Istꞌinhbꞌakano Komam Dios Istzotiꞌ yebꞌ yaꞌ rey Salomón
9
Hayet lahwi iswatxꞌenkano yaꞌ rey Salomón Yatut Komam Dios, Jahawil, yebꞌ yatut yaꞌ, yebꞌ yet xalahwikano iswatxꞌen yaꞌ sunil tzet yoche, 2 isyeni isbꞌa Komam Dios Jahawil tet yaꞌ yinh iskayel, hakaꞌ yu isyeni isbꞌa Komam tet yaꞌ bꞌey Gabaón. 3 Yalni Komam tet yaꞌ: «Hanintiꞌan wabꞌehan hatxah yebꞌ tzet haqꞌan wetan. Haꞌ huneꞌ nha maxawatxꞌekanh tiꞌ, wetan mayukanikoj, yu isbꞌinako inbꞌihan yinh sunilbꞌal ej tiempo, chiwaniko inmujlubꞌal yebꞌ wanmahan yinh sunilbꞌal ej tiempo. 4 Tato chachekꞌ yinh istoholal yebꞌ isyelal yinh sunil hawanma, hakaꞌ yu yekꞌ hamam David yinh insatan yinh kuybꞌanile, chayijen sunil chejbꞌanile chiwalkanojan tawet tiꞌ. 5 Hanintiꞌan chintꞌinhbꞌakanojan tawet ta hanhe ebꞌnaj hakꞌahol chiwaqꞌan ismunil yok reyal yinh Israel hakaꞌ yu walnikanojan tet hamam hakaꞌ tiꞌ: “Haꞌ kꞌahol yebꞌ yuninal hakꞌahol chiꞌok reyalo haseleloj yinh ebꞌnaj Israel,” hak tuꞌ yu walnikanojan. 6 Yajaꞌ ta chelutꞌnhe hebꞌa, ta hach yebꞌ hawuninal chepohnilo hebꞌa winhan, machi xin chekꞌubꞌa heyijen tzet chiyal chejbꞌanile chiwalan, kat heyaqꞌni chejaꞌ hebꞌa tet tioxh, kat heyinayo hebꞌa tet. 7 Haninan xin chiwilojan ebꞌnaj Israel tiꞌ sat huneꞌ txꞌo txꞌotxꞌ aqꞌbꞌilxa teyet wuhan, yebꞌ huneꞌ nha bꞌay chibꞌina inbꞌihan, chiwintanhenkaniltojan kat winilojan yinh insatan, kat yalni ej konhobꞌ bꞌuchwal tzotiꞌ yinh konhobꞌ Israel tiꞌ. 8 Haxa huneꞌ nha kaw ochebꞌil tiꞌ tinanh, makxanhetikꞌa chiꞌekꞌtoj chitakkanh iskꞌul kat isbꞌuchwahi chalni: “¿Tzet yinh xin hak tiꞌ chute isDiosal Israel huneꞌ txꞌotxꞌ yebꞌ huneꞌ nha tiꞌ?” xhinhetikꞌa anma. 9 Kat istaqꞌwipax anma tet hunun: “Isbꞌejkano anma isDiosal, huneꞌ inilti yichmam ebꞌnaj sat txꞌotxꞌ Egipto, yok tzujno ebꞌnaj yinta hunteqꞌan komon tioxh, yinayo isbꞌa ebꞌnaj tet, yuxin hul isyaꞌtajil yibꞌanh ebꞌnaj yu isDiosal,” xhi anma,» xhi Komam.Hunteqꞌanxa tzet ye tuꞌ iswatxꞌe yaꞌ Salomón
10 Haxa yet xaꞌekꞌto 20 (hunkꞌal) habꞌil, islahwi iswatxꞌenkano yaꞌ Salomón kabꞌebꞌ nime nha, haꞌ ton Yatut Komam Dios, Jahawil, yebꞌ yatut yaꞌ. 11 Haꞌ xin naj Hiram, isreyal Tiro aniti teꞌ cedro yebꞌ teꞌ tzꞌisis tet yaꞌ rey Salomón okniko yinh hunteqꞌan nha tuꞌ, yanipaxti naj sunil chꞌen oro isqꞌan yaꞌ Salomón. Wal yaꞌ rey Salomón tuꞌ, yaqꞌ yaꞌ 20 (hunkꞌal) konhobꞌ ay yul ismajul txꞌotxꞌ Galilea tet naj rey Hiram. 12 Yel naj Hiram bꞌey Tiro, isto naj yilno hunteqꞌan konhobꞌ, yajaꞌ xin mach yoche naj hunteqꞌan konhobꞌ tuꞌ. 13 Yalni naj Hiram: «¿Tzet ye hunteqꞌan konhobꞌ chawaqꞌ wettiꞌan wuxhtaj?» xhi naj. Yaniko naj Hiram isbꞌi hunteqꞌan tuꞌ «Istxꞌotxꞌal Cabul», hakto tuꞌ xin isbꞌi tinanh.a 14 Haꞌ chꞌen oro yati naj Hiram tet yaꞌ Salomón 120 talento chꞌen.b
