Ok yaꞌ Acaz reyal yinh Judá
16
Hayet 17 (hujlahonhebꞌxa) habꞌil yok yaꞌ Peka, iskꞌahol naj Remalías, isreyalo Israel, yok yaꞌ Acaz, iskꞌahol yaꞌ Jotam, reyal yinh Judá. 2 Hayet yok yaꞌ Acaz reyal tuꞌ 20 (hunkꞌalxa) habꞌil yaꞌ, 16 (wajlahonhebꞌ) habꞌil ok yaꞌ reyal bꞌey Jerusalén. Machi xin iswatxꞌe yaꞌ Acaz istoholal yul sat Komam Jahawil hakaꞌ yichmam yaꞌ, haꞌ ton yaꞌ David, 3 wal xin isbꞌeybꞌalnhe yaꞌ tzet iswatxꞌe ebꞌyaꞌ isreyal Israel. Yako yaꞌ iskꞌahol xahanbꞌalil, isnhusnito yaꞌ, hakaꞌ chu hunteqꞌan nimeta konhobꞌ istzumbꞌelo Komam Jahawil sata ebꞌnaj Israel; haꞌ isbꞌeybꞌal hunteqꞌan konhobꞌ tuꞌ, kaw chisyah Komam Jahawil. 4 Yaqꞌnipaxo yaꞌ rey Acaz tuꞌ isxahanbꞌal tet tioxh iswiꞌla wonhan, isnhusnipaxo yaꞌ teꞌ pom bꞌey tuꞌ, yebꞌ bꞌey yichla te teꞌ kaw qꞌejholonhe yalanh xaj. 5 Haꞌ yinh huneꞌ tiempo tuꞌ naj Rezín, isreyal Siria, yebꞌ yaꞌ Peka isreyal Israel, to ebꞌnaj bꞌey Jerusalén yu yaniko howal yinh yaꞌ rey Acaz, ishoyayo ebꞌnaj Jerusalén, yajaꞌ xin machi qꞌoji ebꞌnaj. 6 Haꞌ yinh huneꞌ tiempohal tuꞌ, yapaxiko naj rey Edom howal yinh konhobꞌ Elat, isqꞌoji naj yinh ebꞌnaj. Hak tuꞌ yu ismeltzopaxiko konhobꞌ Elat yul isqꞌabꞌ ebꞌnaj Edom hunelxa, istzumbꞌenilo ebꞌnaj ebꞌnaj Judá ay yul konhobꞌ Elat, yapni ebꞌnaj ah Edom, yehayo ebꞌnaj bꞌey tuꞌ, haꞌ xin ebꞌnaj ah Edom tuꞌ ay yul konhobꞌ Elat tinanh.7 Ischejnito yaꞌ Acaz haywanh ischejabꞌ tzotelo tet naj Tiglat-pileser, isreyal Asiria hakaꞌ tiꞌ: «Hanintiꞌan, hachejabꞌ wehan yebꞌ hakaꞌ hakꞌahol chiwukojan, yuxin chinqꞌanan tawet tato chachtit kolwal winhan, kat kinhakolnihan tet naj rey Siria yebꞌ tet yaꞌ rey Israel, yuto chako ebꞌnaj howal winhan,» xhito yaꞌ.
8 Yuxin yilti yaꞌ Acaz chꞌen plata yebꞌ chꞌen oro ay yul Yatut Komam Jahawil, yebꞌ qꞌalomal ay yul palacio, yanito yaꞌ chꞌen sabꞌehal tet naj rey Asiria. 9 Isyijen naj rey Asiria tzet yal yaꞌ Acaz, isto naj yanoko howal yinh konhobꞌ Damasco, isqꞌoji naj yinh, yanito naj anma yul konhobꞌ Damasco preso bꞌey Kir, ismaqꞌnikamo naj naj Rezín isreyal Siria.
