Haꞌ isbꞌiskꞌulal konhobꞌ Sión haꞌ Komam Jahawil chiꞌaqꞌni tet
2
¡Haꞌ konhobꞌ Sión kaw maꞌokkano xol qꞌejholo yu Komam Jahawil,yet yaniti Komam ishowal yibꞌanh!
Haꞌ iskꞌulchꞌanil Israel isqꞌojayo Komam sat txꞌotxꞌ,
matxa isnahti Komam isbꞌatxobꞌal yoj yinh istzꞌayikal bꞌay tit ishowal.
2 Yuchkꞌanto Komam Jahawil konhobꞌ,
mach yaqꞌ nimankꞌulal yinh,
yuchkꞌanto Komam sunil ismantiado yuninal yaꞌ Jacob yu ishowal.
Haꞌ iscuartel konhobꞌ Sión, aykꞌaykano sat txꞌotxꞌ yu Komam.
Maꞌelkano ispixan konhobꞌ Judá yebꞌ ebꞌnaj yahawil yu Komam.
3 Haꞌ yu ishowal Komam yuxin istanhtzekanilo sunil yip Israel,
isbꞌej Komam iskolwa yinh Israel yinh sat ebꞌnaj chaqꞌni howal yinh.
Tzuji qꞌa qꞌaꞌ yinh iskonhobꞌ yuninal yaꞌ Jacob, hakaꞌ qꞌa qꞌaꞌ chinhusnito sunil tzet ayko yinhla ishoyanil.
4 Haꞌ Komam Jahawil lahan hakaꞌ hunu naj aqꞌom howal chistoholnheto isqꞌabꞌ,
chisqꞌojnito isbꞌaqꞌ islitꞌ yinh konhobꞌ bꞌay ayko ishowal,
chiyuchkꞌanto sunil iskꞌulchꞌanil.
Hakaꞌ hunu qꞌa qꞌaꞌ, hak tuꞌ yu yanayo Komam ishowal yibꞌanh ismantiado anma ah Sión.
5 Haꞌ Komam Jahawil, lahan yute isbꞌa hakaꞌ hunu naj aqꞌom howal,
yuchkꞌanto Komam sunil ispalacio ebꞌnaj rey yebꞌ iscuartel ebꞌnaj soldado.
Haꞌ bꞌey Judá kaw ahkanokanh bꞌiskꞌulal yebꞌ oqꞌil yu Komam.
6 Yilo Komam qꞌap mantiado aykanh yatutoj,
bꞌay chiskutxbꞌa isbꞌa anma Israel,
yuchkꞌanto qꞌap mantiado tuꞌ hakaꞌ yuchkꞌalaxto nixhte pat bꞌay chitanhelax tzꞌunubꞌ.
Haꞌ Komam Jahawil, aqꞌni isnahulnheto konhobꞌ Sión qꞌinh kaw ay yelapno chitikꞌa ekꞌtzelaxi,
yebꞌ istzꞌayikal xewilal.
Yintanhekanilto Komam yaꞌ rey yebꞌ yaꞌ sacerdote yu ishowal.
7 Yintanhekanilto Komam Jahawil yaltar, matxa yelapno elkaniko yatut yul sat.
Ismurohal konhobꞌ bꞌay ay palacio yako Komam yul isqꞌabꞌ ebꞌnaj ayko ishowal yinh,
xanhe chiwejcha ebꞌnaj yul Yatut Komam hakaꞌ yinh istzꞌayikal qꞌinh.
8 Ok yinh isnabꞌal Komam Jahawil yuchkꞌanto ismurohal konhobꞌ Sión,
haꞌ tzet ok yinh isnabꞌal,
masan yij isbꞌa, yuchkꞌanto ismurohal konhobꞌ.
Kaw bꞌiskꞌulal yu yaykꞌaykano istorrehal yebꞌ iskꞌubꞌal konhobꞌ,
hun yu yuchkꞌalaxto iskabꞌ majanil.
9 Haꞌ ispultahil konhobꞌ maꞌaykꞌaykano sat txꞌotxꞌ, ismaqꞌlax qꞌaho istel ispultahil tuꞌ.
Haꞌ naj isreyal Judá, yebꞌ ebꞌnaj yahaw konhobꞌ, ilaxto ebꞌnaj xol ebꞌnaj nan konhobꞌal bꞌay machi isley Komam Jahawil,
haxa ebꞌyaꞌ ischejabꞌ Komam matxa tzet chiꞌaqꞌlax yilaꞌ ebꞌyaꞌ yu Komam.
10 Haꞌ ebꞌnaj ichamta winaj ah konhobꞌ Sión, ay tzꞌonhno ebꞌnaj sat txꞌotxꞌ,
matxa chitzotel ebꞌnaj; chahto ebꞌnaj pojoj yinh iswiꞌ,
chaniko ebꞌnaj xilqꞌape yet bꞌiskꞌulal yinh.
Haꞌ ebꞌix qꞌopo ah Jerusalén xanhe xulanayo ebꞌix sat txꞌotxꞌ.
11 Haꞌ isbꞌaqꞌ insatan kaw lanhan ispax yip yu oqꞌil, kaw bꞌiskꞌulal ye inkꞌulan,
kaw yaꞌ chiꞌeliko wanmahan yet chiwilnihan isyaꞌtajil chaqꞌle wet konhobꞌan
yet chiwilnihan iskam nixhte unin yulaj txonhbꞌal yul konhobꞌ
yebꞌ yet chiwilnihan iskam nixhte neneꞌ chitotxutxwi.
