3 Lahwi tuꞌ ismeltzo yaꞌ yintaj, istꞌanhxito yaꞌ rey yibꞌanh anma Israel. Haꞌ sunil anma kutxaniko bꞌey tuꞌ linhankanh yet isqꞌannayo yaꞌ isyaxil Komam yibꞌanh. 4 Yalni yaꞌ rey xin: «Hal-laxojabꞌ kꞌul-la tzotiꞌ yinh Komam Jahawil, isDiosal Israel, yuto haꞌ isqꞌabꞌ Komam aqꞌni yijaꞌkano isbꞌa tzet yaltekano yu istiꞌ tet inmaman, haꞌ ton yaꞌ David, yet yalni Komam hakaꞌ tiꞌ: 5 “Yettaxtikꞌa winilojan inkonhobꞌan sat txꞌotxꞌ Egipto, maxhtotikꞌa hunu konhobꞌ xol hunun majan ebꞌnaj Israel, xaꞌinsikꞌilojan bꞌay chiꞌeh watutan bꞌay chibꞌina inbꞌihan, maxhto xin chinsikꞌilojan hunu naj chꞌok isreyalo ebꞌnaj Israel, inkonhobꞌan. 6 Yajaꞌ wal tinanh xaꞌinsikꞌilojan konhobꞌ Jerusalén yu isbꞌina inbꞌihan bꞌey tuꞌ. Insikꞌnipaxilojan yaꞌ David, isreyalo ebꞌnaj Israel, inkonhobꞌan,” xhi Komam.

7 »Yalnipaxo yaꞌ rey Salomón hakaꞌ tiꞌ: Wal xin yaꞌ David, inmaman, ok yinh yanma yanikanh Yatut Komam Dios, Jahawil, bꞌay chibꞌina isbꞌi Komam, isDiosal Israel. 8 Yajaꞌ yal Komam Jahawil tet inmamtuꞌan hakaꞌ tiꞌ: “Kaw kꞌul tzet chanah yibꞌanhilo tzet hawabꞌe yul hawanma, hawoche hawatxꞌenkanh watutan bꞌay chibꞌina inbꞌihan. 9 Yajaꞌ xin mach tajach chawakanh watuttuꞌan, wal xin haꞌ hunu hakꞌahol chipitzkꞌa tawinh, haꞌ chiwatxꞌenkanh watutan bꞌay chibꞌina inbꞌihan,” xhi Komam.

10 »Haꞌ tinanh xin mayijkano isbꞌa hakaꞌtikꞌa yu yalnikano Komam Dios, Jahawil; kinyakojan Komam isreyalo Israel selelo yaꞌ David, inmaman. Wok tzꞌonhnojan yul istzꞌonhobꞌal, wanikanhan Yatut Komam bꞌay chibꞌina isbꞌi isDiosal Israel. 11 Yul huneꞌ nha tiꞌ xin, mawakaniktojan huneꞌ Kaxha, bꞌay ayayto trato tꞌinhbꞌabꞌilkano yu Komam Jahawil yebꞌ konhobꞌ Israel,» xhi yaꞌ Salomón.

12 Lahwi tuꞌ xin yok linhno yaꞌ rey Salomón sata ismexhahil xahanbꞌal yet Komam Jahawil, sata sunil konhobꞌ Israel, yanikanh yaꞌ isqꞌabꞌ. 13 Yaꞌ Salomón tuꞌ aqꞌbꞌilxa watxꞌelaxo huneꞌ plataforma nabꞌa bronce hakaꞌ huneꞌ niman mexha yu yaꞌ, yalaxayo yiktabꞌal yamaqꞌil Yatut Komam. Haꞌ ismalil mexha tuꞌ kabꞌebꞌ metro yok 25 centímetro yuko ispakꞌul, yebꞌ xin kabꞌebꞌ metro yok 25 centímetro yuko sat, yebꞌ xin huneꞌ metro yok 35 centímetro yukanh istel. Yahto linhno yaꞌ rey Salomón yibꞌanh huneꞌ plataforma tuꞌ, yay jahno yaꞌ sata sunil konhobꞌ Israel, yanikanh isqꞌabꞌ yaꞌ satkanh, istxahli yaꞌ tet Komam Dios, yalni yaꞌ: 14 «Mam Wahawil, hach isDiosal Israel, machi hunuxa dios ekꞌbꞌal tasataj bꞌey yul satkanh yebꞌ sat txꞌo txꞌotxꞌ tiꞌ. Hach tiꞌ xin chayije hatrato tꞌinhbꞌabꞌilkano hawu, kat istzꞌaypaxo hakꞌul yinh ebꞌnaj hachejabꞌ chiwatxꞌen istoholal yinh sunil yanma tasataj. 15 Hawaqꞌni yijaꞌ isbꞌa sunil tzet hawalte tet yaꞌ David, inmaman; haꞌ tzet hawal yu hatiꞌ, haꞌ haqꞌabꞌ maꞌaqꞌni yijaꞌ isbꞌa, hakaꞌ jilnihanh tinanh. 16 Wal tinanh xin Mam Wahawil, isDiosal Israel, yijabꞌpaxo isbꞌa tzet halbꞌilkano hawu tet yaꞌ David, inmaman hakaꞌ tiꞌ: “Masannhetikꞌa ay ebꞌnaj hakꞌahol chiꞌok isreyalo Israel insatajan, yaj choche xin chisbꞌeybꞌalnhe habꞌeybꞌal yebꞌ isyijen chejbꞌanile waqꞌkanojan tawet, hakaꞌ yu hakꞌubꞌan chejbꞌanile.” 17 Yuxin tinanh Mam Wahawil, isDiosal Israel, yijabꞌ isbꞌa tzet haltebꞌilkano hawu tet inmaman, hachejabꞌ.

