4 Haxa yinh ebꞌnaj iskabꞌ majan ok yinh iskabꞌ ixahaw, haꞌ naj Dodai ahohíta ok iswiꞌehalo ebꞌnaj, haꞌ xin naj Miclot, haꞌ naj kaw yahaw yinh ebꞌnaj, 24 (kanhebꞌ iskawinaj) mil isbꞌisil ebꞌnaj. 5 Haꞌ naj Benaía, iskꞌahol yaꞌ sacerdote Joiada, ok naj iswiꞌehalo yinh ebꞌnaj yet yox majan, ebꞌnaj ok yinh yet yox ixahaw, 24 (kanhebꞌ kawinaj) milpaxo isbꞌisil ebꞌnaj.

6 Naj Benaía tuꞌ ayko naj xol ebꞌnaj 30 (lahonhebꞌ iskawinaj) kaw helan, haꞌ xin naj yahawil yeko yinh ebꞌnaj. Haꞌ xin naj Amisabad, iskꞌahol naj Benaía tuꞌ, haꞌ naj iskabꞌ iswiꞌehal xol huneꞌ majan ebꞌnaj tuꞌ.

7 Haꞌ xin ebꞌnaj iskanh majan ok yinh iskanh ixahaw, haꞌ naj Asael yuxhta naj Joab ok iswiꞌehalo ebꞌnaj. Haxa eliko xin, haꞌ naj Zebadías iskꞌahol naj Asael ok yahawil isselelo ismam, 24 (kanhebꞌ iskawinaj) milpaxo isbꞌisil ebꞌnaj yinh huneꞌ majan tuꞌ.

8 Haꞌ xin ebꞌnaj ishoꞌ majan ok yinh ishoꞌ ixahaw, haꞌ naj Samhut izraíta ok iswiꞌehalo ebꞌnaj, 24 (kanhebꞌ iskawinaj) mil isbꞌisilpaxo ebꞌnaj yinh huneꞌ majan tuꞌ.

9 Haꞌ xin ebꞌnaj iswaj majan ok yinh iswaj ixahaw, haꞌ naj Ira, iskꞌahol naj Iques ah Tecoa ok iswiꞌehalo ebꞌnaj, 24 milpaxo isbꞌisil ebꞌnaj yinh sunil.

10 Haꞌ xin ebꞌnaj ishuj majan ok yinh ishuj ixahaw, haꞌ naj Heles, pelonita ok iswiꞌehalo ebꞌnaj, naj Heles tuꞌ yikꞌal yaꞌ Efraín ye naj, 24 (kanhebꞌ iskawinaj) mil isbꞌisilpaxo ebꞌnaj yinh huneꞌ majan tuꞌ.

11 Haxa yinh ebꞌnaj iswaj majan ok yinh iswaxajebꞌ ixahaw, haꞌ naj Sibecai husatita, yikꞌal ebꞌnaj zeraíta, 24 (kanhebꞌ iskawinaj) milpaxo isbꞌisil ebꞌnaj yinh huneꞌ majan ebꞌnaj tuꞌ.

12 Haꞌ yinh ebꞌnaj isbꞌalonhebꞌ majan yinh isbꞌalonhebꞌ ixahaw, haꞌ naj Abiezer anatotita, yikꞌal ebꞌnaj benjaminita ok iswiꞌehalo ebꞌnaj, 24 (kanhebꞌ iskawinaj) milpaxo isbꞌisil ebꞌnaj yinh huneꞌ majan tuꞌ.

13 Haxa yinh ebꞌnaj 10 (islahonhebꞌ) majan yinh 10 (islahonhebꞌ) ixahaw, haꞌ naj Maharai netofatita, yikꞌal yinh ebꞌnaj zeraíta ok iswiꞌehalo ebꞌnaj, 24 (kanhebꞌ iskawinaj) mil isbꞌisilpaxo ebꞌnaj yinh huneꞌ majan tuꞌ. 14 Haꞌ yinh ebꞌnaj 11 (ishunlahonhebꞌ) majan, yinh 11 (ishunlahonhebꞌ) ixahaw, haꞌ naj Benaía piratonita, yikꞌal ebꞌnaj Efraín ok iswiꞌehalo ebꞌnaj; 24 (iskanhebꞌ iskawinaj) mil isbꞌisil yinh huneꞌ majan tuꞌ.

15 Haxa xin ebꞌnaj 12 (iskabꞌlahonhebꞌ) majan yinh 12 (iskabꞌlahonhebꞌ) ixahaw, haꞌ naj Heldai netofatita, iskꞌahol yaꞌ Otoniel ok iswiꞌehalo ebꞌnaj; 24 (iskanhebꞌ iskawinaj) milpaxo isbꞌisil ebꞌnaj yinh islahobꞌal majan.

