Ok yaꞌ rey Salomón iswatxꞌekanh Yatut Komam Dios
3
Yicheko yaꞌ rey Salomón iswatxꞌenkanh Yatut Komam Dios, Jahawil, bꞌey Jerusalén bꞌey wonhan Moriah, bꞌay yelaxkano tet yaꞌ David, ismam yaꞌ Salomón, haxa xin yaꞌ David halnikano bꞌay chiꞌah Yatut Komam tuꞌ, haꞌ ton bꞌey bꞌay watxꞌelaxilo istrigo naj Ornán, jebuseo.a 2 Hayet kanhebꞌxa habꞌil yok yaꞌ Salomón reyal, yicheniko yaꞌ iswatxꞌenkanh Yatut Komam Dios yinh iskabꞌ tzꞌayik yinh iskabꞌ ixahaw yinh huneꞌ habꞌil tuꞌ.3 Hak tiꞌ ismalil xeꞌ Yatut Komam ischej yaꞌ Salomón watxꞌelaxoj, 27 (hujebꞌ iskawinaj) metro yuko ispakꞌul, wal istxikin xin, bꞌalonhebꞌ metro. 4 Haxa yamaqꞌil Yatut Komam tuꞌ bꞌalonhebꞌ metro yuko sat, haxa issat tuꞌ lahan yuko hakaꞌ istxikin Yatut Komam; haxa istel bꞌalonhebꞌ metro yukanh. Yaniko yaꞌ Salomón chꞌen oro, chꞌen kaw kꞌul yinhla bꞌitzꞌabꞌ yul yamaqꞌil tuꞌ. 5 Haxa teꞌ patzabꞌ yebꞌ teꞌ regla ok yinh iswiꞌ Yatut Komam, tzꞌisisnhe teꞌ, yalaxpaxiko chꞌen oro, chꞌen kaw kꞌul yinhla iskꞌul teꞌ patzabꞌ, yalaxiko yechel xaj teꞌ palma, yebꞌ chꞌen cadena yelawiloj. 6 Yalaxpaxiko chꞌen chꞌen kaw kꞌulejchꞌan jilni yelawilo Yatut Komam, haꞌ chꞌen oro alaxiko yinh Yatut Komam, haꞌ ton chꞌen kaw kꞌul tit bꞌey Parvaim. 7 Alaxiko chꞌen oro tuꞌ yinh Yatut Komam, yinh teꞌ patzabꞌ, yinh ismarcohal pulta: yalaxiko yechel ebꞌnaj querubín yinhla iskꞌul bꞌitzꞌabꞌ.
8 Iswatxꞌenpaxo yaꞌ rey Salomón tuꞌ Ehobꞌal kaw ekꞌna Txahulkanoj, bꞌalonhebꞌ metro istel, haxa sat lahan yeko hakaꞌ sata Yatut Komam tuꞌ, bꞌalonhebꞌ metro yepaxiko sat. Lahwi tuꞌ yalaxiko chꞌen oro, chꞌen kaw kꞌul yinh, 500 quintal chꞌen oro ok yinh huneꞌ cuarto tuꞌ. 9 Haꞌ chꞌen lawuxh oro oknikoj 20 (hunkꞌal) onza yalil hunu chꞌen. Yalaxpaxiko chꞌen oro yinh cuarto yinh iskabꞌ piso.
10 Iswatxꞌelax yechel kawanh querubín yinh te teꞌ yulikto huneꞌ Ehobꞌal kaw ekꞌna Txahul, yalaxiko chꞌen oro yinh yechel querubín tuꞌ. 11 Haꞌ istel xikꞌ yechel kawanh querubín tuꞌ, bꞌalonhebꞌ metro yeko iskanhebꞌal, haꞌ isxikꞌ tuꞌ leyaniltoj. Kabꞌ metro yok veinticinco centímetro istel hunun isxikꞌ, chixin apni lehna isxikꞌ tuꞌ yinhla iskꞌul bꞌitzꞌabꞌ, kat ischalenpaxo isbꞌa istxam hunun isxikꞌ tuꞌ. 12 Haktikꞌapax tuꞌ istel isxikꞌ huneꞌxa querubín kabꞌ metro yok veinticinco centímetro istel, chixin apni istel xikꞌ tuꞌ yinh iskꞌul bꞌitzꞌabꞌ, kat ischalen isbꞌa yebꞌ isxikꞌ huneꞌxa querubín. 13 Yuxin haꞌ yinh iskabꞌebꞌalil yechel ebꞌnaj querubín tuꞌ bꞌalonhebꞌ metro chismajilo istel isxikꞌ. Kawanh querubín tuꞌ linhankanh, tꞌanhanilti xin yinh ispultahil Yatut Komam. 14 Iswatxꞌenpaxo ebꞌnaj qꞌap velo litxꞌbꞌalaxkanh yiktabꞌal Yatut Komam Dios tuꞌ, yax yinh txꞌal jilni, yebꞌ kajmutzꞌmunhe, yebꞌ kaj, yebꞌ yinh qꞌap lino, yalaxiko yechel ebꞌnaj querubín yinh qꞌap.b
Kabꞌebꞌ nimeta oy
15 Ischejni yaꞌ rey Salomón watxꞌelaxokanh kabꞌebꞌ nime oy sata istiꞌ Yatut Komam, haꞌ hunun oy tuꞌ 16 (wajlahonhebꞌ) metro istel, kabꞌ metro yok 25 (howebꞌ iskawinaj) centímetro ispimal yelawil ayko yinh iswiꞌ hunun yoyal tuꞌ. 16 Iswatxꞌelaxpaxo yechel chꞌen cadena, yalaxiko yelawilo iswiꞌ kabꞌebꞌ oy tuꞌ, iswatxꞌelaxpaxo 100 (hokꞌal) yechel teꞌ granada yalaxiko yinh yechel chꞌen cadena yelawil iswiꞌ kabꞌebꞌ oy tuꞌ. 17 Yalaxkanh kabꞌebꞌ oy tuꞌ sata istiꞌ Yatut Komam, huneꞌ alaxkanh yinh iswatxꞌqꞌabꞌ, hunxa xin yinh ismekqꞌabꞌ. Haꞌ huneꞌ alaxkanh yinh iswatxꞌqꞌabꞌ, Jaquín ok isbꞌihoj, haxa hunxa alaxkanh yinh ismekqꞌabꞌ, Boaz ok isbꞌihoj.