3 Yapni naj Salmanasar isreyal ebꞌnaj Asiria yaqꞌaꞌko howal yinh yaꞌ rey Oseas, isqꞌoji naj rey Asiria yinh yaꞌ, yokkano yaꞌ Oseas tuꞌ, ischejabꞌo naj, yaqꞌni yaꞌ istohlabꞌal tet naj. 4 Haxa yet tzujanxa, yilni naj rey Salmanasar tato lanhan ispakꞌiko yaꞌ rey Oseas yinh naj. Yuto ischejto yaꞌ Oseas haywanh ischejabꞌ isqꞌanno kolwal tet naj So, isreyal Egipto, yebꞌ xin xaꞌisbꞌej yaꞌ Oseas tuꞌ yaqꞌni istohlabꞌal tet naj Salmanasar hakaꞌ chu hunun habꞌil; yuxin istzabꞌayo naj Salmanasar yaꞌ Oseas tuꞌ, yaniko naj yaꞌ preso. 5 Ismajnilo naj rey Asiria sunil yul ismajul Israel, ishoynayo naj konhobꞌ Samaria, yulbꞌal oxebꞌ habꞌil xin yako naj howal yinh Samaria tuꞌ. 6 9 (Bꞌalonhebꞌxa) habꞌil yok yaꞌ Oseas isreyalo Israel yet yaykꞌay konhobꞌ Samaria yu naj isreyal Asiria, yinito naj ebꞌnaj Israel preso bꞌey txꞌotxꞌ Asiria; yehayo ebꞌnaj Israel yul konhobꞌ Halah, yebꞌ yul konhobꞌ Habor istiꞌ haꞌ Gozán, yebꞌ yulaj iskonhobꞌ ebꞌnaj medo.

7 Hul hunteqꞌan isyaꞌtajil tiꞌ yinh ebꞌnaj Israel yuto yako ismul yul sat Komam Jahawil, isDiosal, Komam inilo ebꞌnaj sat txꞌotxꞌ Egipto, iskolnilo Komam ebꞌnaj yalanh isyaꞌtajil yul isqꞌabꞌ naj faraón, isreyal Egipto. Ebꞌnaj Israel tuꞌ yiyo isbꞌa tet komon tioxh, 8 isbꞌeybꞌalnhen ebꞌnaj isbꞌeybꞌal hunteqꞌan nime konhobꞌ yilo Komam sata ebꞌnaj, isbꞌeybꞌalnhenpaxo ebꞌnaj isbꞌeybꞌal ebꞌnaj isreyal Israel tuꞌ.

9 Yinh ewantajil iswatxꞌepaxo ebꞌnaj Israel tzetaj ye tuꞌ mach toholo sata Komam Jahawil, isDiosal. Iswatxꞌenkanh ebꞌnaj bꞌay chiyiyo isbꞌa tet istioxh yulajla iskonhobꞌ yebꞌ bꞌay ay nha nahat yekanh bꞌay ay ebꞌnaj chitanhen konhobꞌ, yebꞌ yulajla konhobꞌ ayko iskꞌubꞌal. 10 Yanikanh ebꞌnaj yechel tioxh Asera iswiꞌla ej wonhan, yebꞌ yichla teꞌ qꞌebꞌtaj how yeko xaj, 11 isnhusni ebꞌnaj teꞌ pom sunil bꞌay chiyiyo isbꞌa tet istioxh iswiꞌla wonhan, hakaꞌ isbꞌeybꞌal nime konhobꞌ istzumbꞌelo Komam Jahawil sata ebꞌnaj yet yalanhtokanoj. Iswatxꞌenpaxo ebꞌnaj tzetaj ye tuꞌ kaw txꞌojkano, yaqꞌnitij ebꞌnaj ishowal Komam Jahawil. 12 Yinayo isbꞌa ebꞌnaj sata tioxh, hunteqꞌan yal Komam tato mach chiyiyo isbꞌa ebꞌnaj sataj.

