4 Hak tuꞌ yu isto naj tzeh, ischejabꞌ Komam Dios bꞌey Ramot, ay yul ismajul Galaad. 5 Hayet yapni naj bꞌey konhobꞌ, tzꞌonhanayo ebꞌnaj yahawil yinh ebꞌnaj soldado, yalni naj:

—Mamin, hach incapitán, ay hanikꞌ tzet chiwalan tawet, xhi naj tuꞌ. Isqꞌambꞌen yaꞌ Jehú:

—¿Mak honhanh chawala? xhi yaꞌ. Yalni naj tzeh tuꞌ:

—Tawet hach tiꞌ, mam wahawil, xhi naj.

6 Hak tuꞌ yu yahwano yaꞌ Jehú, yokto yaꞌ yul yatut yebꞌ naj tzeh, ischejabꞌ Komam Dios; isjobꞌnayo naj aceite yibꞌanh iswiꞌ yaꞌ, yalni naj tet yaꞌ:

—Hak tiꞌ chiyute yalni Komam Jahawil, isDiosal Israel: “Haninan chachinsayilojan hawokkano isreyalo Israel, inkonhobꞌan.^a 7 Chatanhtzelo sunil yuninal yaꞌ Acab hawahawil, hak tuꞌ xin chu inpajtzenan tet yaꞌ hakaꞌ yu ismalnito yaꞌ ischikꞌil ebꞌnaj halni intzotiꞌan, yebꞌ tet ix Jezabel, ix malnito ischikꞌil ebꞌnaj inchejabꞌan. 8 Kaw yilal chitanhtzelaxilo sunil yuninal yaꞌ Acab, sunil ebꞌnaj winaj; ebꞌnaj chejabꞌ, yebꞌ ebꞌnaj yet isbꞌa ischukil; chitanhtzelaxilo ebꞌnaj sunil xol ebꞌnaj Israel. 9 Lahan chiꞌelkaniko yuninal yaꞌ Acab, hakaꞌ yu intanhtzenilojan yuninal yaꞌ Jeroboam, iskꞌahol naj Nabat, yebꞌ hakaꞌ yu intanhtzenilojan yuninal yaꞌ Baasa, iskꞌahol naj Ahías. 10 Wal ix Jezabel haꞌ metx txꞌiꞌ chileqꞌnikanh ischikꞌil ix bꞌey txꞌotxꞌ Jezreel, chikankano pakꞌno isnimanil ix, machi mak xin chimujni ix,” xhi Komam Dios, xhi naj ischejabꞌ Komam, tet yaꞌ Jehú.

Lahwinhe yalni naj hakaꞌ tiꞌ, ishajni naj teꞌ pulta, ispaxto naj yinh anhe. 11 Haxa yet ismeltzo yaꞌ Jehú iskꞌatanh ebꞌnaj yahawil soldado, isqꞌambꞌen ebꞌnaj tet yaꞌ:

—¿Kꞌulmi maꞌelikoj? ¿Tzet mahul huneꞌ naj suk tuꞌ yalaꞌ tawet? xhi ebꞌnaj. Istaqꞌwi yaꞌ Jehú:

—Hex tiꞌ, heyohta naj, heyohtapaxo tzet mahul naj yalaꞌ, xhi yaꞌ. 12 Istaqꞌwi ebꞌnaj tet yaꞌ:

—¡Leqꞌtiꞌ hach! Wal xin halilo jetanh tzet mahul naj yalaꞌ tawet, xhi ebꞌnaj. Yalni yaꞌ Jehú tet ebꞌnaj:

—Hak tiꞌ mayute yalni Komam Jahawil hakaꞌ tiꞌ: “Haninan chachinsikꞌilojan isreyalo Israel,” xhi Komam, xhi yaꞌ Jehú tet ebꞌnaj.

13 Yinilo ebꞌnaj xil isqꞌap hukaniko yinh, yanayo ebꞌnaj yalanh yoj yaꞌ Jehú bꞌey huneꞌ tzꞌonhobꞌal nahat yekanh, yoqꞌtzen ebꞌnaj cornet, yalni ebꞌnaj hakaꞌ tiꞌ: «Yaꞌ Jehú tiꞌ, reyxa yaꞌ,» xhi ebꞌnaj.

