Chikawxi iskꞌul konhobꞌ Sión ta chikol-laxilo yu iskꞌulchꞌanil iskꞌul Komam Dios
3
Hanintiꞌan, kaw xawilan isyaꞌtajil, kaw xakinekꞌ yaꞌan wijnihan tzꞌum yu ishowal Komam Jahawil.2 Kinyijbꞌatojan Komam, kinyinitojan xol qꞌejholo, maxhtaj xol sajilqꞌinal kinyitojan.
3 Yinh kaw yeli kaw aynhetikꞌakanh isqꞌabꞌ Komam winhan,
chanayo isyaꞌtajil wibꞌanhan sunilbꞌal tzꞌayik.
4 Mayaqꞌ ichambꞌolo Komam inchibꞌehalan yebꞌ istzꞌumal innimanilan,
haxa inbꞌajilan kaw qꞌahkanto yu Komam.
5 Hakaꞌta iswatxꞌe bꞌay chiyebꞌa isbꞌa wetan yaqꞌni howal winhan,
kinishoyayojan, yaqꞌni isyaꞌtajil yebꞌ munil wetan.
6 Kinyakojan xol qꞌejholo hakaꞌ kamom anma ayxa tiempo iskami.
7 Kinismajchehan, mach xin chu weltojan, kiniskalbꞌahan yu chꞌen cadena kaw al.
8 Waxanhka elwawan inqꞌannihan ta chikolwa winhan, wawihan yinh kaw ip,
yajaꞌ ismajche istxikin yunhe mach chabꞌe intxahan.
9 Ismajche inbꞌehan yu chꞌen nime chꞌen hosbꞌil, iskotxbꞌan inbꞌehan.
10 Lahan yute isbꞌa Komam winhan, hakaꞌ hunu noꞌ oso chiꞌelti lemna jinh,
yebꞌ hakaꞌ hunu noꞌ bꞌalam ebꞌabꞌil isbꞌa.
11 Iskotxbꞌa inbꞌehan, kinisxitnitojan, kinbꞌejlaxkanojan yu.
12 Iswatxꞌeko isbꞌaqꞌ islitꞌ, yilwenti islitꞌ tuꞌ winhan.
13 Haꞌ isbꞌaqꞌ islitꞌ low yinh inkꞌulan, kaw nahat to yich inlahwilalan.
14 Matxa tzet walilojan yul sat wet konhobꞌan, hunun tzꞌayik inbꞌuchlaxan.
15 Yaqꞌ Komam bꞌiskꞌulal wetan, hakaꞌta kinyukꞌtzekanhan yu kꞌahla vino.
16 Ismaqꞌilti wehan yet kinisqꞌojnayojan sat txꞌotxꞌ, istixhnayo pojoj wibꞌanhan.
17 Matxatikꞌa aqꞌankꞌulal yinh wanmahan, xaꞌinnahulnhetojan iskꞌulal.
18 Walnihan: «Wal tinanh mapaxkanilo wipan,
matanhkanilo iskawxi inkꞌulan yinh Komam Jahawil,» kinchihan.
19 Mamin, nati isyaꞌtajil chiwaqꞌletiꞌan yebꞌ inbꞌiskꞌulalan,
kaw kꞌah yelo wanmahan yu isyaꞌtajil.
20 Haꞌ hunteqꞌan tiꞌ, kaw aynhetikꞌako yinh innabꞌalan,
yuto kaw bꞌiskꞌulal yelo wanmahan yu.
21 Yajaꞌ ay huneꞌ tzet ye tuꞌ tiꞌ kaw chiꞌekꞌ yinh wanmahan,
haꞌ ton chiwechmahan.
22 Yu iskꞌulchꞌanil iskꞌul Komam Jahawil yuxin mach konhtanhkaniloj,
yuto maxhtikꞌa chitanh iskꞌulchꞌanil iskꞌul Komam.
