Hunteqꞌanxa nha iswatxꞌekanh yaꞌ rey Salomón
7
Lahwi tuꞌ, iswatxꞌenpaxokanh yaꞌ rey Salomón yatut; 13 (oxlahonhebꞌ) habꞌil yito iswatxꞌelaxkanh yatut yaꞌ.a 2 Iswatxꞌenpaxokanh yaꞌ huneꞌ nha chiyij Nha yet qꞌebꞌtalaj Líbano, huneꞌ nha tuꞌ 45 (howebꞌ yoxkꞌal) metro yuko ispakꞌul, 22 (kabꞌ iskawinaj) metro yok 50 (lahonh yoxkꞌal) centímetro yuko istxikin, 13 (oxlahonhebꞌ) metro yok 50 centímetro yukanh istel, kanh txol yuko yoyalil, yaj cedronhe teꞌ. Haꞌ xin teꞌ patzabꞌ ayahto yibꞌanh yoyal tuꞌ, cedronhe teꞌ. 3 Ayko xin teꞌ aqꞌinteꞌ cedronhe yibꞌanh teꞌ patzabꞌ aykanh yibꞌanh 45 teꞌ yoyal, oxebꞌ txol teꞌ yoyal tuꞌ, 15 (holanhebꞌ) teꞌ yinh hunun txol. 4 Aypaxo oxebꞌ txol isventanahil, oxox ventanah ayko yinh hunun txol tuꞌ, ishakxiko hunun ventanah yinh hunun. 5 Sunil ispultahil yebꞌ ismarcohal lahannhe ismalil, kanhebꞌ istxikin. Oxebꞌ txol isventanahil, hunun wentanah tuꞌ ayko yinh yetkꞌulal sata hunxa ayko yinh qꞌaxepxa. 6 Iswatxꞌenpaxo yaꞌ huneꞌ yamaqꞌil nha yoyalnhe oki, 22 metro yok 50 centímetro yuko ispakꞌul, 13 metro yok 50 centímetro yuko istxikin. Huneꞌ nha tiꞌ ayko sata hunteqꞌanxa nha ayko yoyal yebꞌ ayko yibꞌanh. 7 Iswatxꞌenpaxokanh yaꞌ iskapil, bꞌay chiyil yinh tzet chiꞌeliko anma chisqꞌanle yinh, yaniko yaꞌ teꞌ aqꞌinteꞌ cedro yinh bꞌitzꞌabꞌ, ichiko yich masanta ahapno yinh teꞌ patzabꞌ.8 Haxapaxo yatut yaꞌ rey Salomón bꞌay aya, iswatxꞌekanh yaꞌ yinta huneꞌ bꞌabꞌel nha, lahan xin jilni. Iswatxꞌenpaxo yaꞌ yatut ix iskutzꞌin naj faraón, ix ok yixalo yaꞌ. Haꞌ yatut yixal yaꞌ tuꞌ lahan jilni yebꞌ hunteqꞌanxa nha watxꞌebꞌilkanh yu yaꞌ. 9 Sunil hunteqꞌan nha ischej yaꞌ rey Salomón watxꞌelaxoj, haꞌ chꞌen chꞌen kaw yaꞌtaj iswatxꞌebꞌanil haꞌ ok yinh. Hosbꞌil chꞌen yu sierra, hatatikꞌa ismalil hunun chꞌen; paqꞌbꞌil sata chꞌen yebꞌ yinta chꞌen. Haꞌ chꞌen okniko yinh isxeꞌal masanta bꞌay kachankan apno bꞌitzꞌabꞌ; hakaꞌtikꞌa chꞌen ok yinh niman yamaqꞌil. 10 Chꞌen ok yinh xeꞌal tuꞌ, kaw yaꞌta yu iswatxꞌelax chꞌen yebꞌ kaw nimej chꞌen. Ay chꞌen yinh kanhebꞌ metro yok 50 (lahonhebꞌ yoxkꞌal) isqꞌatanil, aypaxo chꞌen oxebꞌ metro yok 60 (oxkꞌal) centímetro sat. 11 Haxa yibꞌanh xeꞌal tuꞌ alaxiko chꞌen chꞌen kaw yaꞌta iswatxꞌebꞌanil, chꞌen hosbꞌil hatatikꞌa ismalil hunun, alaxpaxiko teꞌ aqꞌinteꞌ cedro yinh. 12 Haxa yinh huneꞌ niman yamaqꞌil nha tuꞌ, ayko oxebꞌ txol chꞌen chꞌen hosbꞌil, ayko xin huneꞌ txol teꞌ patzabꞌ cedro yibꞌanh. Hakaꞌtikꞌa ye yamaqꞌil Yatut Komam Dios, hak tuꞌ ye yamaqꞌil yatut yaꞌ Salomón tuꞌ.
