29
Lahwi tuꞌ yalni yaꞌ rey David tet konhobꞌ Israel kutxanikoj: «Hanhechꞌan naj Salomón, inkꞌaholtiꞌan issikꞌilo Komam Dios. Naj Salomón tiꞌ kaw uninto naj, nichꞌan tzehto naj, wal munil tuꞌ kaw nimankanoj, yuto huneꞌ nha chiwatxꞌi tiꞌ mach yeto naj winaj, wal xin yet Komam Dios, Jahawil yehi. 2 Xaxin waqꞌ wanmahan inkutxbꞌanikojan sunil tzet chiꞌokniko yinh Yatut Komam tiꞌ, xaꞌinkutxbꞌakojan chꞌen oro chiwatxꞌelaxayo munlabꞌalil, yebꞌ chꞌen plata chiꞌokniko munlabꞌalil, yebꞌ chꞌen bronce chiꞌokniko munlabꞌalil yebꞌ chꞌen hierro chiwatxꞌelaxayo munlabꞌalil. Kutxbꞌabꞌilxapaxiko te teꞌ chiꞌoknikoj, yebꞌ chꞌen ónice, chꞌen chꞌen kꞌulejchꞌan jilni, chꞌen chꞌen qꞌej, chꞌen chꞌen txꞌiꞌal yelawil, yebꞌ sunil majan chꞌen chꞌen kaw kꞌulejchꞌan jilni, yebꞌ chꞌen mármol yinh kaw nimankano isbꞌisil. 3 Chiwaqꞌnipaxojan chꞌen oro yebꞌ chꞌen plata, chꞌen wetan yehi chꞌen kꞌuwan yul inkꞌuwanbꞌalan, yibꞌanhilo sunil tzet xaꞌinkutxbꞌakotiꞌan, yuto kaw ayko yinh wanmahan inwatxꞌenkanhan Yatut Komam, inDiosalan. 4 Chiwaqꞌan oxebꞌ mil talento chꞌen oro, chꞌen chitit bꞌey Ofir, yok hujebꞌ mil talento chꞌen plata, chꞌen kaw kꞌul chiꞌokniko yinh iskꞌul bꞌitzꞌabꞌ. 5 Chiwaqꞌan chꞌen oro, kat iswatxꞌelaxayo munlabꞌalil, yebꞌ chꞌen plata, kat iswatxꞌelaxayo munlabꞌalil. Chiwaqꞌnihan sunil tzet chꞌokniko yinh Yatut Komam. Wal tinanh xin, ¿mak hunujex cheyaqꞌ heyebꞌalqꞌabꞌ yinh sunil heyanma tet Komam Jahawil?» xhi yaꞌ rey David.6 Hak tuꞌ yu yaqꞌni ebꞌnaj mame isyebꞌalqꞌabꞌ yinh sunil yanma tet Komam Dios, yebꞌ ebꞌnaj iswiꞌehal xol hunun majan ebꞌnaj Israel, yebꞌ ebꞌnaj yahaw yinh hunun mil, yebꞌ hunun 100 (hokꞌal) soldado, yebꞌ ebꞌnaj yilomal tzetaj ay yaꞌ rey David. 7 Yaqꞌ ebꞌnaj tzetaj okniko yinh iswatxꞌebꞌanil Yatut Komam Dios: Howebꞌ mil talento chꞌen oro yebꞌ xin 10 (lahonhebꞌ) mil dracma chꞌen oropaxoj, 10 (lahonhebꞌ) mil talento chꞌen plata, 18 mil talento chꞌen bronce yok howebꞌ mil talento chꞌen hierro. 8 Hakpax tuꞌ anma ay chꞌen chꞌen kaw kꞌulejchꞌan jilni yul isqꞌabꞌ yako chꞌen yul isqꞌabꞌ naj Jehiel gersonita, iskꞌubꞌanto naj chꞌen yul kꞌuwanbꞌal yet isqꞌalomal Yatut Komam Jahawil. 9 Kaw xin tzala konhobꞌ Israel, yuto yaqꞌ isyebꞌalqꞌabꞌ yinh sunil iskꞌul yebꞌ yinh sunil yanma tet Komam Jahawil.