23 Haꞌ iskꞌulchꞌanil iskꞌul kaw akꞌ hunun sakꞌayalil,
kaw nimankano yelapno Komam, yuto haꞌ tzet chala chiyij isbꞌa.
24 Haꞌ wanmahan chala: «Haꞌ Komam Jahawil inmajulan yekoj,
yuxin haꞌ yinh Komam chikawxi inkꞌulan,» xhi wanmahan.
25 Kaw kꞌul Komam Jahawil yinh makta chikawxi iskꞌul yinh Komam,
makta chisayni Komam yinh sunil yanma.
26 Kaw kꞌul jechman kolbꞌanile chiyaqꞌ Komam Jahawil,
yajaꞌ tonhe tukanonh matzet chijala.
27 Kaw kꞌul ta yinhtax istzehal naj winaj chiꞌichi yaqꞌni techaho naj isyaꞌtajil.
28 Hayet chiꞌay isyaꞌtajil yibꞌanh naj winaj, kꞌul ta chikan naj ischukil,
kat yok tuknoj yuto haꞌ Komam Dios chiꞌanayo isyaꞌtajil tuꞌ yibꞌanh naj.
29 Ayojabꞌ nhohno sat txꞌotxꞌ, chiyanayo istiꞌ xol pojoj,
chiyinayo isbꞌa, kꞌuxanta ayto iskolbꞌanil.
30 Yaqꞌabꞌiko issat tet mak chiyoche ispaqꞌalto issat,
yaqꞌabꞌ techahoj yet chibꞌuchlaxi.
31 Yuto Komam Jahawil, mach chonhisbꞌejkano yinh hunelnhe.
32 Hakaꞌtikꞌa chu yanayo isyaꞌtajil jibꞌanh, haktikꞌapax tuꞌ chu istzꞌay iskꞌul jinh,
yuto kaw nimankano iskꞌulal iskꞌul.
33 Yuto Komam Dios mach chitzalahi yet chaqꞌni isyaꞌtajil yebꞌ bꞌiskꞌulal tet anma.
34 Haꞌ Komam Dios Jahawil, mach chischah iswiꞌ ta chixanhlax qꞌaho anma ayikto yulaj preso.
35 Mach chischapaxo iswiꞌ Komam Dios,
Komam kaw niman yelapnoj ta chiꞌetalax hunu anma yinh sat.
36 Mach chischapaxo iswiꞌ Komam ta maxhtaj istoholal chiwatxꞌelax yinh hunu mak ayko yinh istoholal.
37 ¿Aymi hunu mak tiꞌ chalni hunu tzotiꞌ kat yijni isbꞌa tzet chal tuꞌ,
ta maxhtaj Komam Jahawil chejnhe huneꞌ tuꞌ?
38 ¿Tom maxhtaj Komam Jahawil kaw nimankano yelapnoj chiꞌaniti isyaꞌtajil yebꞌ iskꞌulal?
39 ¿Tzet yinh xin chiyiqꞌ bꞌiskꞌulal anma itzitz sat yibꞌanhqꞌinal tiꞌ yu ej isyaꞌtajil chiꞌay yibꞌanh?
Wal xin yiqꞌabꞌ bꞌiskꞌulal yu ismul.
40 Kotxumuꞌ yinh sikꞌlebꞌil hanikꞌ jeko yinh kobꞌeybꞌal,
kosayaꞌwe Komam Jahawil, kat komeltzoko yul isqꞌabꞌ.
41 Jaqꞌaꞌwekanh koqꞌabꞌ kat kotxahli yinh sunil janma tet Komam Dios ay satkanh, chijalni:
42 «Mamin, hanhonhtiꞌanh jako komulanh, komanhkꞌonanh tzet hawala,
yuxin mach hawaqꞌ nimankꞌulal jinhanh.
43 Hawayo hahowal jibꞌanhanh, konhhatzumbꞌenikꞌojanh,
konhhamaqꞌkamojanh, mach xin hawaqꞌ nimankꞌulal jinhanh.
