Ix reina ah Sabá, apni ix istukleꞌ yaꞌ rey Salomón
10
Hayet yabꞌenilo ix reina ah Sabá isqꞌumal ishelanil yaꞌ rey Salomón yaqꞌ Komam Dios, Jahawil, yul ix yilweno yaꞌ, isqꞌambꞌen ix hunteqꞌan qꞌambꞌebꞌal kaw yaꞌtaj tet yaꞌ. 2 Yapni ix bꞌey Jerusalén, kaw xin niman ebꞌnaj ischejabꞌ ix tzujan yintaj, iqꞌbꞌilpaxo noꞌ camello yu ix, kaw al yet noꞌ yu anh kaw xuqꞌ sam, kaw nimanpaxo chꞌen oro iqꞌbꞌilpaxo yu ix, yebꞌ ej chꞌen chꞌen kaw kꞌulejchꞌan jilni. Hayet yapni ix iskꞌatanh yaꞌ rey Salomón, isqꞌambꞌen ix sunil tzet ay yul yanma tet yaꞌ. 3 Ispajtzen yaꞌ sunil isqꞌambꞌebꞌal ix; wal xin sunil yalilo yaꞌ. 4 Hayet yabꞌen ix reina ah Sabá ishelanil yaꞌ rey Salomón yebꞌ yet yilni ix yatut yaꞌ iswatxꞌe, 5 yebꞌ tzet chislo yaꞌ sat mexha, yebꞌ bꞌay ay ebꞌnaj oficial, yebꞌ ebꞌnaj chejabꞌ chibꞌatxnikꞌo vino, yebꞌ xil isqꞌabꞌ ebꞌnaj kaw kꞌul aykoj. Yilnipaxo ix xahanbꞌal chisnhus yaꞌ rey Salomón yul Yatut Komam Jahawil. Haꞌ yinh sunil tuꞌ xin kaw kꞌaykanilo iskꞌul ix yilni. 6 Yalni ix tet yaꞌ rey Salomón: «Toꞌan kaw yel sunil tzet wabꞌehan bꞌey inkonhobꞌan yinh tzetaj hawatxꞌe yebꞌ yitzꞌatil hawiꞌ. 7 Wal walnihan tonhem chal-laxi, yajaꞌ wal tinanh hankawinan manhulan wilaꞌan yu isbꞌaqꞌ insatan. Haꞌ tzet hal-lax wettuꞌan, mach chiꞌapni hakaꞌ tzet lanhan wilnitiꞌan, wal xin kaw nimankano hahelanil yebꞌ haqꞌalomal sata tzet hal-lax wetan. 8 Kaw saqꞌal yet ebꞌnaj winaj chimunla takꞌatanh, yebꞌ ebꞌnaj hachejabꞌ aynhetikꞌako tasataj, yuto chiyabꞌe ebꞌnaj hawalni yitzꞌatil hawiꞌ. 9 Hal-laxojabꞌ kꞌul-la tzotiꞌ yinh Komam Jahawil, haDiosal, yuto chitzala tawinh kach yaniko yahawilo Israel, yuto kaw xahan ay Israel tiꞌ yu Komam Jahawil, yuxin kach yako isreyaloj yunhe hawatxꞌen istoholal yebꞌ isyelal,» xhi ix tet yaꞌ rey Salomón.10 Lahwi tuꞌ yaqꞌni ix 120 talento chꞌen oro tet yaꞌ, yebꞌ kaw nimankano anh kaw xuqꞌ sam, yebꞌ chꞌen chꞌen kaw kꞌulejchꞌankanoj. Machi hunu mak aqꞌni anh kaw xuqꞌ sam yinh kaw niman hakaꞌ yaqꞌ ix reina ah Sabá tet yaꞌ rey Salomón tuꞌ.
