4
Ok yaꞌ rey Salomón reyal yinh sunil anma Israel. 2 Haꞌ xin ebꞌnaj ok iswiꞌehalo yinh ebꞌnaj munla yinta yaꞌ, haꞌ ton ebꞌnaj tiꞌ: Naj Azarías, iskꞌahol yaꞌ sacerdote Sadoc. 3 Naj Elihoref, yebꞌ naj Ahías, haꞌ ebꞌnaj chitzꞌibꞌnhen tzet chiyu yaꞌ rey, ebꞌnaj kawanh tiꞌ, iskꞌahol naj Sisa ye ebꞌnaj. Yebꞌ naj Josafat iskꞌahol naj Ahilud, haꞌ naj istzꞌibꞌlom yaꞌ rey, haꞌ naj tuꞌ iqꞌnhe sello yet yaꞌ rey. 4 Naj Benaía, iskꞌahol naj Joiada, haꞌ naj yahawil yinh ebꞌnaj soldado Israel, wal yaꞌ Sadoc yebꞌ yaꞌ Abiatar, haꞌ ebꞌyaꞌ sacerdote yinh ebꞌnaj Israel. 5 Naj Azarías iskꞌahol yaꞌ Natán, haꞌ naj yahawil yinh ebꞌnaj chiꞌijbꞌali yinh hunun konhobꞌ, naj Zabud iskꞌaholpaxo yaꞌ Natán, haꞌ naj kaw niman yelapno xol ebꞌnaj chimunla yul ispalacio yaꞌ rey Salomón, kaw yamigo yaꞌ rey ye naj. 6 Haxa naj Ahisar, haꞌ naj chiꞌilni ismunil yaꞌ rey tuꞌ, naj Adoniram, iskꞌahol naj Abda, haꞌ naj chiꞌilni ebꞌnaj chiꞌalaxiko yinh munil.7 Ay 12 (kabꞌlahonhwanh) ebꞌnaj chimunla yinta yaꞌ Salomón, hunun ebꞌnaj chiꞌijbꞌali yinh hunun majan anma bꞌey yul sunil ismajul Israel. Haꞌ xin ebꞌnaj tuꞌ chiꞌaniloj tzet chislo yaꞌ rey Salomón yebꞌ makta ay yul yatut yaꞌ; hunun ixahaw yaqꞌni hunun ebꞌnaj tzet chꞌokniko yu yaꞌ rey yulbꞌal hunun habꞌil. 8 Hak tiꞌ isbꞌi ebꞌnaj chimunla yinta yaꞌ Salomón tuꞌ hakaꞌ tiꞌ: Naj iskꞌahol naj Hur, haꞌ naj chiꞌijbꞌali yinh txꞌotxꞌ Efraín, txꞌotxꞌ chewal txꞌotxꞌ. 9 Naj iskꞌahol naj Decar, haꞌ naj chiꞌijbꞌali yinh anma ay sat txꞌotxꞌ Macaz, yebꞌ anma ay bꞌey Saalbim, yebꞌ anma ay bꞌey Bet-semes, yebꞌ anma ay bꞌey Elón yebꞌpaxo yinh anma ay bꞌey Bet-hanán. 10 Naj iskꞌahol naj Hesed chiꞌijbꞌali yinh anma bꞌey txꞌotxꞌ Arubot, yebꞌ anma ay bꞌey txꞌotxꞌ Soco yebꞌ yinh anma ay bꞌey txꞌotxꞌ Hefer. 11 Naj iskꞌahol naj Abinadab, haꞌ naj chiꞌijbꞌali yinh sunil ismajul txꞌotxꞌ Dor, haꞌ xin ix Tafat, iskutzꞌin yaꞌ rey Salomón, haꞌ ix yixal naj. 12 Naj Baana iskꞌahol naj Ahilud, haꞌ naj chiꞌijbꞌali yinh anma ay sat txꞌotxꞌ Taanac, yebꞌ anma ay bꞌey Meguido yebꞌ yinh anma ay bꞌey sunil txꞌotxꞌ Bet-seán, ayko iskawilal txꞌotxꞌ Saretán yalanhayto txꞌotxꞌ Jezreel, chitaichiti txꞌotxꞌ bꞌey Bet-seán masanta chiꞌapni txꞌotxꞌ bꞌey Abel-mehola, kat yapnipaxo txꞌotxꞌ isqꞌaxebꞌikꞌto Jocmeam. 