12 Chalni nixhte unin tet ismiꞌ: «Matxa kopan, matxa kovino,» xhi.
Haꞌ nixhte unin hakaꞌta chitejlaxi,
chipax yip yu wahil yulajla iscallehal konhobꞌ kat iskamayo yul isqꞌabꞌ ismiꞌ.
13 ¿Mak chiwitijan testigohal teyinh, maka mak yebꞌ chexinlahannhehan hex ah Jerusalén?
¿Bꞌaytet konhobꞌ yebꞌ chu kexinlahbꞌanan, yunhe waqꞌnihan yaqꞌlobꞌal hekꞌul, hex ah konhobꞌ Sión?
Yuto kaw nimankano isyaꞌtajil maꞌay teyibꞌanh hakaꞌ ha haꞌ ay yul haꞌ mar, ¿mak chu kexyanhteni?
14 Haꞌ tzet yalikꞌo ebꞌnaj isbꞌaliko isbꞌa ischejabꞌo Komam Dios texol kaw leqꞌtiꞌal yebꞌ sukalnhe yalikꞌo ebꞌnaj,
mach yalilo ebꞌnaj hemul, yuxin kexilaxto preso nan konhobꞌal,
wal xin haꞌ tzet matzet chal yelapnoj, haꞌ yalikꞌo ebꞌnaj teyet, hekꞌaykꞌantoj.
15 Sunil anma chiꞌekꞌto yul bꞌeh, kaw chispoqꞌ isqꞌabꞌ yilni Jerusalén,
chixubꞌli yu tzalahilal, chisbꞌilen iswiꞌ, chalni: «¿Ham huneꞌ konhobꞌ tiꞌ chal-laxi ta kaw nanxa islow iskꞌulchꞌanil,
yebꞌ xin ham yinh huneꞌ konhobꞌ tiꞌ bꞌay kaw chitzala konhobꞌla ay sat yibꞌanhqꞌinal tiꞌ?» xhi anma.
16 Sunil ebꞌnaj ayko ishowal teyinh hex ah Jerusalén, tzotel ebꞌnaj teyinh, kexisbꞌuchni ebꞌnaj,
isnhetxꞌla ye ebꞌnaj yu ishowal, yalni ebꞌnaj: «¡Wal tinanh kokꞌuxuꞌkanaytoj!
¡Yinh kaw yeli echmabꞌil huneꞌ tzꞌayik tiꞌ ju,
yajaꞌ wal tinanh maꞌapni huneꞌ tzꞌayik tiꞌ, kaw lanhan jilni!» xhi ebꞌnaj.
17 Haꞌ tzet nabꞌiltikꞌa yu Komam Jahawil, haꞌ iswatxꞌe,
yij isbꞌa istzotiꞌ Komam hunteqꞌan yalkano yettax kaw payat.
Yuchkꞌakanto Komam konhobꞌ Jerusalén, mach xin yaqꞌ nimankꞌulal yinh.
Haꞌ ebꞌnaj ayko ishowal yinh Jerusalén kaw chitzala ebꞌnaj yilni yuchkꞌalaxto Jerusalén,
yuto haꞌ Komam aqꞌni tzalaho ebꞌnaj;
yiqꞌnikanh yip ebꞌnaj ayko ishowal yinh Jerusalén yu Komam.
18 Hach konhobꞌ Sión awte Komam Jahawil tawinh yinh sunil hawanma.
¡Ekꞌojabꞌ yojomal yal hasat hakaꞌ ha haꞌ,
yu hawoqꞌ tzꞌayik aqꞌbꞌal! ¡Machojabꞌ chituk hawoqꞌi, machojabꞌ chixew isbꞌaqꞌ hasat yoqꞌi!
19 ¡Ahanhwanoj, elojabꞌ hawaw yet chiꞌichiko aqꞌbꞌal, oqꞌanh yinh sunil hawanma sata Komam Dios Jahawil!
Ekꞌojabꞌ yojomal yal hasat hakaꞌ ha haꞌ, akanh haqꞌabꞌ,
chaqꞌanni iskawil nixhte hawuninal lanhan iskam yu wahil yulajla iscallehal konhobꞌ.
20 Mam Jahawil, okanh tuknoj, chatxumni ta machi hunuxa mak chawute hakaꞌ tiꞌ.
¿Tom kꞌul iskꞌuxnayto ebꞌix miꞌe nixhte yunin pitzkꞌana yinh,
nixhte kaw xahan ay yu ebꞌix?
¿tom kꞌul ismaqꞌlaxkamo ebꞌyaꞌ hasacerdote yebꞌ ebꞌyaꞌ hachejabꞌ yul hawatut?
21 Haꞌ nixhte unin yebꞌ ichamta anma chimaqꞌlaxkamoj kat iskankano pakꞌno yulajla calla,
istejlaxkamo ebꞌix qꞌopotaj yebꞌ ebꞌnaj tzehtaj yu espada.
Hamaqꞌkano kamo anma ah Jerusalén yinh istzꞌayikal bꞌay tit hahowal,
aypaxo xin hahojkamoj, mach hawaqꞌ nimankꞌulal yinh.
22 Hawiti xiwkilal sunil bꞌayejtuꞌwal yinh Jerusalén hakaꞌta hawawteti yinh hunu qꞌinh.
Haꞌ yinh istzꞌayikal bꞌay tit hahowal Mam Wahawil,
machi hunu mak tiꞌ kolchahi, machi hunu itzitz kani.
¡Haꞌ mak waqꞌ chꞌibꞌojan inkuynihan, haꞌ ebꞌnaj ayko ishowal winhan,
haꞌ ebꞌnaj matanhtzenkaniloj!