3 Yaꞌ Azarías tuꞌ haꞌ istoholal iswatxꞌe yaꞌ yul sat Komam Jahawil hakaꞌtikꞌa isbꞌeybꞌal ismam yaꞌ, haꞌ ton yaꞌ Amasías. 4 Yajaꞌ xin machi yuchkꞌato yaꞌ hunteqꞌan chꞌen chꞌen latzꞌbꞌabꞌilkanh ismexhahilo yet xahanbꞌal tet tioxh iswiꞌla wonhan, yuto haꞌ tuꞌ chisnhus konhobꞌ isxahanbꞌal yebꞌ teꞌ pom. 5 Yako Komam Jahawil yabꞌil lepra yinh yaꞌ rey Azarías tuꞌ masanto yet yul iskamikal yaꞌ, yuxin nan bꞌay ehayo yaꞌ. Haꞌ yaꞌ Jotam, iskꞌahol yaꞌ ok yilomalo palacio, yebꞌ haꞌ yaꞌ tuꞌ ayko yahawilo Judá.^a

6 Haꞌ hunteqꞌanxa tzet yu yaꞌ rey Azarías, yebꞌ sunil tzet iswatxꞌe, tzꞌibꞌnhebꞌilkano yul hum chitzotel yinh ebꞌyaꞌ rey Judá. 7 Hayet iskam yaꞌ Azarías ismuji yaꞌ bꞌay mujan ismam icham yebꞌ ismam yaꞌ bꞌey iskonhobꞌ yaꞌ David; yok yaꞌ Jotam iskꞌahol yaꞌ reyal seleloj.

8 Hayet 38 (waxajlahonhebꞌ iskawinaj) habꞌilxa yok yaꞌ Azarías isreyalo Judá, yok yaꞌ Zacarías, iskꞌahol yaꞌ iskabꞌ Jeroboam, isreyalo Israel, wajebꞌ ixahaw ok yaꞌ reyal bꞌey Samaria. 9 Yajaꞌ iswatxꞌe yaꞌ istxꞌojal hakaꞌ istxꞌojal bꞌay yako ismul ebꞌyaꞌ yichmam, iskꞌahol naj Nabat, yet yijbꞌan yaꞌ konhobꞌ Israel yaniko ismul.

10 Yajaꞌ yako yaꞌ Salum, iskꞌahol naj Jabes howal yinh yaꞌ Zacarías, ispotxꞌnikamo yaꞌ yaꞌ sata sunil konhobꞌ, yok yaꞌ Salum isreyalo Israel selelo yaꞌ Zacarías.

11 Haꞌ hunteqꞌanxa tzet iswatxꞌe yaꞌ rey Zacarías, tzꞌibꞌnhebꞌil yul hum chitzotel yinh ebꞌyaꞌ rey Israel. 12 Hak tuꞌ yu yijni isbꞌa tzet yalkano Komam Jahawil tet yaꞌ rey Jehú, yet yalni hakaꞌ tiꞌ: «Haꞌ ebꞌnaj hakꞌahol chiꞌok isreyalo Israel masanto yinh iskanh majan uninale,» xhi. Hak tuꞌ xin elikoj.

13 Hayet 39 (bꞌalonhlanhebꞌ iskawinaj) habꞌilxa yok yaꞌ Uzías isreyalo Judá, yok yaꞌ Salum iskꞌahol naj Jabes isreyalo Israel, huneꞌnhe xin ixahaw ok yaꞌ reyal bꞌey Samaria, 14 yuto yaꞌ Manahem, iskꞌahol yaꞌ Gadi, el yaꞌ bꞌey konhobꞌ Tirsa yapni yaꞌ yanoko howal yinh yaꞌ rey Salum bꞌey konhobꞌ Samaria, ismaqꞌnikamo yaꞌ Manahem yaꞌ Salum tuꞌ, yok yaꞌ reyal selelo yaꞌ. 15 Haꞌ hunteqꞌanxa tzet iswatxꞌe yaꞌ rey Salum, tzꞌibꞌnhebꞌilkano yul hum chitzotel yinh ebꞌyaꞌ isreyal Israel. 16 Yet el yaꞌ Manahem yebꞌ issoldado bꞌey konhobꞌ Tirsa, isto yaꞌ yanoko howal yinh konhobꞌ Tifsa, ismaqꞌnikamo yaꞌ sunil anma ay yul konhobꞌ, yebꞌ sunil mak ay yulaj ismajul Tifsa. Ispolnito yaꞌ iskꞌul ebꞌix ix ayxa chꞌini. Ismaqꞌkamo yaꞌ Manahem anma tuꞌ yuto mach ischah anma yaꞌ yul iskonhobꞌ, machi hajlax ispultahil konhobꞌ tuꞌ tet yaꞌ.

