Istanhtzelo yaꞌ Jehú sunil yuninal yaꞌ Acab
10
Wal yaꞌ rey Acab ay 70 (lahonhebꞌ iskanhwinaj) iskꞌahol yaꞌ bꞌey konhobꞌ Samaria, yuxin istzꞌibꞌnhe yaꞌ Jehú carta yanito yaꞌ bꞌey Samaria tet ebꞌnaj yahawil Jezreel, yebꞌ tet ebꞌnaj ichamta winaj, yebꞌ tet ebꞌnaj yilomal yuninal yaꞌ Acab, yalnito yaꞌ hakaꞌ tiꞌ: 2 «Haꞌ tekꞌatanh ay iskꞌahol yaꞌ heyahawil, yebꞌ tekꞌatanh ay ebꞌnaj iqꞌnhe iscarruaje yaꞌ, yebꞌ ebꞌnaj soldado chiꞌah yibꞌanh cheh; yulpaxo xin iskonhobꞌ yaꞌ ay hex, konhobꞌ kaw kꞌul hoyaniko iskꞌubꞌal, aypaxikꞌo ischꞌen yaꞌ yet howal tekꞌatanh, yuxin chinhe apni huneꞌ carta tiꞌ teyet,a 3 kat hesayniko hunu naj iskꞌahol heyahawil tuꞌ kaw kꞌul yebꞌ tohol isbꞌeybꞌal xol yuninal heyahaw tuꞌ, kat hetzꞌonhbꞌaniko naj reyal yul istzꞌonhobꞌal ismam, kat xin heyaqꞌni howal, yunhe iskolchakano yuninal heyahawil tuꞌ,» xhito yaꞌ Jehú yul teꞌ carta.4 Hayet yabꞌen ebꞌnaj huneꞌ tuꞌ, yok huneꞌ niman xiwkilal yinh ebꞌnaj, yalni ebꞌnaj hakaꞌ tiꞌ: «Machi qꞌoji kawanh ebꞌyaꞌ rey yinh yaꞌ Jehú, ¿hanhonh tom xin chonhqꞌoji yinh yaꞌ?» xhi ebꞌnaj.
5 Yalnito naj chiꞌilni yatut yaꞌ rey yebꞌ naj gobernador yebꞌ ebꞌnaj ichamta winaj yebꞌ ebꞌnaj chitanhen yuninal yaꞌ rey tuꞌ tet yaꞌ Jehú hakaꞌ tiꞌ: «Hanhonhtiꞌanh hachejabꞌ chijukojanh, hinan honhanh koyijenanh tzet chawala, mach xin chikosayanh hunuxa mak chiꞌok koreyalojanh, yuxin watxꞌe tzet choche hakꞌul,» xhito ebꞌnaj.
6 Yuxin istzꞌibꞌnheto yaꞌ Jehú huneꞌxa teꞌ carta yinh iskayel tet ebꞌnaj, yalnito yaꞌ hakaꞌ tiꞌ: «Ta cheyoche chexok wetbꞌihojan, yebꞌ ta cheyije tzet chiwalan, iwelo iswiꞌ sunil ebꞌnaj iskꞌahol heyahawil, kat heyiniti iswiꞌ ebꞌnaj tuꞌ wetan bꞌey Jezreel yet hekal hakaꞌ huneꞌ hora tiꞌ,» xhito yaꞌ Jehú yul iscarta.
Haꞌ ebꞌnaj 70 (lahonh iskanhwinajwanh) iskꞌahol isreyal ebꞌnaj tuꞌ, huneꞌnhe ay ebꞌnaj yul konhobꞌ iskꞌatanh ebꞌnaj nime winaj kaw ay yelapno chiꞌilni ebꞌnaj. 7 Yuxin hayet ischahni ebꞌnaj iscarta yaꞌ Jehú, istzabꞌnayo ebꞌnaj iskꞌahol yaꞌ rey, yinilo ebꞌnaj iswiꞌ ebꞌnaj 70 (lahonh iskanhwinajwanh) tuꞌ, yanayto ebꞌnaj yul hunteqꞌan motx, yanito ebꞌnaj bꞌey Jezreel. 8 Yapni huneꞌ naj chejabꞌ yalno tet yaꞌ Jehú hakaꞌ tiꞌ:
—Mahul aqꞌlaxokano iswiꞌ ebꞌnaj iskꞌahol yaꞌ rey, xhi naj. Yalni yaꞌ Jehú tet naj chejabꞌ tuꞌ:
—Kabꞌ tenan cheyuteyo iswiꞌ ebꞌnaj tuꞌ bꞌay chonhokto yul ispultahil konhobꞌ, haꞌ tuꞌ xin chikankanoj masanto yet hekal, xhi yaꞌ Jehú.
