Yekꞌtze yaꞌ rey Josías qꞌinh Pascua
35
Yaꞌ rey Josías yekꞌtze yaꞌ qꞌinh Pascua tet Komam Jahawil bꞌey Jerusalén, yaqꞌni yaꞌ isxahanbꞌal yinh qꞌinh tuꞌ, yinh 14 (iskanhlahonhebꞌ) tzꞌayik yinh bꞌabꞌel ixahaw. 2 Yokkano ebꞌyaꞌ sacerdote yinh ismunil, yiptzelaxkano ebꞌyaꞌ yu yaꞌ rey bꞌey Yatut Komam Jahawil. 3 Yalni yaꞌ tet ebꞌnaj levita, ebꞌnaj chikuyni anma Israel yebꞌ chimunla yinh ismunil Komam Jahawil: «Awekto Kaxha yet istrato Komam Dios yul Yatut Komam, watxꞌebꞌil yu yaꞌ Salomón, iskꞌahol yaꞌ David, oklena isreyalo Israel; haxinwal matxa chebꞌatxikꞌo yu hewixikꞌ. Wal tinanh chexok munil yinh ismunil Komam Jahawil, koDiosal, kat heyijen tet konhobꞌ Israel, iskonhobꞌ Komam. 4 Watxꞌewe hebꞌa yinh hunun majan, hatatikꞌa heyikꞌal, kat heyok yinh hemunil yinh istxolal hakaꞌ yu ischejnikano yaꞌ rey David yebꞌ yaꞌ Salomón, iskꞌahol yaꞌ David. 5 Yinh istxolal chexokto hunun majan hex yul Yatut Komam hatatikꞌa heyikꞌal, hex levita hex tiꞌ. 6 Lahwi tuꞌ, kat hepotxꞌni noꞌ xahanbꞌal yet qꞌinh Pascua, kat hewatxꞌen hebꞌa hakaꞌ yalni chejbꞌanile, yu heyijen sunil tzet yalkano Komam Jahawil tet yaꞌ Moisés,» xhi yaꞌ rey Josías.7 Lahwi tuꞌ ispohnilo yaꞌ rey Josías txꞌiꞌal no noqꞌ xol isnoqꞌ, issahni yaꞌ noꞌ tet konhobꞌ kutxaniko tuꞌ yu yokniko noꞌ xahanbꞌalil yinh qꞌinh Pascua. Yako yaꞌ noꞌ meꞌ yebꞌ noꞌ chiw, 30 (lahonhebꞌ iskawinaj) mil noꞌ yinh sunil. Nan xin yepaxo oxebꞌ mil noꞌ wakax yaqꞌ yaꞌ. 8 Hakpax tuꞌ ebꞌnaj ayko yahawilo yinta yaꞌ rey el yinh iskꞌul ebꞌnaj yaqꞌni issabꞌehal tet konhobꞌ yebꞌ tet ebꞌyaꞌ sacerdote yebꞌ tet ebꞌnaj levita. Haꞌ yaꞌ Hilcías, yebꞌ yaꞌ Zacarías, yebꞌ yaꞌ Jehiel, ebꞌyaꞌ iswiꞌehal yeko yinh sacerdote bꞌey Yatut Komam Dios; haꞌ ebꞌyaꞌ tuꞌ aqꞌni no noqꞌ matanil tet ebꞌyaꞌ sacerdote yu yekꞌtzen qꞌinh Pascua. Haꞌ noꞌ yaqꞌ ebꞌyaꞌ tuꞌ xin 2,600 noꞌ meꞌ, yok 300 noꞌ wakax. 9 Hakpax tuꞌ naj Conanías yebꞌ ebꞌnaj yuxhtaj, haꞌ ton naj Semaías yebꞌ naj Natanael, hakpax tuꞌ naj Hasabías, naj Jehiel yebꞌ naj Josabad yahawil yinh ebꞌnaj levita, issah ebꞌnaj noꞌ tet ebꞌnaj levita, howebꞌ mil noꞌ meꞌ yok 500 noꞌ wakax potxꞌlax xahanbꞌalil yinh qꞌinh pascua tuꞌ.
