Yalkano yaꞌ David chejbꞌanile tet yaꞌ Salomón
2
Hayet kawilxa yeti istzꞌayikal bꞌay chikam yaꞌ rey David, yalnikano yaꞌ tet yaꞌ Salomón iskꞌahol hakaꞌ tiꞌ: 2 «Lanhanxa yapni istzꞌayikal bꞌay chinkaman hakaꞌ chu iskamto sunil jet anmahil. Wal hach xin ako yip hawanma, winaj chawute habꞌa. 3 Chayije sunil ischejbꞌanil Komam Dios Jahawil, koDiosal, kat habꞌeybꞌalnhen tzet choche Komam, kat hayijen kuybꞌanile yebꞌ chejbꞌanile, hakaꞌ yalni yinh ley tzꞌibꞌnhebꞌilkano yu yaꞌ Moisés, haxinwal kꞌul chiꞌeliko sunil tzet chawatxꞌe, yebꞌ sunil tzet chawoche hawatxꞌeꞌ. 4 Yunhe yijnikano isbꞌa tzet yalkano Komam Dios Jahawil wetan, yet yalni: “Tato chisbꞌeybꞌalnhe ebꞌnaj hakꞌahol tzet chiwalan, yebꞌ ta hanhe isyelal chiyal ebꞌnaj yinh sunil yanma, yebꞌ yinh sunil iskꞌul, machi hunelo tiꞌ chisbꞌej ebꞌnaj hakꞌahol yaqꞌni yahawilal yinh ebꞌnaj Israel,” xhi Komam wetan.5 »Hawohtaxa tzet kinyutehan naj Joab, yunin ix Sarvia, ispotxꞌkamo naj kawanh ebꞌnaj yahawil soldado Israel, haꞌ ton naj Abner iskꞌahol naj Ner, yebꞌ naj Amasa iskꞌahol naj Jeter. Hayet machi howal ismaqꞌnikamo naj ebꞌnaj, isbꞌakniko naj ischikꞌil ebꞌnaj yinh iskꞌalil yiktaj yebꞌ yinh isxanhabꞌ. 6 Haxa hach tiꞌ xin chawil tzet chꞌeliko naj Joab tuꞌ, yuto kaw ay hahelanil. Wal xin chawila yalanhto maxhto chiꞌichambꞌi naj ta mach chikam naj yinh aqꞌankꞌulal. 7 Wal ebꞌnaj iskꞌahol naj Barzilai, ah Galaad, kaw kꞌul chawute hakꞌul yinh ebꞌnaj, chawawteko ebꞌnaj waꞌo takꞌatanh sat hamexha, yuto yaqꞌ ebꞌnaj tzet inlohan yet welkanhan tet hawuxhta Absalón. 8 Haxapaxo naj Simei, aykꞌo takꞌatanh, naj iskꞌahol naj Gera, yikꞌal yaꞌ Benjamín ay bꞌey Bahurim, kinistzꞌaktiꞌnhehan naj yet lanhan intohan bꞌey Mahanaim, yajaꞌ haxa yet inmeltzohan istit naj kinischahnojan bꞌey haꞌ Jordán, waqꞌni bꞌinahojan isbꞌi Komam Dios, walnihan tet naj tato mach chinpotxꞌkamojan naj. 9 Yajaꞌ wal hach tiꞌ mach chawaqꞌ nimankꞌulal yinh naj, hach tiꞌ kaw ay hahelanil, yuxin hach chawila tzet chawute naj. Machojabꞌ tonhe chikam naj yinh haknhetiꞌ, wal xin chimaqꞌlaxkamo naj, kat isbꞌaklaxiko ischikꞌil naj xol xil iswiꞌ yet chikami,» xhi yaꞌ tet iskꞌahol.
Iskamikal yaꞌ rey David
10 Haxa yet yapni istzꞌayikal iskam yaꞌ rey David ismujlax yaꞌ yul iskonhobꞌ bꞌay mujan ebꞌnaj yichmam yaꞌ. 11 Hujebꞌ habꞌil ok yaꞌ reyal bꞌey Hebrón, yok 33 (oxlahonhebꞌ iskawinaj) habꞌil ok yaꞌ reyalo bꞌey Jerusalén; yuxin yinh sunil, 40 (kawinaj) habꞌil ok yaꞌ isreyalo ebꞌnaj Israel. 12 Haꞌ xin yaꞌ Salomón ok reyal selelo ismam. Haꞌ huneꞌ ismunil yaꞌ Salomón yinh reyal tuꞌ machi mak inilo tet yaꞌ.
