Ebꞌnaj chitanhen pulta yebꞌ hunteqꞌanxa ebꞌnaj ay yelapno ye ismunil
26
Hakpax tuꞌ ebꞌnaj chitanhen ispultahil Yatut Komam Dios alaxiko ebꞌnaj yinh ismunil yinh hunun majan hakaꞌ tiꞌ: Xol ebꞌnaj coreíta, alaxiko naj Meselemías, iskꞌahol naj Coré, naj Coré tuꞌ yikꞌal yaꞌ Asaf ye naj. 2 Ebꞌnaj iskꞌahol naj Meselemías haꞌ ton ebꞌnaj tiꞌ: Naj Zacarías, naj bꞌabꞌel, naj Jediael, naj iskabꞌ, naj Zebadías, naj yox, naj Jatniel, naj iskanh. 3 Naj Elam, naj ishoꞌ, naj Johanán, naj iswaj, naj Elioenai, naj ishuj. 4 Ebꞌnaj iskꞌahol naj Obed-edom, haꞌ ebꞌnaj tiꞌ: Naj Semaías, naj bꞌabꞌel kꞌahole, naj Jozabad, naj iskabꞌ, naj Joa, naj yox, naj Sacar, naj iskanh, naj Natanael, naj ishoꞌ, 5 naj Amiel, naj iswaj, naj Isacar, naj ishuj, naj Peultai, naj iswaxaj. Txꞌiꞌal ebꞌnaj iskꞌahol naj Obed-edom tuꞌ, yuto kaw yayo Komam isyaxil yibꞌanh naj.6 Haꞌ ebꞌnaj iskꞌahol naj Semaías, iskꞌahol naj Obed-edom, haꞌ ebꞌnaj ok iswiꞌehal xol yuxhtaj, yuto kaw ay yelapno ebꞌnaj, yebꞌ kaw ay yip. 7 Ebꞌnaj iskꞌahol naj Semaías tuꞌ haꞌ ebꞌnaj tiꞌ; naj Otni, naj Rafael, naj Obed, naj Elzabad, naj Eliú yebꞌ naj Samaquías; haꞌ ebꞌnaj tuꞌ kaw ay yip ebꞌnaj. 8 Sunil ebꞌnaj iskꞌahol naj Obed-edom tuꞌ yebꞌ ebꞌnaj iskꞌahol ebꞌnaj, ebꞌnaj tuꞌ kaw ipom ebꞌnaj, yebꞌ xin kaw helan ebꞌnaj yinh munil, 72 (kabꞌlahonhebꞌ iskanhwinaj) ebꞌnaj yinh sunil.
9 Ebꞌnaj iskꞌahol naj Meselemías yebꞌ ebꞌnaj yuxhtaj, 18 (waxajlahonhwanh) ebꞌnaj. Ebꞌnaj tuꞌ kaw kꞌul yinh munil. 10 Ebꞌnaj iskꞌahol naj Hosa, naj titna yinh naj Merari, haꞌ ebꞌnaj tiꞌ: naj Simri, waxanhka mach bꞌabꞌel kꞌahole naj, yaj alaxiko naj iswiꞌehaloj yu ismam, 11 naj Hilcías, naj iskabꞌ, naj Tebalías, naj yox, naj Zacarías, naj iskanh. Sunil ebꞌnaj iskꞌahol naj Hosa yebꞌ ebꞌnaj yuxhtaj, 13 (oxlahonhwanh) isbꞌisil ebꞌnaj.
12 Haꞌ ebꞌnaj tiꞌ ok yinh hunun majan istanheno Yatut Komam Jahawil, lahannhe yu yok ebꞌnaj istanheꞌ Yatut Komam yebꞌ ebꞌnaj iswiꞌehal.a 13 Hatatikꞌa suerte ebꞌnaj bꞌaytet teꞌ pulta chiꞌok ebꞌnaj istanheꞌ. Alaxayo suerte yibꞌanh ebꞌnaj tzeh yebꞌ ebꞌnaj ichamta hatatikꞌa mak yinh titina ebꞌnaj. 14 Haꞌ suerte apni yibꞌanh mak chitanhen pulta ayko yinh yetkꞌulal bꞌay chito tzꞌayik, yibꞌanh naj Selemías aykꞌayi, haxa yibꞌanh naj Zacarías, iskꞌahol naj Selemías tuꞌ aykꞌay suerte yinh istanhen pulta ayko yinh yetkꞌulal norte. Wal naj Zacarías tuꞌ, kaw kꞌul naj yiptzeli, yebꞌ xin kaw ay yitzꞌatil iswiꞌ. 15 Yaykꞌay suerte yibꞌanh naj Obed-edom istanhen pulta ayko yinh yetkꞌulal sur, haꞌ xin ebꞌnaj iskꞌahol naj Obed-edom tuꞌ ok tanheno huneꞌ nha bꞌay kꞌuwan munlabꞌal chꞌokniko yul Yatut Komam. 16 Haxa naj Supim yebꞌ naj Hosa ok tanheno pulta ayko yinh yetkꞌulal bꞌay chiꞌahilo tzꞌayik, haꞌ ton huneꞌ pulta Salequet isbꞌi bꞌay chiꞌahto bꞌeh. Hak tiꞌ xin chu istanhen ebꞌnaj Yatut Komam yinh istxolal hakaꞌ tiꞌ: 17 Yinh yetkꞌulal bꞌay chito tzꞌayik wajwanh ebꞌnaj levita chꞌoki, haxa yinh yetkꞌulal norte kanhwanh ebꞌnaj levita yinh hunun tzꞌayik, haxapaxo xin yetkꞌulal sur, kanhwanhtikꞌapaxo ebꞌnaj yinh hunun tzꞌayik. Haxa istanhemal huneꞌ nha bꞌay kꞌuwan munlabꞌal chꞌokniko yul Yatut Komam, katawanh ebꞌnaj chitanhen hunun pulta. 18 Haxa cuarto bꞌay ay munlabꞌal ayko yinh yetkꞌulal bꞌay chiꞌahilo tzꞌayik, kawanh ebꞌnaj chitanheni, yok kanhwanh ebꞌnaj chitanhen istiꞌ bꞌeh. 19 Hak tuꞌ yu ispohlaxayo munil yinh ebꞌnaj iskꞌahol naj Coré yebꞌ naj Merari.