11 Nanyepaxo chꞌen tit yul barco yu naj rey Hiram tet yaꞌ rey Salomón, haꞌ bꞌey Ofir yiti naj chꞌen, yebꞌpaxo teꞌ sándalo, yebꞌ chꞌen chꞌen kꞌulejchꞌan jilni yaqꞌ tet yaꞌ rey Salomón. 12 Haꞌ teꞌ sándalo tuꞌ ok iswarandahil Yatut Komam Dios yebꞌ xin iswarandahil yatut yaꞌ Salomón. Haꞌ yinh teꞌ sándalo tuꞌ watxꞌelaxpaxayo teꞌ arpa. Haꞌ yinh teꞌ sándalo tuꞌ xin watxꞌelaxpaxo teꞌ salterio chiyako ebꞌnaj bꞌitnom. Machi hunelo tiꞌ xaꞌilaxti hanta teꞌ sándalo hakaꞌ ilaxti tet yaꞌ Salomón, wal tinanh matxa xin bꞌay chiꞌilcha teꞌ.
13 Haꞌ yaꞌ rey Salomón tuꞌ yaqꞌ yaꞌ sunil tzet yoche ix reina ay bꞌey Sabá, yebꞌ xin sunil tzet isqꞌan ix tet yaꞌ, yebꞌ sunil tzet el yinh iskꞌul yaꞌ yaqꞌ tet ix. Lahwi tuꞌ ispaxto ix bꞌey iskonhobꞌ yebꞌ ebꞌnaj ischejabꞌ tzujan yintaj.
Kaw qꞌalom yaꞌ Salomón yebꞌ xin kaw ay ismay yaꞌ
14 Haꞌ yalil chꞌen oro iskꞌambꞌanil txꞌo txꞌotxꞌ chischah yaꞌ rey Salomón yinh hunun habꞌil, chꞌahapno isbꞌisil chꞌen yinh 666 talento.a 15 Yajaꞌ mach ayoko istohlabꞌal ebꞌnaj txonhom, yebꞌ ebꞌnaj chiꞌiniti anh kaw xuqꞌ sam, yebꞌ istohlabꞌal ebꞌnaj rey ay bꞌey Arabia, yebꞌ ebꞌnaj gobernador ay sat txꞌo txꞌotxꞌ, istzꞌajoj. 16 Yaqꞌnipaxo watxꞌo yaꞌ rey Salomón 200 chꞌen escudo kaw nimej yinh chꞌen oro somlaxi, 600 siclo chꞌen oro ok yinh hunun escudo tuꞌ.b 17 Yaqꞌnipaxo watxꞌo yaꞌ 300 hunteqꞌanxa escudo oro, oxebꞌ libra chꞌen oro ok yinh hunun, yanikto yaꞌ chꞌen escudo tuꞌ yul nha chiyij Qꞌebꞌtala Líbano.c 18 Ischejnipaxo yaꞌ watxꞌelaxo huneꞌ niman tzꞌonhobꞌal yet ebꞌnaj rey, chꞌen marfil alaxiko yinh, yalaxpaxiko oro kaw kꞌul yinh. 19 Huneꞌ tzꞌonhobꞌal tuꞌ wajebꞌ yekanh isqꞌochal, haꞌ istel yichinh petan yehi, ay xin hunun isqꞌabꞌ yinh qꞌaxqꞌep iskꞌul tzꞌonhobꞌal tuꞌ, iskawilal hunun isqꞌabꞌ tuꞌ, linhankanh hunun yechel noꞌ bꞌalam.d 20 Haꞌ yinh qꞌaxqꞌep iskꞌul wajebꞌ qꞌoch tuꞌ, aykanh 12 (kabꞌlahonhkꞌonh) yechel noꞌ bꞌalam. Machi hunuxa naj rey watxꞌenhe istzꞌonhobꞌal hakaꞌ yet yaꞌ Salomón tuꞌ. 21 Hakpax tuꞌ isvaso yaꞌ rey Salomón oro chꞌen, hakpax tuꞌ sunil sekꞌ chiꞌokniko yul nha chiyij Isqꞌebꞌtala Líbano oropaxoj; Machi hunu munlabꞌal tuꞌ plata chꞌen okniko yinh, yuto yinh istiempohal yaꞌ rey Salomón, machi yelapno chꞌen plata. 22 Yuto txꞌiꞌal isbarco yaꞌ Salomón watxꞌebꞌil bꞌey konhobꞌ Tarsis, yebꞌ hunteqꞌan isbarco naj rey Hiram ayayo istiꞌ haꞌ mar, hunta el yinh oxox habꞌil chiꞌilaxti teꞌ aqꞌo oro, yebꞌ chꞌen plata, chꞌen marfil, yebꞌ noꞌ max, yebꞌ noꞌ pavo real tet yaꞌ rey Salomón.