2. YET YAQꞌNI YAꞌ SALOMÓN YAHAWILAL YINH EBꞌNAJ ISRAEL
(2:13–11:43)
Tꞌinhbꞌalaxiko ismunil yaꞌ Salomón yul isqꞌabꞌ yinh reyal
13 Lahwi tuꞌ isto naj Adonías, yunin ix Haguit iskꞌatanh ix Betsabé, ismiꞌ yaꞌ Salomón. Hayet yapni naj isqꞌambꞌen ix tet naj:
—¿Aqꞌankꞌulal nabꞌilmi hawu, yuxin chaxhhuli? xhi ix. Istaqꞌwi naj:
—Ay hanikꞌ tzet chiwalan tawet, xhi naj. Isqꞌambꞌen ix:
—Hach tiꞌ kaw hawohtaj tato wettikꞌahan huneꞌ munil yinh wokan reyal, yuto sunil anma Israel yako isnabꞌal winhan wokan reyal, yajaꞌ ilaxilo huneꞌ munil tuꞌ wetan, yaqꞌlaxkano tet yaꞌ wuxhtajan, yuto yettikꞌa yaꞌ ye yu Komam Dios. 16 Yuxin wal tinanh ay huneꞌ tzet chinqꞌanan tawet, mach chamanhkꞌo wetan, xhi naj. Istaqꞌwi ix tet naj:
—¿Tzet chaqꞌan xin? xhi ix.
17 Istaqꞌwi naj tet ix:
—Chinqꞌanan tawet ta chaxhok tzotelo winhan tet yaꞌ rey Salomón tato chaqꞌ yaꞌ ix Abisag, ix sunamita wixalojan. Kaw wohtajan tato kaw mach chismanhkꞌo yaꞌ tawet, xhi naj.
18 Istaqꞌwi ix Betsabé tet naj:
—Kꞌultikꞌa, chintzotelan tawinh tuꞌ, xhi ix.
19 Isto ix iskꞌatanh yaꞌ Salomón tzotelo yinh naj Adonías. Hayet yilni yaꞌ rey Salomón yapni ismiꞌ tuꞌ, yahwano yaꞌ ischahno ix, yay xulno yaꞌ sata ismiꞌ. Lahwi tuꞌ yay tzꞌonhno yaꞌ yul istzꞌonhobꞌal, ischejni yaꞌ yilaxoti xhila bꞌay chitzꞌonhi ismiꞌ tuꞌ, yay tzꞌonhno ix yinh iswatxꞌqꞌabꞌ yaꞌ. 20 Yalni ix tet yaꞌ:
—Wunin, ay huneꞌ nichꞌan tzet chiwochehan inqꞌanaꞌan tawet, mach chamanhkꞌo wetan, xhi ix. Yalni yaꞌ rey Salomón tuꞌ:
—Miꞌ, qꞌan tzet chawoche wetan, mach chu inmanhkꞌonan tzet chaqꞌana, xhi yaꞌ.
21 Yalni ix:
—Chinqꞌanan tawet tato chawaqꞌ ix Abisag ix sunamita yixalo naj hawuxhta Adonías, xhi ix.
22 Istaqꞌwi yaꞌ rey Salomón tet ismiꞌ:
—¿Tzet yinh xin chaxhhul haqꞌanaꞌ wetan tato chiwaqꞌan ix Abisag, ix sunamita yixalo naj Adonías? Wal xin haꞌ chal yelapno huneꞌ tiꞌ lanhan kinyinilojan naj reyal, yuto haꞌ naj bꞌabꞌel winaj, yebꞌ xin yu ayko yaꞌ sacerdote Abiatar yebꞌ naj Joab, yunin ix Sarvia yetbꞌiho naj, xhi yaꞌ Salomón tet ismiꞌ.a
23 Yaqꞌni bꞌinaho yaꞌ rey Salomón isbꞌi Komam Dios, yalni yaꞌ: «Yaqꞌabꞌayo Komam Dios isyaꞌtajil kaw how wibꞌanhan tato mach chikam naj Adonías yu tzet chisqꞌan naj. 24 Haꞌ Komam Dios Jahawil itzitz, aniko huneꞌ munil tiꞌ yul inqꞌabꞌan yinh wokan reyal, kinyanikojan yul istzꞌonhobꞌal yaꞌ rey David, inmaman. Yalnipaxoj tato haꞌ ebꞌnaj inkꞌaholan chiꞌok reyal inselelojan bꞌaqꞌinh, chiwaqꞌni bꞌinahojan isbꞌi Komam Dios chiwalnihan tato chikam naj Adonías tuꞌ tinanh,» xhi yaꞌ Salomón.
