Alaxikto isKaxhahil istrato Komam Dios yul Yatut Komam
8
Lahwi tuꞌ iskutxbꞌaniko yaꞌ rey Salomón ebꞌnaj ichamta winaj Israel bꞌey Jerusalén yebꞌ ebꞌnaj iswiꞌehal yinh hunun majan ebꞌnaj Israel yebꞌ ebꞌnaj mame yinh hunun nhahil ebꞌnaj, yu isto ebꞌnaj yinoti isKaxhahil istrato Komam Dios bꞌey iskonhobꞌ yaꞌ David, haꞌ ton Sión. 2 Iskutxbꞌaniko yaꞌ rey Salomón ebꞌnaj winaj Israel tuꞌ yinh ixahaw Etanim, haꞌ ton ishuj ixahaw yinh huneꞌ habꞌil, yet chiꞌekꞌtzelax huneꞌ niman qꞌinh. 3 Iskutxbꞌaniko isbꞌa sunil ebꞌnaj winaj Israel, yinito ebꞌyaꞌ sacerdote isKaxhahil istꞌinhanil istrato Komam Dios. 4 Hayet yinito ebꞌyaꞌ isKaxhahil istrato Komam tuꞌ, yinipaxto ebꞌyaꞌ qꞌap qꞌap aykanh isTabernáculo Komam, bꞌay chiskutxbꞌa isbꞌa anma Israel yebꞌ Komam. Yinipaxto ebꞌyaꞌ sunil munlabꞌal okniko yul qꞌap; haꞌ ebꞌyaꞌ sacerdote yebꞌ ebꞌnaj levita ijnito sunil tuꞌ. 5 Haxa yaꞌ rey Salomón yebꞌ sunil ebꞌnaj winaj Israel kutxiko tuꞌ, ayko ebꞌnaj sata isKaxhahil istrato Komam, yaqꞌni ebꞌnaj noꞌ meꞌ yebꞌ noꞌ wakax xahanbꞌalil. Kaw nimankano no noqꞌ nhuslax xahanbꞌalil, yuxin matxa chu isbꞌislax noꞌ, yu kaw hantanhekano noꞌ. 6 Yanikto ebꞌyaꞌ sacerdote isKaxhahil istrato Komam yul Yatut Komam, yul Ehobꞌal ekꞌna kaw Txahul, yalanh yenhel xikꞌ yechel ebꞌnaj querubín. 7 Leyanilto xikꞌ ebꞌnaj querubín tuꞌ yibꞌanh isKaxhahil istrato Komam, haꞌ xin xikꞌ tuꞌ ayko yenhelo kaxha, yebꞌ teꞌ regla ayko yinh yu isbꞌatxlaxkanh. 8 Haꞌ teꞌ chibꞌatxnikꞌo tuꞌ, kaw nimajal istel teꞌ, yuxin hayet ay ebꞌyaꞌ bꞌey Ehobꞌal Txahul, ayko satalti Ehobꞌal ekꞌna kaw Txahul chiyilikto ebꞌyaꞌ sacerdote istxam teꞌ, yajaꞌ yinh nahatxa yelo ebꞌyaꞌ sacerdote xin, matxa chiyilikto ebꞌyaꞌ teꞌ. 9 Matxa hunuxa tzet ye tuꞌ ayayto yul Kaxha, kachannhe kabꞌebꞌ chꞌen chꞌen paqꞌan yehi bꞌay ayiko chejbꞌanile yakanayto yaꞌ Moisés yet ay bꞌey witz Horeb, bꞌay istꞌinhbꞌakano Komam Dios istrato yebꞌ ebꞌnaj Israel, yet yinilo Komam konhobꞌ Israel sat txꞌotxꞌ Egipto.10 Haxa yet yelti ebꞌyaꞌ sacerdote yul Yatut Komam tuꞌ, isnohilo yul yu moyan. 11 Matxa xin yu yokto ebꞌyaꞌ sacerdote iswatxꞌeno ismunil yul Yatut Komam Jahawil, yuto nohilo yul nha tuꞌ yu isqꞌaqꞌal yip Komam.
