Yet yok yaꞌ Salomón reyal selelo yaꞌ David
28
Iskutxbꞌaniko yaꞌ rey David bꞌey Jerusalén sunil ebꞌnaj kaw niman yelapno xol Israel, yebꞌ ebꞌnaj iswiꞌehal yinh hunun majana ebꞌnaj Israel, yebꞌ ebꞌnaj iswiꞌehal yinh hunun majan ebꞌnaj soldado ay ismunil yinta yaꞌ rey, yebꞌ ebꞌnaj iswiꞌehal yinh hunun mil yebꞌ hunun 100 (hokꞌal) ebꞌnaj soldado, yebꞌ ebꞌnaj yilomal sunil ej isnoqꞌ yaꞌ, yebꞌ tzetaj ay yaꞌ rey David yebꞌ ebꞌnaj yilomal tzetaj ay iskꞌahol yaꞌ. Iskutxbꞌanpaxiko yaꞌ ebꞌnaj ay yelapno ye yinh munil yinta yaꞌ rey, yebꞌ ebꞌnaj Israel kaw helan, yebꞌ kaw ay yip yanma xol ebꞌnaj chimunla iskꞌatanh yaꞌ. 2 Hayet kutxanxako ebꞌnaj tuꞌ, yahwano yaꞌ rey David, yok linhno yaꞌ, yalni yaꞌ hakaꞌ tiꞌ: «Abꞌewe hex wet Israel, hex wet konhobꞌ, hanintiꞌan wochehan waqꞌaꞌkanhan Yatut Komam Jahawil bꞌay chiꞌehayo isKaxhahil istrato Komam, yebꞌ bꞌay chꞌehikꞌo Komam; kutxbꞌabꞌilxa xin sunil tzet chiꞌokniko yinh Yatut Komam wuhan yu inwatxꞌenan yatut tuꞌ. 3 Yajaꞌ yal Komam wetan hakaꞌ tiꞌ: “Mach chawakanh watutan bꞌay chibꞌina inbꞌihan yuto yet howal hawehi, kaw txꞌiꞌalxa bꞌay chimalto chikꞌ hawu,” xhi. 4 Yajaꞌ haꞌ Komam Jahawil, isDiosal Israel kinsikꞌnilojan xol wuxhtajan, yu wokan isreyalo Israel yinh sunilbꞌal tiempo yet ayinan sat yibꞌanhqꞌinal tiꞌ, yuto issikꞌilo Komam ebꞌnaj Judá yok iswiꞌehalo xol ebꞌnaj Israel, haxa xol ebꞌnaj Judá xin issikꞌilo Komam yuninal inmaman, haꞌ xol iskꞌahol inmamtuꞌan xin, winhan tzala Komam, kinyanikojan reyal yinh sunil txꞌotxꞌ Israel. 5 Wal tinanh xin haꞌ xol sunil ebꞌnaj inkꞌaholan (yuto kaw niman inkꞌaholan yaqꞌ Komam Jahawil), issayilo Komam Jahawil naj Salomón, inkꞌaholan, yu yok tzꞌonhno naj yul intzꞌonhobꞌalan isreyalo Israel, iskonhobꞌ Komam. 6 Yalni Komam wetan: “Haꞌ naj Salomón, hakꞌahol, haꞌ naj chiꞌanikanh watutan yebꞌ yamaqꞌil, yuto haꞌ naj insikꞌilojan inkꞌaholojan, kat wokan ismamo naj. 7 Chiwanikanikojan naj yinh reyal yinh sunilbꞌal tiempo tato chako naj yinh iskꞌul isyijen chejbꞌanile yebꞌ inkuybꞌanilan hakaꞌ isyijen naj tinanh,” xhi Komam.8 »Haꞌ tinanh xin tesataj sunil hex wet konhobꞌ, iskonhobꞌ Komam Dios, yebꞌ sata Komam Dios, Komam chabꞌe tzet chijala, chiwalan teyet tato cheyako yinh hekꞌul hekꞌubꞌan sunil chejbꞌanile chal Komam Dios yunhe heyiqꞌni txꞌo txꞌotxꞌ, txꞌotxꞌ kaw kꞌulkano sikꞌlebꞌil, kat heyanikano txꞌotxꞌ ismajulo heyuninal yinh sunilbꞌal ej tiempo.
9 »Wal hach tiꞌ kꞌahol Salomón, ohtanhelo Komam Dios, inDiosal hanin hamam intiꞌan, kat hayijen tzet chal Komam yinh istoholal, yebꞌ sunil hawanma, yebꞌ yinh sunil hakꞌul, yuto haꞌ Komam Jahawil yohta sunil tzet chꞌekꞌ yul janma yebꞌ tzet chꞌekꞌ yinh konabꞌal kosunil. Tato chasayilo Komam chiꞌilchalo hawu, yajaꞌ tato chabꞌejkano Komam xin, chachyintanhekanilto Komam yinh hunelnhe. 10 Abꞌe xin, haꞌ Komam Jahawil kaxhsikꞌnhekoj yu hawanikanh yatut, huneꞌ yet Komam, yuxin, ako yip hawanma, hawatxꞌeni,» xhi yaꞌ David.