25 Ischejni yaꞌ Salomón naj Benaía, iskꞌahol naj Joiada ispotxꞌnokamo naj Adonías, iskam naj Adonías tuꞌ.b 26 Yalnipaxo yaꞌ rey Salomón tet yaꞌ sacerdote Abiatar: «Paxanhto sat hatxꞌotxꞌ bꞌey Anatot, hach tiꞌ hawet ay hakami, yajaꞌ mach chachinpotxꞌkamojan tinanh, yuto hach hunach hawikꞌo isKaxhahil istrato Komam Dios sata inmaman, yebꞌ xin yu haꞌ hun hach kach ekꞌyaꞌ yinta inmaman yet yaqꞌlen sunil isyaꞌtajil,» xhi yaꞌ. 27 Hak tuꞌ yu yelkano yaꞌ Abiatar yinh sacerdotehal, hak tuꞌ yu yijni isbꞌa huneꞌ tzet yalkano Komam Dios Jahawil yinh yuninal yaꞌ Elí, bꞌey Silo.
28 Yet yalanhto mach ok naj Joab yetbꞌiho naj Absalón, yajaꞌ ok naj Joab yetbꞌiho naj Adonías, yuxin hayet yapni huneꞌ tzotiꞌ tuꞌ tet naj Joab, isto naj yebꞌano isbꞌa yul isTabernáculo Komam Dios Jahawil, yok tzabꞌno naj yinh yukꞌaꞌil istxikin yet xahanbꞌal. 29 Yal-lax tet yaꞌ Salomón tato to naj Joab yebꞌaꞌ isbꞌa yul istabernáculo Komam Dios Jahawil iskawilal yet xahanbꞌal, yuxin ischejto yaꞌ naj Benaía, iskꞌahol naj Joiada, yalni yaꞌ tet naj: «As potxꞌkamo naj Joab,» xhi yaꞌ. 30 Isto naj Benaía, yokto naj yul istabernáculo Komam Dios Jahawil, yalni naj tet naj Joab:
—Chal yaꞌ rey tato chaxhelto bꞌey tiꞌ, xhi naj. Istaqꞌwi naj Joab:
—Machoj, kamojinan bꞌey tiꞌ, xhi naj. Ismeltzo naj Benaía iskꞌatanh yaꞌ rey Salomón, yalni naj tet yaꞌ yinh tzet yu istaqꞌwi naj Joab.
31 Istaqꞌwi yaꞌ rey Salomón tet naj Benaía:
—Yubꞌojabꞌ hakaꞌ choche naj, maqꞌkamo naj bꞌey tuꞌ, kat hamujni naj, hak tuꞌ xin machi tokano ismul naj yibꞌanh inmaman yebꞌ wibꞌanhan yet ispotxꞌnikamo naj ebꞌnaj machi ismul. 32 Haꞌ iskamikal naj tuꞌ, chitokano yibꞌanh naj, yu hak tuꞌ ye yu Komam Dios Jahawil, yuto ismaqꞌkamo naj kawanh ebꞌnaj winaj machi ismul, yebꞌ kaw ekꞌbꞌal tohol, yebꞌ kꞌul isbꞌeybꞌal sata naj. Ebꞌnaj kawanh tuꞌ, haꞌ ton naj Abner, iskꞌahol naj Ner, yebꞌ naj Amasa, iskꞌahol naj Jeter. Naj Abner tuꞌ yahawil naj yinh ebꞌnaj soldado Israel, haxa naj Amasa, yahawil naj yinh ebꞌnaj soldado Judá. Naj Joab tuꞌ ismaqꞌkamo naj ebꞌnaj, machi xin yohtajo inmaman, yuto iswatxꞌe naj huneꞌ tuꞌ yinh ewantajil yinh sat inmaman. 33 Iskamikal ebꞌnaj kawanh tuꞌ, yibꞌanh naj Joab chitokanoj, yebꞌ yibꞌanh yuninal naj yinh sunilbꞌal tiempo, yajaꞌ wal yibꞌanh yaꞌ David yebꞌ yibꞌanh yuninal yaꞌ, chiꞌok reyal seleloj, yebꞌ yibꞌanh mak chiꞌok tzꞌonhno yul istzꞌonhobꞌal, yaqꞌabꞌayo Komam Dios Jahawil aqꞌankꞌulal yinh sunilbꞌal ej tiempo, xhi yaꞌ Salomón tet naj Benaía.c