Ekꞌtzelax isqꞌinhal Yatut Komam Dios
(2Cr. 6:1-7, 10)
12 Lahwi tuꞌ yalni yaꞌ Salomón:
«Haꞌ Komam Dios halni ta chꞌehikꞌo xol qꞌejholoj.
13 Mamin, yajaꞌ xin watxꞌebꞌilxa huneꞌ nha tiꞌ wuhan,
huneꞌ nha bꞌay chaxhehikꞌoj yinh sunilbꞌal ej tiempo,» xhi yaꞌ.
14 Lahwi tuꞌ ismeltzo tꞌanhno yaꞌ Salomón yibꞌanh anma Israel linhanejkanh, isqꞌanni yaꞌ iskꞌulal Komam Dios yibꞌanh anma. 15 Yalni yaꞌ: «Jalaꞌwe kꞌul-la tzotiꞌ yinh Komam Dios, isDiosal Israel, yuto mayij isbꞌa tzet halbꞌilkano yu Komam tet inmam Davidan. 16 Yalni Komam hakaꞌ tiꞌ: “Yettaxtikꞌa winilo inkonhobꞌ Israelan bꞌey Egipto, maxhtotikꞌa bꞌay chinsikꞌilojan huneꞌ konhobꞌ xol ebꞌnaj Israel bꞌay chiꞌah watutan, bꞌay chinehikꞌojan, kachannhe xin insayikojan yaꞌ David isreyalo Israel, inkonhobꞌan,” xhi Komam. 17 Haꞌ inmam Davidan yoche yanma yaqꞌaꞌkanh Yatut Komam Dios, bꞌay chibꞌina isbꞌi Komam, isDiosal Israel. 18 Yajaꞌ yal Komam Dios tet inmamtuꞌan: “Kaw chiꞌekꞌ yinh hawanma hawatxꞌenkanh watutan bꞌay chibꞌina inbꞌihan, kaw kꞌulkano tzet chawoche tuꞌ. 19 Yajaꞌ xin maxhtaj hach chawatxꞌe watuttuꞌan, wal xin haꞌ huneꞌ hakꞌahol chipitzkꞌahi, haꞌ naj chꞌanikanh bꞌay chibꞌina inbꞌihan,” xhi Komam.
20 »Haꞌ tinanh xin mayijkano isbꞌa tzet yal Komam, kinyanikojan reyalo selelo inmaman, kinok tzꞌonhnojan yul istzꞌonhobꞌal yahawilo konhobꞌ Israel hakaꞌtikꞌa yu yalnikanoj. Wanikanhan Yatut Komam, isDiosal Israel bꞌay chibꞌina isbꞌi. 21 Haꞌ yul yatut, xaꞌinwatxꞌehan bꞌay chiꞌehikꞌo isKaxhahil istꞌinhanil istrato Komam yaqꞌkano tet ebꞌyaꞌ komam jichmam, yet yinilo Komam ebꞌyaꞌ bꞌey Egipto,» xhi yaꞌ rey Salomón.
