24
Haꞌ yinh huneꞌ habꞌil tuꞌ, tit naj Nabucodonosor, isreyal Babilonia howal yinh yaꞌ Joacim. Hak tuꞌ yu istzabꞌcha yaꞌ Joacim, yok yaꞌ oxebꞌ habꞌil ischejabꞌo naj Nabucodonosor. Lahwi tuꞌ ispakꞌiko yaꞌ Joacim iskolnolo isbꞌa yul isqꞌabꞌ naj.a 2 Yajaꞌ ischejti Komam Jahawil ebꞌnaj soldado Caldeo, ebꞌnaj sirio, ebꞌnaj Moab, yebꞌ ebꞌnaj Amón yok howal yinh yaꞌ Joacim yebꞌ yinh konhobꞌ Judá yu istanhtzelaxilo Judá hakaꞌ yu yalnikano ebꞌyaꞌ ischejabꞌ Komam Jahawil. 3 Apni sunil isyaꞌtajil tuꞌ yibꞌanh konhobꞌ Judá yu ischejbꞌanil Komam Jahawil, yu yilaxilo Judá yinh sat Komam, yu ismul yaꞌ Manasés yebꞌ yu sunil istxꞌojal iswatxꞌe yaꞌ. 4 Yebꞌ yu ismul yaꞌ yakoj yet ismaqꞌnikamo yaꞌ anma machi ismul, nohilo yul sunil konhobꞌ Jerusalén yu ischikꞌil anma machi ismul ispotxꞌkamo yaꞌ. Yu huneꞌ tuꞌ xin mach yaqꞌ nimankꞌulal Komam Jahawil yinh yaꞌ.5 Haꞌ hunteqꞌanxa tzet yu yaꞌ Joacim, yebꞌ sunil tzet iswatxꞌe yaꞌ tzꞌibꞌnhebꞌilkano yul hum chitzotel yinh ebꞌyaꞌ rey Judá. 6 Haxa yet iskam yaꞌ Joacim ismujlax yaꞌ bꞌay mujan yichmam, yok yaꞌ Joaquín iskꞌahol yaꞌ, reyal seleloj.
7 Matxa xin elto naj rey Egipto yul iskonhobꞌ, yuto yilo naj rey Babilonia sunil ismajul naj faraón ichiti bꞌey ha haꞌ yet Egipto masanta bꞌey ha haꞌ Éufrates.
Ilaxto yaꞌ Joaquín yebꞌ ebꞌnaj chimunla yintaj preso bꞌey Babilonia
8 18 (Waxajlahonhebꞌ) habꞌil yaꞌ Joaquín yet yok yaꞌ reyal, oxebꞌnhe ixahaw ok yaꞌ reyal bꞌey Jerusalén, Nehusta isbꞌi ismiꞌ yaꞌ, iskutzꞌin naj Elnatán, ah Jerusalén ix. 9 Yaꞌ rey Joaquín tuꞌ, haꞌ istxꞌojal iswatxꞌe yaꞌ sata Komam Jahawil, iswatxꞌe yaꞌ tzetaj iswatxꞌe yichmam yaꞌ.
10 Haꞌ yinh hunteqꞌan tiempo tuꞌ, ahapno ebꞌnaj issoldado naj Nabucodonosor, isreyal Babilonia yaqꞌaꞌko howal yinh Jerusalén, ishoynayo ebꞌnaj konhobꞌ tuꞌ. 11 Hayet hoybꞌilxayo konhobꞌ tuꞌ yu ebꞌnaj soldado yapni naj rey Nabucodonosor yinh Jerusalén. 12 Hak tuꞌ yu yaniko isbꞌa yaꞌ Joaquín, isreyal Judá, yebꞌ ismiꞌ, yebꞌ ischejabꞌ yebꞌ ebꞌnaj yahaw konhobꞌ yebꞌ ebꞌnaj yahaw yinh issoldado yul isqꞌabꞌ naj rey Babilonia, istzabꞌnayo naj yaꞌ Joaquín yebꞌ sunil mak tuꞌ. Hayet yuni huneꞌ tuꞌ, 18 (waxajlahonhebꞌxa) habꞌil yok naj Nabucodonosor isreyalo Babilonia. 13 Yinito naj rey Nabucodonosor sunil qꞌalomal ay yul Yatut Komam Jahawil, yinipaxto naj sunil qꞌalomal ay yul palacio, ismaqꞌnipoho naj sunil munlabꞌal oro ayikto yul Yatut Komam, yaqꞌ watxꞌe yaꞌ Salomón isreyal Israel. Hak tuꞌ elikoj yu yijni isbꞌa hakaꞌtikꞌa yu yalnikano Komam Jahawil. 14 Yinito naj rey Nabucodonosor preso sunil konhobꞌ Jerusalén; ebꞌnaj yahaw konhobꞌ, yebꞌ sunil ebꞌnaj winaj kaw helan, yilaxpaxto ebꞌnaj ay ismunil, hakaꞌ ebꞌnaj chakꞌom chꞌen; haxanhe xin anma kaw mebꞌaꞌ kankanoj. 10 (lahonhebꞌ) mil isbꞌisil ebꞌnaj ilaxto preso tuꞌ.
15 Yinipaxto naj rey Nabucodonosor yaꞌ rey Joaquín preso bꞌey Babilonia, yebꞌ ismiꞌ, yebꞌ ebꞌix yixal, yebꞌ ebꞌnaj yahaw konhobꞌ, yebꞌ ebꞌnaj winaj kaw helan. 16 Yilaxto hujebꞌ mil ebꞌnaj soldado ah Judá tuꞌ preso, yok huneꞌ mil ebꞌnaj winaj kaw helan yinh ismunil yebꞌ ebꞌnaj chakꞌom chꞌen. Yilaxpaxto preso bꞌey Babilonia ebꞌnaj kaw ay yip yebꞌ helan yinh howal. 17 Yaniko naj rey Nabucodonosor yaꞌ Matanías reyal yinh Judá selelo yaꞌ Joaquín. Yaꞌ Matanías tuꞌ, yuxhta ismam yaꞌ Joaquín tuꞌ ye yaꞌ, ishelni naj isbꞌi yaꞌ Matanías, yaniko naj Sedequías isbꞌiho yaꞌ.
Ok yaꞌ Sedequías reyal
18 Hayet yok yaꞌ Sedequías reyal, 21 (huneꞌ iskawinaj) habꞌil yaꞌ, 11 (hunlahonhebꞌ) xin habꞌil ok yaꞌ reyal bꞌey Jerusalén, Hamutal isbꞌi ismiꞌ yaꞌ, iskutzꞌin naj Jeremías, ah Libna. 19 Yaꞌ rey Sedequías tuꞌ, haꞌ istxꞌojal iswatxꞌe yaꞌ sata Komam Jahawil, hakaꞌ iswatxꞌe ebꞌyaꞌ yichmam yaꞌ. 20 Yuxin tit ishowal Komam Jahawil yinh konhobꞌ Jerusalén yebꞌ yinh Judá, yinilo Komam yinh sat. Haxa yet tzujanilxa ispakꞌiko yaꞌ rey Sedequías yinh naj rey Babilonia.