2 Yaqꞌnipaxo watxꞌe yaꞌ huneꞌ niman pila bronce, huneꞌ pila tuꞌ petan yehi, yikta ishoꞌ metro xolbꞌal ismalil istiꞌ huneꞌ niman pila tuꞌ, kabꞌ metro yok 25 (howebꞌ iskawinaj) centímetro yekanh istel, haxa ismalil yinh ishoyanil istiꞌ huneꞌ niman pila tuꞌ, yikta iskanhlahonhebꞌ metro. 3 Haꞌ yinhla iskꞌul yebꞌ yalanh huneꞌ niman pila tuꞌ ayko katxol yechel teꞌ kꞌum yelawiloj. Haꞌ xolbꞌal hunun 10 (lahonhebꞌ) yechel teꞌ kꞌum tuꞌ ay 45 (howebꞌ yoxkꞌal) centímetro, haꞌ yelawil tuꞌ huneꞌnhe iswatxꞌebꞌanil yebꞌ niman pila tuꞌ. 4 Huneꞌ niman pila, tzꞌonhan yibꞌanh yechel 12 (kabꞌlahonhkꞌonh) noꞌ wakax, oxkꞌonh yechel wakax tuꞌ tꞌanhanto yinh yetkꞌulal norte, oxkꞌonhxa tꞌanhanto yinh yetkꞌulal bꞌay chiꞌahilo tzꞌayik, oxkꞌonhxa noꞌ xin tꞌanhanto yinh sur, oxkꞌonhxa xin tꞌanhanto yinh yetkꞌulal bꞌay chito tzꞌayik; haꞌ yoj noꞌ yintaj haꞌ ayikto yalanh huneꞌ pila tuꞌ. 5 Waxajebꞌ centímetro ispimal huneꞌ pila tuꞌ, haꞌ ishoyanil istiꞌ, hakaꞌ yelo ispetanil isxumakil teꞌ lirio. Haꞌ yul huneꞌ pila, haꞌ tuꞌ chiꞌayto 66 mil litro ha haꞌ.

6 Ischejnipaxo yaꞌ rey Salomón watxꞌelaxo 10 (lahonhebꞌ) nixhte pila bronce bꞌay chitxꞌahlax munlabꞌal chiꞌokniko yet chinhuslax no noqꞌ xahanbꞌalil. Howebꞌ nixhte pila tuꞌ alaxiko yinh yetkꞌulal iswatxꞌqꞌabꞌ, howebꞌxa xin yinh ismekqꞌabꞌ. Wal huneꞌ niman pila xin haꞌ tuꞌ chissajnhe isbꞌa ebꞌyaꞌ sacerdote.

7 Ischejnipaxo yaꞌ iswatxꞌelaxo 10 (lahonhebꞌ) isbꞌatxobꞌal cantil nabꞌa oro, hatatikꞌa yal-laxi tzet chuhi, hak tuꞌ yu iswatxꞌelaxi, yalaxikto yul Yatut Komam, howebꞌ alaxiko yinh iswatxꞌqꞌabꞌ, yok howebꞌxa alaxiko yinh ismekqꞌabꞌ. 8 Ischejni yaꞌ watxꞌelaxo 10 (lahonhebꞌ) mexha, yalaxikto yul Yatut Komam Dios tuꞌ, howebꞌ alaxiko yinh iswatxꞌqꞌabꞌ, howebꞌxa xin alaxiko yinh ismekqꞌabꞌ. Iswatxꞌelaxpaxo 100 (hokꞌal) nime sekꞌ oro.

9 Iswatxꞌelaxpaxo huneꞌ yamaqꞌil yet ebꞌyaꞌ sacerdote yebꞌ huneꞌxa niman amaqꞌ. Yalaxiko chꞌen bronce yinh ispultahil kabꞌebꞌ amaqꞌ tuꞌ. 10 Haꞌ xin yinh yetkꞌulal iswatxꞌqꞌabꞌ alaxikto huneꞌ niman pila yinh istxikin Yatut Komam yinh yetkꞌulal bꞌay chiꞌahilo tzꞌayik.