22 Lahwi tuꞌ yok linhno yaꞌ Salomón sata mexha bꞌay chꞌaqꞌlax xahanbꞌal tet Komam Dios yinh sat sunil konhobꞌ Israel tuꞌ, yanikanh yaꞌ isqꞌabꞌ satkanh, 23 yalni yaꞌ: «Mam Jahawil, isDiosal Israel, machi hunuxa mak hakaꞌ hach tiꞌ, ay hach yul satkanh yebꞌ sat txꞌo txꞌotxꞌ tiꞌ, chij isbꞌa tzet tꞌinhbꞌabꞌilkano hawu yebꞌ konhobꞌ Israel, kat hayenilo iskꞌulal hakꞌul yinh ebꞌnaj chiyijen yinh sunil yanma yinh tzet chawala. 24 Hayijenpaxo tzet hawalkano tet hachejabꞌ David, inmaman. Haꞌ tzet hawalkano yu hatiꞌ, haꞌ tinanh chiyijkano isbꞌa yu haqꞌabꞌ. 25 Wal tinanh xin Mamin, isDiosal Israel, yijabꞌ isbꞌa tzet hawalkano tet hachejabꞌ David, inmaman yet hawalni: “Haꞌ hakꞌahol chꞌok tzꞌonhno yahawilo Israel, tato chiskꞌubꞌa ebꞌnaj tzet chiwalan yebꞌ ta chibꞌelwi ebꞌnaj yinh iskꞌulal insatajan, hakaꞌ hach tiꞌ,” kachikano tet inmaman. 26 Wal tinanh xin Mamin, isDiosal Israel, yijabꞌ isbꞌa tzet hawalkano tet hachejabꞌ David inmamtuꞌan.
27 »Yajaꞌ ¿yelmi Mamin, chaxheh sat txꞌo txꞌotxꞌ tiꞌ? Tato machi kꞌuxanli satkanh bꞌay chachehikꞌoj, ¿hajxam huneꞌ nha inwatxꞌekanhan tawet tiꞌ? 28 Waxanhka hak tuꞌ ye Mam Wahawil, hach inDiosalan, yajaꞌ hach tiꞌ chawabꞌe intxahan, hanin hachejabꞌ intiꞌan; chawabꞌe tzet chinqꞌanan, tawet chiꞌahwawan yinh huneꞌ tzꞌayik tiꞌ. 29 Hajannhehojabꞌnhetikꞌa hasat yilni huneꞌ nha tiꞌ tzꞌayikal yebꞌ aqꞌbꞌalil, bꞌay hawalkanoj ta chibꞌina habꞌi. Mamin, abꞌe intxahan chiwaqꞌan tawet yul hawatut tiꞌ, hanin hachejabꞌ intiꞌan. 30 Abꞌe tzet chinqꞌanan tawet, hanin hachejabꞌ intiꞌan, kat hawabꞌenpaxo tzet chisqꞌan hakonhobꞌ Israel. Hayet chonhtxalihanh yul hawatut tiꞌ, chawabꞌen kotxahanh bꞌay ayach yul satkanh, chapajtzeni chawaqꞌni nimankꞌulal jinhanh.
31 »Tato ay hunu mak chiyako ismul yinh hunu yet anmahil, kat yal-lax tet ta chihul yalaꞌti ismul yul hawatut sata bꞌay chiꞌaqꞌlax xahanbꞌal tawet tiꞌ, 32 kat hawabꞌen yul satkanh, chawilni tzet chiꞌelikoj. Chawilni tzet chiꞌeliko ebꞌnaj hachejabꞌ, chawanayo isyaꞌtajil yibꞌanh mak ay ismul, chawaqꞌni istxꞌojal chiswatxꞌe tuꞌ tet, chawaqꞌni istoholal tet mak mach ismul, hakaꞌtikꞌa istoholal chiswatxꞌe tuꞌ.
33 »Hayet chiꞌaykꞌay hakonhobꞌ Israel tiꞌ yul isqꞌabꞌ ebꞌnaj chiꞌaniko howal yinh, yuto yako ismul tawet, yajaꞌ hayet chisnah isbꞌa kat yawten habꞌi yinh, chisqꞌanni tawet yinh istxah yul hawatut tiꞌ, 34 chawabꞌen bꞌey yul satkanh tzet chisqꞌana, chawaqꞌni nimankꞌulal yinh ismul hakonhobꞌ Israel tiꞌ, kat hawaqꞌni meltzoho ebꞌnaj sat istxꞌotxꞌ, txꞌotxꞌ hawaqꞌkano tet ebꞌyaꞌ jichmamanh.