17 Hayet 39 (bꞌalonhlahonhebꞌ iskawinaj) habꞌilxa yok yaꞌ Azarías isreyalo Judá, yok yaꞌ Manahem, iskꞌahol naj Gadi isreyalo Israel, 10 (lahonhebꞌ) habꞌil xin ok yaꞌ reyal bꞌey Samaria. 18 Yajaꞌ haꞌ istxꞌojal iswatxꞌe yaꞌ Manahem tuꞌ yul sat Komam Jahawil, mach ispohilo isbꞌa yaꞌ yinh istxꞌojal bꞌay yako yaꞌ Jeroboam, iskꞌahol naj Nabat, ismul yul sata Komam Dios, yet yijbꞌan yaꞌ konhobꞌ Israel yaniko ismul.

19 Yapni naj Pul isreyal Asiria, yanoko howal yinh Israel, yuxin yaqꞌ yaꞌ rey Manahem mil talento chꞌen plata^b tet naj rey Pul, yunhe yok naj kolwa yinh yaꞌ yaniko yip yinh isreyal. 20 Yaniko yaꞌ Manahem chꞌen melyu tuꞌ yibꞌanh konhobꞌ Israel; isqꞌanni yaꞌ chꞌen tohlabꞌal tet hunun ebꞌnaj Israel kaw ay yelapnoj, yebꞌ ebꞌnaj kaw qꞌalom, 50 (lahonhebꞌ yoxkꞌal) siclo melyu chꞌen plata melyu yaqꞌ hunun ebꞌnaj, yunhe yaqꞌlax chꞌen tet naj Pul, isreyal Asiria, matxa xin kankano naj bꞌey Israel.

21 Haꞌ hunteqꞌanxa tzet yu yaꞌ rey Manahem yebꞌ sunil tzet iswatxꞌe yaꞌ, tzꞌibꞌnhebꞌilkano yul hum chitzotel yinh ebꞌnaj rey Israel. 22 Lahwi tuꞌ iskam yaꞌ Manahem, ismujlax yaꞌ bꞌay mujan ismam icham yaꞌ yebꞌ ismam yaꞌ, yok yaꞌ Pekaía, iskꞌahol yaꞌ reyal seleloj.

23 Haxa yet 50 (lahonh yoxkꞌal) habꞌilxa yok yaꞌ Azarías isreyalo Judá, yok yaꞌ Pekaía isreyalo Israel bꞌey Samaria, kabꞌnhe habꞌil xin ok yaꞌ isreyalo Israel. 24 Yajaꞌ haꞌ istxꞌojal iswatxꞌe yaꞌ Pekaía yul sat Komam Jahawil, yuto mach ispohilo isbꞌa yaꞌ yinh istxꞌojal hakaꞌ iswatxꞌe yaꞌ Jeroboam, iskꞌahol naj Nabat, yet yijbꞌan yaꞌ konhobꞌ Israel yaniko ismul.

25 Yajaꞌ pakꞌiko yaꞌ Peka, iskꞌahol naj Remalías yinh yaꞌ rey Pekaía tuꞌ. Yaꞌ Peka, capitán yaꞌ yinh ebꞌnaj issoldado yaꞌ rey Pekaía. Yaniko yaꞌ howal yinh yaꞌ rey yul ispalacio bꞌey Samaria, yaqꞌnikamo yaꞌ yaꞌ rey tuꞌ. Hayet yaniko yaꞌ Peka howal yinh yaꞌ rey tuꞌ tzujan naj Argob yebꞌ naj Arie yinta yaꞌ, yebꞌpaxo xin 50 (lahonh yoxkꞌalwanh) ebꞌnaj ah Galaad. Hayet iskam yaꞌ Pekaía, yok yaꞌ Peka reyal selelo yaꞌ.

26 Haꞌ hunteqꞌanxa tzet yu yaꞌ Pekaía, yebꞌ sunil tzet iswatxꞌe yaꞌ, tzꞌibꞌnhebꞌil yul hum chitzotel yinh ebꞌyaꞌ isreyal Israel.