13 Ischejni Komam Jahawil ischejabꞌ yalno tet ebꞌnaj Israel yebꞌ tet ebꞌnaj Judá hakaꞌ tiꞌ: «Bꞌejwe hebꞌeybꞌalnhen istxꞌojal, kat hekꞌubꞌan kuybꞌanile yebꞌ chejbꞌanile, hakaꞌtikꞌa yalni tzotiꞌ waqꞌkanojan tet heyichmam yu ebꞌnaj inchejabꞌan,» xhi Komam. 14 Yajaꞌ mach isyije ebꞌnaj tzet yal Komam, islutꞌnhen yanma ebꞌnaj hakaꞌtikꞌa yu islutꞌnhen yanma yichmam ebꞌnaj, mach yayto ebꞌnaj yul yanma yinh Komam Jahawil, isDiosal. 15 Yintanhenkanilto ebꞌnaj iskuybꞌanil yalkano Komam, yebꞌ istrato Komam istꞌinhbꞌakano tet yichmam ebꞌnaj yebꞌ chejbꞌanile yaqꞌkano Komam tet yichmam ebꞌnaj. Yok tzujno ebꞌnaj yinta tzetaj ye tuꞌ machi yelapnoj, yuxin matxa yelapno elkaniko ebꞌnaj yuto isbꞌeybꞌalnhe ebꞌnaj tzetaj iswatxꞌe nime konhobꞌ hoyaniko yinh ebꞌnaj, hunteqꞌan yal Komam Jahawil tato mach chisbꞌeybꞌalnhe ebꞌnaj. 16 Isbꞌejnikano ebꞌnaj sunil chejbꞌanile yal Komam Jahawil, iswatxꞌen ebꞌnaj kabꞌebꞌ yechel wakax istioxhoj yinh chꞌen chꞌen nhusbꞌil, yebꞌ yechel tioxh Asera, yinipaxayo isbꞌa ebꞌnaj tet sunil tzet chitzejtzon satkanh, yinipaxayo isbꞌa ebꞌnaj tet tioxh Baal. 17 Yaqꞌnipaxo tzꞌajoto ebꞌnaj iskꞌahol yebꞌ iskutzꞌin yinh xahanbꞌalil tet istioxh, isqꞌambꞌenpaxo isbꞌa ebꞌnaj tet ebꞌnaj ahbꞌe, yebꞌ tet ebꞌnaj chihalnilo tzetaj chiyuhi, yok ebꞌnaj iswatxꞌeno istxꞌojal sata Komam Jahawil, yaqꞌnitij ebꞌnaj ishowal Komam.^a

18 Yuxin kaw tit ishowal Komam Jahawil yinh konhobꞌ Israel, yinilo Komam konhobꞌ tuꞌ yinh sat,^b haxanhe xin Judá kankano yu Komam. 19 Yajaꞌ xin mach iskꞌubꞌapaxo ebꞌnaj Judá chejbꞌanile yalkano Komam Jahawil, isDiosal; wal xin isbꞌeybꞌalnhepaxo ebꞌnaj tzetaj iswatxꞌe ebꞌnaj Israel. 20 Yintanhenkanilto Komam Jahawil yuninal yuninal ebꞌnaj Israel, yanayo Komam isyaꞌtajil yibꞌanh. Yaniko Komam ebꞌnaj yul isqꞌabꞌ ebꞌnaj elqꞌom, yinilo Komam konhobꞌ Israel tuꞌ yinh sat. 21 Yuto ispohilo Komam ebꞌnaj Israel tuꞌ yinh ebꞌnaj yuninal yaꞌ rey David, yaniko ebꞌnaj Israel tuꞌ yaꞌ Jeroboam isreyaloj, yaꞌ iskꞌahol naj Nabat. Haꞌ xin yaꞌ Jeroboam tuꞌ, inilo konhobꞌ Israel yinta Komam Jahawil, yijbꞌan yaꞌ konhobꞌ tuꞌ, yaniko nimeta mule sata Komam. 22 Isbꞌeybꞌalnhe Israel sunil istxꞌojal iswatxꞌe yaꞌ Jeroboam, machi xin ishekꞌilo isbꞌa yinh istxꞌojal, 23 masanta yilo Komam konhobꞌ Israel tuꞌ yinh sat, hakaꞌtikꞌa yu yalni Komam tet konhobꞌ Israel yu ebꞌyaꞌ profeta, ischejabꞌ Komam; yilaxilo ebꞌnaj Israel sat istxꞌotxꞌ, yilaxpaxto preso bꞌey Asiria, masanto tinanh.

24 Yiniti naj rey Asiria anma ah Babilonia, ah Cuta, ah Ava, ah Hamat yebꞌ anma ah Sefarvaim bꞌey Samaria, sunil hunteqꞌan anma tuꞌ kankano yulaj konhobꞌ ay yul Samaria selelo ebꞌnaj Israel. 25 Hayet yichebꞌanil yet tolto apni hunteqꞌan anma tuꞌ bꞌey Samaria, yanito Komam noꞌ bꞌalam iskꞌuxnokamo anma tuꞌ, yuto machi xiw anma tet Komam Jahawil. 26 Yuxin hal-lax tet naj rey Asiria: «Haꞌ anma hawako yulajla konhobꞌ ay yul txꞌotxꞌ Samaria mach yohtajo anma chejbꞌanile aqꞌbꞌil yu Komam Dios tet iskonhobꞌ, yuxin yako Komam Dios noꞌ bꞌalam xol anma tiꞌ, yok noꞌ iskꞌuxnoto anma; hak tuꞌ eliko anma yuto mach yohtajoj anma kuybꞌanile yet isDiosal Samaria,» xhi tet naj. 27 Yalnito naj rey Asiria: «Meltzojabꞌto hunu ebꞌyaꞌ sacerdote ilaxti bꞌey tiꞌ, kat yehayo bꞌey Samaria tuꞌ, kat iskuyni yaꞌ anma yinh chejbꞌanile yal Komam Jahawil, isDiosal txꞌotxꞌ Samaria tuꞌ,» xhi naj.

