3 Lahwi tuꞌ isto yaꞌ rey yaqꞌno howal yinh konhobꞌ Hamat yul ismajul Soba, yok konhobꞌ tuꞌ yul isqꞌabꞌ yaꞌ. 4 Iswatxꞌenkanh yaꞌ Salomón konhobꞌ Tadmor sat txꞌotxꞌ desierto yebꞌ hunteqꞌanxa konhobꞌ watxꞌelaxkanh bꞌey Hamat bꞌay chikꞌubꞌalax tzet chilolaxi. 5 Iswatxꞌenpaxkanh yaꞌ konhobꞌ Bet-horón ay yibꞌanhahtoj, yebꞌ Bet-horón ay yalanhaytoj, hunteqꞌan konhobꞌ tuꞌ kaw ay yip, alaxkanh iskꞌubꞌal, ispultahil, yebꞌ yalaxiko chꞌen hierro yipomalo ispultahil. 6 Iswatxꞌenpaxokanh yaꞌ rey Salomón konhobꞌ Baalat yebꞌ hunteqꞌanxa konhobꞌ bꞌay chikꞌubꞌalax tzet chilolaxi. Iswatxꞌenpaxokanh yaꞌ rey Salomón sunil konhobꞌ bꞌay ay ischeh yebꞌ bꞌay ay issoldado chiyaqꞌ howal yibꞌanh cheh. Iswatxꞌenpaxokanh yaꞌ sunil tzet yoche iskꞌul bꞌey Jerusalén yebꞌ bꞌey Líbano yebꞌ yulajla sunil konhobꞌ ayko yalanh yip yaꞌ.

7 Wal sunil anma kankano yinh ebꞌnaj heteo, ebꞌnaj amorreo, ebꞌnaj ferezeo, ebꞌnaj heveo, yebꞌ xin ebꞌnaj jebuseo, anma mach Israeloj, 8 ebꞌnaj matxa istanhtzelo ebꞌnaj Israel, alaxiko ebꞌnaj munil yu yaꞌ rey Salomón, hakto tuꞌ xin ye ebꞌnaj tinanh. 9 Wal ebꞌnaj Israel mach yako yaꞌ rey Salomón tuꞌ ebꞌnaj yinh munil iswatxꞌe, wal xin haꞌ ebꞌnaj tuꞌ yako yaꞌ soldadohal, yebꞌ yinh yahawilal, yinh kapitanhil yebꞌ yinh komandantehal yinh iscarruaje yet howal, yebꞌ yinh ebꞌnaj issoldado chiyaqꞌ howal yibꞌanh cheh. 10 Aypaxo 250 ebꞌnaj sat yahawil yinh ebꞌnaj chimunla yinta yaꞌ rey Salomón.

11 Yinilo yaꞌ rey Salomón tuꞌ yixal bꞌay aya, yul iskonhobꞌ yaꞌ rey David, haꞌ ton ix iskutzꞌin naj faraón, yinito yaꞌ ix bꞌey huneꞌ nha iswatxꞌekanh yul huneꞌxa konhobꞌ, yuto istxum yaꞌ hakaꞌ tiꞌ: «Haꞌ ix wixaltiꞌan, mach kꞌuloj tato chiꞌehayo ix yul yatut yaꞌ rey David, inmaman ok isreyalo Israel, yuto haꞌ yul yatut inmamtuꞌan ekꞌlena isKaxhahil istrato Komam Jahawil, nha aqꞌbꞌiliko yeto Komam Dios,» xhi yaꞌ.

12 Yaqꞌni yaꞌ rey Salomón isxahanbꞌal tet Komam Jahawil yibꞌanh ismexhahil yet xahanbꞌal yaqꞌ watxꞌe yaꞌ yamaqꞌil Yatut Komam. 13 Yibꞌanh ismexhahil yet xahanbꞌal tuꞌ xin chinhuslax hunun xahanbꞌal yinh istzꞌayikal hakaꞌtikꞌa yu yalnikano yaꞌ Moisés, yinh istzꞌayikal xewilal, yebꞌ yet unin ixahaw, yebꞌ yinh oxebꞌ qꞌinh kaw ay yelapno chꞌekꞌtzelax yulbꞌal hunun habꞌil, haꞌ ton qꞌinh yet chiwalax ixim pan machi yanhal, qꞌinh yet chiꞌah sat tzꞌunubꞌ, yebꞌ qꞌinh yet Lexhpat.

14 Yalaxiko ebꞌyaꞌ sacerdote yinh istxolal yinh ismunil hakaꞌ yu ischejnikano yaꞌ rey David, ismam yaꞌ rey Salomón, yalaxpaxiko ebꞌnaj levita yinh ismunil yebꞌ yinh isbꞌitnhen Komam Dios sata ebꞌyaꞌ sacerdote, hunun munil tiꞌ chiwatxꞌelaxi hatatikꞌa istxolal yinh istzꞌayikal. Yalaxpaxiko ebꞌnaj tanhem pulta yinh ismunil yinh istxolal yinh hunun pulta, hatatikꞌa yu yalnikano yaꞌ rey David, ischejabꞌ Komam. 15 Isyije ebꞌnaj sunil tzet ischej yaꞌ rey David yubꞌ ebꞌyaꞌ sacerdote, ebꞌnaj levita, ebꞌnaj chikꞌubꞌan qꞌalomal, yebꞌ sunil ismunil yaꞌ rey yinh txonh, 16 yuto sunil munil yoche iswatxꞌe yaꞌ rey Salomón yijkano isbꞌa yettaxtikꞌa yet yalaxayto xeꞌ Yatut Komam Jahawil masanto lahwikanoj, wal xin tzꞌajan yu iswatxꞌikanoj.

17 Lahwi tuꞌ xin isto yaꞌ rey Salomón bꞌey Ezión-geber yebꞌ bꞌey Elot, istiꞌ haꞌ mar bꞌey txꞌotxꞌ Edom; 18 yuto yati naj rey Hiram hunteqꞌan teꞌ barco yebꞌ ebꞌnaj munlawom yinh teꞌ barco tuꞌ, hunteqꞌan ebꞌnaj tuꞌ, kaw helan ebꞌnaj yekꞌ yibꞌanh haꞌ mar. Haꞌ xin ebꞌnaj tuꞌ to yinta ebꞌnaj ischejabꞌ yaꞌ rey Salomón bꞌey Ofir, yiniti ebꞌnaj 450 talento chꞌen oro bꞌey tuꞌ, yiniti ebꞌnaj chꞌen tet yaꞌ rey Salomón.