3 Kaw xin ayko yanma yaꞌ Salomón yinh Komam Jahawil, chisyijen yaꞌ sunil chejbꞌanile halbꞌilkano tet yaꞌ yu ismam, haꞌ ton yaꞌ David, yajaꞌ chako yaꞌ isxahanbꞌal iswiꞌla witz, kat isnhusnipaxo yaꞌ teꞌ pom. 4 Chixin bꞌeypaxikꞌo yaꞌ rey Salomón bꞌey Gabaón bꞌey iswiꞌ huneꞌ witz kaw aykano yelapnoj, chahniko yaꞌ qꞌaꞌ yibꞌanh yet xahanbꞌal, kat yanahto yaꞌ no noqꞌ yibꞌanh, kat istzꞌatoj. Mil no noqꞌ tuꞌ yako yaꞌ xahanbꞌalil bꞌey tuꞌ.

5 Hayet ay yaꞌ rey Salomón bꞌey Gabaón isyeni isbꞌa Komam Dios Jahawil tet yaꞌ yul iswayik yinh huneꞌ aqꞌbꞌal, yalni Komam tet yaꞌ:

—Qꞌan tzet chawoche, chiwaqꞌan tawet, xhi Komam.

6 Istaqꞌwi yaꞌ rey Salomón:

—Mamin, hach tiꞌ kaw ayayo iskꞌulal hakꞌul yibꞌanh hachejabꞌ David inmaman, yuto haꞌ inmamtuꞌan isyelal yebꞌ iskꞌulal yebꞌ istoholal iswatxꞌe yaꞌ yinh sunil yanma yul hasat. Haꞌ tinanh xin chito ayilo iskꞌulal hakꞌul yinh yaꞌ, yuxin hanin iskꞌahol intiꞌan kinok tzꞌonhnojan yul istzꞌonhobꞌal yaꞌ hakaꞌ yijni isbꞌa tinanh. 7 Wal tinanh xin Mam Yahawil, hach kinhawakojan hanin hachejabꞌ intiꞌan reyal selelo inmaman. Hanintiꞌan tzeh intohan, kaw mach wohtajojan yinh tzet chu wijbꞌanan konhobꞌ. 8 Hanin hachejabꞌ intiꞌan, ayinikojan yahawil yinh hakonhobꞌ sikꞌbꞌililo hawu, hakonhobꞌ tiꞌ kaw nimajalkanoj, mach chu isbꞌislaxi, yuto kaw niman isbꞌisil. 9 Yuxin chinqꞌanan tawet ta chawaqꞌ innabꞌalan wijbꞌanan hakonhobꞌ, yunhe wohtanhenilojan bꞌaytet iskꞌulal, yebꞌ bꞌaytet istxꞌojal. Yuto ¿maktaxka chu yijbꞌan hakonhobꞌ matxa isbꞌi hanta isbꞌisil? xhi yaꞌ tet Komam.

10 Kaw xin ischah iswiꞌ Komam Dios Jahawil tzet isqꞌan yaꞌ rey Salomón. 11 Istaqꞌwi Komam tet yaꞌ:

—Wal tinanh xin, haꞌ tzet haqꞌanaꞌ, haꞌ ton hahelanil yebꞌ yitzꞌatil hawiꞌ; mach haqꞌan hakawil maka haqꞌalomal. Mach haqꞌanpaxo iskamikal ebꞌnaj ayko ishowal tawinh, wal xin haꞌ hahelanil qꞌanbꞌil hawu yinh tzet chu hawijbꞌan konhobꞌ; 12 yuxin chiwaqꞌan tzet chaqꞌan tiꞌ. Chiwaqꞌan hanabꞌal yebꞌ hahelanil. Maxhto hunu mak kaw ay ishelanil yet yalanhtokanoj hakaꞌ hach tiꞌ, yebꞌ xin machi hunu mak chitohuli yinh tzujaniloxa hakaꞌ hach tiꞌ. 13 Chiwaqꞌnipaxojan tawet bꞌaytet mach qꞌanbꞌilo hawu, chiwaqꞌan qꞌalomal tawet, chiwanikojan hamay, machi xin hunu ebꞌnaj rey hakaꞌ hach tiꞌ yulbꞌal istiempohal yet itzitz hachto. 14 Ta chabꞌeybꞌalnhe inbꞌeybꞌalan, kat hakꞌubꞌan kuybꞌanile, yebꞌ chejbꞌanile chiwaqꞌan, hakaꞌ yu isyijen hamam, yaꞌ David. Ta hak tuꞌ, chaxhnahatli yul sat yibꞌanhqꞌinal tiꞌ, xhi Komam tet yaꞌ.

15 Hayet yel iswayanh yaꞌ rey Salomón, istxumchalo yu yaꞌ tato wayike huneꞌ tuꞌ. Lahwi tuꞌ ismeltzo yaꞌ bꞌey Jerusalén, isto yaꞌ sata isKaxhahil istꞌinhanil istrato Komam Dios Jahawil. Yaniko yaꞌ no noqꞌ xahanbꞌalil, yaltenpaxo yaꞌ xahanbꞌal yet aqꞌankꞌulal. Yawten yaꞌ sunil ischejabꞌ waꞌoj.

