2 Lahwi tuꞌ iskutxbꞌaniko yaꞌ rey Salomón bꞌey Jerusalén ebꞌnaj ichamta winaj Israel, yebꞌ ebꞌnaj iswiꞌehal xol hunun majan ebꞌnaj Israel, yebꞌ ebꞌnaj iswiꞌehal xol yuxhtaj. Iskutxbꞌako isbꞌa ebꞌnaj tuꞌ yunhe ishekꞌniti ebꞌnaj isKaxhahil isTrato Komam Dios bꞌey iskonhobꞌ yaꞌ David, haꞌ ton konhobꞌ Sión. 3 Iskutxbꞌako isbꞌa sunil ebꞌnaj winaj Israel yebꞌ yaꞌ rey Salomón yinh istzꞌayikal qꞌinh kaw ay yelapnoj yinh ishuj ixahaw yinh hunun habꞌil. 4 Yapni ebꞌnaj ichamta winaj Israel yebꞌ ebꞌnaj levita, yiniti ebꞌnaj levita isKaxhahil istrato Komam. 5 Yinipaxto ebꞌnaj isTabernáculo Komam Dios aytikꞌako yatutoj, bꞌay iskutxbꞌa isbꞌa ebꞌnaj iskꞌatanh Komam, yinipaxto ebꞌnaj sunil munlabꞌal okniko yul Tabernáculo aykanh yatuto Komam. Sunil hunteqꞌan tuꞌ, haꞌ ebꞌyaꞌ sacerdote yebꞌ ebꞌnaj levita ijnitoj. 6 Haꞌ yaꞌ rey Salomón yebꞌ ebꞌnaj Israel kutxaniko tuꞌ, iskutxbꞌako isbꞌa ebꞌnaj sata isKaxhahil isTrato Komam, yaqꞌni ebꞌnaj isxahanbꞌal tet Komam; haꞌ noꞌ meꞌ yebꞌ noꞌ wakax aqꞌlax yinh xahanbꞌalil tuꞌ, matxa chibꞌischa hanta noꞌ. 7 Yanikto ebꞌyaꞌ sacerdote isKaxhahil isTrato Komam yul yatut tuꞌ, yul Ehobꞌal ekꞌna kaw Txahul, bꞌey yalanh xikꞌ kawanh yechel ebꞌnaj querubín. 8 Leyanilto xikꞌ kawanh ebꞌnaj querubín tuꞌ bꞌay alaxikto isKaxha, leyanpaxilto xikꞌ yibꞌanh teꞌ chibꞌatxnikanh kaxha tuꞌ. 9 Yajaꞌ nimajal istel yoj teꞌ chibꞌatxnikanh teꞌ kaxha tuꞌ, yuxin chijilikto iswiꞌ teꞌ sata Ehobꞌal ekꞌna kaw Txahul, yajaꞌ wal satalti huneꞌxa iskabꞌ cuarto, huneꞌ txahul matxa ixtanho jilnito teꞌ, hakto tuꞌ xin ye tinanh. 10 Machi hunuxa tzet ye tuꞌ ayayto yul Kaxha, kachannhe kabꞌebꞌ chꞌen chꞌen paqꞌpaqꞌ yehi. Haꞌ yinh chꞌen chꞌen tuꞌ istꞌinhbꞌakano Komam Jahawil chejbꞌanile tet ebꞌnaj Israel, aykanayto yu yaꞌ Moisés bꞌey wonhan Horeb yet yel ebꞌnaj bꞌey Egipto.

11 Yelti ebꞌyaꞌ sacerdote yul Ehobꞌal Txahul, (yuto sunil ebꞌyaꞌ sacerdote tuꞌ issajnhe isbꞌa ebꞌyaꞌ, yet maxhto ayoko ebꞌyaꞌ yinh istxolal yinh ismunil). 12 Wal ebꞌnaj levita bꞌitnom, ebꞌnaj iskꞌahol yaꞌ Asaf, ebꞌnaj iskꞌahol naj Hemán, yebꞌ ebꞌnaj iskꞌahol naj Jedutún, ayko qꞌap lino qꞌap kaw kꞌul xilo isqꞌap ebꞌnaj, iqꞌbꞌil cimbalo, salterio yebꞌ teꞌ arpa yu ebꞌnaj, linhankanh ebꞌnaj iskꞌatanh ismexhahil yet xahanbꞌal yinh yetkꞌulal bꞌay chiꞌahilo tzꞌayik. Aypaxiko 120 ebꞌyaꞌ sacerdote chiꞌaniko trompeta iskꞌatanh ebꞌnaj. 13 Huneꞌnhe yu yoqꞌtzen ebꞌyaꞌ istrompeta, yebꞌ xin lahannhe yute yul isnuqꞌ ebꞌyaꞌ isbꞌitni, yalni ebꞌyaꞌ kꞌul-la tzotiꞌ yu yaqꞌni yuchꞌandiosal tet Komam Dios, Jahawil. Haxa yet kaw islahniko yul isnuqꞌ chꞌen trompeta yebꞌ chꞌen cimbalo yebꞌ hunteqꞌanxa munlabꞌal yet bꞌit, isbꞌitnhen ebꞌyaꞌ Komam Jahawil, yalni ebꞌyaꞌ hakaꞌ tiꞌ: «Kaw kꞌulkano Komam Dios, chitzꞌay iskꞌul jinh yinh sunilbꞌal ej tiempo,» xhi ebꞌyaꞌ yinh isbꞌit. Yinhnhena tuꞌ isnohilo yul Yatut Komam Jahawil yu moyan. 14 Matxa xin yu iswatxꞌen ebꞌyaꞌ sacerdote ismunil yul Yatut Komam tuꞌ yu moyan, yuto nohilo yul nha tuꞌ yu isqꞌaqꞌal ismay Komam Dios, Jahawil.