Munla naj Hiram ah Tiro yinta yaꞌ rey Salomón
13 Yaꞌ rey Salomón yaqꞌtij yaꞌ naj Hiram ah Tiro. 14 Naj Hiram tuꞌ, yunin huneꞌ ix hunix ye naj, yikꞌal yaꞌ Neftalí ye ix, wal ismam naj xin ah Tiro naj. Hayet itzitzto ismam naj, chimunla naj yinh chꞌen bronce. Naj Hiram tuꞌ kaw helan naj yebꞌ kaw itzꞌat iswiꞌ naj iswatxꞌen munlabꞌal yinh chꞌen bronce; yuxin apni naj iskꞌatanh yaꞌ rey Salomón iswatxꞌen naj sunil ismunil yaꞌ. 15 Iswatxꞌe naj kabꞌebꞌ oy, yaj broncenhe. Hunun oy tuꞌ waxajebꞌ metro yok 10 (lahonhebꞌ) centímetro istel, howebꞌ metro yok 40 (kawinaj) centímetro ispetikoj. 16 Iswatxꞌenpaxo naj kabꞌebꞌ yelawil chiꞌok yibꞌanh iswiꞌ hunun oy, yinh chꞌen bronce. Kabꞌebꞌ metro yok 40 centímetro istel hunun yelawil ok yinh iswiꞌ oy tuꞌ. 17 Haꞌ yinh kabꞌebꞌ yelawil ayko iswiꞌ oy tuꞌ ayko chꞌen bronce halbꞌilayoj hakaꞌ txꞌanh hakꞌ, yebꞌ yechel txꞌanh txꞌanh, hakaꞌ jilni cadena, hujebꞌ ayko yinh hunun yelawil. 18 Yaniko naj kabꞌ txol yechel teꞌ granada, yinh chꞌen bronce yinhla ishoyanil yelawil iswiꞌ kabꞌebꞌ oy hakaꞌ ishalbꞌanil txꞌanh hakꞌ. 19 Iswatxꞌenpaxo naj kabꞌebꞌ yelawil chiꞌok yibꞌanh iswiꞌ oy ay bꞌey yamaqꞌil, huneꞌ metro yok 80 (kanhwinaj) centímetro istel hunun, haꞌ yelawil tuꞌ lahan jilni hakaꞌ teꞌ lirio.b 20 Haꞌ yinh yelawil iswiꞌ kabꞌebꞌ yoyal tuꞌ ayko yechel 200 teꞌ granada, kabꞌ txol yehikoj, bꞌeqꞌaniko chꞌen bronce, hakaꞌ ishalbꞌanil txꞌanh hakꞌ. 21 Yanikanh naj Hiram kabꞌebꞌ nimeta oy tuꞌ yamaqꞌil yatut yaꞌ Salomón. Hayet lahwi yanikanh naj huneꞌ yinh iswatxꞌqꞌabꞌ nha, yaniko naj, Jaquín isbꞌihoj oy tuꞌ, haxa yet lahwi yanikanh naj hunxa niman oy yinh ismekqꞌabꞌ nha, yaniko naj Boaz isbꞌihoj. 22 Yaniko naj yechel teꞌ lirio yinh iswiꞌ kabꞌebꞌ nime oy. Hak tuꞌ yu islahwikano ismunil naj iswatxꞌen kabꞌebꞌ oy tuꞌ.