14 Hak tuꞌ yu yok yinh isnabꞌal yaꞌ Jehú isto ispotxꞌnokamo yaꞌ rey Joram. Yaꞌ Jehú, iskꞌahol naj Josafat ye yaꞌ, haxa naj Josafat iskꞌahol naj Nimsi. (Yaꞌ Joram tuꞌ, to yaꞌ yebꞌ sunil ebꞌnaj soldado Israel bꞌey Ramot ay yul ismajul Galaad yu iskolnilo konhobꞌ tuꞌ yul isqꞌabꞌ naj Hazael, isreyal Siria. 15 Yajaꞌ hayet lanhan yaqꞌni naj Hazael, isreyal ebꞌnaj Siria, howal yinh ebꞌnaj Israel, yok islahwilal yaꞌ rey Joram yu ebꞌnaj Siria, yuxin meltzo yaꞌ rey Joram bꞌey Jezreel, yu yanhten isbꞌa.) Yuxin yal yaꞌ Jehú tet ebꞌnaj yetbꞌi hakaꞌ tiꞌ: «Tato cheyoche chinokan reyal, machi hunu mak bꞌey konhobꞌ tiꞌ chechato halno bꞌey konhobꞌ Jezreel,» xhi yaꞌ. 16 Lahwi tuꞌ, yahto yaꞌ Jehú yibꞌanh ischeh, isto yaꞌ bꞌey Jezreel, istukleꞌ yaꞌ rey Joram, yuto yaꞌay yaꞌ. Haꞌ bꞌey tuꞌ aykꞌo yaꞌ Ocozías, isreyal Judá, apnipaxo yaꞌ istukleꞌ yaꞌ rey Joram.

17 Haxa yet yilnito naj soldado ayko istanheno konhobꞌ Jezreel yul huneꞌ nha nahat yekanh tato lanhan yapni yaꞌ Jehú yebꞌ hunbꞌulan ebꞌnaj winaj, yalni naj tet yaꞌ rey Joram:

—Mam rey, ay hunteqꞌan ebꞌnaj lanhan yuli, xhi naj. Yalni yaꞌ Joram tet naj:

—Chejto hunu naj soldado yibꞌanh cheh yilaꞌ mak anmahil ebꞌnaj, kat isqꞌambꞌen naj tet ebꞌnaj hakaꞌ tiꞌ: “¿Ham aqꞌankꞌulal chexhul heyalaꞌ?” xhihojabꞌ naj tet ebꞌnaj, xhi yaꞌ rey Joram.

18 Hak tuꞌ yu isto naj soldado yibꞌanh cheh yilaꞌ mak anmahil ebꞌnaj chiꞌapni tuꞌ, haxa yet ischahnayo naj ebꞌnaj yalni naj:

—Haꞌ yaꞌ rey makinchejnitijan inqꞌambꞌeꞌan teyet hakaꞌ tiꞌ: “¿Ham aqꞌankꞌulal chexhul heyalaꞌ?” xhi naj. Istaqꞌwi yaꞌ Jehú tet naj:

—¿Tzet hawok yinh yuxin chaqꞌambꞌe tato ay aqꞌankꞌulal? Hach kachan, okanh tzujno wintajan, xhi yaꞌ.

Hayet yilni naj chitanhen konhobꞌ Jezreel tato matxa meltzo naj chejlaxto tuꞌ yayto naj yalno tet yaꞌ rey:

—Mamin, haꞌ naj soldado maxachejtoj maꞌapni naj ischahbꞌaꞌ ebꞌnaj, yajaꞌ matxa mameltzo naj, xhi naj.

19 Yuxin chejlaxto hunxa naj, hayet yapni naj ischahno ebꞌnaj, yalni naj:

—Haꞌ yaꞌ rey makinchejnitijan inqꞌambꞌeꞌan tawet: ¿Ham aqꞌankꞌulal chexhul heyalaꞌ? xhi naj. Istaqꞌwi yaꞌ Jehú tet naj:

—¿Tzet hawok yinh yuxin chaqꞌambꞌe tato ay aqꞌankꞌulal? Hach kachan, okanh tzujno wintajan, xhi naj.