9 Haxa yet hunxa tzꞌayik yelto yaꞌ Jehú, yok linhno yaꞌ, yalni yaꞌ tet konhobꞌ hakaꞌ tiꞌ: «Hex tiꞌ, machi hemul, haninan inmaqꞌkamojan koreyal yu winilojan yinh ismunil, yajaꞌ ¿mak mamaqꞌnikamo hunteqꞌan ebꞌnaj tiꞌ? 10 Wal tinanh cheyohtanheloj tato haꞌ tzet yalkano Komam Jahawil yinh yaꞌ rey Acab mach ekꞌto yet yijni isbꞌa hakaꞌ yu yalnikanoj. Wal xin mayij isbꞌa tzet yalkano Komam Jahawil tet yaꞌ Elías, ischejabꞌ,» xhi yaꞌ Jehú.b
11 Ispotxꞌkamo yaꞌ Jehú sunil ebꞌnaj iskꞌahol yaꞌ rey Acab kantokanoj bꞌey Jezreel. Ispotxꞌnikamo yaꞌ ebꞌnaj nime winaj munla yinta yaꞌ Acab yul palacio yebꞌ sunil mak ayto yu isbꞌa yebꞌ yaꞌ, yebꞌ ebꞌnaj issacerdote yaꞌ Acab, matxa hunu ebꞌnaj tuꞌ kankanoj.
12 Lahwi tuꞌ, yel yaꞌ Jehú bꞌey tuꞌ, isto yaꞌ bꞌey Samaria, hayet ayko yaꞌ yinh isbꞌel, yapni yaꞌ bꞌey huneꞌ teꞌ nha bꞌay chiyilo ebꞌnaj tanhem meꞌ xil ismeꞌ. 13 Haꞌ bꞌey tuꞌ xin ischahleyo isbꞌa yaꞌ yebꞌ ebꞌnaj yuxhta yaꞌ Ocozías, yaꞌ oklena isreyalo Judá, isqꞌambꞌen yaꞌ tet ebꞌnaj:
—¿Mak anmahil hex tiꞌ? xhi yaꞌ. Istaqꞌwi ebꞌnaj tet yaꞌ:
—Hanhonhtiꞌanh yuxhta yaꞌ rey Ocozías jehanh, makonhtitanh koqꞌambꞌehanh hanikꞌ ye ebꞌnaj iskꞌahol yaꞌ rey yebꞌ ebꞌnaj yunin ix reina, xhi ebꞌnaj. 14 Yuxin yal yaꞌ Jehú tet issoldado:
«Tzabꞌweyo hunteqꞌan ebꞌnaj tiꞌ,» xhi yaꞌ.
Lahwi istzabꞌlaxayo ebꞌnaj, ispotxꞌlaxkamo ebꞌnaj bꞌey huneꞌ kꞌuh ay bꞌey teꞌ nha tuꞌ, 42 (kabꞌ yoxkꞌal) isbꞌisil ebꞌnaj winaj, matxa xin hunu ebꞌnaj tuꞌ kolchakanoj.
15 Hayet yel yaꞌ Jehú bꞌey tuꞌ, ischahni isbꞌa yaꞌ yebꞌ yaꞌ Jonadab, iskꞌahol naj Recab;c hayet lahwi istioxhli yaꞌ Jehú tet yaꞌ, isqꞌambꞌen yaꞌ tet yaꞌ Jonadab:
—¿Iskꞌulalmi chiꞌekꞌ yul hawanma, hakaꞌ iskꞌulal chiꞌekꞌ yul wanmahan tawinh? xhi yaꞌ Jehú. Istaqꞌwi yaꞌ Jonadab:
—Hoꞌ, kꞌul chꞌekꞌ yinh wanmahan tawinh, xhi yaꞌ. Yalni yaꞌ Jehú tet yaꞌ:
—Tato hak tuꞌ, ati haqꞌabꞌ wetan, xhi yaꞌ Jehú. Yanito yaꞌ Jonadab isqꞌabꞌ tet yaꞌ, ischahnahto yaꞌ Jehú yaꞌ yul iscarruaje. 16 Yalni yaꞌ Jehú tet yaꞌ:
—Tonh wintajan, kat hawilno hanta intzꞌeꞌalan yinh Komam Jahawil, xhi yaꞌ. Yuxin to yaꞌ Jonadab yinta yaꞌ yul iscarruaje tuꞌ.
