3
Yalni wetan: «Hach iskꞌahol naj winaj, loto huneꞌ hum ayko tasata tiꞌ, kat hato hawalno hunteqꞌan tzotiꞌ tiꞌ tet anma Israel,» xhi wetan. 2 Inkꞌabꞌnikanh intiꞌan, yaqꞌni Komam huneꞌ hum tuꞌ inlobꞌoꞌan.3 Yalnipaxo wetan: «Hach iskꞌahol naj winaj, bꞌiqꞌayto huneꞌ hum chiwaqꞌan halobꞌ tiꞌ, kaw kamojabꞌ chinoh hakꞌul,» xhi wetan. Hak tuꞌ yu inlonitojan, kaw chiꞌeliko yul intiꞌan yu, hakaꞌ ischiꞌal noꞌ kabꞌ.
4 Yalnipaxo wetan: «Hach iskꞌahol naj winaj, Asiꞌ xol hawet konhobꞌ Israel, kat hawalni tzotiꞌ chiwalan tawet tet ebꞌnaj, 5 yuto mach chachinchejtojan xol anma yaꞌtaj isnachalo yabꞌxubꞌal hawu, wal xin xol hawet konhobꞌ Israel, chachinchejtojan. 6 Mach chachinchejtojan bꞌey hunu niman konhobꞌ bꞌay kaw ay txꞌiꞌal anma yaꞌta istxumchalo yabꞌxubꞌal hawu, yajaꞌ ta chachinchejtojan xol anma tuꞌ, chimyabꞌe ebꞌnaj tzet chawala. 7 Yajaꞌ wal hawet konhobꞌ Israel tuꞌ mach chiyoche yabꞌeꞌ tzet chawala, yuto mach choche yabꞌeꞌ tzet chiwalan; yuto mach chibꞌili sat yinh tzet chiwalan, yebꞌ xin kaw kaw yanma. 8 Haninan chiwaqꞌ howbꞌojan hasat yinh sat ebꞌnaj, yebꞌ xin kaw kaw chawute habꞌa sata ebꞌnaj. 9 Ekꞌna kaw pehponhe chiwutehan hapalanh hakaꞌ chꞌen diamante. Yuxin matzet chal hakꞌul, yebꞌ xin mach chaxhxiw sata ebꞌnaj, yuto haꞌ ebꞌnaj Israel tuꞌ kaw hip ebꞌnaj,» xhi Komam wetan.
10 Yalnipaxoj wetan: «Hach iskꞌahol naj winaj, kaw kam chawabꞌe tzet chiwalan tawet, chakꞌubꞌan sunil intzotiꞌan yul hawanma. 11 Chaxhto hawalaꞌ intzotiꞌan tet hawet konhobꞌ ayko preso, ta chabꞌe ebꞌnaj maka machoj, yilal hawalni hakaꞌ tiꞌ: “Hak tiꞌ yalni Komam Dios, Jahawil,” kachi,» xhi Komam.
12 Kinyinikanhan Yespíritu Komam Dios, wabꞌenan huneꞌ yul nuqꞌe awi yinh kaw ip, wintajan, yalni: «Hal-laxojabꞌ kꞌul-la tzotiꞌ yinh Komam Jahawil bꞌay aya, Komam kaw aykano ismay isqꞌaqꞌal,» xhi. 13 Wabꞌenpaxojan isbꞌili xikꞌ ebꞌnaj hakaꞌ anma tuꞌ yet chischalen isbꞌa, yebꞌ isbꞌili hunteqꞌan rueda ayko sata ebꞌnaj, kaw aykano ismay isnhirnhoni. 14 Kinyinikanhan Yespíritu Komam Dios, kinyinitojan. Hayet intohan kaw bꞌiskꞌulal yehilo wanmahan, yebꞌ xin kaw ayti inhowalan, yajaꞌ kaw ip ay isqꞌabꞌ Komam Jahawil wibꞌanhan. 15 Wapnihan xol wet konhobꞌan ayko preso bꞌey Tel-abib ay istiꞌ haꞌ Quebar, way tzꞌonhnojan bꞌay tzꞌonhan ebꞌnaj, wokan yinh kꞌaykꞌulal matxa chinawi wuhan tzet chiwalan, inkankanojan hujebꞌ tzꞌayik xol ebꞌnaj.
