3 Yalni: «Hach iskꞌahol naj winaj, hanintiꞌan chachinchejtojan xol ebꞌnaj hawet konhobꞌ Israel, haꞌ hunteqꞌan anma tuꞌ kaw mach yijemoj, ok manhkꞌomal, hakaꞌtikꞌa ismanhkꞌomal yichmam ebꞌnaj wetan payxa, hak tuꞌ ismanhkꞌomal ebꞌnaj wetan tinanh. 4 Hanintiꞌan chachwatojan xol ebꞌnaj uninale kaw lutꞌkanoj, yebꞌ kaw kawkano yanma, chawalni tet: “Hak tiꞌ yalni Komam Jahawil wetan,”^a kachi tet ebꞌnaj. 5 Ta chabꞌeto ebꞌnaj tzet chawala maka machoj yilal hawalni, yuto haꞌ hunteqꞌan anma tiꞌ kaw manhkꞌomkanoj, yajaꞌ xin chisnati ebꞌnaj yet bꞌaqꞌinh ta inchejan inchejabꞌan xol ebꞌnaj. 6 Hach iskꞌahol naj winaj, mach chaxhxiw tet anma tuꞌ, matzet chal hakꞌul yinh tzet chal ebꞌnaj tawet, waxanhka hakaꞌta xol teꞌ txꞌix yebꞌ xol noꞌ kꞌolotx ayach, matzet chal hakꞌul. Mach chaxhxiw yinh tzet chal ebꞌnaj tawet, mach chaxhxiwpaxo tet ebꞌnaj, yuto haꞌ hunteqꞌan anma tuꞌ kaw manhkꞌomkanoj. 7 Yuxin yilal hawalni intzotiꞌan tet anma tuꞌ, ta chabꞌe maka machoj, yuto kaw hip yinh hunelnhe. 8 Yajaꞌ wal hach tiꞌ, hach iskꞌahol naj winaj, abꞌe tzet chiwalan tawet, mach manhkꞌomo chawute habꞌa hakaꞌ hunteqꞌan anma tuꞌ. Kꞌabꞌkanh hatiꞌ kat halonayto tzet chiwaqꞌan tawet,» xhi Komam wetan.

9 Lahwi tuꞌ wilnihan huneꞌ qꞌabꞌe, bꞌatxanti yinh insatan, iqꞌbꞌil huneꞌ hum chulbꞌilayo yul isqꞌabꞌ. 10 Isholnito huneꞌ hum tuꞌ yinh insatan. Haꞌ huneꞌ hum tuꞌ tzꞌibꞌnhebꞌil yul yebꞌ yintaj. Haꞌ yinh huneꞌ hum tuꞌ tzꞌibꞌnhebꞌilayo bꞌiskꞌulal, isyaꞌtajil, yebꞌ oqꞌil.