4 Yaqꞌni yaꞌ rey Salomón yebꞌ konhobꞌ Israel isxahanbꞌal tet Komam Jahawil. 5 Yalten yaꞌ rey 22 mil noꞌ wakax xahanbꞌalilal yok 120 mil noꞌ meꞌ. Hak tuꞌ yu yekꞌtzelax isqꞌinh Yatut Komam Dios yu yaꞌ rey yebꞌ sunil konhobꞌ Israel.

6 Wal ebꞌyaꞌ sacerdote xin islinhbꞌa isbꞌa bꞌaytikꞌa ayiko yinh ismunil tuꞌ. Haxa ebꞌnaj levita xin chibꞌitni tet Komam yu munlabꞌal yet bꞌit, hunteqꞌan aqꞌbꞌil watxꞌelax yu yaꞌ rey David yu isbꞌitnhelax Komam Jahawil yinh huneꞌ bꞌit tiꞌ: «Yuto haꞌ iskꞌulchꞌanil Komam aynhetikꞌa yinh sunibꞌal ej tiempo,» xhi. Yanipaxiko ebꞌnaj hunteqꞌan bꞌit saybꞌilkano istzotiꞌal yu yaꞌ rey David. Hakpax tuꞌ xin ebꞌyaꞌ sacerdote yoqꞌtze ebꞌnaj chꞌen trompeta sata ebꞌnaj levita, wal sunil konhobꞌ Israel huneꞌnhe haꞌ bꞌay linhan.

7 Yaqꞌlaxpaxo ismunil yiktabꞌal yamaqꞌil Yatut Komam Dios yu yaꞌ rey Salomón, yuto haꞌ tuꞌ isnhus yaꞌ xahanbꞌal tet Komam yebꞌ ismantecahil xahanbꞌal yet aqꞌankꞌulal; yuto huneꞌ ismexhahil yet xahanbꞌal bronce yaqꞌ watxꞌe yaꞌ rey Salomón mach chiqꞌoji isnhuslax sunil xahanbꞌal yebꞌ yebꞌalqꞌabꞌe yebꞌ ismantecahil no noqꞌ yibꞌanh.

8 Hujebꞌ tzꞌayik yekꞌtze yaꞌ rey Salomón yebꞌ sunil konhobꞌ Israel huneꞌ qꞌinh chal-lax Lexhpat.^a Kaw nimankano anma kutxikoj, ichitati istit anma bꞌay chonhokapno bꞌey Hamat masanta bꞌey haꞌ nichꞌan haꞌ yet Egipto. 9 Hujebꞌ tzꞌayik ekꞌtzelax isqꞌinhal ismexhahil yet xahanbꞌal haxa yinh iswaxajebꞌ tzꞌayik xin, iskutxbꞌanpaxiko isbꞌa anma Israel yu yekꞌtzen qꞌinh Lexhpat hujebꞌxa tzꞌayik. 10 Haxa yinh 23 (oxebꞌ iskawinaj) tzꞌayik yinh ishuj ixahaw ischejnitopaxo yaꞌ rey Salomón sunil anma Israel yatut. Kaw tzala yanma ispaxtoj, yuto isyelo Komam Jahawil iskꞌulal iskꞌul yinh yaꞌ David yebꞌ yinh yaꞌ rey Salomón yebꞌ yinh konhobꞌ Israel.

11 Hayet islahwi iswatxꞌenkanokanh yaꞌ rey Salomón Yatut Komam Jahawil, yebꞌpaxo yatut yaꞌ, yok yinh isnabꞌal yaꞌ iswatxꞌen sunil tzet chiꞌokniko yinh Yatut Komam, yebꞌ yinh yatut yaꞌ. Sunil tzet iswatxꞌe yaꞌ tuꞌ kꞌul elikoj. 12 Isyeni isbꞌa Komam Jahawil tet yaꞌ Salomón yinh aqꞌbꞌalil, yalni Komam tet yaꞌ: «Hanintiꞌan mawabꞌehan hatxah, mansikꞌlenikojan huneꞌ nha tiꞌ Watutojan bꞌay chinhuslax xahanbꞌal wetan. 13 Tato matxa chiwatijan haꞌ nhabꞌ satkanh, maka ta chiwatijan noꞌ qꞌul yetaꞌto tzꞌunubꞌ, maka ta chiwatijan howla yabꞌil yibꞌanh inkonhobꞌan; 14 yajaꞌ ta chiyo isbꞌa inkonhobꞌan bꞌay chiyaqꞌ bꞌinaho inbꞌihan, kat istxahli wetan, kat kinissaynihan, chisbꞌejnikano isbꞌeybꞌalnhen istxꞌojal, wal tuꞌ chiwabꞌehan istxah yul satkanh, chiwaqꞌni nimankꞌulalan yinh ismul, kat wanayojan isyaxil yibꞌanh hetxꞌotxꞌ hakaꞌ yanhtelax yabꞌil. 15 Haꞌ tinanh xin chinok tꞌanhnojan yinh huneꞌ nha tiꞌ, chinhajbꞌan intxikinan wabꞌenan txah chiꞌaqꞌlax wetan bꞌey tiꞌ, 16 yuto tinanh mansikꞌikꞌojan huneꞌ nha tiꞌ chiwanikanikojan Watutojan yu isbꞌina inbꞌihan yinh, yinh sunilbꞌal tiempo; chinok tꞌanhnojan yinh, kat waniko wanmahan yinh, yinh sunil istiempohal. 17 Yebꞌ xin ta chabꞌeybꞌalnhe isbꞌeybꞌal hamam David insatajan, chayijen sunil tzet chiwalan tawet, kat hakꞌubꞌan chejbꞌanile yebꞌ kuybꞌanile aqꞌbꞌil wuhan, 18 chintaqꞌekanojan huneꞌ munil tiꞌ yinh reyalil tawet hakaꞌ yu intꞌinhbꞌankanojan intzotiꞌan tet hamam hakaꞌ tiꞌ: “Masannhetikꞌa ay ebꞌnaj hakꞌahol chiꞌok reyal yinh ebꞌnaj Israel,” quinchihan. 19 Yajaꞌ ta chachmeltzo hawatxꞌen istxꞌojal, chabꞌejnikano chejbꞌanile yebꞌ kuybꞌanile waqꞌkanojan teyet, kat heyok tzujno yinta komon tioxh, kat heyay jahno sataj, 20 chexinhokꞌatijan sat intxꞌotxꞌan waqꞌan teyet kat kexinqꞌojnilojan, kat inbꞌejnikanojan huneꞌ nha wakojan watutotiꞌan, kat isbꞌuchwa ej konhobꞌ yinh, kat yok tzebꞌoj. 21 Huneꞌ nha kaw kꞌulchꞌankano tiꞌ, chimeltzoko yinh takkꞌulal, haꞌ anma chiꞌilnoj chixiwkanh, yuxin chiyal hakaꞌ tiꞌ: “¿Tzet yinh xin yati Komam Jahawil isyaꞌtajil yinh konhobꞌ tiꞌ yebꞌ yinh huneꞌ nha tiꞌ?” xhioj, 22 kat ispajtzelax tet hakaꞌ tiꞌ: “Mahul isyaꞌtajil yibꞌanh anma tiꞌ, yuto isbꞌejkano Komam Jahawil, isDiosal yichmam, Komam inilo sat txꞌotxꞌ Egipto. Yok tzujno yinta komon tioxh, islaqꞌnikꞌoj, yay jahno sataj,” xhi,» xhi Komam tet yaꞌ Salomón.