18 »Yajaꞌ xin ¿chimisje hawehikꞌo yebꞌ anma ay sat yibꞌanhqꞌinal tiꞌ? Yuto haꞌ ej satkanh kaw nimejkanoj, yajaꞌ machi qꞌoji satkanh tuꞌ hawehikꞌo sat, ¿haꞌ tom xin huneꞌ nha manwatxꞌekanhan tawet tiꞌ, chiqꞌoji tawet? Machoj. 19 Wal xin Mam Wahawil, inDiosalan, abꞌe tzet chiyal hachejabꞌ tiꞌ, yu yeliko yaw istxahli tawinh yinh sunil yanma tasataj. 20 Hajannhehojabꞌ hasat yibꞌanh huneꞌ nha tiꞌ yinh tzꞌayikal yebꞌ aqꞌbꞌalil yibꞌanh txꞌotxꞌ halbꞌilkano hawu hakaꞌ tiꞌ: “Chibꞌina inbꞌihan bꞌey tuꞌ,” kachi. Mamin, abꞌe tzet chisqꞌan hachejabꞌ tiꞌ tawet bꞌey huneꞌ nha tiꞌ. 21 Chawabꞌen intxahan yebꞌ istxah hakonhobꞌ Israel tiꞌ yet chitxahli tawet bꞌey tiꞌ. Chawabꞌen kotxahanh yul satkanh bꞌay ayach, chawabꞌen tzet chikoqꞌananh tawet, chawaqꞌni nimankꞌulal jinhanh.

22 »Tato ay hunu mak chako ismul yinh hunu yet anmahil kat yal-lax tet ta chihul yalahti ismul sata ismexhahil xahanbꞌal yul hawatut tiꞌ, 23 kat hawabꞌen yul satkanh kat hawatxꞌeniloj, chawalni tzet chiꞌeliko ebꞌnaj hachejabꞌ. Chawanayo isyaꞌtajil yibꞌanh mak ay ismul, haꞌtikꞌa istxꞌojal iswatxꞌe haꞌ chawaqꞌ tet, chawaqꞌni istoholal tet mak machi ismul hakaꞌtikꞌa istoholal chiswatxꞌe.

24 »Hayet machi qꞌoji ebꞌnaj hakonhobꞌ tiꞌ yul isqꞌabꞌ ebꞌnaj chiꞌaniko howal yinh yu ismul yako tawet, yajaꞌ hayet chisnah isbꞌa kat yawten habꞌi yinh, chisqꞌanni tawet yinh istxah yul hawatut tiꞌ, 25 chawabꞌen bꞌey yul satkanh tzet chisqꞌanaꞌ, chawaqꞌni nimankꞌulal yinh ismul hakonhobꞌ Israel tiꞌ, kat hawaqꞌni meltzoho sat txꞌo txꞌotxꞌ hawaqꞌ tet jichmamanh yebꞌ xin jetanh.

26 »Tato matxa chitit haꞌ nhabꞌ yul satkanh yu ismul ebꞌnaj chako tawet, yajaꞌ ta chihul txahlo tawet yul hawatut tiꞌ, kat yawten habꞌi yinh, kat isbꞌejnikano istxꞌojal yu isyaꞌtajil ay yibꞌanh, 27 chawabꞌe istxah tuꞌ bꞌey satkanh, kat hawaqꞌni nimankꞌulal yinh ismul ebꞌnaj hachejabꞌ yebꞌ yinh hakonhobꞌ Israel, chayenilo kꞌul-la bꞌeybꞌale tet yunhe isbꞌeybꞌalnheni, chawaniti haꞌ nhabꞌ yibꞌanh hatxꞌotxꞌ hawaqꞌ ismajulo hakonhobꞌ.