16 Yinh huneꞌ tiempohal tuꞌ apni kawanh ebꞌix ix txꞌoj ye iswiꞌ isqꞌanle yinh tet yaꞌ rey Salomón. 17 Yalni huneꞌ ix tet yaꞌ:

—¡Mam rey! Hanintiꞌan yebꞌ huneꞌ ix tiꞌ, huneꞌnhe nhahil bꞌay ayonhanh. Hayet yapni istzꞌayikal ispitzkꞌa wuninan, aykꞌo ix tiꞌ inkꞌatanhan. 18 Haxa yinh yoxebꞌ tzꞌayik xin ispitzkꞌapaxo yunin ix. Wal xin kokawanhilchꞌananh ayonhanh yul nha, machi hunuxa mak ayko kokꞌatanhanh. 19 Ay huneꞌ aqꞌbꞌal tiꞌ xin, yet kaw kamom ix iswayi, ismeltzon isbꞌa ix, yok ix yibꞌanh yunin, iskami. 20 Haxa yet chuman aqꞌbꞌal, yet kaw chinwayan, hanin hachejabꞌ intiꞌan, yahwano ix, yinikanh ix wuninan ishilbꞌanayo ix iskꞌatanh, haxapaxo yunin ix kamom tuꞌ xin, haxa yayo ix inkꞌatanhan. 21 Haxa yet kaw sahabꞌ yet waqꞌnihan yim wuninan walnihan, yixtanhwiti wuhan ta kamomxa. Haxa yet issajbꞌilo xin wilnihan ta maxhtaj wuninan, xhi ix.

22 Yalnipaxo hunxa ix:

—Machoj, haꞌ nichꞌan unin itzitzto tiꞌ, haꞌ wuninan yehi. Haꞌ nichꞌan kam tuꞌ haꞌ hawunin, xhi ix. Yalnipaxo ix bꞌabꞌel tuꞌ:

—Machoj, haꞌ nichꞌan unin itzitz tiꞌ haꞌ wuninan, haꞌ nichꞌan kamom, haꞌ hawunin, xhi ix.

Hak tuꞌ yu iskajlen isbꞌa ebꞌix sata yaꞌ rey Salomón. 23 Yuxin yal yaꞌ rey: «Haꞌ huneꞌ ix tiꞌ chiyal ix hakaꞌ tiꞌ: “Haꞌ nichꞌan unin itzitz tiꞌ, haꞌ wuninan, haꞌ nichꞌan kamom, haꞌ hawunin,” xhi ix. Haktikꞌapax tuꞌ yalni ix bꞌabꞌel, chalni ix: “Machoj, haꞌ nichꞌan itzitz haꞌ wuninan, haꞌ nichꞌan kamom haꞌ hawunin,” xhipaxo ix,» xhi yaꞌ rey Salomón. 24 Yuxin yal yaꞌ rey:

—Iweti hunu chꞌen espada, xhi yaꞌ. Yilaxti huneꞌ chꞌen espada tet yaꞌ. 25 Lahwi tuꞌ yalni yaꞌ:

—Qꞌaxpoweyo nichꞌan unin itzitz tiꞌ, kabꞌ cheyuteyoj, kat heyaqꞌni qꞌaxqꞌep yet hunun ebꞌix, xhi yaꞌ rey tuꞌ.

26 Haꞌ ismiꞌ nichꞌan unin itzitz tuꞌ, ok bꞌiskꞌulal yinh iskꞌul ix yinh nichꞌan unin yinh tzet yal yaꞌ rey, yuxin yal ix tet yaꞌ:

—Mam rey, haꞌ nichꞌan unin itzitz tiꞌ aqꞌ tet ix tiꞌ, mach chapotxꞌkamoj, xhi ix. Wal hunxa ix xin yal ix hakaꞌ tiꞌ:

—Yunhe mach chikan nichꞌan unin tiꞌ wetan, yebꞌ yunhe machi kanpaxo tet ix tiꞌ, wal xin maqꞌbꞌil haqꞌaxponayoj, xhi ix.

27 Yuxin yal yaꞌ rey Salomón:

—Aweko nichꞌan unin itzitz tiꞌ yul isqꞌabꞌ ix mahalni ta mach chikam nichꞌan unin tiꞌ, mach chepotxꞌkamoj, yuto haꞌ ix miꞌe yinh, xhi yaꞌ.

28 Sunil anma Israel abꞌenilo yinh tzet yu iswatxꞌenilo yaꞌ rey Salomón huneꞌ kajlebꞌahil, isxiwkanh anma tet yaꞌ, yuto yil anma ishelanil yaꞌ yaqꞌ Komam Dios yinh iswatxꞌenilo howal chiꞌah xol anma.