4 Wilnihan istit huneꞌ niman howla jaqꞌeqꞌ yinh yetkꞌulal norte yebꞌ huneꞌ niman moyan ayko qꞌa qꞌaꞌ yinh, xanhe chitzejla yinhla ishoyanil, haxa xolbꞌal huneꞌ moyan bꞌay ayko qꞌa qꞌaꞌ tuꞌ wilan huneꞌ tzet ye tuꞌ kaw chijepla hakaꞌ chꞌen bronce chitzejtzoni.^b 5 Haxa xolbꞌal huneꞌ qꞌaꞌ tuꞌ wilan yechel kanhwanh ebꞌnaj hakaꞌ jilni anma. 6 Hunun ebꞌnaj tuꞌ ay kanhebꞌ sat yebꞌ kanhebꞌ xikꞌ. 7 Wal yoj ebꞌnaj kaw tohol, haxa ispaqꞌanil yoj ebꞌnaj lahan hakaꞌ yisqꞌaj yoj wakax, chitzejla yinh ebꞌnaj, hakaꞌ chꞌen bronce kaw nhijbꞌililo istzꞌilal. 8 Aypaxo kanhebꞌ isqꞌabꞌ ebꞌnaj hakaꞌ isqꞌabꞌ anma, ayko yinh iskanhebꞌal isqꞌaxqꞌepal isnimanil yalanh isxikꞌ, kanhebꞌ issat ebꞌnaj yebꞌ kanhebꞌpaxo isxikꞌ ebꞌnaj. 9 Haꞌ isxikꞌ ebꞌnaj chischale isbꞌa hunun, hayet chibꞌelwi ebꞌnaj machi meltzo ebꞌnaj yintaj, wal xin satanhetikꞌa ebꞌnaj chibꞌelwi. 10 Haꞌ issat ebꞌnaj tuꞌ hak tiꞌ jilni hakaꞌ tiꞌ: Haꞌ sataj, sat winaj jilni, haxa yinh iswatxꞌ, sat bꞌalam jilni, haxa yinh ismek, lahan jilni hakaꞌ sat wakax, haxa yintaj, lahan jilni hakaꞌ sat noꞌ tꞌiw. 11 Hak tuꞌ jilni sat ebꞌnaj tuꞌ. Haꞌ hunun ebꞌnaj tuꞌ leyankanh kabꞌebꞌ isxikꞌ ebꞌnaj, chischalen isbꞌa hunun, haxa kabꞌebꞌxa isxikꞌ ebꞌnaj xin haꞌ ayko yenhelo isnimanil. 12 Kaw tohol isbꞌelwi hunun ebꞌnaj sataj bꞌay chiꞌijbꞌalaxto ebꞌnaj yu Yespíritu Komam Dios; hayet chibꞌelwito ebꞌnaj tuꞌ matxa chimeltzo ebꞌnaj yintaj. 13 Haꞌ xol ebꞌnaj tuꞌ ay huneꞌ tzet ye tuꞌ tiꞌ lahan jilni hakaꞌ tzaqꞌaqꞌ kaw kaj txaltxonhe qꞌaꞌ yinh, yebꞌ xin lahan jilni hakaꞌ tzejtah ayko qꞌaꞌ yinh chꞌekꞌ xolbꞌal ebꞌnaj, haꞌ huneꞌ qꞌaꞌ tuꞌ kaw toxanhe chitzejlahi, kat yelti kꞌuh chijepla xol. 14 Haꞌ huneꞌ qꞌa tuꞌ kaw yinh anhe chiꞌekꞌi, kat ismeltzo hakaꞌ yekꞌ isjepla kꞌuh.

15 Hayet wilnihan ebꞌnaj tuꞌ, wilnihan sat txꞌotxꞌ, ayko hunun hakaꞌ jilni rueda isqꞌaxqꞌep hunun ebꞌnaj kanhwanh tuꞌ. 16 Haꞌ hunteqꞌan rueda tuꞌ lahannhe jilni, yebꞌ xin kaw chitzejla hakaꞌ chꞌen crisólito, hakaꞌtanhe xin ay hunteqꞌanxa rueda ayikto yul hunteqꞌan rueda tuꞌ. 17 Hayet chibꞌelwi chisje isbꞌelwi yinh iskanhebꞌ isqꞌaxepal iskꞌul, mach yilalo chismeltzo isbꞌa. 18 Haꞌ isarohal hunteqꞌan rueda tuꞌ kaw nahat yekanh, kaw chonhxiw jilni, ay xin isbꞌaqꞌ sat yinhla ishoyanil iskanhebꞌal.

