Chihul islahobꞌal tzꞌayik
7
Tzotel Komam wetan, yalni hakaꞌ tiꞌ: 2 «Hach iskꞌahol naj winaj, hanin Dios, Yahawilintiꞌan, hankawinan chiwalan tet anma Israel:“Lanhan yul islahobꞌal tzꞌayik,
lanhan yul islahobꞌal tzꞌayik yibꞌanh iskanhebꞌal istxikin yul sat yibꞌanhqꞌinal tiꞌ.
3 Wal tinanh hex ah Israel, xaꞌapni islahobꞌal tzꞌayik bꞌay chiꞌay isyaꞌtajil teyibꞌanh,
chiwayojan inhowalan teyibꞌanh.
Hatatikꞌa tzet hebꞌeybꞌalnhe, hak tuꞌ chu wilnihan yinh tzet chexelikoj,
chiwayojan isyaꞌtajil teyibꞌanh yu sunil isyahbꞌetajil hewatxꞌe.
4 Mach chiwaqꞌ nimankꞌulalan teyinh, yebꞌ xin mach chitzꞌaypaxo inkꞌulan teyinh.
Chiwayojan isyaꞌtajil teyibꞌanh yu istxꞌojal chebꞌeybꞌalnhe,
chetohlan sunil isyahbꞌetajil chilahewatxꞌe,
hak tuꞌ chu heyohtanheniloj tato haninan Yahawil hinan,” xhi Komam.
5 »Yalnipaxo Komam Dios Jahawil hakaꞌ tiꞌ:
¡Ay huneꞌ isyaꞌtajil, haꞌ huneꞌ isyaꞌtajil tiꞌ xin, lanhan yuli!
6 ¡Lanhan yul islahobꞌal tzꞌayik, lanhan yuli.
Xaꞌel iswayanh yu chul yaqꞌaꞌko howal teyinh. Yinh kaw yeli chuli!
7 ¡Lanhan yul istzꞌayikal bꞌay chiꞌay isyaꞌtajil teyibꞌanh, sunil hex ay hex sat txꞌo txꞌotxꞌ tiꞌ.
Lanhan yul huneꞌ tiempo bꞌay chiꞌay isyaꞌtajil. Lanhan ishitzti huneꞌ tzꞌayik tuꞌ.
Haꞌ yinh huneꞌ tzꞌayik tuꞌ chiwejchakanh anma yu xiwkilal, matxa tzalahilal iswiꞌla wonhan!
8 Wal tinanh, kaw toxa chiwayojan inhowalan teyibꞌanh,
masan chiyij isbꞌa yay inhowal tuꞌan.
Hatatikꞌa tzet hebꞌeybꞌalnhe, hak tuꞌ chu wilnihan yinh tzet chexelikoj,
chiwanayojan isyaꞌtajil teyibꞌanh yu isyahbꞌetajil chewatxꞌe.
9 Mach chiwaqꞌ nimankꞌulalan teyinh, yebꞌ xin mach chitzꞌaypaxo inkꞌulan teyinh,
wal xin chiwayojan isyaꞌtajil teyibꞌanh yu istxꞌojal chebꞌeybꞌalnhe,
chetohla isyahbꞌetajil chilahewatxꞌe.
Hak tuꞌ chu heyohtanheniloj ta hanin Yahawilintiꞌan,
haninan chiwayojan isyaꞌtajil yibꞌanh makta chiwatxꞌen istxꞌojal.
10 ¡Lanhan yayilo istzꞌayikal bꞌay chiꞌay isyaꞌtajil teyibꞌanh,
haꞌ huneꞌ tzꞌayik tuꞌ, kaw yeli chuli!
Xaꞌapni yorahil bꞌay chuli. Haꞌ istxꞌojal kaw xayiqꞌkanokanh yip, yiqꞌnipaxokanh yip isloloꞌal anma.
11 Chiyiqꞌkanokanh yip istxꞌojal yu howal,
matxa hunu mak tiꞌ chikankano xol ebꞌnaj chiwatxꞌen istxꞌojal tuꞌ,
waxanhka kaw niman ebꞌnaj, yajaꞌ matxa hunu yetbꞌi ebꞌnaj chikani;
matxa hunu ebꞌnaj chikani, yu yiqꞌni bꞌiskꞌulal.
12 Xaꞌapni istzꞌayikal bꞌay chiꞌay isyaꞌtajil, xaꞌapni huneꞌ tzꞌayik tuꞌ.
Haꞌ mak chiloqꞌni, machojabꞌ chitzalahi, haxa mak chitxonhwi,
machojabꞌ chꞌoqꞌ yu bꞌiskꞌulal yinh tzet istxonhtoj, yuto chiwayojan inhowalan yibꞌanh sunil anma.
13 Yuto haꞌ mak chitxonhni hunu tzet ye tuꞌ, matxa chu ismeltzo tzet istxonh yul isqꞌabꞌ hunelxa,
waxanhka itzitzto iskawanhil, yuto haꞌ isyaꞌtajil xawalan ta chiꞌay yibꞌanh hunteqꞌan anma kaw nimankano isbꞌisil tiꞌ,
mach chꞌekꞌto yet yijni isbꞌa. Haꞌ makta chiwatxꞌen istxꞌojal, machi hunu tiꞌ chikolchahi.
14 Chiꞌoqꞌtzelax chꞌen trompeta yu iswatxꞌen isbꞌa ebꞌnaj winaj yinh howal,
yajaꞌ matxa hunu ebꞌnaj chitit yinh howal,
yuto wayo inhowalan yibꞌanh sunil hunteqꞌan anma kaw nimankano isbꞌisil.