23 Haꞌ yaꞌ rey Salomón tuꞌ, haꞌ yaꞌ kaw ekꞌbꞌalkano isqꞌalomal sata sunil ebꞌnaj rey ay sat txꞌo txꞌotxꞌ, yebꞌ xin haꞌ yaꞌ kaw ekꞌbꞌalkano ishelanil. 24 Sunil anma ay sat txꞌo txꞌotxꞌ yoche istukleꞌ yaꞌ Salomón yu yochen yabꞌeꞌ ishelanil yaꞌ aqꞌbꞌil yu Komam Dios. 25 Sunil mak chibꞌey ilno yaꞌ Salomón yinh hunun habꞌil, chiyito sabꞌehal tet yaꞌ, chiyinito tzetaj ye tuꞌ watxꞌebꞌil yinh chꞌen oro yebꞌ yinh chꞌen plata, chiyinipaxto xilqꞌape, yebꞌ chꞌen chꞌen yet howal, yebꞌ anh kaw xuqꞌ sam, yebꞌ noꞌ cheh, yebꞌ noꞌ mula sabꞌehalo tet yaꞌ.
Istxonh yaꞌ rey Salomón noꞌ cheh yebꞌ chꞌen carruaje
26 Iskutxbꞌako yaꞌ Salomón iscarruaje yebꞌ ebꞌnaj soldado chiꞌekꞌ yibꞌanh cheh yet howal; 1,400 isbꞌisil iscarruaje yaꞌ tuꞌ, yok 12 (kabꞌlanhebꞌ) mil isbꞌisil ebꞌnaj soldado chꞌekꞌ yibꞌanh cheh, iskutxbꞌako yaꞌ sunil tuꞌ yulajla konhobꞌ bꞌay chal-lax konhobꞌ yet carruaje bꞌey Jerusalén, bꞌay ay yaꞌ. 27 Kaw nimankano chꞌen plata iskutxbꞌako yaꞌ rey Salomón bꞌey Jerusalén, hakaꞌxa isbꞌisil chꞌen komon chꞌen, hakxa tuꞌ isbꞌisil chꞌen; hakpax tuꞌ teꞌ cedro kaw nimankano teꞌ, lahanxa isbꞌisil teꞌ hakaꞌ teꞌ xoltelajil higo ay bꞌey txꞌotxꞌ Sefela. 28 Haꞌ xin bꞌey Egipto ilaxti noꞌ cheh yebꞌ qꞌap qꞌap ay istohol, tet yaꞌ Salomón, yuto bꞌey Egipto tuꞌ chisloqꞌ ebꞌnaj ischejabꞌ yaꞌ rey noꞌ cheh yebꞌ qꞌap lino.e 29 Haꞌ carruaje chiloqꞌlax bꞌey Egipto 600 melyu plata chiꞌeliko istohol hunun, haxa noꞌ cheh, 150 plata chiꞌeliko hunun noꞌ. Haxa ebꞌnaj rey hitita yebꞌ ebꞌnaj isreyal Siria chiloqꞌni chꞌen carruaje yebꞌ noꞌ cheh tuꞌ tet ebꞌnaj ischejabꞌ yaꞌ rey Salomón.