19 Hayet chibꞌelwi ebꞌnaj, kat isbꞌelwipaxo hunteqꞌan rueda tuꞌ yebꞌ ebꞌnaj, hayet chiꞌah ebꞌnaj sat txꞌotxꞌ, kat yahpaxo hunteqꞌan rueda tuꞌ sat txꞌotxꞌ. 20 Haꞌ ebꞌnaj tuꞌ chito ebꞌnaj bꞌay chiꞌilaxto yu Yespíritu Komam Dios, hakpax tuꞌ xin hunteqꞌan rueda tuꞌ, chitopaxo yinta ebꞌnaj, yuto haꞌ yespíritu ebꞌnaj ayko yinh hunteqꞌan rueda tuꞌ. 21 Hayet chiꞌekꞌ ebꞌnaj, kat yekꞌ hunteqꞌan rueda tuꞌ, haxa yet chiꞌok linhno ebꞌnaj, kat yokpaxo linhnoj. Hakpax tuꞌ xin yet chiꞌah ebꞌnaj sat txꞌotxꞌ chiꞌahpaxo hunteqꞌan rueda yinta ebꞌnaj, yuto haꞌ yespíritu ebꞌnaj ayko yinh hunteqꞌan rueda tuꞌ.

22 Haꞌ yibꞌanh iswiꞌ ebꞌnaj tuꞌ ay huneꞌ tzet ye tuꞌ leyantoj, xanhe chitzejtzoni hakaꞌ chꞌen cristal, kaw kꞌulchꞌankano jilni. 23 Haꞌ yalanh huneꞌ leyanto hakaꞌ jilni chꞌen cristal tuꞌ, kaw tohol chiyutekanh ebꞌnaj xikꞌ, chischalen isbꞌa xikꞌ ebꞌnaj, haxa kabꞌebꞌxa xikꞌ haꞌ ayko yenhelo isnimanil. 24 Hayet chiꞌekꞌ ebꞌnaj kaw chibꞌili xikꞌ ebꞌnaj hakaꞌ ishaxon haꞌ nime haꞌ, hakaꞌ yul isnuqꞌ Komam Dios sunil chisje yu, lahanpaxo jabꞌen hakaꞌ iswejcha hunbꞌulan anma, yebꞌ xin hakaꞌ isbꞌili yekꞌ hunbꞌulan ebꞌnaj soldado. Hayet chꞌok linhno ebꞌnaj tuꞌ chiyinayo ebꞌnaj xikꞌ.

25 Hayet chꞌok linhno ebꞌnaj kat yinayo ebꞌnaj isxikꞌ tuꞌ, chꞌabꞌelax huneꞌ yul nuqꞌe chiꞌelti yibꞌanh huneꞌ hakaꞌ cristal leyanto yibꞌanh iswiꞌ ebꞌnaj. 26 Haꞌ yibꞌanh huneꞌ hakaꞌ cristal leyanto yibꞌanh iswiꞌ ebꞌnaj, wilan huneꞌ yechel tzꞌonhobꞌal hakaꞌ jilni chꞌen zafiro, haꞌ yul huneꞌ yechel tzꞌonhobꞌal tuꞌ tzꞌonhan huneꞌ mak hakaꞌ anma jilni. 27 Haꞌ huneꞌ mak tzꞌonhan tuꞌ haꞌ yikta isnimanil chiꞌichiko yinh yiktaj masanta yinh iswiꞌ, xanhe chitzejtzoni hakaꞌ chꞌen bronce, haxa yiktaxa isnimanil chiꞌichiko yinh yiktaj masanta chiꞌayilo yinh yoj, lahan jilni hakaꞌ qꞌa qꞌaꞌ kaw kaj txaltxonhe, haxa yinhla ishoyanil xanhe chitzejtzoni. 28 Hakaꞌ jilni yelawil noꞌ chꞌer yet chaqꞌni haꞌ nhabꞌ, hak tuꞌ jilni yelawil yinhla ishoyanil. Hak tuꞌ yu wilnihan isqꞌaqꞌal ismay Komam Jahawil.

Hayet wilnihan isqꞌaqꞌal ismay, way jahnojan, way xulnojan sat txꞌotxꞌ, wabꞌenan yul isnuqꞌ huneꞌ mak chitzoteli.