15 Haꞌ yintalto konhobꞌ ay howal, haxa yul konhobꞌ ay howla yabꞌil yebꞌ wahil,
haꞌ mak ay xol ismunil chitejlaxkamo yu espada,
haxa mak ay yul konhobꞌ chikam yu wahil yebꞌ yu howla yabꞌil.
16 Haꞌ mak chikolchalo yul isqꞌabꞌ kamikal xol anma tuꞌ, chꞌelkanh,
kat isto yebꞌano isbꞌa iswiꞌla witz, hakaꞌ noꞌ kuwis chꞌekꞌ satla akꞌal.
Haꞌ sunil mak chꞌelkanh tuꞌ chiqꞌajwi yinh hununtajil yu ismul.
17 Haꞌ sunil ebꞌnaj winaj chipáxilo yip isqꞌabꞌ ebꞌnaj,
kat ispaxilo yip iswitxꞌiꞌ sunil ebꞌnaj hakaꞌ ha haꞌ.
18 Chiyanipaxiko ebꞌnaj xilqꞌape yet bꞌiskꞌulal yinh,
kat yul niman xiwkilal yibꞌanh ebꞌnaj,
kajpulpoxanhe chiꞌeliko sat ebꞌnaj yu txꞌixwilal, chiskꞌupnilo ebꞌnaj xil iswiꞌ.
19 Toxanhe chistixhto ebꞌnaj isplata yulaj bꞌeh, matxa tzet chalilo yoro ebꞌnaj.
Haꞌ isplata yebꞌ yoro ebꞌnaj mach chu iskolnilo chꞌen ebꞌnaj yul isqꞌabꞌ isyaꞌtajil yinh istzꞌayikal yet chiꞌay inhowalan yibꞌanh ebꞌnaj,
mach chu yaqꞌni noho chꞌen yanma ebꞌnaj, nitam yaqꞌni noho chꞌen iskꞌul ebꞌnaj yinh istzꞌayikal isyaꞌtajil;
yuto haꞌ chꞌen aqꞌni aykꞌayo ebꞌnaj tet istxꞌojal.
20 Haꞌ yu iskꞌulchꞌanil isqꞌalomal ebꞌnaj, yuxin meltzokaniko ebꞌnaj yinh loloꞌal,
iswatxꞌen ebꞌnaj yechel isdios yinh isqꞌalomal tuꞌ,
haꞌ ton hunteqꞌan tioxh kaw yahbꞌetaj,
yuxin inmeltzokojan isqꞌalomal ebꞌnaj yinh qꞌalemal.
21 Chiwakojan isqꞌalomal ebꞌnaj tuꞌ yul isqꞌabꞌ ebꞌnaj nan konhobꞌal,
chiyelqꞌanto ebꞌnaj, chiwanipaxikojan istioxh ebꞌnaj yul isqꞌabꞌ ebꞌnaj
winaj kaw txꞌoj ay sat txꞌo txꞌotxꞌ tiꞌ, chiyetankanto ebꞌnaj, kat yelkano ispixan.
22 Chinpohilo hinbꞌahan yinh anma Israel, matxa chintꞌanhxikojan yinh,
haꞌ watutan kaw ochebꞌil wuhan chiꞌelkano ispixan, yuto chihul ebꞌnaj yet howal,
kat yokto ebꞌnaj yul watutan, kat yetankanto ebꞌnaj.
23 Watxꞌe hunu chꞌen cadena, yuto haꞌ txꞌotxꞌ Israel tiꞌ kaw nohna txꞌotxꞌ yu ebꞌnaj potxꞌom anma,
haxa konhobꞌ, kaw nohna yu istxꞌojal.
24 Yuxin haninan chiwaqꞌtijan ebꞌnaj winaj kaw txꞌojkano ay yulajla nimeta konhobꞌ,
kat yokkano yatut anma Israel tiꞌ yu ebꞌnaj, kat intanhtzenkanilojan isloloꞌal ebꞌnaj winaj kaw ay yip,
kat yetalaxto yatut istioxh ebꞌnaj, kat yelkano ispixan.
25 ¡Lanhanxa yul istzꞌayikal bꞌay chiꞌuchkꞌalaxto konhobꞌ!
Chissay anma aqꞌankꞌulal, yajaꞌ matxa aqꞌankꞌulal.
26 Lanhantotikꞌa yay huneꞌ isyaꞌtajil, kat yul huneꞌxa isyaꞌtajil,
lanhantotikꞌa yal-lax tzotiꞌ bꞌiskꞌulal yoki kat yul yal-laxo huneꞌxa.
Nabꞌxanhe chiyaqꞌ ebꞌnaj isqꞌambꞌebꞌal tet ebꞌyaꞌ inchejabꞌan,
yuto matxa tzet chiwaqꞌan yohtanheloj, matxa ley chiyal ebꞌyaꞌ sacerdote,
matxa kuybꞌanile chiyaqꞌ ebꞌnaj ichamta winaj.
27 Naj rey chiyako naj xilqꞌape yet bꞌiskꞌulal yinh,
haxa ebꞌnaj yahaw konhobꞌ chiꞌok niman bꞌiskꞌulal yinh ebꞌnaj,
kat isbꞌilikanh isqꞌabꞌ sunil anma ay yul konhobꞌ yu xiwkilal.
Hakaꞌtikꞌa isbꞌeybꞌal, hak tuꞌ chiwutehan ebꞌnaj, hakaꞌ yu yilni ebꞌnaj tzet eliko yet anmahil,
hak tuꞌ chu wilnihan yinh tzet chiꞌeliko ebꞌnaj,
hak tuꞌ chu yohtanhenilo ebꞌnaj tato hanintiꞌan Yahawil hinan,» xhi Komam.