17 Haxa yet yapni yaꞌ Jehú bꞌey Samaria ispotxꞌnikamo yaꞌ sunil ebꞌnaj iskꞌahol yaꞌ rey Acab kantokano bꞌey Samaria; sunil ebꞌnaj tuꞌ istanhtzekanilo yaꞌ Jehú, hakaꞌtikꞌa yu yaqꞌni Komam Jahawil yalaꞌ yaꞌ Elías.
Istanhtzelo yaꞌ Jehú anma chiyiyo isbꞌa tet tioxh Baal
18 Lahwi tuꞌ, iskutxbꞌaniko yaꞌ Jehú sunil konhobꞌ, yalni yaꞌ tet konhobꞌ tuꞌ: «Haꞌ yaꞌ Acab hanikꞌnhe yiyo isbꞌa yaꞌ tet tioxh Baal, yajaꞌ wal hanintiꞌan xin ekꞌbꞌalto chiwiyo hinbꞌahan tet tioxh Baal. 19 Yuxin wal tinanh awtewe sunil ebꞌnaj ischejabꞌ tioxh Baal yebꞌ sunil mak chiyiyo isbꞌa tet Baal, yebꞌ sunil ebꞌnaj issacerdote tioxh Baal. Sunilojabꞌ ebꞌnaj chihuli yuto chiwaltehan hunu niman xahanbꞌal tet tioxh Baal; haꞌ mak mach chihuli chꞌaqꞌlaxkamoj,» xhi yaꞌ.
Yajaꞌ tonhe yal yaꞌ Jehú huneꞌ tuꞌ, yunhe istanhtzenkanilo yaꞌ sunil mak chiyiyo isbꞌa tet tioxh Baal. 20 Lahwi tuꞌ, yalni yaꞌ Jehú:
«Wal tinanh kutxbꞌaweko anma, yuto chijekꞌtze huneꞌ tzꞌayik qꞌinh tet tioxh Baal,» xhi yaꞌ.
Hak tuꞌ yu iskutxbꞌaniko isbꞌa sunil konhobꞌ. 21 Yanipaxto yaꞌ Jehú ischejabꞌ yalno tet sunil konhobꞌ Israel. Iskutxbꞌaniko isbꞌa sunil makta chiyiyo isbꞌa tet Baal, machi hunu mak tiꞌ machi apni. Iskuxbꞌako isbꞌa anma yul yatut tioxh Baal, kaw xin nohkanilo yul yatut tioxh tuꞌ yu anma.d 22 Yalni yaꞌ Jehú tet naj yahawil yeko yinh yilni xil isqꞌap ebꞌnaj ischejabꞌ tioxh Baal: «Iweti xil isqꞌap ebꞌnaj tiꞌ,» xhi yaꞌ.
Hak tuꞌ yu yiniti naj qꞌap xilqꞌape tuꞌ. 23 Lahwi tuꞌ yokto yaꞌ Jehú yebꞌ yaꞌ Jonadab, iskꞌahol naj Recab yul yatut tioxh Baal. Yalni yaꞌ Jehú tet ebꞌnaj ischejabꞌ Baal: «Kaw kam cheyilwekanoj tato machi hunu ischejabꞌ Komam Jahawil ayikti bꞌey tiꞌ, wal xin to hanhe mak chiyiyo isbꞌa tet tioxh Baal,» xhi yaꞌ.
24 Hayet yokto ebꞌnaj ischejabꞌ tioxh Baal isnhusno xahanbꞌal yebꞌ yalten hunteqꞌanxa yebꞌalqꞌabꞌe yul yatut tioxh Baal, yaniko yaꞌ Jehú 80 (kanhwinaj) ebꞌnaj issoldado istiꞌ ispultahil yatut tioxh tuꞌ, yalni yaꞌ tet ebꞌnaj: «Tato ay hunu ebꞌnaj chiwakojan yul heqꞌabꞌ tiꞌ chebꞌejtzotoj, hexxa chexkam seleloj,» xhi yaꞌ.