13 Naj iskꞌahol naj Geber, haꞌ naj chiꞌijbꞌali yinh anma ay bꞌey txꞌotxꞌ Ramot ay bꞌey Galaad, yebꞌ sunil iskonhobꞌ ebꞌnaj pohchakanokanh yinh naj Jair, iskꞌahol yaꞌ Manasés, yul ismajul txꞌotxꞌ Galaad. Chiꞌijbꞌalipaxo naj yinh anma ay bꞌey txꞌotxꞌ Argob yul ismajul txꞌotxꞌ Basán, bꞌay ay 60 (oxkꞌal) nime konhobꞌ, hoyanejiko iskꞌubꞌal, wal xin bronce ispultahil hunteqꞌan konhobꞌ tuꞌ aykoj. 14 Naj Ahinadab iskꞌahol yaꞌ Iddo, haꞌ naj chiꞌijbꞌali yinh anma ay bꞌey Mahanaim. 15 Naj Ahimaas, chiꞌijbꞌali naj yinh anma ay bꞌey txꞌotxꞌ Neftalí, haꞌ xin ix Basemat iskutzꞌin yaꞌ rey Salomón, haꞌ ix yiqꞌkanh naj. 16 Naj Baana, iskꞌahol naj Husai, haꞌ naj chiꞌijbꞌali yinh anma ay bꞌey txꞌotxꞌ Aser, yebꞌ yinh anma ay bꞌey txꞌotxꞌ Alot. 17 Naj Josafat, iskꞌahol naj Parúa, haꞌ naj chiꞌijbꞌali yinh anma ay bꞌey txꞌotxꞌ Isacar. 18 Naj Simei, iskꞌahol naj Ela, haꞌ naj chiꞌijbꞌali yinh anma ay bꞌey txꞌotxꞌ Benjamín. 19 Naj Geber iskꞌahol naj Uri, haꞌ naj chiꞌijbꞌali yinh anma ay bꞌey txꞌotxꞌ Galaad, haꞌ ton istxꞌotxꞌ naj Sehón, isreyal ebꞌnaj amorreo yebꞌ istxꞌotxꞌ naj Og, isreyal Basán. Hanhe xin naj Geber, chiꞌijbꞌali yinh anma yinh sunil txꞌotxꞌ Galaad.
20 Haꞌ anma Judá yebꞌ anma Israel, kaw nimankano isbꞌisil, lahan isbꞌisil hakaꞌ isbꞌisil arena ay istiꞌ haꞌ mar. Kaw xin ay tzet chislo yebꞌ tzet chiyukꞌu, yebꞌ xin kaw tzalahilalnhetikꞌa ye ebꞌnaj yinh hunteqꞌan habꞌil tuꞌ. 21 Yaꞌ Salomón tuꞌ ok yaꞌ reyal yinh hunteqꞌan konhobꞌ chitaichiti bꞌey haꞌ Éufrates masanta chiꞌapni bꞌey istxꞌotxꞌ ebꞌnaj filisteo, kat yapnipaxo yinh ismohonal txꞌotxꞌ Egipto. Sunil hunteqꞌan konhobꞌ tuꞌ yaqꞌ istohlabꞌal tet yaꞌ rey Salomón, isyijen tzet yal yaꞌ yulbꞌal tiempo yet itzitz yaꞌ. 22 Haꞌ sunil tzet chislo yaꞌ rey Salomón chiꞌaqꞌlax hunu tzꞌayik, 70 (lahonhebꞌ iskanhwinaj) quintal ixim harina kaw kꞌunkꞌuꞌ, yebꞌpaxo xin 140 quintal ixim mach kaw kokꞌo yehi. 23 10 (Lahonhkꞌonh) noꞌ wakax ayikto yul peyabꞌ kaw bꞌaqꞌich, yebꞌ 20 (hunkꞌal) noꞌ wakax chꞌimnhe chislo, 100 (hokꞌalkꞌonh) noꞌ meꞌ, nanyepaxo noꞌ sajche yebꞌ noꞌ miꞌe sajche, yebꞌ noꞌ chꞌik kaw bꞌaqꞌich. 24 Yuto yaꞌ Salomón tuꞌ, haꞌ yaꞌ yahawil yinh sunil ismajul txꞌotxꞌ ayko yinh yetkꞌulal bꞌay chito tzꞌayik, yinh istiꞌla haꞌ Éufrates; chitaichiti txꞌotxꞌ bꞌey Tifsa masanta bꞌey Gaza. Yahawil yeko yaꞌ yinh sunil ebꞌnaj rey ay yul hunun konhobꞌ tuꞌ. Aqꞌankꞌulal xin ye yaꞌ yebꞌ nime konhobꞌ ayko yinhla ishoyanil Israel.