28 »Ta chihul wahil bꞌey kokonhobꞌ tiꞌanh maka howla yabꞌil, maka ta chitajilo tzꞌunubꞌ yu qꞌa qꞌaꞌ, maka ta chihul hunu isyabꞌil tzꞌunubꞌ, maka ta chihul no noqꞌ. Maka ta chihul ebꞌnaj ayko ishowal yinh hakonhobꞌ tiꞌ, kat ishoynayo ebꞌnaj bꞌay aya, maka ta chihul tzijxanhe isyaꞌtajil maka yabꞌil; 29 hayet lanhan yabꞌen isyaꞌtajil tuꞌ yinh yanma kat yul makxanhetikꞌa anmahil maka ta sunil konhobꞌ Israel tiꞌ yul hawatut tiꞌ, kat isqꞌanni yinh istxah tawet, chanikanh isqꞌabꞌ tasataj, 30 Mamin, chawabꞌen istxah yul satkanh bꞌay ayach, kat hawaqꞌni nimankꞌulal yinh. Chawaqꞌni ispaj tet hunun anma hatatikꞌa isbꞌeybꞌal, chawohtanhenilo tzet chiꞌekꞌ yinh yanma, yuto hachnhechꞌan hawohta tzet chiꞌekꞌ yinh yanma iskꞌahol ebꞌnaj winaj. 31 Yunhe konanonanh tawet kat koyijenanh tzet chawala sunilbꞌal ej tiempo ayonhanh sat txꞌo txꞌotxꞌ tiꞌ, txꞌotxꞌ hawaqꞌ tet jichmamanh.

32 »Yebꞌpaxo xin tato ay hunu mak nan konhobꞌal mach Israelo chitit nahata, yuto kaw chibꞌina habꞌi yebꞌ hawip yebꞌ hakꞌulal, kat yul txahlo tawet yul hawatut tiꞌ, 33 chawabꞌen istxah bꞌay ayach yul satkanh, chapajtzen sunil tzet chisqꞌan tawet yinh istxah huneꞌ mak mach Israelo tuꞌ; yu yohtanheniloj sunil konhobꞌ ay sat yibꞌanhqꞌinal tiꞌ habꞌi, kat isxiw tawet, hakaꞌ hakonhobꞌ Israel tiꞌ, kat yohtanhelaxiloj tato chibꞌina habꞌi yinh hawatut inwatxꞌetiꞌan.

34 »Tato chiꞌelto hakonhobꞌ tiꞌ yaqꞌaꞌ howal yinh ebꞌnaj chiꞌaniko howal yinh kat isto yul bꞌeh bꞌay chawijbꞌatoj kat yok txahlo tawet, yinh yetkꞌulal konhobꞌ hasikꞌilo tiꞌ yebꞌ yinh yetkꞌulal hawatut inwatxꞌetiꞌan bꞌay chibꞌina habꞌi, 35 chawabꞌen istxah satkanh bꞌay ayach yebꞌ tzet chisqꞌana, chakolniloj.

36 »Tato chako ismul hakonhobꞌ tiꞌ tawet (yuto machi hunu naj winaj tiꞌ mach chako ismul), kat istit hahowal, kat hawaniko yul isqꞌabꞌ ebꞌnaj ayko ishowal yinh kat yinito ebꞌnaj preso nahata maka kawil, 37 yajaꞌ ta chisnah isbꞌa bꞌay ayko preso tuꞌ, kat ismeltzo ebꞌnaj yul haqꞌabꞌ kat istxahli tawet bꞌay ayko preso, chalni: “hanhonhtiꞌanh kaw jako komulanh, haꞌ istxꞌojal kowatxꞌehanh,” ta xhi, 38 kat ismeltzo yul haqꞌabꞌ yinh sunil iskꞌul yebꞌ yinh sunil yanma bꞌay ayko preso tuꞌ, kat istxahli yinh yetkꞌulal txꞌo txꞌotxꞌ hawaqꞌ tet yichmam yebꞌ yinh yetkꞌulal konhobꞌ hasikꞌiloj, yebꞌ yinh yetkꞌulal hawatut inwatxꞌehan bꞌay chibꞌina habꞌi. 39 Chawabꞌe istxah yul satkanh bꞌay ayach, chapajtzen istxah yebꞌ tzet chisqꞌana, chakolni chawaqꞌni nimankꞌulal yinh ismul hakonhobꞌ tuꞌ.

40 »Wal tinanh xin Mamin hach inDiosalan, chinqꞌanan tawet tato chawilaytij, kat hahajbꞌan hatxikin hawabꞌen txah chꞌaqꞌlax tawet bꞌey hawatut tiꞌ.

41 »Mam Wahawil, hach inDiosalan, ahanhwanoj kat hawul xewo yul hawatut tiꞌ iskꞌatanh Kaxha yet hatrato chiyenilo hawip. Mam Wahawil, hach inDiosalan kol ebꞌyaꞌ hasacerdote chimunla yinh hamunil yebꞌ ebꞌnaj hawetxa yehi, ebꞌnaj chaqꞌ tzalaho iskꞌul yinh hakꞌulal. 42 Mam Wahawil, mach chawintanhelto hachejabꞌ sikꞌbꞌiliko hawu, nati iskꞌulchꞌanil hakꞌul hayelo yinh yaꞌ David, hachejabꞌ,» xhi yaꞌ rey Salomón.