞌulal kowatxꞌqꞌabꞌ yet chonhokto yul ispultahil konhobꞌ Jerusalén. 9 Yajaꞌ wal ebꞌnaj sacerdote chiyaqꞌ isxahanbꞌal iswiꞌla wonhan mach chiꞌapni ebꞌnaj bꞌey ismexhahil yet xahanbꞌal yul Yatut Komam Jahawil bꞌey Jerusalén; chiswahni ebꞌnaj ixim pan machi yanhal aykoj yebꞌ yetbꞌi ebꞌnaj, haꞌ ton hunteqꞌanxa sacerdote.
10 Yetanpaxto yaꞌ rey Josías huneꞌ bꞌay chisnhus ebꞌnaj yuninal, huneꞌ chiyij Tofet ay sat akꞌal sat istxꞌotxꞌ naj iskꞌahol naj Hinom, yunhe matxa hunuxa mak chisnhus iskꞌahol, maka iskutzꞌin xahanbꞌalil tet tioxh Moloc bꞌey tuꞌ. 11 Yinipaxilo yaꞌ noꞌ cheh chiꞌokniko yu ebꞌyaꞌ rey Judá yet chiyinayo isbꞌa tet tzꞌayik, isnhusnito yaꞌ iscarruaje noꞌ cheh tuꞌ. Haꞌ xin bꞌey huneꞌ yamaqꞌil ay iskawilal bꞌay chonhokto yul Yatut Komam Jahawil kankano noꞌ cheh tuꞌ, iskawilal iscuarto naj eunuco chiyij Natán-melec, naj aqꞌbꞌil ismunil tanhe cheh.a
12 Yuchkꞌanpaxayo yaꞌ rey Josías ismexhahil xahanbꞌal watxꞌebꞌil yu ebꞌyaꞌ rey Judá yibꞌanh yakꞌalil iscuarto yaꞌ Acaz yebꞌ hunteqꞌan ismexhahil yet xahanbꞌal watxꞌebꞌilkanh yu yaꞌ rey Manasés bꞌey kabꞌebꞌ yamaqꞌil Yatut Komam Jahawil, isnhusnito yaꞌ, isto yaꞌ yinh anhe istixhnoto istanhil yul haꞌ nichꞌan haꞌ Cedrón. 13 Yetanpaxto yaꞌ Josías hunteqꞌan ismexhahil yet xahanbꞌal ayko satakꞌti Jerusalén yinh yetkꞌulal yinh kowatxꞌqꞌabꞌ yinh wonhan chihal-lax etabꞌiltoj, haꞌ hunteqꞌan tuꞌ haꞌ yaꞌ Salomón isreyal Israel watxꞌenhekanoj. Watxꞌebꞌil ismexhahil xahanbꞌal tuꞌ yu yaꞌ, yunhe yinayo isbꞌa anma tet tioxh Astarot, isdiosal ebꞌnaj Sidonio yebꞌ tet tioxh Quemos, isdiosal Moab, yebꞌ tet Milcom, isdiosal Amón, hunteqꞌan tioxh tuꞌ kaw chisyah Komam Jahawil. 14 Ismaqꞌnipoho yaꞌ Josías hunteqꞌan tioxh tuꞌ, ismaqꞌnipaxo poho yaꞌ tioxh Asera, istenbꞌankanh yaꞌ isbꞌajil kamom bꞌey tuꞌ. 15 Yuchkꞌanpaxto yaꞌ Josías ismexhahil yet xahanbꞌal aykanh bꞌey Bet-el, yebꞌ ismexhahil yet xahanbꞌal aykanh iswiꞌla wonhan watxꞌebꞌilkano yu yaꞌ rey Jeroboam, iskꞌahol naj Nabat; isnhusnito yaꞌ, haxanhe xin istanhil kankanoj. Yaꞌ Jeroboam tuꞌ haꞌ yaꞌ ijbꞌan konhobꞌ Israel yaniko ismul sata Komam Jahawil. Lahwi tuꞌ xin yaniko yaꞌ rey Josías qꞌaꞌ yinh tioxh Asera. 16 Hayet ismeltzo yaꞌ Josías, yilnito yaꞌ huneꞌ bꞌay mujan ej kamom yinh istzalanil wonhan, ischejni yaꞌ ilaxolti isbꞌajil kamom, isnhuslaxto isbꞌajil kamom tuꞌ bꞌay nhuslaxto hunteqꞌan ismexhahil yet xahanbꞌal yunhe yetaxkantoj; hak tuꞌ yu yijni isbꞌa tzet yalkano ischejabꞌ Komam Jahawil yibꞌanhilo huneꞌ tuꞌ. 17 Lahwi tuꞌ, isqꞌambꞌen yaꞌ Josías:
—¿Mak ay yet huneꞌ panteón chiwiltiꞌan? xhi yaꞌ. Istaqꞌwi ebꞌnaj ay bꞌey tuꞌ:
—Haꞌ ispantionh huneꞌ ischejabꞌ Komam Dios titna bꞌey Judá, yalnikano yibꞌanhilo tzet mayijkano isbꞌa yinh ismexhahil yet xahanbꞌal ay bꞌey Bet-el tiꞌ tinanh, xhi ebꞌnaj. 18 Yalni yaꞌ Josías:
—Mach chetzabꞌ ispantionh yaꞌ, mach cheyilti isbꞌajil yaꞌ, xhi yaꞌ. Hak tuꞌ xin matxa ilaxilti isbꞌajil huneꞌ ischejabꞌ Komam Dios tuꞌ tit bꞌey Samaria.
