Yaꞌ rey Salomón ok yaꞌ iswatxꞌekanh Yatut Komam Dios
6
480 habꞌilxa yel ebꞌnaj Israel bꞌey Egipto, kanhebꞌxa xin habꞌil yokpaxo yaꞌ Salomón isreyalo Israel selelo ismam, yicheniko yaꞌ iswatxꞌenkanh Yatut Komam Dios, yinh iskabꞌ ixahaw chiyij Zif yinh huneꞌ habꞌil tuꞌ. 2 Haꞌ Yatut Komam Dios Jahawil iswatxꞌe yaꞌ rey Salomón tuꞌ, 27 (hujebꞌ iskawinaj) metro ispakꞌul, bꞌalonhebꞌ metro yuko istxikin, 13 (oxlanhebꞌ) metro ok yikta metro yupaxkanh istel. 3 Hakaꞌ ismalil yuko istxikin Yatut Komam Dios, hak tuꞌ yupaxilto ismalil yamaqꞌil, bꞌalonhebꞌ metro yukoj. Wal sat yamaqꞌil Yatut Komam tuꞌ, kanhebꞌ metro yok yiktaxa yukoj. 4 Iswatxꞌenpaxo yaꞌ isventanahil Yatut Komam tuꞌ, nimajal sat yul, haxa yintaj txannhe sat. 5 Iswatxꞌelaxpaxo hunteqꞌan cuarto yinhla ishoyanil iskꞌul yebꞌ istxikin isbꞌitzꞌabꞌil Yatut Komam Dios tuꞌ. 6 Oxebꞌ piso yu iswatxꞌelaxi, haꞌ bꞌabꞌel piso, kabꞌ metro yok 25 centímetro yuko sat, haxa iskabꞌ piso kabꞌebꞌ metro yok 70 centímetro yuko sat, haxa yoxebꞌ piso xin oxebꞌ metro yok 15 centímetro yuko sat. Yuto haꞌ ispimal bꞌitzꞌabꞌ mokꞌi ismalil, yunhe machi hol-lax bꞌitzꞌabꞌ bꞌay chiꞌok ispatzabꞌil, yuxin hak tuꞌ yuhi. 7 Hayet iswatxꞌelax Yatut Komam, chꞌen chꞌen ok bꞌitzꞌabꞌoj. Hunteqꞌan chꞌen tuꞌ, watxꞌebꞌilxa chꞌen yet yilaxti chꞌen, yuxin hayet ismunla ebꞌnaj anikanh Yatut Komam, machi abꞌelax ischakꞌlax chꞌen yu martillo maka yu hunu eche, maka yu hunuxa chꞌen munlabꞌal. 8 Haꞌ ispultahil iskabꞌ piso ayko yinh yetkꞌulal kowatxꞌqꞌabꞌ yet chonhokto yul Yatut Komam, haxa bꞌay chonhahto yinh iskabꞌ yebꞌ yinh yet yox piso tuꞌ ay huneꞌ qꞌoch chiꞌekꞌ kotxkoni hakaꞌ yul iskꞌul noꞌ mikꞌin.9 Iswatxꞌekanh yaꞌ Salomón Yatut Komam, hayet islahwi xin yalaxiko teꞌ patzabꞌ yibꞌanh, yokpaxkano teꞌ nime aqꞌinteꞌ, cedro yinh. 10 Iswatxꞌelaxpaxokanh cuarto yinhla ishoyanil iskꞌul, kabꞌ metro yok 25 centímetro yukanh istel hunun cuarto. Yalaxiko ispatzabꞌil, cedronhe teꞌ oknikoj yinh. Haꞌ teꞌ patzabꞌ tuꞌ chiꞌokapno istxam teꞌ yibꞌanh iskahonal Yatut Komam.a 11 Lahwi tuꞌ yalni Komam Dios Jahawil tet yaꞌ rey Salomón hakaꞌ tiꞌ: 12 «Haꞌ yinh huneꞌ nha maxawatxꞌekanh tiꞌ chiwalkanojan tawet, tato chaxhok tzujno yinta tzet chiwalan, kat hayijen inchejbꞌanilan, kat hakꞌubꞌanpaxoj, kat habꞌeybꞌalnheni, chinyijehan tawet tzet waltekanojan tet yaꞌ rey David hamam. 13 Chinehikꞌojan xol ebꞌnaj Israel, machi xin chinbꞌejkanojan inkonhobꞌ Israeltiꞌan,» xhi Komam.