10 Lahwi tuꞌ isto yaꞌ rey Acaz ischahno naj Tiglat-pileser, isreyal Asiria bꞌey konhobꞌ Damasco, yilni yaꞌ huneꞌ ismexhahil xahanbꞌal ay bꞌey Damasco tuꞌ, yanito yaꞌ yechel huneꞌ ismexhahil xahanbꞌal tuꞌ tet yaꞌ sacerdote Urías bꞌey Jerusalén. 11 Hak tuꞌ yu iswatxꞌenkanh yaꞌ Urías huneꞌ ismexhahil yet xahanbꞌal hakaꞌ jilni yechel yati yaꞌ rey Acaz bꞌey Damasco, iswatxꞌe yaꞌ sacerdote tuꞌ yet maxhto chꞌel yaꞌ Acaz bꞌey Damasco.
12 Haxa yet yapni yaꞌ rey Acaz bꞌey Jerusalén yilni yaꞌ huneꞌ ismexhahil xahanbꞌal tuꞌ, yalten yaꞌ isxahanbꞌal yibꞌanh. 13 Isnhusni yaꞌ isxahanbꞌal yebꞌ yebꞌalqꞌabꞌe, isjobꞌnayo yaꞌ vino yibꞌanh ismexhahil yet xahanbꞌal tuꞌ, istxihnayo yaꞌ ischikꞌil noꞌ xahanbꞌal yet aqꞌankꞌulal yibꞌanh huneꞌ mexha tuꞌ.
14 Haxa huneꞌ ismexhahil yet xahanbꞌal bronce ayko sata Yatut Komam Jahawil xolbꞌal huneꞌ akꞌ mexha yebꞌ Yatut Komam yilo yaꞌ rey Acaz bꞌey tuꞌ, yanayo yaꞌ yinh yetkꞌulal norte iskawilal huneꞌ akꞌ mexha iswatxꞌe yaꞌ. 15 Lahwi tuꞌ yalni yaꞌ rey Acaz tet yaꞌ sacerdote Urías: «Haꞌ yibꞌanh huneꞌ niman akꞌ mexha yet xahanbꞌal tiꞌ chanhus noꞌ xahanbꞌal yet sahabꞌ sakꞌayal, yebꞌ yebꞌalqꞌabꞌe yet qꞌejbꞌiyal. Haꞌ yibꞌanh xin chanhuspaxo inxahanbꞌalan yebꞌ inyebꞌalqꞌabꞌan, hanin rey intiꞌan. Yibꞌanh tiꞌ xin chanhuspaxo isxahanbꞌal sunil konhobꞌ, chanhusni isyebꞌalqꞌabꞌ konhobꞌ, chatxihnayo ischikꞌil noꞌ xahanbꞌal yibꞌanh. Walpaxo huneꞌ mexha yet xahanbꞌal bronce wetan chukaniko hanin rey intiꞌan, yibꞌanh chinqꞌambꞌe hinbꞌahan tet Komam Jahawil,» xhi yaꞌ.
16 Isyijen yaꞌ sacerdote Urías sunil tzet yal yaꞌ rey Acaz. 17 Ischejni yaꞌ rey Acaz yilaxilo teꞌ aqꞌinteꞌ ayko ismajilo yul ismarcohal hunteqꞌan carruaje bronce ay yul Yatut Komam Jahawil, yilaxilo isnet ha haꞌ aykanh yibꞌanh carruaje tuꞌ; yilaxpaxilo yechel noꞌ toro bronce ayikto yalanh huneꞌ niman pila, haxa xin yibꞌanh chꞌen chꞌen sat txꞌotxꞌ alaxayo huneꞌ niman pila tuꞌ. 18 Yinilo yaꞌ Acaz tuꞌ huneꞌ amaqꞌ bꞌay chiskutxbꞌa isbꞌa ebꞌnaj Israel yet istzꞌayikal xewilal, yinipaxilo yaꞌ pulta bꞌay chꞌekꞌto yaꞌ rey. Yilo yaꞌ hunteqꞌan tuꞌ yinh Yatut Komam Jahawil, yu iskan yaꞌ kꞌulal yul sat naj rey Asiria.