19 Yuchkꞌanpaxto yaꞌ rey Josías sunil yatut tioxh aykanh iswiꞌla wonhan bꞌey Samaria, hunteqꞌan yaqꞌ watxꞌe ebꞌnaj Israel yet yaqꞌnitij ebꞌnaj ishowal Komam Jahawil, isnhusnito yaꞌ hakaꞌtikꞌa yu yaꞌ bꞌey Bet-el. 20 Ispotxꞌnikamo yaꞌ rey Josías ebꞌnaj sacerdote aqꞌni xahanbꞌal tet tioxh, yibꞌanh ismexhahil yet xahanbꞌal, isnhusnipaxo yaꞌ isbꞌajil ebꞌnaj winaj yibꞌanh ismexhahil yet xahanbꞌal tuꞌ. Lahwi tuꞌ xin ismeltzo yaꞌ bꞌey Jerusalén.
Yaꞌ Josías yekꞌtze yaꞌ qꞌinh Pascua
21 Lahwi tuꞌ yalni yaꞌ rey Josías tet konhobꞌ: «Wal tinanh jekꞌtzewe qꞌinh Pascua tet Komam Jahawil, koDiosal, hakaꞌ tzet tzꞌibꞌnhebꞌilkano yul hum yet istrato Komam Dios,» xhi yaꞌ.b 22 Maxhto hunelo chiꞌekꞌtzelax qꞌinh pascua hakaꞌ yu yekꞌtzen yaꞌ Josías tuꞌ, nitam yinh istiempohal yet ayko ebꞌyaꞌ juez yahawilo Israel, nitampaxo yinh istiempohal ebꞌyaꞌ isreyal Israel yebꞌ ebꞌyaꞌ isreyal Judá. 23 18 (Waxajlahonhebꞌxa) habꞌil yok yaꞌ Josías reyal yet yekꞌtzen yaꞌ qꞌinh pascua tet Komam Jahawil bꞌey Jerusalén.
Kaw ay ishowal Komam Jahawil yibꞌanh Judá
24 Istanhtzenpaxilo yaꞌ rey Josías ebꞌnaj ahbꞌe yebꞌ ebꞌnaj chiqꞌumlan kamom yebꞌ tioxh ay yulaj nha, yebꞌ sunil tzet yahbꞌeta yul sat Komam Jahawil bꞌey Judá yebꞌ Jerusalén. Iswatxꞌe yaꞌ Josías sunil tuꞌ yu isyijen yaꞌ sunil tzet ayayo yul yumal ley ilcha yu yaꞌ sacerdote Hilcías yul Yatut Komam Jahawil.c 25 Machi hunuxa rey yet yalanhtokano yako isbꞌa yul isqꞌabꞌ Komam Jahawil yinh sunil yanma, yinh sunil iskꞌul, yebꞌ yinh sunil yip hakaꞌ yaꞌ Josías tiꞌ hakaꞌ yalni chejbꞌanile yet yaꞌ Moisés. Machi hunuxa rey hakaꞌ yaꞌ Josías tiꞌ yet tzujanilxa.