35 »Tato matxa chiyaqꞌ haꞌ nhabꞌ yu ismul hakonhobꞌ chiyako tawet, yajaꞌ ta chisnah isbꞌa yinh ismul yet chawanayo isyaꞌtajil yibꞌanh, kat yul txahlo tawet yul hawatut tiꞌ, 36 chawabꞌen tzet chisqꞌan yinh istxah tuꞌ bꞌay ayach yul satkanh, chawaqꞌni nimankꞌulal yinh ismul hachejabꞌ yebꞌ hakonhobꞌ Israel yet chakuyni ebꞌnaj yinh iskꞌulal, chawanayo haꞌ nhabꞌ yibꞌanh istxꞌotxꞌ, txꞌotxꞌ hawaqꞌ ismajulo ebꞌnaj.
37 »Tato ay wahil chihul bꞌey kokonhobꞌ tiꞌanh, maka howla yabꞌil, maka ta chitajilo tzꞌunubꞌ yu qꞌa qꞌaꞌ, maka yu chihul no noqꞌ istanhtzeloj sat tzꞌunubꞌ hakaꞌ noꞌ qꞌul, maka hunuxa majan noꞌ; yebꞌ xin ta chihul ebꞌnaj ayko ishowal yinh hakonhobꞌ tiꞌ kat ishoynayoj, maka ta chihul tzijxanhe yabꞌilal maka isyaꞌtajil, 38 hayet lanhan yabꞌen ebꞌnaj isyaꞌtajil tuꞌ, kat yul makxanhetikꞌa anmahil, maka ta sunil hakonhobꞌ Israel yul hawatut tiꞌ, kat isqꞌanni yinh istxah tawet, chanikanh isqꞌabꞌ sataj, 39 chawabꞌe istxah tuꞌ bꞌay ayach yul hawehobꞌal yul satkanh, kat hawaqꞌni nimankꞌulal yinh, chapajtzen istxah. Chawaqꞌni ispaj tet hunun anma, hatatikꞌa isbꞌeybꞌal yul hasat, yuto hach hawohta yanma sunil anma, (yuto hachnhechꞌan hawohta tzet chiꞌekꞌ yinh yanma iskꞌahol ebꞌnaj winaj), 40 yunhe isxiw ebꞌnaj tawet yulbꞌal sunil tzꞌayik itzitz ebꞌnaj sat txꞌo txꞌotxꞌ hawaqꞌkano tet ebꞌyaꞌ jichmamanh.
41 »Hakpax tuꞌ; ebꞌnaj nan konhobꞌal, mach Israeloj, nahat chitita yu yinayo isbꞌa tawet, 42 (yuto chiyabꞌe ebꞌnaj isbꞌina habꞌi, habꞌi kaw ay yelapnoj, chiyabꞌen ebꞌnaj tzetaj hawatxꞌe yu haqꞌabꞌ kaw aykano yip), kat xin istxahli ebꞌnaj tawet yul hawatut tiꞌ, 43 chawabꞌenpaxo istxah ebꞌnaj bꞌay ayach yul satkanh kat hawaqꞌni ispaj tzet chisqꞌan ebꞌnaj nan konhobꞌal tuꞌ, yunhe yohtanhenilo sunil ej konhobꞌ ay sat yibꞌanhqꞌinal tiꞌ habꞌi, kat isxiw tawet, hakaꞌ hakonhobꞌ Israel tiꞌ, kat yohtanhenilo hunteqꞌan konhobꞌ tuꞌ tato chibꞌina habꞌi yul huneꞌ nha inwatxꞌekanhan tawet tiꞌ.
44 »Hayet chiꞌelto hakonhobꞌ yaqꞌaꞌko howal yinh ebꞌnaj ayko ishowal yinh, kat isto yul bꞌeh bꞌay chawala, kat istxahli tawet, mam Jahawil, kat istꞌanhxiko yinh hakonhobꞌ hasikꞌilo tiꞌ yebꞌ yinh hawatut inwatxꞌekanhan bꞌay chibꞌina habꞌi tiꞌ, 45 chawabꞌe istxah bꞌay ayach yul satkanh, chawabꞌen tzet chisqꞌana, chawatxꞌen istoholal yinh.
