3 Ischejnito yaꞌ rey Salomón ischejabꞌ yalno tet naj Hiram, isreyal Tiro hakaꞌ tiꞌ: «Chimisje hawaniti te teꞌ wetan hakaꞌ yu hawaniti teꞌ cedro tet inmaman, yet iswatxꞌenkanh yatut bꞌay ehikꞌoj. 4 Ilkꞌanabꞌi, ayko yinh innabꞌalan wanikanhan Yatut Komam Jahawil, inDiosalan bꞌay chibꞌina isbꞌi. Haꞌ huneꞌ nha tuꞌ yet Komam chukoj, haꞌ tuꞌ chinhuslax teꞌ pom kaw xuqꞌ sam sata Komam, haꞌ tuꞌ xin chiꞌalaxpaxayo ixim pan sata Komam, kat isnhuslaxpaxo xahanbꞌal hunun sakꞌayal yebꞌ qꞌejbꞌiyalil yinh istzꞌayikal xewilal yebꞌ yet unin ixahaw, yebꞌ yet chiꞌekꞌtzelax qꞌinh tet Komam Dios, koDiosalanh; haꞌ hunteqꞌan tiꞌ chikoyijehanh hanhonh Israelonh tiꞌanh yinh sunilbꞌal tiempo. 5 Haꞌ Yatut Komam Dios chinwatxꞌekanhan kaw nimajal chu, yuto haꞌ Komam koDiosalanh kaw aykano yelapnoj sata hunteqꞌanxa tzet chihal-lax diosal. 6 Yajaꞌ xin ¿maktaxka chu iswatxꞌenkanh hunu nha bꞌay chꞌehikꞌo Komam Dios? Yuto haꞌ satkanh matxa isbꞌi hanta yekoj, mach chiqꞌoji tet Komam. Yuxin hanintiꞌan machi welapnojan wanikanhan nha bꞌay chiꞌehikꞌo Komam, kachannhe bꞌay chinhuslax teꞌ pom tet Komam, yuxin chiwakanhan yatut. 7 Wal tinanh chiwaltojan tawet tato chawati hunu naj kaw helan ismunla yinh chꞌen oro, chꞌen plata, chꞌen bronce, chꞌen hierro yebꞌ yinh qꞌap kajmutzꞌmunhe, qꞌap kaj, qꞌap yaxtzꞌantzꞌonhe, yebꞌ helan iswatxꞌen yelawil tzijxanhe tzet ye tuꞌ, yu ismunla naj yebꞌ ebꞌnaj ijbꞌalom saybꞌilkano yu inmaman bꞌey Judá yebꞌ bꞌey Jerusalén tiꞌ. 8 Chiwochehan chawapaxti te teꞌ ay bꞌey Líbano wetan; teꞌ cedro, teꞌ tzꞌisis, yebꞌ teꞌ sándalo, yuto wohtajan ta haꞌ bꞌey tuꞌ ay ebꞌnaj winaj kaw helan yinh polo teꞌ, chiwanipaxtojan ebꞌnaj inchejabꞌan munlaho yinta ebꞌnaj hachejabꞌ tuꞌ. 9 Yu iswatxꞌenilo ebꞌnaj te teꞌ yinh kaw niman yuto haꞌ huneꞌ nha chinwatxꞌehan tiꞌ kaw nimajal yebꞌ kaw kꞌulchꞌankano chu. 10 Chiwatojan 60 mil quintal ixim trigo iswabꞌ ebꞌnaj polom teꞌ tuꞌ, yebꞌ 60 mil quintal ixim cebada, yok 440 litro vino, haktikꞌapax tuꞌ islitrohal teꞌ aceite,» xhito yaꞌ rey Salomón.^a

11 Lahwi tuꞌ yaniti naj Hiram isreyal Tiro, ispaj istzotiꞌ yaꞌ Salomón yul carta, yalniti naj hakaꞌ tiꞌ: «Yuto kaw xahan ay iskonhobꞌ Dios yu, haWahawil, yuxin kach yako reyal yinh,» xhi naj Hiram. 12 Yalnipaxo naj rey Hiram hakaꞌ tiꞌ: «Xin, hal-laxojabꞌ kꞌul-la tzotiꞌ yinh Dios, isDiosal Israel, Dios watxꞌenhe satkanh yebꞌ txꞌo txꞌotxꞌ, Dios kach saynilo xol ebꞌnaj iskꞌahol yaꞌ David hamam, yaqꞌni hanabꞌal yebꞌ hahelanil chawanikanh yatut isDiosal ebꞌnaj Israel yebꞌ hawatut bꞌay chachok reyal. 13 Chiwatojan huneꞌ naj kaw helan yebꞌ kaw ay isnabꞌal tawet, haꞌ ton naj Hiram-abi. 14 Naj tuꞌ yunin huneꞌ ix iskutzꞌin naj Dan ye naj, wal ismam naj xin, ah Tiro. Naj Hiram-abi tuꞌ helan naj ismunla yinh chꞌen oro, chꞌen plata, chꞌen bronce, chꞌen hierro, chꞌen chꞌen yebꞌ te teꞌ. Yohta naj ismunlapaxo yinh qꞌap kajmutzꞌmunhe, qꞌap yaxtzꞌantzꞌonhe, qꞌap lino, yebꞌ yinh qꞌap qꞌap kaj; yohtapaxo naj yaniko yechel yelawil tzetaj ye tuꞌ, haꞌ naj chiwatojan tawet yunhe ismunla naj yebꞌ ebꞌnaj kaw helan saybꞌilkaniko yu komam David, hamam. 15 Tinanh xin chiwaltojan tawet mam rey, tato chawati ixim trigo, ixim cebada, teꞌ aceite yebꞌ vino yinta ebꞌnaj munlawom tuꞌ hakaꞌ hawalni. 16 Chinchejtojan ebꞌnaj inchejabꞌan yiqꞌalo te teꞌ haqꞌana bꞌey txꞌotxꞌ Líbano, kat yanito ebꞌnaj teꞌ tawet yul barco yibꞌanh haꞌ mar, chachahni teꞌ bꞌey Jope, hexxa xin cheyito teꞌ bꞌey Jerusalén,» xhiti naj yul teꞌ carta.

17 Lahwi tuꞌ ischejni yaꞌ rey Salomón ilaxokanh isbꞌisil ebꞌnaj mach Israelo ay xol ebꞌnaj Israel tuꞌ, 153,600 isbꞌisil ebꞌnaj. Wal xin bꞌisbꞌil ebꞌnaj tuꞌ yu yaꞌ rey David, ismam yaꞌ Salomón, yet yalanhtokanoj. 18 Haꞌ xol ebꞌnaj tuꞌ, saylaxilo 70 (lahonhebꞌ iskanhwinaj) mil ebꞌnaj ok ijo ijatz, 80 (kanhwinaj) mil ebꞌnaj ok poho chꞌen yinh ejla wonhan, yok 3,600 ebꞌnaj ok ijbꞌalomal yinh ebꞌnaj ok munil tuꞌ.