2. TZOTIꞌ YAL KOMAM DIOS YIBꞌANHILO YAYKꞌAYKANO JERUSALÉN
(4:1–24:27)
Yechel yaykꞌaybꞌanil konhobꞌ Jerusalén
4
Yalni Komam wetan: «Hach iskꞌahol naj winaj, iti hunu txꞌotxꞌ lokꞌ, chawanayo txꞌotxꞌ yinh hasat, chatzꞌibꞌnhenayo yechel konhobꞌ Jerusalén yibꞌanh txꞌotxꞌ. 2 Chahoybꞌaniko yechel ebꞌnaj soldado iqꞌbꞌil ischꞌen yet howal yinhla ishoyanil, chawanayo campamento sataj, chawanayo chꞌen ariete chiꞌuchkꞌanto chꞌen kꞌubꞌ yinhla ishoyanil. 3 Chawiniti hunu chꞌen lamina kaw pim, chawaniko chꞌen haxolbꞌal yebꞌ konhobꞌ, yechelo chꞌen kꞌubꞌ chukoj, kat hawok sata konhobꞌ tuꞌ, hakaꞌto chawako howal yinh. Haꞌ huneꞌ tiꞌ yechelnhe chiwaqꞌan tet anma Israel yinh tzet chu yuchkꞌalaxto konhobꞌ Jerusalén.a4 »Lahwi tuꞌ kat haway hilno yinh yetkꞌulal hamekqꞌabꞌ, hak tuꞌ chu yaykꞌay ismul konhobꞌ Israel tawibꞌanh. Haꞌ yulbꞌal tzꞌayikal chachway yinh yetkꞌulal hamekqꞌabꞌ tuꞌ, chiꞌay ismul anma Israel tawibꞌanh. 5 390 tzꞌayik chiyu hun tuꞌ, chal yelapnoj; hunun tzꞌayik yinh hunun habꞌil chiyabꞌe anma Israel isyaꞌil yu ismul.
6 »Hayet xaꞌekꞌto hunteqꞌan tzꞌayik tuꞌ xin, kat hawaypaxo yinh yetkꞌulal hawatxꞌqꞌabꞌ yulbꞌal 40 (kawinaj) tzꞌayik, hak tuꞌ chu yaykꞌaypaxo ismul anma ah Judá tawibꞌanh, hunu tzꞌayik yinh hunun habꞌil chiyabꞌe anma isyaꞌilal yu ismul. 7 Chaxhoktꞌanhno yinh yechel konhobꞌ Jerusalén bꞌay hoyaniko ebꞌnaj ayko ishowal yinh, chabꞌalnikanh isqꞌabꞌ hakamixh, hak tuꞌ chu hawinilo yenhel haqꞌabꞌ, kat hawichiko hawalni tzotiꞌ chiwalan tawet yinh konhobꞌ Jerusalén. 8 Hakaꞌto chaxhinkꞌalayojan yu lasu, mach chu hameltzon habꞌa, masanto chitzꞌajna istzꞌayikal bꞌay chawabꞌe isyaꞌtajil.
9 »Chawinito ixim trigo, ixim cebada, teꞌ habas, teꞌ hakaꞌ hubꞌal, yebꞌ teꞌ avena, soman chu yayto yul hunu xi, haꞌ xin chawatxꞌe halobꞌ. Haꞌ hunteqꞌan tuꞌ chaloh yulbꞌal hilan hach yinh yetkꞌulal hamekqꞌabꞌ yulbꞌal 390 tzꞌayik. 10 Yiktanhe libra yalil tzet chaloh yinh hunun tzꞌayik, yebꞌ xin aynhe yorahil bꞌay chachwaꞌi. 11 Chimalelaxpax ha haꞌ chawukꞌu, yiktanhe litro haꞌ chawukꞌ hunun tzꞌayik, yebꞌ xin aynhe yorahil bꞌay chawukꞌ haꞌ. 12 Chawatxꞌe hapan cebada, chaqꞌantzen xol qꞌaꞌ yinh sat anma, yajaꞌ haꞌ istzaꞌ anma chiꞌokniko siꞌal hawu,» xhi Komam.
13 Yalnipaxo Komam Jahawil: «Chaloh hunteqꞌan itah tzꞌil, yu hayeni sata anma Israel ta haꞌ itah tzꞌil chislo xolaj anma ay yulajla nimeta konhobꞌ bꞌay chiwaqꞌ sajlemotojan anma,» xhi Komam.
14 Intaqꞌwihan tet Komam: «Mamin, Dios Wahawil, hanintiꞌan mach tzꞌilo wanmahan, yinhtax intzehalan masanta tinanh, maxhto hunelo tiꞌ xaꞌinkꞌuxan ischibꞌehal no noqꞌ tonhe chikamkanh, maka ischibꞌehal noꞌ chixitlaxkamo yu no noqꞌ, maxhto hunel tiꞌ xaꞌinkꞌuxan ischibꞌehal no noqꞌ mach sajo hakaꞌ yalni ley,» kinchihan.
15 Istaqꞌwi Komam wetan: «Ta hak tuꞌ, chisje yokniko istzaꞌ noꞌ wakax siꞌal hawu selelo istzaꞌ anma chal tuꞌ, yet chatahtzen tzet chaloh,» xhi wetan.
16 Tzujan tuꞌ, yalnipaxo Komam: «Hach iskꞌahol naj winaj, haninan chiwayojan wahil yibꞌanh anma ay bꞌey Jerusalén, haꞌ tzet chislo hunun tzꞌayik chimalelaxi, kaw chꞌekꞌyaꞌ yu isyaꞌtajil, hakpax tuꞌ ha haꞌ chukꞌ anma, yinh mal chꞌaqꞌlax haꞌ tet, kaw xin yinh xiwkilal chiyu yukꞌni haꞌ. 17 Hayet chiyaqꞌlen anma wahil yebꞌ tajintiꞌal, chilatꞌanhxiko yinh sat hunun yinh xiwkilal, kat istanhkanilo yu ismul,» xhi Komam.