10 Haxa yet kꞌulxa ye sunil yet yichiko qꞌinh Pascua tuꞌ, yok ebꞌyaꞌ sacerdote yinh istxolal yinh ismunil, yokpaxo ebꞌnaj levita yinh istxolal hakaꞌtikꞌa yu ischejni yaꞌ rey Josías. 11 Yok ebꞌnaj levita ispotxꞌno no noqꞌ yinh qꞌinh Pascua tuꞌ, haxa xin ebꞌyaꞌ sacerdote chichahnilo ischikꞌil noꞌ tet ebꞌnaj levita tuꞌ, chistxihnayo ebꞌyaꞌ yibꞌanh ismexhahil yet xahanbꞌal. 12 Lahwi tuꞌ yinilo ebꞌnaj ismantecahil noꞌ yu isnhuslaxi, ispohnikanh ebꞌnaj yinh hunun majan ikꞌale, yu yaltelax tet Komam Dios hakaꞌ yalni yul hum bꞌay tzꞌibꞌnhebꞌilayo chejbꞌanile yu yaꞌ Moisés, haktikꞌapax tuꞌ yute ebꞌnaj noꞌ wakax. 13 Lahwi tuꞌ isqꞌantzen ebꞌnaj ischibꞌehal noꞌ xahanbꞌal yet qꞌinh Pascua tuꞌ hakaꞌ yalni chejbꞌanile, haxa hunteqꞌanxa noꞌ xahanbꞌal xin txiklax noꞌ yul xi, yul nimeta xi, yebꞌ yul xhaltin; yitxqꞌalaxikꞌo noꞌ yinh anhe yinh konhobꞌ.a 14 Lahwi tuꞌ yichiko ebꞌnaj levita iswatxꞌen noꞌ chiskꞌux ebꞌnaj, yebꞌ chiskꞌux ebꞌyaꞌ sacerdote, ebꞌyaꞌ titna yinh yaꞌ Aarón, yuto ayiko ebꞌyaꞌ isnhusni noꞌ xahanbꞌal yebꞌ isnhusni ismantecahil noꞌ masanta yinh aqꞌbꞌalil. Yuxin haꞌ ebꞌnaj levita tuꞌ watxꞌen noꞌ chiskꞌux yet levitahil yebꞌ chiskꞌux ebꞌyaꞌ sacerdote, titna yinh yaꞌ Aarón. 15 Hakpax tuꞌ ebꞌnaj bꞌitnom, ebꞌnaj iskꞌahol yaꞌ Asaf, aypaxiko ebꞌnaj yinh ismunil hakaꞌ yu yalnikano yaꞌ David tet yaꞌ Asaf, naj Hemán, yebꞌ naj Jedutún ischejabꞌ yaꞌ David tuꞌ. Hakpax tuꞌ ebꞌnaj tanhem pulta ayko ebꞌnaj istanheno hunun pulta, mach xin isbꞌejkano ebꞌnaj istanhen pulta tuꞌ, yuto yet levitahil, ebꞌnaj watxꞌen tzet chislo.