28 Yuxin meltzo huneꞌ yaꞌ sacerdote ah Samaria ilaxto preso bꞌey Asiria, yapni yaꞌ bꞌey konhobꞌ Bet-el, yehayo yaꞌ bꞌey tuꞌ; chiskuyni yaꞌ hunteqꞌan anma tuꞌ isxiw tet Komam Jahawil. 29 Yajaꞌ hunun majan anma tuꞌ iswatxꞌe istioxh, yanikto yul yatut tioxh watxꞌebꞌilkanh yu ebꞌnaj iswiꞌla wonhan, yulajla iskonhobꞌ bꞌay aya. 30 Haꞌ anma ah Babilonia iswatxꞌe yechel tioxh Sucot-benot, haxa anma ah Cuta, iswatxꞌe yechel tioxh Nergal, haxa anma ah Hamat iswatxꞌe yechel tioxh Asima. 31 Haxa anma ah Ava iswatxꞌe yechel tioxh Nibhaz yebꞌ yechel tioxh Tartac, haxa anma ah Sefarvaim chisnhusto yuninal xahanbꞌalil tet istioxh Adramelec yebꞌ tet Anamelec bꞌay chiyiyo isbꞌa. 32 Haꞌ hunteqꞌan anma tuꞌ chixiw tet Komam Jahawil jalni, yajaꞌ issayiko issacerdote yu yalten isxahanbꞌal yul yatut istioxh aykanh iswiꞌla wonhan. 33 Chixiw tet Komam Jahawil yalni, yajaꞌ chiyiyo isbꞌa tet istioxh hakaꞌtikꞌa chiyute konhobꞌ bꞌay titnaj.

34 Haꞌ tinanh xin, haktikꞌa tuꞌ chute hunteqꞌan anma, hakaꞌtikꞌa yet yalanhtokanoj; machi xiw anma tet Komam Jahawil; mach iskꞌubꞌapaxo kuybꞌanile yebꞌ chejbꞌanile chal Komam, machi xin chisyije hakaꞌ chal kuybꞌanile yebꞌ chejbꞌanile yalkano Komam tet ebꞌnaj yuninal yaꞌ Jacob; yaꞌ yako Komam Israel isbꞌihoj. 35 Hayet istꞌinhbꞌankano Komam Jahawil Istzotiꞌ tet ebꞌnaj yalnikano Komam: «Mach chexxiw tet komon tioxh, mach cheyipaxayo hebꞌa tet, mach chexoktzujno yintaj, mach cheyaltepaxo hexahanbꞌal tet. 36 Wal xin hanhe tet Komam Jahawil, huneꞌ kexinilo sat txꞌotxꞌ Egipto yinh sunil yip, yebꞌ leyanto xin isqꞌabꞌ, haꞌ tet chexxiwi, haꞌ tet cheyiyo hebꞌa, haꞌ tet cheyaqꞌpaxo hexahanbꞌal. 37 Yebꞌpaxo kaw kam cheyilaꞌ kat heyijen sunil inleyan yebꞌ chejbꞌanile yebꞌ kuybꞌanile tzꞌibꞌnhebꞌilkanoj; machi xin chexxiw tet komon tioxh. 38 Mach chenahulnheto tzet tꞌinhbꞌabꞌilkano teyet wuhan, mach chexxiwpaxo tet komon tioxh. 39 Wal xin xiwanhwe wetan hanin heYahawilintiꞌan, heDiosal, haninan xin chexinkolilojan yul isqꞌabꞌ sunil ebꞌnaj ayko ishowal teyinh,» xhi.

40 Yajaꞌ xin mach yabꞌeto ebꞌnaj tzet yal Komam, wal xin ok tzujno ebꞌnaj yinta isbꞌeybꞌal iqꞌbꞌiltikꞌa yu yet payat. 41 Haꞌ hunteqꞌan anma tuꞌ xiw tet Komam Jahawil yalni, yajaꞌ yipaxayo isbꞌa tet istioxh, haktikꞌapax tuꞌ yuninal yebꞌ yuninal yuninal, isbꞌeybꞌalnhen tzet iswatxꞌe yichmam, haꞌ xin chisbꞌeybꞌalnhe tinanh.