Watxꞌi ismunlabꞌal Yatut Komam Dios
23 Iswatxꞌenpaxo naj Hiram huneꞌ niman pila yet ha haꞌ, huneꞌ pila tuꞌ broncenhe chꞌen okniko yinh, petan yehi. Kanhebꞌ metro yok 50 centímetro xolbꞌal istiꞌ chiꞌapni qꞌaxepxa istiꞌ. Kabꞌ metro yok 25 centímetro yehayto yich. Huneꞌ txꞌanh txꞌanh 13 (oxlanhebꞌ) metro yok 50 centímetro, hak tuꞌ yekoj ispetanil istiꞌ. 24 Haꞌ yalanh istiꞌ huneꞌ pila tuꞌ ayko katxol yechel sat te teꞌ hakaꞌ jilni teꞌ kꞌum, yaj txanejnhe. Sunil yinh istiꞌ huneꞌ pila tuꞌ hoyaniko teꞌ. Xolbꞌal hunun 45 (howebꞌ yoxkꞌal) centímetro txolaniko 10 (lahonhebꞌ) teꞌ, huneꞌnhe xin ye iswatxꞌebꞌanil yebꞌ pila tuꞌ. 25 Huneꞌ pila tuꞌ aykanh yibꞌanh yechel 12 (kabꞌlahonhkꞌonh) noꞌ wakax, yaj broncenhe chꞌen ayko yinh. Oxkꞌonh noꞌ tuꞌ tꞌanhanto yinh norte, oxkꞌonhxa xin noꞌ tꞌanhanto bꞌay chiꞌahilo tzꞌayik, oxkꞌonhxa xin tꞌanhanto yinh sur, oxkꞌonhxa noꞌ xin tꞌanhanto bꞌay chito tzꞌayik. Yibꞌanh noꞌ ayayo huneꞌ pila tuꞌ, haꞌ xin yoj noꞌ yintaj yalanh huneꞌ pila tuꞌ ayiktoj. 26 Huneꞌ pila tuꞌ huneꞌ qꞌuchubꞌ ispimal, haꞌ yinh istiꞌ pila tuꞌ ayko isxumakil teꞌ lirio yelawiloj. Haꞌ yul huneꞌ pila tuꞌ chiꞌayto 44 (kanhebꞌ yoxkꞌal) mil litro ha haꞌ.
27 Iswatxꞌenpaxo naj Hiram 10 (lahonhebꞌ) carruaje, yaj broncenhe chꞌen ok yinh. Huneꞌ metro yok 80 centímetro yeko ispakꞌul, huneꞌ metro yok 80 centímetropaxo sat, hunun metro yok 35 centímetro yekanh istel. 28 Hunteqꞌan carruaje tuꞌ, hak tiꞌ ye iswatxꞌebꞌanil hakaꞌ tiꞌ: Ayko ismarcohal, haxa yibꞌanh ismarcohal tuꞌ ayko yaqꞌinteꞌal. 29 Haxa yibꞌanh yaqꞌinteꞌal tuꞌ ayko yechel noꞌ bꞌalam, noꞌ wakax yebꞌ yechel ebꞌnaj querubín, aypaxo hunteqꞌanxa yelawil aykoj yibꞌanh yebꞌ yalanh hunteqꞌan yechel tuꞌ. 30 Hunun carruaje tuꞌ, ayko kanhebꞌ yanta, broncenhe chꞌen, broncenhepaxo chꞌen bꞌay chiꞌekꞌ petpon yanta tuꞌ, haꞌ yinhla kanhebꞌ istxikin ayikto huneꞌ chꞌen chichahwahi, ayko yipomalo bꞌay chiꞌayto pila, broncepaxo chꞌen. Aypaxiko xaj te teꞌ yebꞌ teꞌ xumak yelawiloj. 