10 Hakpax tuꞌ yaꞌ rey David kaw tzala yaꞌ, yalni yaꞌ kꞌul-la tzotiꞌ yinh Komam Jahawil sata sunil konhobꞌ kutxanikoj, yalni yaꞌ hakaꞌ tiꞌ: «Mam Wahawil, hach isDiosal yaꞌ Israel jichmamanh, hal-laxojabꞌ kꞌul-la tzotiꞌ tawinh yinh sunilbꞌal ej tiempo. 11 Hach tiꞌ Mam Wahawil, kaw ay hawelapnoj yebꞌ kaw ay hawip, kaw ay hamay, kaxhqꞌoji yinh mak ayko ishowal tawinh, yuto sunil tzet ay yul satkanh yebꞌ sat txꞌo txꞌotxꞌ hawet yehi, yahaw hach yinh sunil, Mam Wahawil, ekꞌbꞌal hach yibꞌanh sunil. 12 Tawet chitit qꞌalomal yebꞌ yalaxiko komayanh, yul haqꞌabꞌ ayko sunil tzetaj ye tuꞌ, tawet chitit jipanh. Yul haqꞌabꞌ ayko hawip, chu hawaniko sunil anma nime winajil. 13 Wal tinanh xin Mamin, hach koDiosalanh chijakojanh hamay, chikobꞌitnhenanh habꞌi kaw saqꞌalkanoj. 14 Wal xin, yinh kaw isyelal hanintiꞌan yebꞌ wet konhobꞌtiꞌan kaw machi nino tzet wal jaqꞌnihanh tawet, yuto sunil hunteqꞌan tiꞌ hach chawaqꞌa. Yuxin haꞌ tzet chikochahanh tawet, haꞌ chijaqꞌpaxojanh tawet. 15 Yuto hanhonhtiꞌanh ekꞌomnhe jekꞌanh yul hasat hakaꞌ ebꞌnaj jichmamanh; haꞌ kokawilanh yul yibꞌanhqꞌinal tiꞌ, hakaꞌ yenhel hunu tzet ye tuꞌ, machi nahatli. 16 Mam Jahawilanh, hach koDiosalanh, sunil tzet xakokutxbꞌako tiꞌanh yul haqꞌabꞌ tita, yuxin hawet ye sunil. Xakokutxbꞌakojanh yu yokniko yinh hawatut bꞌay chaxhbꞌinahi, habꞌi kaw saqꞌalkanoj. 17 Mamin, hach inDiosalan, hanintiꞌan wohtajan tato hawohta tzet chiꞌekꞌ yinh janmahanh, chachtzala yinh mak chiwatxꞌen istoholal, yuxin haꞌ yinh istoholal wanmahan yebꞌ yinh sunil inkꞌulan chiwaqꞌan sunil hunteqꞌan tiꞌ tawet. Chintzalapaxojan chiwilnihan hakonhobꞌ kutxaniko tiꞌ, chꞌaqꞌni yebꞌalqꞌabꞌe yinh sunil iskꞌul tawet. 18 Mam Wahawilan, isDiosal yaꞌ Abraham, yaꞌ Isaac yebꞌ yaꞌ Israel, ebꞌyaꞌ jichmamanh, ayojabꞌnhetikꞌako yinh isnabꞌal hakonhobꞌ tiꞌ yaqꞌni yinh sunil iskꞌul yebꞌalqꞌabꞌe tawet, kat yaniko yanma tawinh. 19 Kaw xin tohol chawute yanma naj Salomón inkꞌaholan, yu iskꞌubꞌan naj chejbꞌanile yebꞌ kuybꞌanile chawaqꞌa yebꞌ sunil tzet chaqꞌanaꞌ, kat isyijen naj; kat iswatxꞌen naj hawatut, kutxbꞌabꞌilxako tzet chiꞌokniko yinh wuhan,» xhi yaꞌ rey David.