14 Hayet lahwi iswatxꞌikanokanh Yatut Komam Dios yu yaꞌ rey Salomón, 15 yalaxiko teꞌ aqꞌinteꞌ cedro yul yinhla iskꞌul bꞌitzꞌabꞌ, ok teꞌ aqꞌinteꞌ tuꞌ yich masanta ahapno teꞌ yalanh teꞌ patzabꞌ bꞌay ayahto jaqꞌal. Yalaxpaxayo teꞌ aqꞌinteꞌ tzꞌisis pisohal. 16 Haꞌ yul Yatut Komam, watxꞌelaxpaxokanh huneꞌ cuarto yinh yaqꞌinteꞌal teꞌ cedro, haꞌ ton huneꞌ cuarto chiyij Ehobꞌal ekꞌna kaw Txahul; huneꞌ cuarto tuꞌ, bꞌalonhebꞌ metro yeko yul. 17 18 (waxajlahonhebꞌ) metro yeko ispakꞌul Yatut Komam. 18 Haꞌ yul Yatut Komam tuꞌ ayko teꞌ aqꞌinteꞌ cedro yinhla iskꞌul bꞌitzꞌabꞌ, ayko yechel isxumakil teꞌ kaj yebꞌ sat teꞌ kꞌum yelawiloj. Haꞌ yul tuꞌ cedronhe teꞌ, mach ixtanho yeko chꞌen chꞌen bꞌitzꞌabꞌoj. 19 Yalaxpaxiko yelawil yul Cuarto chiyij Ehobꞌal ekꞌna kaw Txahul ayikto yul Yatut Komam, yalaxikto isKaxhahil istrato Komam Dios Jahawil bꞌey tuꞌ.b 20 Huneꞌ cuarto tuꞌ ayikto yul Yatut Komam bꞌalonhebꞌ metro yeko istxikin, bꞌalonhebꞌ metro yeko ispakꞌul, bꞌalonhebꞌ metro yekanh istel. Yalaxiko chꞌen oro, chꞌen kawxayako iskꞌulal yinhla iskꞌul teꞌ aqꞌinteꞌ yul huneꞌ cuarto tuꞌ, yalaxpaxiko chꞌen oro yinh ismexhahil bꞌay chinhuslax pom, haꞌ ismexhahil tuꞌ cedronhe teꞌ aykoj. 21 Hak tuꞌ yu ischejni yaꞌ rey Salomón yalaxiko chꞌen oro yinh teꞌ aqꞌinteꞌ yulaj iskꞌul Yatut Komam, yalaxiko huneꞌ chꞌen cadena oro satalti huneꞌ Ehobꞌal ekꞌna kaw Txahul.c 22 Yalaxiko chꞌen oro yul Yatut Komam, ichiko yalaxiko chꞌen yich masanta bꞌay kachan bꞌitzꞌabꞌ, yalaxpaxiko chꞌen oro yinh ismexhahil yet pom ayko satalti huneꞌ Ehobꞌal ekꞌna kaw Txahul.