31 Haxa yul hunun carruaje tuꞌ ayayto huneꞌ niman hakaꞌ tubo, 45 (howebꞌ yoxkꞌal) centímetro yekanh yibꞌanh istiꞌ carruaje tuꞌ, 68 (waxajebꞌ iskanhwinaj) centímetro yehpaxikto chꞌen tubo yulikto carruaje tuꞌ. Aypaxiko xin yelawil huneꞌ niman tubo, haxa ismajil istiꞌ tubo tuꞌ, mach petano yehi, wal xin kanh tzalan ye ismajil. 32 Haꞌ kanhebꞌ yanta tuꞌ ayko yalanh yaqꞌinteꞌal, haxa bꞌay chiꞌekꞌ petpon yanta tuꞌ hunye iswatxꞌebꞌanil yebꞌ carruaje, 27 (hujebꞌ iskawinaj) pulgada ismalil yekanh hunun llanta tuꞌ. 33 Lahan yanta tuꞌ hakaꞌ isyantahil chꞌen carruaje, huneꞌnhe ye iswatxꞌebꞌanil, broncenhe chꞌen sunil. 34 Haktikꞌapax tuꞌ kanhebꞌ chꞌen chichahwahi, ayko yipomalo ayko yinhla istxikin carruaje tuꞌ, broncenhe chꞌen, hun xin ye iswatxꞌebꞌanil huneꞌ tuꞌ yebꞌ chꞌen carruaje. 35 Aypaxokanh huneꞌ petan yehi yibꞌanh carruaje tuꞌ, 18 (waxajlahonhebꞌ) pulgada yekanh istel, haꞌ ismarcohal yebꞌ yaqꞌinteꞌal tuꞌ hunnhe ye iswatxꞌebꞌanil sunil.c 36 Haꞌ yinh marco yebꞌ yinh yaqꞌinteꞌal yako naj Hiram yechel ebꞌnaj querubín yebꞌ yechel noꞌ bꞌalam yebꞌ yechel xaj teꞌ palma, hatatikꞌa ishamanil xol hunun; yanipaxiko naj yelawil yinhla ishoyanil. 37 Hak tuꞌ yute naj iswatxꞌebꞌanil 10 (lahonhebꞌ) carruaje, broncenhe chꞌen okniko yinh sunil; lahannhe xin jilni yebꞌ lahannhe ismalil yebꞌ yelawil.
38 Iswatxꞌenpaxo naj 10 (lahonhebꞌ) pila, yaj bronce chꞌen okniko yinh, huneꞌ metro yok 80 (kanhwinaj) centímetro ismalil, 40 (kawinaj) kꞌot ha haꞌ chiꞌayto yul hunun pila tuꞌ. 39 Yalaxiko howebꞌ carruaje tuꞌ yinh iswatxꞌqꞌabꞌ yinh iskꞌul Yatut Komam Dios, howebꞌxa xin alaxiko yinh ismekqꞌabꞌ yinh qꞌaxepxa iskꞌul yatut tuꞌ. Yalaxiko huneꞌ niman pila yinh iswatxꞌqꞌabꞌ yatut tuꞌ yinh istxikin yetkꞌulal bꞌay chito tzꞌayik yebꞌpaxo yinh sur.