25 Haxa yet lahwi isnhusni ebꞌnaj isxahanbꞌal tet tioxh Baal, yalni yaꞌ Jehú tet ebꞌnaj chitanheni yebꞌ tet ebꞌnaj capitán: «Okanhwetoj kat hepotxꞌnikamo sunil mak chiyiyo isbꞌa tet tioxh Baal tiꞌ, machi hunu mak tiꞌ chebꞌejtzotoj,» xhi yaꞌ.
Hak tuꞌ yu ispotxꞌnikamo ebꞌnaj sunil anma yu chꞌen espada, iskankano pakꞌno isnimanil sunil anma, yokto ebꞌnaj bꞌay ay tioxh Baal, 26 yinilti ebꞌnaj hunteqꞌanxa tioxh ayikto yul yatut tioxh tuꞌ, isnhusnito ebꞌnaj. 27 Ismaqꞌnipoho ebꞌnaj tioxh Baal, yuchkꞌanayo ebꞌnaj yatut tioxh, yokkano tzahyobꞌal yu anma masanto tinanh.
28 Hak tuꞌ yu istanhtzenkanilo yaꞌ Jehú tioxh Baal xol anma Israel. 29 Waxanhka istanhtzelo yaꞌ tioxh Baal, yajaꞌ mach ishekꞌilo isbꞌa yaꞌ yinh ismul yaꞌ Jeroboam, iskꞌahol naj Nabat yet yijbꞌan yaꞌ konhobꞌ Israel yaniko ismul; yuto machi yilo yaꞌ Jehú hunteqꞌan yechel wakax oronhe aykanh bꞌey Bet-el yebꞌ bꞌey Dan. 30 Lahwi tuꞌ yalni Komam Jahawil tet yaꞌ Jehú: «Yu haꞌ iskꞌulal yebꞌ istoholal maxawatxꞌe yul insatan, hatanhtzenilo yuninal yaꞌ Acab hakaꞌ chal wanmahan, yuxin haꞌ ebꞌnaj hakꞌahol chꞌok isreyalo Israel masanto yet iskanh majanil yuninal hawuninal,» xhi Komam tet yaꞌ.
31 Yajaꞌ mach yako yaꞌ Jehú yinh isnabꞌal isyijen ischejbꞌanil Komam Jahawil, isDiosal Israel yinh sunil yanma. Mach xin ispohilo isbꞌa yaꞌ yinh ismul yaꞌ Jeroboam, yaꞌ ijbꞌan konhobꞌ Israel yaniko ismul.
32 Haꞌ yinh hunteqꞌan tzꞌayik tuꞌ yicheko Komam Jahawil yinilo istxꞌotxꞌ ebꞌnaj Israel; isqꞌoji naj Hazael isreyal Siria yinh ebꞌnaj, yinilo naj istxꞌotxꞌ ebꞌnaj ayko istiꞌla ismohon ebꞌnaj Siria, 33 ichiti bꞌey haꞌ Jordán bꞌay chiꞌahilo tzꞌayik, yinilo ebꞌnaj sunil txꞌotxꞌ Galaad, txꞌotxꞌ Gad, txꞌotxꞌ Rubén yebꞌ txꞌotxꞌ Manasés, yichipaxti bꞌey Aroer, iskawilal haꞌ nichꞌan haꞌ Arnón masanta bꞌey txꞌotxꞌ Galaad yebꞌ txꞌotxꞌ Basán.
34 Haꞌ hunteqꞌanxa tzet yu yaꞌ Jehú yebꞌ sunil tzet iswatxꞌe yaꞌ yebꞌ ishelanil yaꞌ, tzꞌibꞌnhebꞌilkano yul hum chitzotel yinh ebꞌyaꞌ isreyal Israel. 35 Lahwi tuꞌ iskam yaꞌ Jehú hakaꞌ yu iskamto ismam icham yebꞌ ismam yaꞌ, ismujlax yaꞌ bꞌey Samaria, yok yaꞌ Joacaz, iskꞌahol yaꞌ reyal seleloj. 36 28 (Waxajebꞌ iskawinaj) habꞌil ok yaꞌ Jehú isreyal Israel bꞌey txꞌotxꞌ Samaria.