5
Yalnipaxo Komam Jahawil wetan: «Hach iskꞌahol naj winaj, iti hunu chꞌen cuchillo kaw ay ye, yebꞌ hunu chꞌen navaja chiꞌokniko yu ebꞌnaj chiꞌinilo xil wiꞌe, chakꞌupnilo xil hawiꞌ yebꞌ xin xil hatiꞌ. Lahwi tuꞌ chawiniti hunu malbꞌal, chamalen xil hawiꞌ tuꞌ, ox majan chawute hamaleni. 2 Chanhusni huneꞌ majan xil hawiꞌ yul yiktabꞌanil konhobꞌ Jerusalén yet xatanh yalaxiko howal yinh Jerusalén, haxa hunxa majan xil hawiꞌ, chakꞌupayo yu chꞌen espada yinhla ishoyanil konhobꞌ, haxa hunxa yox majan, chatixhkanh xol jaqꞌeqꞌ. Hanintiꞌan chiwitijan chꞌen espada yinh anma ah Jerusalén tiꞌ. 3 Chasikꞌniti hanikꞌo xil hawiꞌ tuꞌ, chaximniko yinh istiꞌ xil haqꞌap. 4 Lahwi tuꞌ, chawinilo hanikꞌo xil hawiꞌ ximbꞌiliko yinh istiꞌ xil haqꞌap, chanhusnito xol qꞌaꞌ, hak tuꞌ chu yelti xaj qꞌa qꞌaꞌ, kat isto qꞌaꞌ yinh sunil konhobꞌ Israel,» xhi Komam.5 Hak tiꞌ chu yalnipaxo Komam Dios Jahawil: «Haꞌ xil hawiꞌ hakꞌupiloj, yechel Jerusalén yehi, haꞌ Jerusalén wakojan yiktabꞌanil nimeta konhobꞌ, hoybꞌilayo yu nimeta konhobꞌ ay sat txꞌo txꞌotxꞌ tiꞌ. 6 Yajaꞌ xin ismanhkꞌo anma ah Jerusalén inleyan yebꞌ chejbꞌanile waqꞌan tet, kaw xin ekꞌna txꞌoj isbꞌeybꞌal sata anma ay yulajla nimeta konhobꞌ, yebꞌ anma ay yulajla konhobꞌ ayko yinhla ishoyanil, yuto haꞌ anma ah Jerusalén yintanhekanilto inleyan yebꞌ chejbꞌanile waqꞌan tet, hak tuꞌ xin mach isbꞌeybꞌalnhe,» xhi Komam.
7 Yuxin hak tiꞌ yalni Komam Jahawil hakaꞌ tiꞌ: «Hex ah Jerusalén, kaw ekꞌna hemanhkꞌomal sata anma ay yulajla nimeta konhobꞌ ayko yinhla hehoyanil, mach hebꞌeybꞌalnhe chejbꞌanile waqꞌan teyet, mach hekꞌubꞌapaxo inleyan. Mach xin heyijepaxo isleyal nimeta konhobꞌ ayko yinhla hehoyanil.
8 »Yuxin hanin Yahawilintiꞌan, haninan, chiwalan: Hanintiꞌan chinokan howal teyinh hex ah Jerusalén. Hoꞌ, haninan chiwayojan isyaꞌtajil texol yinh sat anma ay yul nimeta konhobꞌ. 9 Haꞌ isyaꞌtajil chiwayojan teyibꞌanh yu isyahbꞌetajil chewatxꞌe maxhto hunelo tiꞌ xayuhi, yebꞌ xin matxa bꞌaqꞌinhal chiwatijan yet chilahwi yaykano teyibꞌanh. 10 Haꞌ texol hex ah Jerusalén, chiskꞌuxayto ebꞌnaj mame yebꞌ ebꞌix miꞌe yuninal, haxa ebꞌnaj uninale, chiskꞌuxayto ebꞌnaj ismam yebꞌ ismiꞌ. Chiwayojan isyaꞌtajil teyibꞌanh, haxa mak chikankano texol chisajlemito wuhan yulaj konhobꞌ sunil bꞌayejtuꞌwal. 11 Hanin Dios Yahawilintiꞌan, itzitz hinan, yinh kaw yeli chiwalan, hex tiꞌ heyilo ispixan watutan yu sunil hunteqꞌan isyahbꞌetajil hewatxꞌe, yuxin chiwayojan isyaꞌtajil teyibꞌanh, matxa chiwaqꞌ nimankꞌulalan teyinh, mach xin chitzꞌaypaxo inkꞌulan teyinh. 12 Huneꞌ yox majan hex ah Jerusalén chexkam yul hekonhobꞌ yu howla yabꞌil, yebꞌ yu wahil. Haxa hunxa yox majan hex xin chexpotxꞌlaxkamo yu espada yinhla ishoyanil konhobꞌ, haxa hunxa yox majan hex xin chexsajlemito wuhan yulaj konhobꞌ, sunil bꞌayejtuꞌwal, yajaꞌ xin chinok tzujnojan teyintaj yebꞌ chꞌen espada.
13 »Chiyij isbꞌa wanayojan inhowalan yibꞌanh ebꞌnaj ah Jerusalén, chiwanayojan isyaꞌtajil yibꞌanh katto wokan yinh aqꞌankꞌulal. Hayet chiyijni isbꞌa yay inhowalan yibꞌanh ebꞌnaj, chiyohtanhenilo ebꞌnaj ta hanin Yahawilintiꞌan walan hunteqꞌan tiꞌ yu sunil hinhowalan, yuto xahan ay ebꞌnaj wuhan.
14 »Kaw chitzꞌinhzꞌonkano konhobꞌ Jerusalén wuhan, kat yokkano yinh txꞌixwilal sata anma ay yulaj konhobꞌ ayko yinhla ishoyanil yebꞌ yinh sat sunil makta chꞌekꞌto iskawilal Jerusalén. 15 Haꞌ Jerusalén kaw chibꞌuchlaxi, kat istzeyelaxi yet chiwanayojan isyaꞌtajil yibꞌanh yet chitit inhowalan yinh. Haꞌ huneꞌ tiꞌ chiwaqꞌan yilaꞌ anma ayko yinhla ishoyanil, yu yaqꞌni yul iswiꞌ, kat isxiwkanh yilni. Hanin Yahawilintiꞌan, hankawinan chiwalan hunteqꞌan tiꞌ. 16 Haninan chiwatojan wahil texol hex ah Jerusalén, hakaꞌ chu isqꞌojwa teꞌ litꞌ kaw ay ismay. Haꞌ huneꞌ wahil tuꞌ kaw chiyiqꞌkanokanh yip, kat hetanhkanilo yu, yuto matxa tzet chilolax yul konhobꞌ. 17 Chiwatojan wahil texol, hex ah Jerusalén, chiwanipaxtojan noꞌ howla noqꞌ teyinh, yu kexisxitnikamo noꞌ, chiwanipaxtojan howla yabꞌil texol, kat hepotxꞌlaxkamo xol howal. Haxanhe chikꞌ chimalikꞌo yul konhobꞌ Jerusalén. Haꞌ hunteqꞌan tiꞌ haninan Yahawilintiꞌan, hankawhinan chiwalan,» xhi Komam.