16 Hak tuꞌ yu ismunla ebꞌnaj yinh ismunil Komam Jahawil yinh istzꞌayikal qꞌinh pascua tuꞌ, isnhusni ebꞌnaj noꞌ xahanbꞌal yibꞌanh ismexhahil yet xahanbꞌal tet Komam Dios, hakaꞌ yu ischejni yaꞌ rey Josías. 17 Hak tuꞌ yu yekꞌtzen ebꞌnaj Israel iskutxbꞌako isbꞌa tuꞌ qꞌinh Pascua yinh huneꞌ tiempohal tuꞌ, yekꞌtzenpaxo ebꞌnaj qꞌinh kaw ay yelapno yet chiwalax ixim pan machi yanhal yulbꞌal hujebꞌ tzꞌayik. 18 Machi bꞌay ekꞌtzelax qꞌinh Pascua hakaꞌ huneꞌ tiꞌ yettax istiempohal yaꞌ Samuel ischejabꞌ Komam Dios, hakaꞌ pascua yekꞌtze yaꞌ rey Josías yebꞌ ebꞌyaꞌ sacerdote yebꞌ ebꞌnaj levita yebꞌ sunil anma Judá yebꞌ anma Israel apni bꞌey tuꞌ yebꞌ sunil konhobꞌ Jerusalén. 19 Hayet ekꞌtzelax qꞌinh Pascua tiꞌ 18 (waxajlahonhebꞌxa) habꞌil yok yaꞌ Josías reyal.
Iskamikal yaꞌ rey Josías
20 Hayet yekꞌkanto sunil hunteqꞌan tuꞌ yebꞌ yet lahwi iswatxꞌenkano yaꞌ rey Josías munil yinh Yatut Komam Jahawil, yahapno naj Necao, isreyal Egipto yanoko howal bꞌey Carquemis, istiꞌ haꞌ niman Éufrates, yelto yaꞌ rey Josías yanoko howal yinh naj. 21 Yajaꞌ ischejto naj Necao tuꞌ ischejabꞌ yalno tet yaꞌ Josías hakaꞌ tiꞌ: «Hach isreyal Judá mach chachtit howal winhan, yuto maxhtaj tawinh kintitan howal, wal xin chintohan waqꞌaꞌan howal yinh ebꞌnaj ayko ishowal winhan, haꞌ xin Komam Dios mahalni wetan tato chinlahikojan intohan howal yinh ebꞌnaj, yuxin bꞌej hakachwa yinh tzet chal Komam Dios yuto ayko Komam wetbꞌihojan, kꞌuxantaxka chaxhistanhtzelo Komam,» xhito naj.
22 Yajaꞌ xin mach meltzo yaꞌ Josías tuꞌ mach yabꞌeto yaꞌ tzet ischej Komam Dios yalaꞌ naj Necao. Ishelni yaꞌ xil isqꞌap yet rey ayko yinh, isto yaꞌ yaqꞌno howal yinh naj Necao tuꞌ bꞌey txꞌotxꞌ Meguido. 23 Hayet ayko howal tuꞌ yapni isbꞌaqꞌ islitꞌ ebꞌnaj issoldado naj Necao yinh yaꞌ rey Josías, yalni yaꞌ tet ebꞌnaj ischejabꞌ: «Iqꞌinwelojan xol howal tiꞌ, yuto kaw niman inlahwilalan maꞌoki,» xhi yaꞌ. 24 Hak tuꞌ yu yinilti ebꞌnaj ischejabꞌ yaꞌ yul carruaje bꞌay ayiktoj, yanikto ebꞌnaj yaꞌ yul huneꞌxa carruaje, yilaxto yaꞌ bꞌey Jerusalén. Haxa bꞌey Jerusalén tuꞌ kam yaꞌ, ismuji yaꞌ bꞌay mujan yichmam, yok sunil anma Judá yebꞌ Jerusalén yinh bꞌiskꞌulal yu iskamikal yaꞌ rey Josías tuꞌ. 25 Hayet iskam yaꞌ rey Josías iswatxꞌen yaꞌ Jeremías huneꞌ poesía yu isnahlaxti iskamikal yaꞌ rey Josías, chito xin aqꞌlax bꞌinaho huneꞌ poesía tuꞌ tinanh. Sunil ebꞌnaj bꞌitnom yebꞌ ebꞌix bꞌitnom chisnati huneꞌ poesía yet iskamikal yaꞌ rey Josías tuꞌ yet chisbꞌitnhen bꞌit yet kamom xol ebꞌnaj Israel. Haꞌ huneꞌ bꞌit tuꞌ tzꞌibꞌnhebꞌilkano yul hum Lamentación.