20 Yuxin aypaxti naj chitanhen konhobꞌ tuꞌ yalaꞌ tet yaꞌ rey Joram hunelxa:

—Mamin, haꞌ naj maxachejto tuꞌ, maꞌapni naj iskꞌatanh ebꞌnaj, yajaꞌ xin matxa mameltzopaxo naj chiwilan. Haꞌ naj chihul tuꞌ kochnhe haꞌ yaꞌ Jehú, iskꞌahol naj Nimsi, yuto haktanhe tuꞌ yekꞌ yaꞌ, kꞌiraniko anhe yu yaꞌ, xhi naj.

21 Yuxin yal yaꞌ Joram tato chiꞌalaxiko noꞌ cheh yinh teꞌ carruaje, isto yaꞌ Joram isreyal Israel, yebꞌ yaꞌ Ocozías, isreyal Judá, yul hunun iscarruaje, isto ebꞌyaꞌ ischahno yaꞌ Jehú. Ischahnayo ebꞌyaꞌ yaꞌ bꞌey istxꞌotxꞌ naj Nabot bꞌey Jezreel. 22 Hayet yilni yaꞌ Joram yaꞌ Jehú, yalni yaꞌ:

—¿Jehú, ham aqꞌankꞌulal chachhul hawalaꞌ? xhi yaꞌ. Istaqꞌwi yaꞌ Jehú tet yaꞌ:

—¿Tzet yinh chito haqꞌambꞌe tato ay aqꞌankꞌulal yet chiswatxꞌen hamiꞌ Jezabel istxꞌojal, chiyinipaxayo isbꞌa sata komon tioxh, kat iskunli? xhi yaꞌ Jehú.

23 Hak tuꞌ yu ismeltzo yaꞌ Joram, yelkanh yaꞌ, yalni yaꞌ tet yaꞌ Ocozías:

—¡Ocozías, kamikal huneꞌ tiꞌ! xhi yaꞌ.

24 Isqꞌojnito yaꞌ Jehú isbꞌaqꞌ islitꞌ yinh yaꞌ Joram, yapni yinh istel yichinh yaꞌ, isqꞌaxponikto isbꞌaqꞌ teꞌ yul yanma yaꞌ, iskam yaꞌ yul iscarruaje. 25 Yalni yaꞌ Jehú tet naj Bidcar, yahawil yinh issoldado: «Ilti yaꞌ yul carruaje tuꞌ, kat haqꞌojnikanilto yaꞌ sat istxꞌotxꞌ naj Nabot bꞌey Jezreel tiꞌ. Natij tzet yal Komam Jahawil yet tzujan honhiko yinta issoldado yaꞌ Acab, ismam yaꞌ Joram tiꞌ yet yalni Komam Jahawil hakaꞌ tiꞌ: 26 “Hakaꞌtikꞌa yu wilnihan hamaqꞌnikamo naj Nabot yebꞌ yuninal yet ewi, hak tuꞌ chu inpajtzenkanojan tawet bꞌaytikꞌa hamaqꞌkamo naj Nabot,” xhi Komam Jahawil.^b Yuxin ilti yaꞌ rey Joram yul carruaje tuꞌ, kat haqꞌojnito yaꞌ sat istxꞌotxꞌ naj Nabot tiꞌ, yunhe yijni isbꞌa hakaꞌ yu yalnikano Komam Jahawil,» xhi yaꞌ Jehú.

27 Hayet yilni yaꞌ Ocozías, isreyal Judá huneꞌ tuꞌ, yelkanh yaꞌ, isto yaꞌ yul isbꞌelal huneꞌ nha ay bꞌey hunteqꞌanxa tzꞌunubꞌ; yajaꞌ ok tzujno yaꞌ Jehú yinta yaꞌ, yalni yaꞌ: «¡Maqꞌwepaxo kamo yaꞌ tiꞌ yul iscarruaje!» xhi yaꞌ.

Yuxin hayet lanhan yahto yaꞌ Ocozías yinh istzalanil Gur, iskawilal Ibleam yok islahwilal yaꞌ yu ebꞌnaj issoldado yaꞌ Jehú. Hak tuꞌ yu yelkanh yaꞌ Ocozías, isto yaꞌ bꞌey Meguido, yajaꞌ kam yaꞌ bꞌey tuꞌ.