26 Waxanhka kꞌul yute isbꞌeybꞌal yaꞌ Josías, yajaꞌ mach yaqꞌ ekꞌoyo Komam Jahawil ishowal yibꞌanh Judá, yuto yaqꞌtij yaꞌ rey Manasés ishowal Komam. 27 Yuxin yal Komam Jahawil: «Haꞌ hun Judá tiꞌ chiwipaxilojan yinh insatan, hakaꞌ yu winilojan Israel, kat wintanhenkaniltojan konhobꞌ Jerusalén insikꞌilojan yebꞌ nha bꞌay walan ta chibꞌina inbꞌihan yinh,» xhi Komam.
Iskamikal yaꞌ Josías
28 Haꞌ hunteqꞌanxa tzet yu, yebꞌ tzet iswatxꞌe yaꞌ rey Josías tzꞌibꞌnhebꞌilkano yul teꞌ hum bꞌay chitzotel yibꞌanhilo ebꞌyaꞌ rey Judá. 29 Haꞌ yul hunteqꞌan tzꞌayik bꞌay ayko yaꞌ Josías reyal tuꞌ, to naj faraón Necao, isreyal Egipto bꞌey haꞌ niman Éufrates kolwal yinh howal yinta naj rey Asiria, yelto yaꞌ Josías yaqꞌaꞌ howal yinh naj Necao tuꞌ, yajaꞌ yilnhena naj Necao yaꞌ Josías, ismaqꞌnikamo naj yaꞌ bꞌey Meguido. 30 Yalaxahto isnimanil yaꞌ yul carruaje yu ischejabꞌ, yilaxilo yaꞌ bꞌey Meguido tuꞌ, yilaxto yaꞌ bꞌey Jerusalén, ismujlax yaꞌ bꞌey tuꞌ yul ispantionh. Yiniti konhobꞌ yaꞌ Joacaz, iskꞌahol yaꞌ Josías, isjobꞌlaxayo aceite yibꞌanh iswiꞌ yaꞌ, yokkano yaꞌ reyal selelo ismam.
Yet yok yaꞌ Joacaz reyal yebꞌ yet yilaxilo yaꞌ reyal
31 Hayet yok yaꞌ Joacaz reyal, 23 (oxebꞌ iskawinaj) habꞌil yaꞌ, oxebꞌnhe ixahaw ok yaꞌ reyal bꞌey Jerusalén, Hamutal isbꞌi ismiꞌ yaꞌ, iskutzꞌin naj Jeremías, ah Libna ye ix. 32 Yaꞌ Joacaz tuꞌ, haꞌ istxꞌojal iswatxꞌe yaꞌ sata Komam Jahawil, iswatxꞌe yaꞌ tzetaj iswatxꞌe yichmam yaꞌ. 33 Yaniko naj faraón Necao ah Egipto yaꞌ rey Joacaz tuꞌ preso bꞌey Ribla, ay yul ismajul Hamat, yu matxa chiꞌok yaꞌ reyal bꞌey Jerusalén, isqꞌanayo naj chꞌen tohlabꞌal tet konhobꞌ, yinh sunil tuꞌ isqꞌan naj 100 (hokꞌal) talento chꞌen plata yok huneꞌ talento chꞌen oro.d 34 Lahwi tuꞌ yaniko naj faraón Necao yaꞌ Eliaquim, hunxa iskꞌahol yaꞌ Josías reyal selelo ismam. Ishelni naj faraón isbꞌi yaꞌ Eliaquim, yaniko naj Joacim isbꞌiho yaꞌ. Yinito naj Necao yaꞌ rey Joacaz preso bꞌey Egipto, haꞌ bꞌey tuꞌ xin kam yaꞌ Joacaz.
35 Yaqꞌni yaꞌ Joacim chꞌen plata yebꞌ chꞌen oro istohlabꞌalo tet naj faraón. Isqꞌanni yaꞌ chꞌen tohlabꞌal tuꞌ tet konhobꞌ Judá, yuxin yaqꞌ hunun anma chꞌen oro yebꞌ chꞌen plata, hatatikꞌa tzet ay hunun. Hak tuꞌ yu yaqꞌni konhobꞌ Judá istohlabꞌal tet naj faraón Necao.
Ok yaꞌ Joacim reyal