25 Yulbꞌal istiempohal yet itzitzto yaꞌ rey Salomón, sunil anma Judá yebꞌ sunil anma Israel chitaichiti bꞌey konhobꞌ Dan masanta bꞌey konhobꞌ Beerseba aqꞌankꞌulal yehi; hunun mak tuꞌ ayikꞌto yalanh yenhel teꞌ uva, yebꞌ teꞌ higuera.a 26 Yaꞌ Salomón tuꞌ, aypaxo 40 (kawinaj) mil ischeh yaꞌ chitarnikꞌo teꞌ carruaje chiꞌokniko yinh howal, yebꞌ 12 (kabꞌlahonhebꞌ) mil ebꞌnaj soldado chiꞌekꞌ yibꞌanh cheh. 27 Haꞌ ebꞌnaj chiꞌijbꞌali yinh hunun majan konhobꞌ chaqꞌ ebꞌnaj tzet chislo yaꞌ rey Salomón, yebꞌ sunil ebꞌnaj chiwaꞌ yinta yaꞌ sat ismexha. Hunun ixahaw chiyaqꞌ hunun ebꞌnaj tzet chislo yaꞌ rey Salomón tuꞌ, machi hunu tzet ye tuꞌ tiꞌ mach chiꞌaqꞌlax tet yaꞌ. 28 Chiyipaxto ebꞌnaj ixim cebada yebꞌ teꞌ chꞌim chislo noꞌ cheh yet howal, yebꞌ noꞌ cheh yet ijatz. Sunil tuꞌ chito ebꞌnaj bꞌay ay yaꞌ rey Salomón yinh istxolal hunun ebꞌnaj.
29 Kaw nimankano ishelanil yebꞌ yitzꞌatil iswiꞌ yaꞌ rey Salomón aqꞌlax tet yu Komam Dios; kaw xin nimankano yip yanma yaꞌ hakaꞌ isbꞌisil arena ay istiꞌ haꞌ mar. 30 Haꞌ ishelanil yaꞌ tuꞌ ekꞌbꞌal yibꞌanh ishelanil ebꞌnaj ay yul nime konhobꞌ ay bꞌey bꞌay chiꞌahilo tzꞌayik, yebꞌ ekꞌbꞌal sata ishelanil ebꞌnaj ah Egipto. 31 Haꞌ ishelanil yaꞌ Salomón tuꞌ kaw ekꞌbꞌalkano yibꞌanh ishelanil ebꞌnaj winaj. Ekꞌbꞌal ishelanil yaꞌ yibꞌanh naj Etán ezraíta, naj Hemán, naj Calcol yebꞌ naj Darda, iskꞌahol naj Mahol. Sunil nime konhobꞌ ayko yinhla ishoyanil Israel abꞌenilo isqꞌumal ishelanil yaꞌ rey Salomón tuꞌ.
32 Istzꞌibꞌnhenayo yaꞌ oxebꞌ mil nabꞌale kaw ay yelapnoj, yebꞌpaxo 1,005 bꞌit. 33 Tzotelpaxo yaꞌ yibꞌanhilo teꞌ qꞌebꞌtaj, ichiti yaꞌ yinh teꞌ cedro ay bꞌey Líbano masanta apni yaꞌ yinh teꞌ hisopo chiꞌelilo yinhla iskꞌul bꞌitzꞌabꞌ. Tzotelpaxo yaꞌ yibꞌanhilo no noqꞌ, noꞌ chꞌik, no noqꞌ chishatxikꞌo iskꞌul, yebꞌ yibꞌanhilo noꞌ kay. 34 Sunil ej konhobꞌ yebꞌ ebꞌnaj rey ay sat txꞌo txꞌotxꞌ abꞌenilo isqꞌumal ishelanil yaꞌ rey Salomón, isto ebꞌnaj yabꞌeno ishelanil yaꞌ bꞌey Israel.