28 Lahwi tuꞌ yilaxto isnimanil yaꞌ bꞌey Jerusalén yul huneꞌ carruaje yu ischejabꞌ yaꞌ, ismujlax yaꞌ bꞌay mujbꞌil ismam, yebꞌ ismam icham bꞌey iskonhobꞌ yaꞌ David.

29 Hunlahonhebꞌxa habꞌil yok yaꞌ Joram, iskꞌahol yaꞌ Acab isreyalo Israel yet yok yaꞌ Ocozías tuꞌ reyal yinh Judá.

30 Lahwi tuꞌ, isto yaꞌ Jehú bꞌey Jezreel, hayet yabꞌen ix Jezabel tato apni yaꞌ bꞌey tuꞌ, yok ix yanhteno sat, iswatxꞌento ix xil iswiꞌ, yelti tꞌanhno ix yul huneꞌ ventanah. 31 Haxa yet lanhan yokto yaꞌ Jehú yul istiꞌ ispultahil konhobꞌ, yalni ix Jezabel tet yaꞌ:

—¿Tzet xhi hakꞌul, hach tiꞌ Zimri? Hach tiꞌ hawaqꞌ kamo hawahawil, xhi ix.^c 32 Istꞌanhxikanh yaꞌ Jehú yinh huneꞌ ventanah tuꞌ, yalni yaꞌ hakaꞌ tiꞌ:

—¿Mak hex ayexiko wetbꞌihojan? ¿mak hex? xhi yaꞌ Jehú.

Yelti tꞌanhno kawanh oxwanh ebꞌnaj chimunla iskꞌatanh ix yinh yaꞌ Jehú. 33 Yalni yaꞌ Jehú tet ebꞌnaj:

—¡Tenweyti huneꞌ ix tuꞌ! xhi yaꞌ.

Istenchanayti ebꞌnaj ix Jezabel, isbꞌakchato bꞌitzꞌabꞌ yebꞌ noꞌ cheh yu ischikꞌil ix yet yaykꞌayti ix tuꞌ, haxa xin ischeh yaꞌ Jehú tuꞌ xanhnikanayo ix.

34 Yokto yaꞌ Jehú yul konhobꞌ tuꞌ, iswaꞌ yaꞌ, haxa yet lahwi iswaꞌkanilo yaꞌ xin, yalni yaꞌ tet issoldado:

—As ilwe huneꞌ ix ix tzꞌaktiꞌnhebꞌil tuꞌ, kat hemujni ix, yuto iskutzꞌin rey ye ix, xhi yaꞌ.

35 Yajaꞌ haxa yet yapni ebꞌnaj ismujno ix, haxanhe isbꞌajil iswiꞌ ix yebꞌ yoj ix yebꞌ isqꞌabꞌ ix ilcha yu ebꞌnaj. 36 Ismeltzo ebꞌnaj iskꞌatanh yaꞌ Jehú, yalni ebꞌnaj huneꞌ tuꞌ tet yaꞌ. Yalni yaꞌ tet issoldado hakaꞌ tiꞌ:

—Haꞌ huneꞌ tiꞌ Istzotiꞌ Komam Dios yaqꞌ bꞌinaho yaꞌ Elías, yaꞌ tisbita, ischejabꞌ Komam yet yalni yaꞌ hakaꞌ tiꞌ: “Haꞌ metx txꞌiꞌ chikꞌuxnito isnimanil ix Jezabel bꞌey txꞌotxꞌ Jezreel. 37 Haꞌ isnimanil ix tuꞌ tonhe chiꞌekꞌkano bꞌalo sat txꞌotxꞌ bꞌey Jezreel hakaꞌ chu yekꞌkano bꞌal-la istzaꞌ no noqꞌ sat txꞌotxꞌ. Yuxin machi hunu mak chalni: ‘Haꞌ huneꞌ tiꞌ, haꞌ isnimanil ix Jezabel, mach xhihoj,’ xhikano Komam,” xhi yaꞌ Elías, xhi yaꞌ Jehú.