20 Haꞌ xin naj Ahías ayko iswiꞌehalo xol ebꞌnaj levita ayko yilomalo chꞌen yebꞌalqꞌabꞌe yebꞌ qꞌalomal yet Komam. 21 Haxa ebꞌnaj iskꞌahol naj Laadán, haꞌ ton ebꞌnaj titna yinh yaꞌ Gersón yebꞌ naj Jehieli. 22 Haꞌ ebꞌnaj iskꞌahol naj Jehieli, haꞌ ton naj Zetam yebꞌ naj Joel, haꞌ xin ebꞌnaj tuꞌ yebꞌ yuxhtaj ok tanheno qꞌalomal ay yul Yatut Komam Jahawil.
23 Aqꞌlaxpaxo ismunil ebꞌnaj amramita: ebꞌnaj izharita yebꞌ ebꞌnaj hebronita, yebꞌ ebꞌnaj uzielita. 24 Haꞌ xin naj Sebuel titna yinh yaꞌ Gersón, haꞌ ayko iswiꞌehalo yinh iskꞌubꞌan qꞌalomal ay yul Yatut Komam Dios, yaꞌ Gersón tuꞌ iskꞌahol yaꞌ Moisés. 25 Haxa naj Eliezer yuxhta naj Gersón, iskꞌahol naj naj Rehabías, haxa naj Rehabías iskꞌahol naj naj Jesaías, haxa naj Jesaías iskꞌahol naj yaꞌ Joram, haxa yaꞌ Joram iskꞌahol yaꞌ naj Zicri, haxa naj Zicri iskꞌahol naj naj Selomit. 26 Haꞌ naj Selomit tuꞌ yebꞌ ebꞌnaj yuxhtaj ayko yilomalo qꞌalomal yet Komam Dios, hunteqꞌan yako yaꞌ rey David yeto Komam yebꞌ hunteqꞌan yaqꞌ ebꞌnaj iswiꞌehal yinh yuxhtaj, yebꞌ hunteqꞌan yaqꞌ ebꞌnaj yahawil yinh hunun mil soldado, yebꞌ yinh hunun 100 (hokꞌal) soldado. 27 Haꞌ hunteqꞌan qꞌalomal tuꞌ, haꞌ ton hunteqꞌan yilo ebꞌnaj issoldado Israel tet ebꞌnaj bꞌay qꞌoji yinh howal, aqꞌlax yu ebꞌnaj yu yokniko yinh munil iswatxꞌebꞌanil Yatut Komam. 28 Yebꞌpaxo sunil qꞌalomal iskutxbꞌako yaꞌ Samuel, ischejabꞌ Komam Dios yebꞌ yaꞌ Saúl, iskꞌahol naj Cis, yebꞌ naj Abner iskꞌahol naj Ner, yebꞌ naj Joab yunin ix Sarvia; haꞌ sunil tzet aqꞌlax tet Komam Dios tuꞌ, haꞌ naj Selomit yebꞌ ebꞌnaj yuxhta ok yilomaloj.
29 Wal xol ebꞌnaj izharita haꞌ naj Quenanías yebꞌ ebꞌnaj iskꞌahol, haꞌ ok gobernadoral yebꞌ juesal xol ebꞌnaj Israel.
30 Xol ebꞌnaj hebronita, naj Hasabías yebꞌ ebꞌnaj yuxhta ayko gobernadoral yinh ebꞌnaj Israel ay bꞌey isqꞌaxebꞌikꞌto haꞌ Jordán, ayko yinh yetkꞌulal bꞌay chito tzꞌayik. Ebꞌnaj tuꞌ winaj kaw ay yip, 1,700 isbꞌisil ebꞌnaj yinh sunil, haꞌ ebꞌnaj chiꞌilni tzetaj ye tuꞌ yet Komam, yebꞌ tzetaj ye tuꞌ yet yaꞌ rey David. 31 Haꞌ xol ebꞌnaj hebronita haꞌ naj Jerías ayko iswiꞌehalo ebꞌnaj. Hayet 40 (kawinajxa) habꞌil yok yaꞌ David reyal Israel istzꞌunlax isbꞌi anma, hak tuꞌ xin yu yil-laxi tato ay ebꞌnaj hebronita kaw helan yebꞌ kaw ay yip, ay bꞌey Jazer yul ismajul Galaad. 32 Naj Jerías yebꞌ ebꞌnaj yuxhta apni isbꞌisil ebꞌnaj yinh 2,700, ebꞌnaj tuꞌ winaj kaw helan yebꞌ xin haꞌ ebꞌnaj ok iswiꞌehalo xol yuxhtaj. Haꞌ ebꞌnaj yako yaꞌ rey David yahawilo xol ebꞌnaj rubenita, ebꞌnaj gadita yebꞌ yikta majan ebꞌnaj Manasés, yunhe yilni ebꞌnaj tzetaj ye tuꞌ yet Komam Dios, yebꞌ tzetaj ye tuꞌ yet yaꞌ rey David xol ebꞌnaj.