15 Haꞌ xin ebꞌnaj mach Israeloj yako yaꞌ rey Salomón yinh munil iswatxꞌenokanh Yatut Komam Dios, Jahawil, yebꞌ yatut yaꞌ, yebꞌ iskꞌubꞌal Milo, yebꞌ iskꞌubꞌal hoybꞌalaxiko yinh konhobꞌ Jerusalén, yebꞌ iskꞌubꞌal konhobꞌ Hazor, iskꞌubꞌal konhobꞌ Meguido, yebꞌ iskꞌubꞌal konhobꞌ Gezer. 16 Yet yalanhtokanoj naj rey faraón yinh Egipto, bꞌey naj yaqꞌaꞌko howal yinh konhobꞌ Gezer, isqꞌoji naj yinh, isnhusnilo naj konhobꞌ, ismaqꞌnikamo naj ebꞌnaj cananeo ay yul konhobꞌ tuꞌ. Haꞌ huneꞌ konhobꞌ tuꞌ issah naj faraón tet iskutzꞌin yet ismohyi ix yebꞌ yaꞌ rey Salomón. 17 Lahwi tuꞌ iswatxꞌenkanh yaꞌ Salomón konhobꞌ Gezer tuꞌ, iswatxꞌenpaxokanh yaꞌ txꞌotxꞌ qꞌaxan txꞌotxꞌ Bet-horón, 18 yebꞌ konhobꞌ Baalat yebꞌ konhobꞌ Tadmor ay sat txꞌotxꞌ desierto. 19 Iswatxꞌenpaxokanh yaꞌ Salomón tuꞌ konhobꞌ bꞌay kꞌuwan tzet chislo yaꞌ, yebꞌ konhobꞌ bꞌay ay iscarruaje yaꞌ, yebꞌ konhobꞌ bꞌay ay ebꞌnaj soldado chiꞌahto yibꞌanh cheh. Iswatxꞌenpaxokanh yaꞌ bꞌey Jerusalén sunil tzet yoche yebꞌ bꞌey txꞌotxꞌ Líbano yebꞌ bꞌey sunil txꞌotxꞌ ayko yalanh yip yaꞌ. 20 Sunil ebꞌnaj amorreo, ebꞌnaj heteo, ebꞌnaj ferezeo, ebꞌnaj heveo yebꞌ ebꞌnaj jebuseo kankano xol ebꞌnaj Israel, haꞌ hunteqꞌan anma tuꞌ mach Israeloj. 21 Ebꞌnaj tuꞌ, mach qꞌoji ebꞌnaj Israel istanhtzeniloj, haxa xin yuninal ebꞌnaj yako yaꞌ rey Salomón yinh munil yaꞌtaj, hak tuꞌ xin tinanh, haꞌ ebꞌnaj ayko chejabꞌoj. 22 Mach xin hunu ebꞌnaj Israel lanhlaxiko yinh munil kaw yaꞌta tuꞌ, wal xin aqꞌlax ismunil ebꞌnaj yinh soldadohal, yebꞌ yinh ijbꞌalomal, yebꞌ yinh kapitanhil, yebꞌ yinh komandantehal yinh carruaje yet howal, ay ebꞌnaj xin chꞌekꞌ yibꞌanh cheh yet howal. 23 Haꞌ ebꞌnaj Israel alaxiko yahawil yebꞌ istanhemal ebꞌnaj alaxiko munil tuꞌ, 550 isbꞌisil ebꞌnaj yinh sunil.
24 Hayet iswatxꞌeniko yaꞌ huneꞌ niman kꞌubꞌ, yakꞌalnhelaxi, yahto ix iskutzꞌin naj faraón yul konhobꞌ chiyij iskonhobꞌ yaꞌ rey David, haꞌ xin Jerusalén, isto ix yul yatut iswatxꞌenkanh yaꞌ rey Salomón.
25 Oxel yul hunun habꞌil chisnhus yaꞌ rey Salomón noꞌ xahanbꞌal tet Komam Dios Jahawil yebꞌ xahanbꞌal yet aqꞌankꞌulal yibꞌanh huneꞌ mexha iswatxꞌekanh tet Komam Dios. Chisnhusnipaxo yaꞌ teꞌ pom yibꞌanh ismexhahil xahanbꞌal ayko sata Komam Jahawil yet xalahwi iswatxꞌikano Yatut Komam Dios.c
26 Ischejnipaxo yaꞌ rey Salomón watxꞌelaxo teꞌ barco bꞌey Ezión-geber, iskawilal Elot ayko istiꞌ haꞌ Kajinh Mar, sat txꞌotxꞌ Edom. 27 Ischejnito naj Hiram ischejabꞌ yebꞌ ebꞌnaj chiꞌinikꞌo teꞌ barco, yebꞌ ebꞌnaj yohta yekꞌ yibꞌanh haꞌ mar yul teꞌ barco tuꞌ, yinta ismunlawom yaꞌ rey Salomón, 28 yapni ebꞌnaj bꞌey txꞌotxꞌ Ofir, yiniti ebꞌnaj chꞌen oro bꞌey tuꞌ tet yaꞌ rey Salomón, 420 talento chꞌen oro yito ebꞌnaj.d