27 Haxa yet 52 (kabꞌlahonhebꞌ yoxkꞌal) habꞌilxa yok yaꞌ Azarías isreyalo Judá, yok yaꞌ Peka iskꞌahol naj Remalías isreyalo Israel bꞌey Samaria, 20 (hunkꞌal) habꞌil ok yaꞌ isreyalo Israel. 28 Yajaꞌ iswatxꞌe yaꞌ Peka istxꞌojal yul sat Komam Jahawil, mach ispohilo isbꞌa yaꞌ yinh istxꞌojal bꞌay yako yaꞌ Jeroboam, iskꞌahol naj Nabat, yet yijbꞌan yaꞌ konhobꞌ Israel yaniko ismul.

29 Haꞌ yinh hunteqꞌan istzꞌayikal yet ayko yaꞌ Peka isreyalo Israel, yapni naj Tiglat-pileser, isreyal Asiria, howal yinh Israel. Isqꞌoji naj yinh hunteqꞌan konhobꞌ: haꞌ konhobꞌ Ijón, konhobꞌ Abel-bet-maaca, konhobꞌ Janoa, konhobꞌ Cedes, konhobꞌ Hazor, konhobꞌ Galaad, konhobꞌ Galilea yebꞌ sunil txꞌotxꞌ Neftalí; yinito naj rey Asiria ebꞌnaj Israel ay yul hunteqꞌan konhobꞌ tuꞌ preso bꞌey Asiria. 30 Ispakꞌiko yaꞌ Oseas, iskꞌahol naj Ela, howal yinh yaꞌ rey Peka, iskꞌahol naj Remalías, ispotxꞌnikamo yaꞌ yaꞌ, yok yaꞌ Oseas isreyalo Israel selelo yaꞌ Peka. Hayet yuni huneꞌ tuꞌ 20 (hunkꞌalxa) habꞌil yok yaꞌ Jotam iskꞌahol yaꞌ Uzías, isreyalo Judá.

31 Haꞌ hunteqꞌanxa tzet yu yaꞌ Peka yebꞌ sunil tzet iswatxꞌe yaꞌ, tzꞌibꞌnhebꞌil yul hum chitzotel yinh ebꞌyaꞌ rey Israel.

32 Hayet kabꞌxa habꞌil yok yaꞌ Peka, iskꞌahol naj Remalías isreyalo Israel, yok yaꞌ Jotam, iskꞌahol yaꞌ Uzías isreyalo Judá. 33 25 (Howebꞌ iskawinaj) habꞌil yaꞌ Jotam yet yok yaꞌ reyal, 16 (wajlahonhebꞌ) habꞌil ok yaꞌ reyal bꞌey Jerusalén, Jerusa isbꞌi ismiꞌ yaꞌ Jotam tuꞌ, iskutzꞌin yaꞌ Sadoc ye ix.

34 Yaꞌ Jotam haꞌ istoholal iswatxꞌe yaꞌ yul sat Komam Jahawil, iswatxꞌe yaꞌ sunil iskꞌulal isbꞌeybꞌalnhe ismam, haꞌ ton yaꞌ Uzías. 35 Yajaꞌ machi yuchkꞌayo yaꞌ chꞌen chꞌen latzꞌbꞌabꞌilkanh mexhahil yet xahanbꞌal tet tioxh aykanh iswiꞌla wonhan, yuto haꞌ tuꞌ chisnhus konhobꞌ isxahanbꞌal yebꞌ teꞌ pom. Haxa yaꞌ rey Jotam tuꞌ aqꞌni watxꞌeꞌ hunelxa huneꞌ niman pulta kaw nahat yukanh istel, okniko ispultahilo Yatut Komam Jahawil.

36 Haꞌ hunteqꞌanxa tzet yu yaꞌ rey Jotam yebꞌ sunil tzet iswatxꞌe yaꞌ, tzꞌibꞌnhebꞌil yul hum chitzotel yinh ebꞌyaꞌ rey Judá.

37 Haꞌ yinh hunteqꞌan tiempo tuꞌ, ichiko Komam Jahawil ischejni naj Rezín, isreyal Siria, yebꞌ yaꞌ Peka isreyal Israel, iskꞌahol naj Remalías, yaniko howal yinh konhobꞌ Judá. 38 Iskam yaꞌ rey Jotam hakaꞌ yu iskamto ismam icham yaꞌ yebꞌ ismam yaꞌ, ismujlax yaꞌ bꞌay mujan ismam icham yebꞌ ismam bꞌey iskonhobꞌ yaꞌ David, yichmam yaꞌ; yok yaꞌ Acaz, iskꞌahol yaꞌ Jotam tuꞌ reyal Judá, seleloj ismam.