Alaxiko yaꞌ Ezequiel majwawomal xol anma Israel
16 Haxa yet yekꞌto hujebꞌ tzꞌayik tuꞌ xin, yul istzotiꞌ Komam Jahawil wetan, yalni hakaꞌ tiꞌ: 17 «Hach iskꞌahol naj winaj, haninan chaxhwakojan majwawomal xol anma Israel, hayet chiwalnihan huneꞌ tzet ye tuꞌ tawet yilal hawalnilo tet konhobꞌ tiꞌ yunhe yohtanheniloj. 18 Hayet chiwalnihan tet anma txꞌoj isbꞌeybꞌal ta chitit kamikal yibꞌanh yu istxꞌojal, yajaꞌ wal hach xin ta matzet chawal tet, yebꞌ xin mach chachkachwa yinh yunhe isbꞌejni iswatxꞌen istxꞌojal, hak tuꞌ xin ay iskawil; haꞌ huneꞌ mak tuꞌ chikam yu ismul, yajaꞌ iskamikal naj tuꞌ xin chiwakojan tawibꞌanh. 19 Yajaꞌ ta chachkachwa yinh mak chiwatxꞌen istxꞌojal, yajaꞌ ta mach isbꞌej iswatxꞌen istxꞌojal, machi xin chishel isbꞌeybꞌal, haꞌ huneꞌ mak tuꞌ chikam yu ismul, yajaꞌ hach xin matxa hawok yinh iskamikal, yuto kaxhkachwa yinh.
20 »Ta ay hunu mak chitikꞌa iswatxꞌe istoholal, yajaꞌ ta chispohilo isbꞌa yinh istoholal, kat iswatxꞌenpaxo istxꞌojal, chiwanikojan hunu tzet bꞌay chitxaqꞌmohi; haꞌ huneꞌ mak tuꞌ chitit kamikal yibꞌanh, yuto mach kach kachwa yinh. Matxa xin chinnatijan iskꞌulal iswatxꞌe yet yalanhtokano tuꞌ, chikam naj yu ismul; yajaꞌ haꞌ iskamikal huneꞌ mak tuꞌ tawibꞌanh chitokanoj yuto mach kaxhkachwa yinh. 21 Yajaꞌ ta chakach mak chitikꞌa isbꞌeybꞌalnhe istoholal yunhe mach chako ismul, mach xin chako ismul, haꞌ huneꞌ mak tuꞌ yinh kaw yeli ay isqꞌinal yuto kaxhkachwa yinh, wal hach tiꞌ xin hakolilo habꞌa,» xhi Komam wetan.
Yaꞌ Ezequiel matxa yu istzotel yaꞌ hanikꞌ tiempo
22 Hayet ayinan bꞌey tuꞌ yanayo Komam Jahawil isqꞌabꞌ wibꞌanhan, yalni wetan: «Ahanhwanoj kat hawelto yintalto konhobꞌ, haꞌ tuꞌ chintzotelan tawet,» xhi Komam. 23 Wahwanojan, weltojan yintalto konhobꞌ, wilnihan isqꞌaqꞌal ismay Komam Jahawil bꞌey tuꞌ, hakaꞌ isqꞌaqꞌal ismay wilan bꞌey istiꞌ haꞌ Quebar. Hayet wilnihan isqꞌaqꞌal ismay Komam tuꞌ, way jahnojan, way xulnojan sat txꞌotxꞌ.
24 Yinhnhena tuꞌ yul Espíritu winhan, yaqꞌni yip wojan inlinhbꞌan hinbꞌahan, istzotel Komam wetan hakaꞌ tiꞌ: «Asiꞌ kat hamajchen habꞌa yul hawatut. 25 Hach iskꞌahol naj winaj, hach tiꞌ chachkꞌalbꞌalaxayo yu txꞌanh lasu yul hawatut, hak tuꞌ xin mach chu hawelto xol hawet konhobꞌ. 26 Yebꞌpaxo xin chꞌahkanto lakꞌno hawaqꞌ yul ishomal hatiꞌ wuhan; hak tuꞌ xin matxa chu hatzoteli, yunhe matxa chu hakachni hunteqꞌan anma tiꞌ; anma kaw manhkꞌomkano, kaw hip yinh hunelnhe. 27 Yajaꞌ hayet chintzotelan tawet hunelxa, chaxhwaqꞌni tzotelojan, kat hawalni tet anma tiꞌ: “Hak tiꞌ yalni Komam Dios, Jahawil,” kachi. Haꞌ mak choche yabꞌeꞌ, yabꞌehabꞌi; haxa mak mach choche yabꞌeꞌ, machojabꞌ chabꞌe, yuto haꞌ hunteqꞌan anma tiꞌ kaw manhkꞌomtikꞌa,» xhi Komam.a