44 Hahoybꞌako moyan tawinh, yunhe mach chiꞌapni kotxahanh tasataj.
45 Konhawakanikojan yinh txꞌixwilal,
konhayahnikanojan xol ej konhobꞌ,» chijalni.
46 Haꞌ ebꞌnaj ayko ishowal jinhanh ishaj ebꞌnaj istiꞌ konhisbꞌuchnihanh.
47 Hawaqꞌ xiwkilal jetanh, hawanayo latzꞌabꞌ kosatajanh,
hawanayo isyaꞌtajil jibꞌanhanh, konhhatanhtzenkanilojanh.
48 Haꞌ yal insatan chiꞌel yu woqꞌan yu bꞌiskꞌulal yinh inkonhobꞌan,
kaw lahanxa hakaꞌ ha haꞌ chiꞌekꞌ yojomal.
49 Kaw mach chitanh yay yal insatan,
yuto mach chiꞌekꞌ ismul wilnihan isyaꞌtajil.
50 Chinbꞌejan woqꞌan, masanta chonhyilayti Komam Jahawil satkanh.
51 Kaw chinoqꞌan yebꞌ xin kaw bꞌiskꞌulal ye wanmahan wilnihan yay isyaꞌtajil yibꞌanh ebꞌix ix wet konhobꞌan.
52 Haꞌ ebꞌnaj ayko ishowal winhan,
kinislitꞌnhehan ebꞌnaj hakaꞌ chiꞌutelax noꞌ chꞌik,
yajaꞌ xin machi inmulan tet ebꞌnaj.
53 Itzitz hinan, kiniskꞌalbꞌanan ebꞌnaj,
kinyanaytojan ebꞌnaj yul huneꞌ kꞌuh, yaniko ebꞌnaj chꞌen chꞌen ismajiloj.
54 Kinmujikantojan yalanh ha haꞌ, ham tuꞌ kinkaman walnihan.
55 Mam Jahawil, kinawihan tawet,
kach wawtenan yul preso kaw nahat yehayto yich.
56 Hawabꞌen yul innuqꞌan, mach hamajche hatxikin yet wawihan tawet yet kaw chiꞌah inkꞌulan yu bꞌiskꞌulal.
57 Kach hitziko inkꞌatanhan yinh istzꞌayikal yet kach wawtenan,
hawalni wetan: «Mach chaxhxiwi,» kachi.
58 Mam Jahawil, hakol wanmahan, kinhakolnihan yul isqꞌabꞌ kamikal.
59 Mam Jahawil, hach tiꞌ hawil istxꞌojal watxꞌelax winhan,
kolinan Mamin, chawatxꞌen istoholal winhan.
60 Hawil sunil tzet aqꞌlax ispajo wetan, hawohta sunil tzet nahlax winhan.
61 Mam Jahawil, xahawabꞌe isbꞌuchwa ebꞌnaj winhan,
hach hawohta sunil istxꞌojal tzet chisnako ebꞌnaj winhan.
62 Hawohtapaxo tzotiꞌ chihal-lax winhan yu ebꞌnaj ah lemna winhan;
sunilbꞌal tzꞌayik txꞌoj istzotel ebꞌnaj winhan.
63 Hach hawohtaj yet chiꞌay tzꞌonhno ebꞌnaj yebꞌ yet chiꞌahwano ebꞌnaj,
chinyaqꞌni bꞌinahojan ebꞌnaj yinh isbꞌit, chinistzeyenan ebꞌnaj.
64 Mam Jahawil, pajtze tet ebꞌnaj hakaꞌtikꞌa tzet iswatxꞌe ebꞌnaj winhan.
65 Aqꞌ, kawbꞌolo yanma ebꞌnaj, aykꞌayojabꞌ hatzꞌaktiꞌ yibꞌanh ebꞌnaj.
66 Tzumbꞌekꞌo ebꞌnaj yinh sunil hahowal.
Tanhtzelo ebꞌnaj yul yibꞌanhqꞌinal yalanh satkanh tiꞌ.