34 Hak tuꞌ yu isto naj Benaía, iskꞌahol naj Joiada, istzabꞌnoyo naj Joab, ismaqꞌnikamo naj naj, ismujlax naj yul ismantiado aykanh yatutoj bꞌey txꞌotxꞌ desierto. 35 Lahwi tuꞌ yaniko yaꞌ rey Salomón naj Benaía yahawilo ebꞌnaj soldado, selelo naj Joab, yanipaxiko naj yaꞌ Sadoc sacerdotehal selelo yaꞌ Abiatar. 36 Yanipaxto yaꞌ rey Salomón yiqꞌomal naj Simei, yalni yaꞌ tet naj:
—Watxꞌekanh hawatut bꞌey Jerusalén tiꞌ, kat haweh bꞌey tiꞌ, machi xin bꞌay chaxheltoj; 37 yajaꞌ ta ay bꞌaqꞌinh chaxheltoj, kat haqꞌaxponikꞌto yibꞌanh haꞌ Cedrón, yinh kaw yeli chaxhkami, kat istitkano hachikꞌil yibꞌanh hawiꞌ yu hamanhkomal, xhi yaꞌ rey Salomón tet naj.
38 Istaqꞌwi naj Simei tet yaꞌ rey Salomón:
—Mam rey, haꞌ tzet chawal tiꞌ kaw kꞌulkanoj, hanin hachejabꞌ intiꞌan chinyijehan hakaꞌ hawalni tiꞌ, xhi naj.
Nahatil xin ehayo naj Simei bꞌey Jerusalén. 39 Haxa yet yekꞌto oxebꞌ habꞌil yelkanh kawanh ebꞌnaj ischejabꞌ naj Simei, isto ebꞌnaj iskꞌatanh naj Aquis, iskꞌahol naj Maaca, isreyal Gat. Ay mak halni tet naj Simei: «Haꞌ ebꞌnaj hachejabꞌ aykꞌo ebꞌnaj bꞌey Gat,» xhi. 40 Hayet yabꞌen naj huneꞌ tuꞌ yanikanh naj isxhila ischeh, isto naj iskꞌatanh naj Aquis bꞌey Gat saywal yinh ischejabꞌ. Lahwi tuꞌ ismeltzo naj Simei, yiniti naj ischejabꞌ bꞌey Gat. 41 Lahwi tuꞌ yal-lax tet yaꞌ rey Salomón tato bꞌeykꞌo naj Simei bꞌey Gat, xaxin meltzo naj bꞌey Jerusalén tuꞌ. 42 Ischejnito yaꞌ rey Salomón huneꞌ naj to awtenoti naj Simei, yalni yaꞌ rey tet naj: «¿Tom machi walan tawet, yet waqꞌni bꞌinahojan isbꞌi Komam Dios Jahawil tato ay bꞌay chaxhelto yul konhobꞌ tiꞌ chawohtanhenkaniloj ta chaxhkami? Hach taqꞌwenkano yu hatiꞌ: “Kaw kꞌul tzet chawala, chinokan inyijehan,” kachi. 43 ¿Tzet yinh xin machi hayije tzet walan yet waqꞌni bꞌinahojan isbꞌi Komam Dios Jahawil tawet?» xhi yaꞌ Salomón.
44 Yalnipaxo yaꞌ rey tet naj Simei: «Hach tiꞌ kaw hawohtaj istxꞌojal hawal yinh inmaman, yaꞌ David, wal tinanh haꞌ Komam Dios chꞌaqꞌni meltzoho hatxꞌojal tawibꞌanh. 45 Wal hanin Salomón intiꞌan, haꞌ Komam Dios Jahawil chiꞌanayo iskꞌulal wibꞌanhan, haxa yuninal yaꞌ David xin, haꞌ chiꞌok yul istzꞌonhobꞌal yaꞌ yinh sunilbꞌal tiempo,» xhi yaꞌ rey Salomón.
46 Lahwi tuꞌ ischejni yaꞌ rey Salomón naj Benaía, iskꞌahol naj Joiada ispotxꞌnokamo naj Simei, iskam naj Simei tuꞌ.
Hak tuꞌ yu iskawxikaniko ismunil yaꞌ rey Salomón yul isqꞌabꞌ.