11 Hak tuꞌ yu yaqꞌni yaꞌ rey David yechel yinh tzet chu iswatxꞌikanh Yatut Komam Dios tet yaꞌ Salomón iskꞌahol; yinh tzet chu iswatxꞌi yamaqꞌil, yebꞌ tzet chu iswatxꞌi iscuartohal, yebꞌ bꞌay chikꞌuhi yebꞌalqꞌabꞌe, yebꞌ iscuartohal yul kabꞌ piso, yebꞌ cuarto yul Yatut Komam, yebꞌ Ehobꞌal kaw Txahul bꞌay chꞌaqꞌlax tanho mule. 12 Yaqꞌnipaxo yaꞌ rey David tet yaꞌ Salomón yechel sunil tzet ok yinh isnabꞌal yinh tzet chiwatxꞌi bꞌey Yatut Komam Jahawil, yebꞌ yechel cuarto yet yebꞌalqꞌabꞌe, yebꞌ iscuartohal bꞌay chikꞌubꞌalax qꞌalomal yet Komam Dios. 13 Yaqꞌnipaxo yaꞌ yechel iswatxꞌebꞌanil cuarto bꞌay chiꞌeh hunun majan ebꞌyaꞌ sacerdote yebꞌ ebꞌnaj levita yet chiꞌok yinh ismunil yul Yatut Komam Jahawil, yebꞌ cuarto bꞌay chikꞌubꞌalax munlabꞌal chiꞌokniko yul Yatut Komam.
14 Yaqꞌnipaxo yaꞌ rey David tuꞌ chꞌen oro yinh kaw niman yu yokniko yinh munlabꞌal chiwatxꞌi chiꞌokniko yinh ismunil Komam, yaqꞌnipaxo yaꞌ rey chꞌen plata yinh kaw niman yu iswatxꞌayo yinh munlabꞌalil yu yokniko yinh ismunil Komam. 15 Yaqꞌnipaxo yaꞌ rey David chꞌen oro yu iswatxꞌayo chꞌen candelero yebꞌ chꞌen lámpara, hantatikꞌa chꞌen chꞌokniko yinh hunun candelero yebꞌ lámpara, hak tuꞌ chꞌen yaqꞌ yaꞌ. Yaqꞌnipaxo yaꞌ rey chꞌen plata yu iswatxꞌayo chꞌen candelero yebꞌ chꞌen lámpara, hantatikꞌa chꞌen chꞌokniko yinh ismunil. 16 Yaqꞌnipaxo yaꞌ chꞌen oro yinh kaw niman chꞌokniko yinh mexhahil bꞌay chitxolbꞌalaxayo ixim pan yet Komam. Yaqꞌnipaxo yaꞌ chꞌen plata watxꞌayo mexhahil. 17 Yaqꞌnipaxo yaꞌ David chꞌen oro yinh huneꞌ chibꞌatxnilti tzet ye tuꞌ yibꞌanh qꞌaꞌ, yebꞌ yinh nime sekꞌ yebꞌ xhalu, yebꞌ chꞌen oro watxꞌelaxayo netal. Yaqꞌnipaxo yaꞌ chꞌen plata iswatxꞌelaxayo sekꞌal, hatatikꞌa hanta yalil chiyu hunu chꞌen, hak tuꞌ yalil chꞌen yaqꞌ yaꞌ rey David. 18 Yaqꞌnipaxo yaꞌ chꞌen oro, chꞌen kaw kꞌul yinh kaw niman watxꞌelax ismexhahil yebꞌ lesen bꞌay chinhuslax teꞌ pom, yebꞌ chꞌen oro watxꞌelaxiko yinh carruaje bꞌay linhankanh yechel querubín leyanilto xikꞌ yibꞌanh Kaxha yet istrato Komam Jahawil.
19 Lahwi tuꞌ yalni yaꞌ rey David hakaꞌ tiꞌ: «Sunil hunteqꞌan tiꞌ haꞌ kaw isqꞌabꞌ Komam Jahawil yenikano wetan yu intxumnihan yinh tzet chu iswatxꞌi Yatut Komam,» xhi yaꞌ.
20 Lahwi tuꞌ yalnipaxo yaꞌ rey David tet yaꞌ Salomón iskꞌahol: «Ako yip hawanma, linhbꞌa habꞌa, kat hawok munil, mach chaxhxiwi, ako hawip, yuto haꞌ Komam Jahawil, inDiosalan chiꞌok hawetbꞌihoj masanto chilahwikano iswatxꞌi huneꞌ munil tiꞌ yinh hawatxꞌenkanh Yatut Komam Jahawil, wal xin mach chachisbꞌejkano Komam, mach chachisnahulnhetoj. 21 Aypaxo hunun majan ebꞌyaꞌ sacerdote yebꞌ ebꞌnaj levita chiꞌok hawetbꞌiho yinh huneꞌ munil tiꞌ, yebꞌ ebꞌnaj winaj chimunla yinh sunil iskꞌul yebꞌ ebꞌnaj kaw helan yinh tzijxanhe munilal, yebꞌ ebꞌnaj iswiꞌehal konhobꞌ. Chisyijenpaxo sunil konhobꞌ tiꞌ sunil tzet chawala,» xhi yaꞌ rey David.