Istꞌinhbꞌakano yaꞌ Salomón istrato yebꞌ naj Hiram
5
Hayet yabꞌen naj Hiram, isreyal Tiro tato haꞌ yaꞌ Salomón ok reyal selelo ismam, haꞌ ton yaꞌ David, ischejnito naj ischejabꞌ tzotelo tet yaꞌ rey Salomón tuꞌ, yuto kaw xahan yil isbꞌa naj Hiram yebꞌ yaꞌ David yet yalanhtokanoj. 2 Yalnito yaꞌ rey Salomón tet naj Hiram: 3 «Hach tiꞌ kaw hawohtaj tato mach yu yanikanh inmam Davidan Yatut Komam Dios Jahawil, isDiosal, yu ej howal yako konhobꞌ ayko yinhla ishoyanil, yajaꞌ masanta yako Komam Dios ebꞌnaj tuꞌ yalanh yoj inmaman. 4 Haꞌ tinanh xin, chiyaqꞌ Komam Wahawil, inDiosalan aqꞌankꞌulal wilaꞌan sat sunil txꞌotxꞌ Israel, yuto machi mak ayko ishowal jinhanh yebꞌ machi mak tet wal koxiwanh. 5 Yuxin wal tinanh, xaꞌel yinh inkꞌulan wanikanhan Yatut Komam Wahawilan, inDiosalan, hakaꞌ yu yalnikano Komam tet inmaman yet yalnikanoj: “Naj hakꞌahol chiwakojan reyal haseleloj, haꞌ naj chiꞌanikanh watutan,” xhikano Komam. 6 Yuxin chiwaltojan tawet tato chachejto ebꞌnaj hachejabꞌ qꞌajo cedro bꞌey txꞌotxꞌ Líbano. Chinchejnipaxtojan inchejabꞌan yinta ebꞌnaj hachejabꞌ tuꞌ, kat hawalni hanta istohol ebꞌnaj chiwaqꞌan, yuto hach tiꞌ kaw hawohtaj tato koxol tiꞌanh machi ebꞌnaj polom teꞌ hakaꞌ ebꞌnaj ay takꞌatanh bꞌey Sidón,» xhito yaꞌ Salomón.7 Hayet yabꞌen naj Hiram tzet yalto yaꞌ rey Salomón istzalakanh naj, yalni naj: «Hal-laxojabꞌ kꞌul-la tzotiꞌ yinh Komam Dios Jahawil, yuto yaqꞌ Komam ishelanil iskꞌahol yaꞌ David yijbꞌan huneꞌ konhobꞌ kaw nimajalkano tiꞌ,» xhi naj.
8 Yalnito naj Hiram tet yaꞌ Salomón: «Mawabꞌehan tzet hawaltij, chinyijenan tzet chawoche, chinchejnihan ilaxoyo teꞌ cedro yebꞌ teꞌ tzꞌisis, hakaꞌ hawalni tiꞌ. 9 Kat yiniti ebꞌnaj inchejabꞌan teꞌ bꞌey txꞌotxꞌ Líbano masanta istiꞌ haꞌ mar. Lahwi tuꞌ kat iskꞌalbꞌan ebꞌnaj teꞌ yinh islatzꞌanil, kat yaniko ebꞌnaj teꞌ yibꞌanh haꞌ mar, kat yinito ebꞌnaj teꞌ bꞌay chawoche tuꞌ, kat yilaxilo iskꞌalil teꞌ, kat yalaxiko teꞌ yul haqꞌabꞌ. Wal xin chayije tzet chiwochehan, chawaniti tzet chinlohan yebꞌ mak ay yul watutan,» xhito naj.
10 Hak tuꞌ yu yaqꞌni naj Hiram sunil teꞌ cedro yebꞌ teꞌ tzꞌisis isqꞌan yaꞌ Salomón. 11 Yaqꞌni yaꞌ Salomón hanta tzet chiꞌokniko yu naj Hiram, 75 (holanhebꞌ iskanhwinaj) mil quintal ixim trigo yu iswahni naj ixim yebꞌ makta ay yul yatut, yaqꞌnipaxo 115 mil litro teꞌ aceite olivo kaw kꞌul tet naj. Haꞌ ixim trigo yebꞌ teꞌ aceite tuꞌ yaqꞌ yaꞌ Salomón hunun habꞌil tet naj Hiram. 12 Yaqꞌ Komam Dios Jahawil ishelanil yaꞌ Salomón hakaꞌ yu yalnikano Komam. Wal xin istꞌinhbꞌakano istzotiꞌ naj Hiram yebꞌ yaꞌ Salomón, hak tuꞌ xin ay aqꞌankꞌulal xol yaꞌ yebꞌ naj rey.
13 Yanilto yaꞌ rey Salomón huneꞌ chejbꞌanile tet sunil anma ay sat txꞌotxꞌ Israel ta chikutxiko ebꞌnaj chito yinh munil. Iskutxbꞌalaxiko 30 (lahonhebꞌ iskawinaj) mil ebꞌnaj winaj.a 14 Ischejlaxto hunun 10 (lahonhebꞌ) mil ebꞌnaj yinh hunun ixahaw yinh istxolal, yuxin huneꞌ ixahaw chibꞌeykꞌo 10 (lahonhebꞌ) mil ebꞌnaj munlahoj bꞌey txꞌotxꞌ Líbano, tzujan tuꞌ, kat ismeltzo ebꞌnaj yatut, kabꞌ xin ixahaw chiꞌehikꞌo ebꞌnaj yatut, kat isto ebꞌnaj hunelxa. Haꞌ naj Adoniram ayko yahawilo yinh ebꞌnaj alaxto munil tuꞌ. 15 Issaynipaxo yaꞌ rey Salomón 70 (holanhebꞌ iskanhwinaj) mil ebꞌnaj winaj ijom ijatz, yebꞌ xin 80 (kanhwinaj) mil ebꞌnaj maqꞌom poho chꞌen xolaj qꞌebꞌtaj. 16 Nan xin yepaxo ebꞌnaj iswiꞌehal issayiko yaꞌ Salomón yinh ebꞌnaj chimunla tuꞌ, 3,300 isbꞌisil ebꞌnaj chiꞌijbꞌali yinh ebꞌnaj. 17 Ischejni yaꞌ rey Salomón yilaxoti chꞌen nime chꞌen yebꞌ chꞌen yaꞌtaj iswatxꞌelaxiloj chꞌokniko xeꞌo Yatut Komam Dios, yilaxpaxti chꞌen chꞌen tzehbꞌil iskꞌul, chiꞌok isxihalo Yatut Komam. 18 Ebꞌnaj watxꞌem nha yet yaꞌ rey Salomón yebꞌ ebꞌnaj watxꞌem nha yet naj rey Hiram, yebꞌ hunteqꞌanxa ebꞌnaj ah Gebal, ispolayo ebꞌnaj te teꞌ, iswatxꞌenpaxilo ebꞌnaj chꞌen chꞌen chiꞌokniko yinh Yatut Komam.