16 Haꞌ ebꞌnaj tiꞌ xin yahaw ye yinh hunun majan ebꞌnaj Israel; naj Eliezer, iskꞌahol naj Zicri, haꞌ naj yahaw xol ebꞌnaj rubenita. Naj Sefatías iskꞌahol naj Maaca, haꞌ naj yahaw xol ebꞌnaj simeonita. 17 Naj Hasabías iskꞌahol naj Kemuel, haꞌ naj yahaw xol ebꞌnaj levita; haxa yaꞌ Sadoc xin, haꞌ yaꞌ ok yahawilo xol ebꞌnaj yikꞌal yaꞌ Aarón. 18 Haxa xol ebꞌnaj Judá, haꞌ naj Eliú, yuxhta yaꞌ David haꞌ naj ok yahawilo xol ebꞌnaj. Haxa xol ebꞌnaj Isacar, haꞌ naj Omri, iskꞌahol naj Micael, haꞌ naj ok yahawiloj. 19 Xol ebꞌnaj Zabulón, naj Ismaías, iskꞌahol naj Abdías, haꞌ naj ok yahawilo xol ebꞌnaj. Xol ebꞌnaj Neftalí, naj Jerimot, iskꞌahol naj Azriel, haꞌ naj ok yahawilo xol ebꞌnaj. 20 Xol ebꞌnaj Efraín, haꞌ yaꞌ Oseas, iskꞌahol naj Azazías, haꞌ naj ok yahawiloj. Haxa yinh yikta majan ebꞌnaj Manasés, haꞌ naj Joel, iskꞌahol naj Pedaías, haꞌ naj ok yahawiloj. 21 Haxa xol yiktaxa majan ebꞌnaj Manasés ay bꞌey Galaad, haꞌ yaꞌ Iddo, iskꞌahol naj Zacarías, haꞌ yaꞌ ok yahawiloj; haxa xol ebꞌnaj Benjamín, haꞌ naj Jaasiel, iskꞌahol naj Abner, haꞌ naj ok yahawiloj. 22 Xol ebꞌnaj Dan, haꞌ naj Azareel, iskꞌahol naj Jeroham, haꞌ naj ok yahawilo xol ebꞌnaj. Sunil ebꞌnaj tuꞌ yahawil xol hunun majan ebꞌnaj Israel.

23 Yajaꞌ mach bꞌislax ebꞌnaj maxhto tzꞌajano yinh 20 (hunkꞌal) habꞌil yu yaꞌ rey David, yuto haꞌ Komam Jahawil halnhekanoj tato chiyaqꞌ chꞌibꞌo Komam isbꞌisil yuninal ebꞌnaj Israel, hakaꞌ isbꞌisil txꞌumel. 24 Xaxin ichiko naj Joab, yunin ix Sarvia yinikanh isbꞌisil ebꞌnaj Israel tuꞌ, yajaꞌ matxa islah naj isbꞌisni yuto yati Komam Dios huneꞌ isyaꞌtajil yibꞌanh ebꞌnaj Israel, yuxin matxa alaxayo isbꞌisil tuꞌ yul hum chitzotel yinh yaꞌ rey David.

25 Haꞌ naj Azmavet iskꞌahol naj Adiel, haꞌ naj ayko yilomalo isqꞌalomal yaꞌ rey David bꞌey Jerusalén. Haxa naj Jonatán iskꞌahol naj Uzías, haꞌ naj ayko yilomalo qꞌalomal kutxbꞌabꞌiliko yulaj konhobꞌ, yebꞌ yulaj aldea yebꞌ yulaj cuartel. 26 Haꞌ xin naj Ezri iskꞌahol naj Quelub, haꞌ naj ayko yilomalo ebꞌnaj munlawom chimunla sat txꞌotxꞌ. 27 Naj Simei, ramatita, haꞌ naj ayko yilomalo tzꞌunubꞌ bꞌay ay teꞌ uva; haxa naj Zabdi, sifmita, haꞌ naj ayko yilomalo bꞌay chikꞌubꞌalaxto sat teꞌ uva. 28 Naj Baal-hanán, gederita, ayko yilomalo teꞌ olivo yebꞌ teꞌ higuera bꞌey txꞌotxꞌ Sefela, haxa naj Joás ayko yilomalo bꞌay chikꞌubꞌalax teꞌ aceite. 29 Naj Sitrai ah Sarón, ayko yilomalo noꞌ wakax chilow bꞌey txꞌotxꞌ Sarón; haxa naj Safat, iskꞌahol naj Adlai ayko yilomalo noꞌ wakax chilow satla akꞌal. 30 Naj Obil ismaelita, haꞌ naj ayko yilomalo noꞌ camello, haxa naj Jehedías meronotita, haꞌ naj ayko yilomalo noꞌ burro. 31 Naj Jaziz agareno, haꞌ naj ayko yilomalo noꞌ meꞌ. Haꞌ sunil ebꞌnaj tuꞌ ayko yilomalo yinh sunil tzet ay yaꞌ rey David.

32 Haꞌ xin naj Jonatán, yuxhta ismam yaꞌ rey David, haꞌ naj chꞌiptzeli istzꞌajbꞌan iskꞌul yaꞌ rey David. Naj Jonatán tuꞌ kaw helan naj, tzꞌibꞌlompaxo naj. Wal naj Jehiel, iskꞌahol naj Hacmoni chitanhen ebꞌnaj iskꞌahol yaꞌ rey David. 33 Hakpax tuꞌ naj Ahitofel, haꞌ naj chitzꞌajbꞌan iskꞌul yaꞌ rey. Wal naj Husai, arquita, yamigo isbꞌa yebꞌ yaꞌ rey. 34 Yinta naj Ahitofel tuꞌ aypaxiko naj Joiada, iskꞌahol naj Benaía, yebꞌ yaꞌ Abiatar; chistzꞌajbꞌan ebꞌnaj iskꞌul yaꞌ rey. Wal naj Joab, haꞌ naj ayko yahawilo ebꞌnaj issoldado yaꞌ rey David.