46 »Tato chako hakonhobꞌ tiꞌ ismul tawet yuto machi hunu naj winaj tiꞌ mach chako ismul, kat istit hahowal yinh, kat hawaniko hakonhobꞌ yul isqꞌabꞌ ebꞌnaj ayko ishowal yinh, chiyinito ebꞌnaj hakonhobꞌ tiꞌ ischejabꞌoj bꞌey nan konhobꞌal, nahata maka kawil, 47 yajaꞌ ta chistxum isbꞌa iskꞌul bꞌay chiꞌilaxto tuꞌ, kat ismeltzoko yul haqꞌabꞌ kat istxahli tawet chalni: “Majako komulanh, makowatxꞌenanh istxꞌojal yebꞌ ismachiswalilal,” ta xhi. 48 Kat ismeltzoko yinh sunil iskꞌul yebꞌ yinh sunil yanma yul haqꞌabꞌ bꞌay ilaxto chejabꞌo tuꞌ, kat istxahli tawet, chitꞌanhxiti yinh txꞌotxꞌ, txꞌotxꞌ hawaqꞌkano tet ebꞌyaꞌ jichmamanh yebꞌ tet hakonhobꞌ sikꞌbꞌililoj hawu, yebꞌ yinh hawatut inwatxꞌehan bꞌay chibꞌina habꞌi tiꞌ, 49 chawabꞌe istxah bꞌay ayach yul satkanh, chawabꞌen tzet chisqꞌan yinh sunil yanma, chawatxꞌen istoholal yinh. 50 Chawaqꞌni nimankꞌulal yinh ismul, yebꞌ yinh ismanhkꞌomal tawet, chawaqꞌni tzꞌayo iskꞌul ebꞌnaj nan konhobꞌal xaꞌinito hakonhobꞌ tuꞌ, 51 yuto hanhonhtiꞌanh hakonhobꞌ jehanh, hamajul jehanh, konhhawilojanh sat txꞌotxꞌ Egipto huneꞌ konhobꞌ hakaꞌ horno bꞌay chinhuslax chꞌen hierro.a
52 »Mamin, abꞌe istxah hachejabꞌ yebꞌ istxah hakonhobꞌ Israel, chawabꞌen sunil tzet chisqꞌan tawet, 53 yuto hach, mam Jahawil, hapohilo hakonhobꞌ tiꞌ xol sunil ej konhobꞌ ay sat yibꞌanhqꞌinal tiꞌ yu yok hamajuloj hakaꞌ yu hawalnikano tet yaꞌ Moisés, hachejabꞌ, yet hawinilo jichmamanh sat txꞌotxꞌ Egipto,» xhi yaꞌ Salomón, yinh istxah.
54 Hayet istxahli yaꞌ Salomón tuꞌ tet Komam Jahawil, jahanayo yaꞌ sata ismexhahil yet xahanbꞌal tet Komam, aykanh xin isqꞌabꞌ yaꞌ satkanh. 55 Yahwano yaꞌ, isqꞌanni yaꞌ iskꞌulal Komam Dios yibꞌanh konhobꞌ Israel, yalni yaꞌ yinh kaw ip hakaꞌ tiꞌ: 56 «Jalaꞌwe kꞌul-la tzotiꞌ yinh Komam Dios, Jahawil, Komam aqꞌni aqꞌankꞌulal yul konhobꞌ Israel hakaꞌtikꞌa yu yet yalanhtokanoj. Sunil tzet yalte Komam tet yaꞌ Moisés, ischejabꞌ, yij isbꞌa, machi hunu tiꞌ mach yij isbꞌa.