Isbꞌi istxolal munlabꞌal bꞌey Yatut Komam
40 Iswatxꞌenpaxo naj Hiram nimeta xi yebꞌ chꞌen tenaza, yebꞌ chꞌen nime sekꞌ. Hak tuꞌ yu islahwi iswatxꞌenkano naj munlabꞌal chiꞌokniko yul Yatut Komam Dios, yet ischejlax naj yu yaꞌ rey Salomón. 41 Iswatxꞌe naj kabꞌebꞌ oy yebꞌ kabꞌebꞌ yelawil iswiꞌ oy, yanipaxiko naj chꞌen bronce watxꞌebꞌilayo hakaꞌ jilni txꞌanh hak, haꞌ xin ishoybꞌako naj yelawilo iswiꞌ oy. 42 Yaniko naj kanhebꞌ ciento yechel teꞌ granada, yinh kabꞌebꞌ txꞌanh hakꞌ tuꞌ, katxol yuko granada yinh hunun yechel txꞌanh hakꞌ hoyaniko yinh iskꞌolanil yelawil iswiꞌ oy tuꞌ. 43 Iswatxꞌenpaxo naj 10 (lahonhebꞌ) carruaje yebꞌ 10 (lahonhebꞌ) pila ahto yibꞌanh yehobꞌal yibꞌanh carruaje. 44 Iswatxꞌenpaxo naj huneꞌ niman pila yebꞌ 12 (kabꞌlahonhkꞌonh) yechel noꞌ wakax okto linhno yalanh. 45 Iswatxꞌenpaxo naj Hiram chꞌen nime xi, chꞌen nime cuchara yebꞌ chꞌen nime sekꞌ chiꞌokniko yul Yatut Komam Jahawil.
Sunil hunteqꞌan munlabꞌal iswatxꞌe naj Hiram tuꞌ bronce chꞌen ok yinh, chijepla elikoj; haꞌ yaꞌ rey Salomón chejni naj. 46 Sunil tuꞌ ischej yaꞌ rey iswatxꞌe naj Hiram istiꞌ haꞌ Jordán, bꞌay ay huneꞌ txꞌotxꞌ kꞌul yinh sekꞌal, ayko xolbꞌal konhobꞌ Sucot yebꞌ konhobꞌ Saretán. 47 Mach xin ismale yaꞌ rey Salomón hanta yalil chꞌen bronce okniko yinh sunil munlabꞌal tuꞌ, yuto kaw nimankano chꞌen ok yinh.
48 Ischejnipaxo yaꞌ rey Salomón watxꞌelaxo hunteqꞌanxa munlabꞌal chiꞌokniko yul Yatut Komam Jahawil. Iswatxꞌenkanh naj huneꞌ mexha nabꞌa oro ok yinh, bꞌay chinhuslax pom, yebꞌ huneꞌ mexha oropaxo bꞌay chiꞌahto ixim pan chihaltelax tet Komam. 49 Iswatxꞌenpaxo naj howebꞌ candelero watxꞌebꞌil yinh chꞌen oro, chꞌen kaw kꞌul, chiꞌok yinh iswatxꞌqꞌabꞌ yul Yatut Komam Dios, yok howebꞌxapaxo chꞌen chiꞌok yinh ismekqꞌabꞌ yul Yatut Komam sata Ehobꞌal ekꞌna kaw Txahul. Iswatxꞌenpaxo naj isxumakil te teꞌ yebꞌ chꞌen cantil yebꞌ chꞌen tenaza oronhe. 50 Iswatxꞌenpaxo naj tzꞌahabꞌ, yebꞌ chꞌen tenaza chiꞌinilo istanhil ismechahil cantil, yebꞌ nime sekꞌ, yebꞌ cucharón, yebꞌ chꞌen lesen oropaxoj. Oropaxo iswisagrahil ispultahil Ehobꞌal ekꞌna kaw Txahul, ayikto yul Yatut Komam, yebꞌ iswisagrahil sunil ispultahil Yatut Komam.
51 Hak tiꞌ yu islahwikano iswatxꞌi sunil munlabꞌal ischej yaꞌ rey watxꞌelaxoj. Ischejni yaꞌ Salomón tuꞌ yilaxkanto sunilal munlabꞌal oro yebꞌ plata yakano yaꞌ rey David, ismam yaꞌ Salomón, yu yokniko yul Yatut Komam, iskꞌubꞌalaxto munlabꞌal tuꞌ yul kꞌuwanbꞌal yul Yatut Komam.