20 Lahwi tuꞌ yalni yaꞌ rey David tet konhobꞌ Israel kutxanikoj: «Wal tinanh hex wet konhobꞌ, halwe kꞌul-la tzotiꞌ yinh Komam Jahawil,» xhi yaꞌ David. Hak tuꞌ yu yok sunil anma Israel yanoko ismay Komam Jahawil, isDiosal jichmam, yay jahnoj yinayo isbꞌa tet Komam Jahawil, yet ayko anma tuꞌ sata yaꞌ rey David.
21 Haxa yet hunxa tzꞌayik isnhusni anma no noqꞌ, yalten anma xahanbꞌal tet Komam Jahawil, yalten anma mil noꞌ tzehla wakax, mil noꞌ tzehla meꞌ, yok mil noꞌ nixhte meꞌ, yaltelaxpaxo yal teꞌ uva yebꞌalqꞌabꞌehal yinta noꞌ, yebꞌ xin kaw txꞌiꞌal xahanbꞌal yalte konhobꞌ Israel tet Komam. 22 Iswaꞌkano konhobꞌ, yukꞌni tzet chukꞌ sata Komam Jahawil yinh huneꞌ tzꞌayik tuꞌ yinh tzalahilal; yaniko ebꞌnaj xil isqꞌap yaꞌ Salomón, iskꞌahol yaꞌ rey David, hak tuꞌ yu iswatxꞌen isbꞌa yokkano yaꞌ reyal,a yanayo ebꞌnaj aceite yibꞌanh iswiꞌ yaꞌ sata Komam Dios, Jahawil; yebꞌpaxo yibꞌanh iswiꞌ yaꞌ Sadoc yokkano yaꞌ sacerdotehal. 23 Yok tzꞌonhno yaꞌ Salomón reyal selelo ismam, yul istzꞌonhobꞌal Komam Dios, Jahawil. Yanayo Komam isyaxil yibꞌanh yaꞌ; isyijen sunil konhobꞌ Israel tzet chal yaꞌ. 24 Sunil ebꞌnaj iswiꞌehal xol ebꞌnaj Israel yebꞌ ebꞌnaj winaj kaw ay yelapnoj yebꞌ sunil ebꞌnaj yuxhta yaꞌ Salomón, ok ebꞌnaj yijemal tet yaꞌ Salomón tuꞌ. 25 Kaw niman yelapno elkaniko yaꞌ Salomón tuꞌ yu Komam Dios, Jahawil, yul sat sunil konhobꞌ Israel. Yaniko Komam ismay yaꞌ yinh reyal; wal xin machi hunuxa ebꞌyaꞌ rey yet yalanhtokano hakaꞌ yaꞌ tiꞌ.
Iskamikal yaꞌ rey David
26 Wal yaꞌ David, iskꞌahol yaꞌ Isaí, ok yaꞌ reyal yinh sunil Israel. 27 40 (Kawinaj) habꞌil ok yaꞌ isreyalo Israel; hujebꞌ habꞌil bꞌey Hebrón, yebꞌ xin 33 (oxlahonhebꞌ iskawinaj) habꞌil bꞌey Jerusalén. 28 Yaꞌ rey David tuꞌ kaw ichamilxa kam yaꞌ, kaw xin ay isqꞌalomal yaꞌ yebꞌ kaw ay yelapno elkaniko yaꞌ. Hayet iskam yaꞌ, yok yaꞌ Salomón iskꞌahol yaꞌ reyal seleloj.
29 Sunil tzet iswatxꞌe yaꞌ rey David yet yichebꞌanil yebꞌ yet islahobꞌal, tzꞌibꞌnhelaxkano yul hum Crónicas yu yaꞌ Samuel, yaꞌ Natán yebꞌ yaꞌ Gad, ebꞌyaꞌ ischejabꞌ Komam Dios. 30 Yul hum tiꞌ tzꞌibꞌnhebꞌilkano yet yok yaꞌ David reyal; chitzotelpaxo yinh yip yaꞌ, yebꞌ sunil tzet yaqꞌle yaꞌ, yebꞌ sunil tzet yaqꞌle konhobꞌ Israel, yebꞌ tzet yaqꞌle hunteqꞌanxa konhobꞌ ayejayo iskawilal.