Hal-lax isyaꞌtajil chiꞌay yibꞌanh ej wonhan ay bꞌey Jerusalén
6
Hul istzotiꞌ Komam Jahawil wetan, yalni hakaꞌ tiꞌ: 2 «Hach iskꞌahol naj winaj, tꞌanhxanhto yinh ej wonhan ay bꞌey Israel, kat hawalni isyaꞌtajil chiꞌay yibꞌanh.a 3 Chawalni: “Hex wonhan ay bꞌey Israel, abꞌewe tzet chiyal Komam Dios, Jahawil yinh ej wonhan, yebꞌ yinh ha haꞌ chꞌel yojomal, yebꞌ yinh ej akꞌal; chalni Komam hakaꞌ tiꞌ: Chiwatojan howal teyinh, chiwuchkꞌantojan bꞌay nahat yekanh bꞌay cheyiyo hebꞌa sata tioxh. 4 Haꞌ mexha bꞌay chenhus hexahanbꞌal chiꞌuchkꞌalaxkantoj, kat ismaqꞌlaxpoho istioxhal tzꞌayik, chiwaqꞌnikamojan ebꞌnaj winaj sata hetioxh tuꞌ. 5 Chiwakojan henimanil hex Israel hex tiꞌ yet kamom hexxa sata hetioxh yebꞌ xin xanhe chꞌekꞌ pakꞌla hebꞌajil yinhla ishoyanil ismexhahil yet xahanbꞌal. 6 Bꞌajxanhetuꞌwal konhobꞌal chextohi, chiꞌuchkꞌalaxtoj, kat yuchkꞌalaxto bꞌay nahat yekanh bꞌay cheyiyo hebꞌa tet hetioxh. Chiꞌuchkꞌalaxkantoj yebꞌ xin kaw chitzꞌinhtzꞌonkanoj, kat ismaqꞌlaxpoho hetioxh, kat istanhkaniloj. Chimaqꞌlaxpoho istioxhal tzꞌayik, kat istanhkanilo sunil tzet watxꞌebꞌil heyu. 7 Hayet cheyilni yaykꞌay anma chipotxꞌlaxkamo texol, cheyohtanheniloj ta hanintiꞌan Yahawil hinan.8 »”Yajaꞌ ayto haywanhexxa chexwakanojan, chexkolcha tet chꞌen espada; haꞌ ton hex tuꞌ chexsajlemito xolaj nimeta konhobꞌ. 9 Hex chexkolcha tuꞌ chinhenatijan yulaj nimeta konhobꞌ bꞌay chexilaxto preso, yuto wabꞌehan isyaꞌil yet hepohnilo hebꞌa winhan, heyaniko heyanma yinh hetioxh, heyok tzujno yintaj. Chextxꞌixwikanh teyinh yu istxꞌojal hewatxꞌe yebꞌ yu hebꞌeybꞌal kaw yahbꞌetaj. 10 Cheyohtanheloj ta haninan Yahawil hinan, mach nabꞌnheho chintzotelan ta chihul hunteqꞌan isyaꞌtajil teyibꞌanh,” kachi,» xhi Komam.
11 Yalnipaxo Komam Dios Jahawil hakaꞌ tiꞌ: «Chatzaqꞌ haqꞌabꞌ, chatinhnayo hawoj, chawalni: “¡Ay, kaw kꞌanchꞌan anma Israel, yuto chiꞌay isyaꞌtajil yibꞌanh yu sunil isyahbꞌetajil chilaiswatxꞌe! Ay mak chipotxꞌlaxkamo yu espada, ay mak chikam yu wahil, aypaxo mak chikam yu howla yabꞌil. 12 Haꞌ mak nahat ayah chikam yu howla yabꞌil, haxa mak kawil ayah chipotxꞌlaxkamo yu espada, haxa mak chikankano yul konhobꞌ, haꞌ wahil chꞌaqꞌni kamoj, yuto chꞌahlaxiko howal yinh konhobꞌ,” kachi. Hak tuꞌ chu yijni isbꞌa yay inhowalan yibꞌanh anma. 13 Cheyohtanheloj ta hanintiꞌan Yahawil hinan yet cheyilni anma kamom, xanhepakꞌbꞌonbꞌatoj xolaj hetioxh yebꞌ yinhla ishoyanil ismexhahil yet xahanbꞌal bꞌey iswiꞌla wonhan nahat yekanh, bꞌey iswiꞌla witz yebꞌ yichla teꞌ nimeta qꞌebꞌtaj, yebꞌ yichla teꞌ nimeta hih, bꞌay henhus teꞌ pom tet sunil hetioxh. 14 Chiwikanh inqꞌabꞌan teyinh, chiwanayojan isyaꞌtajil teyibꞌanh bꞌayejxanhetuꞌwal chexehayoj. Chinmeltzokojan hetxꞌotxꞌ tuꞌ yinh hakaꞌ txꞌotxꞌ machi yahaw, yebꞌ xin kaw ekꞌbꞌal chitzꞌinhtzꞌonkanoj hakaꞌ txꞌotxꞌ desierto chiꞌapni bꞌey Diblat. Hak tuꞌ chu heyohtanheniloj ta hanintiꞌan Yahawil hinan,» xhi Komam.