11 Iswatxꞌenpaxo naj Hiram hunteqꞌan xhi, yebꞌ pala, yebꞌ nimeta sekꞌ. Hak tuꞌ yu islahwi iswatxꞌenkano naj Hiram sunil munlabꞌal chiꞌokniko yul Yatut Komam Dios ischej yaꞌ rey Salomón iswatxꞌeꞌ naj. 12 Haꞌ munil tuꞌ haꞌ ton kabꞌebꞌ nime oy yebꞌ yelawil iswiꞌ oy tuꞌ petan yehi, yebꞌ yechel cadena yebꞌ kabꞌebꞌ yechel txꞌanh hak ayko yinhla iskꞌul yelawil iswiꞌ yoyal tuꞌ. 13 400 yechel teꞌ granada ayko yinh kabꞌ txol yechel txꞌanh hakꞌ tuꞌ, kabꞌ txol yechel teꞌ granada ayko yinh hunun hakꞌ, bꞌeqꞌaniko xin yinh iskꞌul yelawil iswiꞌ yoyal tuꞌ. 14 Iswatxꞌenpaxo naj 10 (lahonhebꞌ) nixhte pila, yok 10 (lahonhebꞌ) xeꞌ bꞌay tzꞌonhanayoj. 15 Iswatxꞌe naj huneꞌ niman pila yebꞌ 12 (kabꞌlahonhkꞌonh) yechel noꞌ wakax ayikto yalanh huneꞌ niman pila tuꞌ. 16 Iswatxꞌen naj nime sekꞌ yebꞌ pala, yebꞌ chꞌen chibꞌatxniltꞌo tzet ye tuꞌ yibꞌanh qꞌaꞌ. Sunil hunteqꞌan munlabꞌal tuꞌ, naj Hiram-abi watxꞌenheni yu ischejbꞌanil yaꞌ Salomón, yu yokniko yul Yatut Komam Jahawil. Hunteqꞌan munlabꞌal tuꞌ chꞌen bronce kaw kꞌul okniko yinh. 17 Sunil tuꞌ ischej yaꞌ rey Salomón watxꞌelaxo yul hunteqꞌan molde qꞌantxꞌotxꞌ; istiꞌ haꞌ Jordán, xolbꞌal Sucot yebꞌ Seredata. 18 Kaw nimankano isbꞌisil hunteqꞌan munlabꞌal tuꞌ yaqꞌ watxꞌe yaꞌ rey Salomón, yuxin matxa isbꞌi hanta chꞌen bronce tanhiko yinh.

19 Ischejni yaꞌ rey Salomón watxꞌelaxo hunteqꞌanxa munlabꞌal chiꞌokniko yul Yatut Komam Dios, iswatxꞌelax mexha yet xahanbꞌal oro, yebꞌ mexha bꞌay chiꞌalaxayo ixim pan sata Komam Dios. 20 Iswatxꞌelaxpaxo isbꞌatxobꞌal cantil yebꞌ isnet cantil nabꞌa oro chꞌen oknikoj, chꞌen kaw kꞌul, yunhe yalaxiko qꞌaꞌ yinh sata Ehobꞌal ekꞌna kaw Txahul, hakaꞌtikꞌa yu yalni Komam Dios. 21 Iswatxꞌelaxpaxo yechel xumakil teꞌ kaj, iswatxꞌelax isnet cantil, yebꞌ chꞌen lotꞌbꞌal, sunil tuꞌ oro chꞌen watxꞌelaxayoj, chꞌen kaw kꞌul. 22 Iswatxꞌelaxpaxo chꞌen chiꞌinilo istanhil ismechahil cantil yebꞌ chꞌen nime sekꞌ, yebꞌ chꞌen nime pakꞌ, yebꞌ isnet pom, sunil tuꞌ oro kaw kꞌul, oknikoj. Hakpax tuꞌ bꞌay chonhokapno yul Yatut Komam tuꞌ, oro chꞌen, oropaxo ispultahil Ehobꞌal ekꞌna kaw Txahul, yebꞌ ispultahil Yatut Komam.