57 »Ayojabꞌiko Komam Dios, Jahawil, koDiosal jetbꞌihoj, machojabꞌ chonhisnahulnheto Komam, machojabꞌ chonhisbꞌejkanoj. 58 Haꞌojabꞌ Komam chimeltzoniko janma yul isqꞌabꞌ, yunhe kobꞌelwi yul isbꞌeh, kat kokꞌubꞌan chejbꞌanile chal Komam, yebꞌ iskuybꞌanil, yebꞌ tzotiꞌ yal Komam, hunteqꞌan yalkano tet komam icham. 59 Haꞌ xin tzet chinqꞌanan yinh intxahtiꞌan, ayojabꞌnhetikꞌako tzꞌayik yebꞌ aqꞌbꞌal iskꞌatanh Komam Dios, Jahawil, yunhe iskolwa Komam yinh ischejabꞌ yebꞌ yinh iskonhobꞌ Israel chipajtzen kotxah yinh istzꞌayikal. 60 Yunhe yohtanhenilo konhobꞌ ay sat txꞌo txꞌotxꞌ tiꞌ tato hanhe Komam Dios, Jahawil, kaw Dioskanoj, machi hunuxa mak hakaꞌ Komam. 61 Toholojabꞌ janma sata Komam Dios, Jahawil, koDiosal, chikoyijen Istzotiꞌ yebꞌ ischejbꞌanil, hakaꞌ koyijen yinh huneꞌ tzꞌayik tiꞌ,» xhi yaꞌ rey Salomón.
62 Lahwi tuꞌ, yaqꞌni yaꞌ rey Salomón yebꞌ konhobꞌ Israel isxahanbꞌal tet Komam Dios, Jahawil. 63 Yaqꞌnipaxo yaꞌ xahanbꞌal yet aqꞌankꞌulal tet Komam. 22 mil noꞌ wakax nhuslax yinh xahanbꞌalil tuꞌ, 120 mil noꞌ meꞌ.
Hak tuꞌ yu yekꞌtzelax isqꞌinh Yatut Komam Dios, Jahawil, yu yaꞌ rey Salomón yebꞌ konhobꞌ Israel.b 64 Yinhtikꞌa huneꞌ tzꞌayik tuꞌ, yakaniko yaꞌ Salomón yiktabꞌal yamaqꞌil Yatut Komam bꞌay chiꞌalaxiko xahanbꞌal tet Komam, yuto haꞌ bꞌey tuꞌ nhuslax noꞌ xahanbꞌal yebꞌ yebꞌalqꞌabꞌe, haꞌ tuꞌ nhuslaxpaxo ismantecahil noꞌ aqꞌlax xahanbꞌalil yet aqꞌankꞌulal; yuto haꞌ huneꞌ mexha yet xahanbꞌal bronce ayko sata Komam Jahawil yul yatut, nichꞌanchꞌan, machi qꞌoji isnhuslaxayo noꞌ xahanbꞌal tuꞌ yibꞌanh.
65 Haꞌ yinh huneꞌ tiempo tuꞌ, hujebꞌ tzꞌayik yekꞌtze yaꞌ Salomón yebꞌ konhobꞌ Israel huneꞌ qꞌinh tet Komam Dios, Jahawil. Kaw sunil anma Israel iskutxbꞌako isbꞌa; tit anma ay bꞌey ismohonal Hamat masanta istiꞌ ha haꞌ ayko ismohonalo Egipto. Hayet islahwi hujebꞌ tzꞌayik qꞌinh tuꞌ, yichipaxiko hujebꞌxa tzꞌayik qꞌinh, yuxin 14 (kanhlahonhebꞌ) tzꞌayik ekꞌtzelax huneꞌ qꞌinh tuꞌ. 66 Haxa yinh iswaxajebꞌ tzꞌayik, istaqꞌlikano yaꞌ rey Salomón tet konhobꞌ Israel, isqꞌanni anma Israel tuꞌ iskꞌulal Komam Dios Jahawil yibꞌanh yaꞌ rey Salomón, ispaxto anma yatut. Kaw xin chitzala yanma anma Israel yuto isyelo Komam sunil iskꞌulal yinh yaꞌ David, ischejabꞌ Komam yebꞌ yinh konhobꞌ Israel.