23 Iswatxꞌelaxpaxo yechel kawanh ebꞌnaj querubín. Haꞌ istel hunun querubín tuꞌ kanhebꞌ metro yok 50 centímetro, yalaxikto yul Ehobꞌal ekꞌna kaw Txahul. 24 Kabꞌebꞌ metro yok 25 centímetro yeko hunun xikꞌ, yuxin kanhebꞌ metro yok 50 centímetro chismajiloj; chitaichiti yinh istxam xikꞌ masanta yinh huneꞌxa istxam xikꞌ hunun querubín. 25 Haktikꞌapax tuꞌ huneꞌxa naj querubín, kanhebꞌ metro yok 50 centímetro chismajilo xikꞌ, wal xin lahannhe ismalil iskabꞌil, yebꞌ xin lahannhe yil-laxi. 26 Kanhebꞌ metro yok 50 centímetroxa istel huneꞌ querubín, haktikꞌapax tuꞌ istel huneꞌxa. 27 Yalaxikto kawanh querubín tuꞌ yul Ehobꞌal ekꞌna kaw Txahul ayikto yul Yatut Komam. Haꞌ kawanh querubín tuꞌ xin, lehanilto xikꞌ, yuxin huneꞌ querubín apni isxikꞌ yinh iskꞌul huneꞌ bꞌitzꞌabꞌ, haꞌ isxikꞌ huneꞌxa querubín apnipaxo xikꞌ yinh iskꞌul qꞌaxepxa huneꞌxa bꞌitzꞌabꞌ, wal qꞌaxepxa xikꞌ hunun querubín xin ischale isbꞌa istxam yiktabꞌal cuarto tuꞌ. 28 Yalaxpaxiko chꞌen oro yinh kabꞌebꞌ querubín tuꞌ. 29 Yalaxiko txꞌiꞌal yelawil isbꞌitzꞌabꞌil Yatut Komam, alaxiko yechel ebꞌnaj querubín yebꞌ yechel xaj teꞌ palma yebꞌ isxumakil te teꞌ. Alaxiko yelawil tuꞌ yul huneꞌ Ehobꞌal ekꞌna kaw Txahul yebꞌ yintaj. 30 Yalaxpaxayo chꞌen oro yibꞌanh teꞌ aqꞌinteꞌ ayayo yul Yatut Komam yinh bꞌabꞌel cuarto, yebꞌ yul Ehobꞌal ekꞌna kaw Txahul. 31 Haꞌ isteꞌal teꞌ olivo watxꞌebꞌiliko pultahil yinh huneꞌ Ehobꞌal ekꞌna kaw Txahul, haxa ismarcohal yebꞌ yoyalil howebꞌ istxikin ayko yelawiloj. 32 Haꞌ kabꞌebꞌ teꞌ pulta tuꞌ watxꞌebꞌil yinh teꞌ olivo, alaxiko yechel ebꞌnaj querubín yebꞌ xaj teꞌ palma yebꞌ isxumakil te teꞌ yelawiloj. Yalaxpaxiko chꞌen oro yinh teꞌ pulta, yebꞌ yinh yelawil yechel querubín yebꞌ yinh xaj teꞌ palma. 33 Bꞌay kaw chonhokapno yul Yatut Komam Dios, haꞌtikꞌa teꞌ olivo ok ismarcohalo yinh iskanhebꞌal istiꞌla teꞌ pulta. 34 Haꞌ kabꞌebꞌ teꞌ pulta ayko yinh Yatut Komam tuꞌ tzꞌisis teꞌ. Wal xin hunun pulta tuꞌ kabꞌebꞌ yiqꞌni isbꞌa, hayet chihajlaxi kat ispajtzon isbꞌa. 35 Yalaxpaxiko yechel ebꞌnaj querubín yebꞌ xaj teꞌ palma, yebꞌ xumakil te teꞌ yelawilo pulta tuꞌ; yanhtelaxpaxoj yok chꞌen oro yinh. 36 Iswatxꞌelaxpaxkanh chꞌen kꞌubꞌ yamaqꞌil Yatut Komam, oxebꞌ txol chꞌen chꞌen tzehbꞌilxa latzꞌbꞌalaxkanh, yalaxiko huneꞌ txol teꞌ patzabꞌ cedro yibꞌanh.
37 Kanhebꞌxa habꞌil yok yaꞌ Salomón reyal yet ichiko yalaxayto xeꞌ Yatut Komam Dios, yinh ixahaw Zif ichikoj. 38 Hunlahonhebꞌxa habꞌil xin yok yaꞌ Salomón reyal yinh ixahaw Bul, haꞌ ton iswaxajebꞌ ixahaw yinh huneꞌ habꞌil tuꞌ, islahwikano iswatxꞌelax Yatut Komam yebꞌ sunil iscuartohal yebꞌ yelawil. Hujebꞌ habꞌil yito iswatxꞌelaxkanh Yatut Komam yu yaꞌ rey Salomón.