Yelax isyahbꞌetajil chiwatxꞌelax bꞌey Jerusalén yilaꞌ yaꞌ Ezequiel
8
Haꞌ yinh ishoꞌ tzꞌayik, yinh iswaj ixahaw yinh iswaj habꞌil, tzꞌonhan hinan watutan yebꞌ ebꞌnaj ichamta winaj ah Judá. Hayet tzꞌonhan intuꞌan, yanayo Komam Dios Jahawil isqꞌabꞌ wibꞌanhan. 2 Yinhnhena tuꞌ, wilnihan huneꞌ mak hakaꞌ anma jilni, haꞌ yiktaj hakaꞌ qꞌa qꞌaꞌ jilni masanta chiꞌayapno yinh yoj, haxa yiktaxa isnimanil masanta chiꞌahapno yinh iswiꞌ kaw chitzejtzoni hakaꞌ chꞌen bronce. 3 Haꞌ huneꞌ mak hakaꞌ jilni anma tuꞌ, yati isqꞌabꞌ, yok tzabꞌno yinh xil inwiꞌan, kinyinikanhan yu Espíritu xol jaqꞌeqꞌ, isyeni Komam Dios hunteqꞌan tzet ye tuꞌ yinh sajsatil wilaꞌan. Hakaꞌto kinyitojan Komam bꞌey Jerusalén, kinyanayojan bꞌey ispultahil yatut, huneꞌ pulta ayko yinh yetkꞌulal norte. Haꞌ bꞌey tuꞌ ay huneꞌ tioxh aqꞌnitij ishowal Komam Jahawil. 4 Haꞌ bꞌey tuꞌ wilan isqꞌaqꞌal ismay Komam Jahawil, isDiosal Israel, hakaꞌ isqꞌaqꞌal ismay wilan yet bꞌabꞌelal yet ayinan sat akꞌal.5 Yalni Komam wetan: «Hach iskꞌahol naj winaj, tꞌanhxanhto yinh yetkꞌulal norte tinanh,» xhi Komam. Intꞌanhxitojan yinh yetkꞌulal norte, wilnihan huneꞌ tioxh chiꞌaqꞌnitij ishowal Komam Jahawil bꞌey istiꞌ ispultahil ismexhahil xahanbꞌal. 6 Lahwi tuꞌ yalni Komam wetan: «Hach iskꞌahol naj winaj ¿tom mach chawil hunteqꞌan nimeta isyahbꞌetajil chiswatxꞌe anma Israel tiꞌ? Haꞌ yu tzet chiswatxꞌe tiꞌ yuxin chinelan yul watuttiꞌan, yajaꞌ xin ayto hunteqꞌanxa nimeta isyahbꞌetajil chito hawilaꞌ,» xhi Komam wetan.
7 Lahwi tuꞌ kinyinitojan amaqꞌ, wilnihan huneꞌ holan yinh iskꞌul chꞌen kꞌubꞌ. 8 Yalni Komam wetan: «Hach iskꞌahol naj winaj, haꞌ huneꞌ holan tiꞌ, aqꞌ chꞌibꞌo yul,» xhi Komam wetan. Hak tuꞌ yu inholnihan iskꞌul chꞌen kꞌubꞌ tuꞌ, wilnihan huneꞌ pulta.
9 Tzujan tuꞌ yalni Komam wetan: «Okanhto yul pulta tuꞌ, chawilni isyahbꞌetajil kaw txꞌojkano chiswatxꞌe anma bꞌey tuꞌ,» xhi Komam wetan. 10 Woktojan xin, wilnihan iskꞌul bꞌitzꞌabꞌ bꞌay tzꞌibꞌnhebꞌiliko yechel sunil no noqꞌ chishatxikꞌo iskꞌul, yebꞌ yechel no noqꞌ mach sajo hakaꞌ yalni ley. Wilnipaxojan yechel sunil tioxh chiyal anma Israel isdiosaloj yinhla sunil ishoyanil iskꞌul bꞌitzꞌabꞌ tuꞌ. 11 Wilnihan 70 (lahonhebꞌ iskanhwinaj) ebꞌnaj ichamta winaj ah Israel sata hunteqꞌan tioxh tuꞌ, haꞌ xol ebꞌnaj tuꞌ ayko naj Jaazanías, iskꞌahol naj Safán. Haꞌ hunun ebꞌnaj tuꞌ, iqꞌbꞌil islesén yul isqꞌabꞌ, xanhe xin chitopla yah isnhubꞌal pom chisnhus ebꞌnaj.
12 Lahwi tuꞌ yalni Komam wetan: «Hach iskꞌahol naj winaj, ¿mamxawil sunil tzet chiswatxꞌe ebꞌnaj ichamta winaj Israel xol qꞌejholo tiꞌ? Haꞌ hunun ebꞌnaj tuꞌ aylekto ebꞌnaj yul iscuarto bꞌay tzꞌibꞌnhebꞌiliko yechel tioxh yinh iskꞌul bꞌitzꞌabꞌ, chalni ebꞌnaj: “Mach chonhyil Komam Jahawil, yuto bꞌejbꞌilkano kokonhobꞌ tiꞌ yu Komam,” xhi ebꞌnaj,» xhi Komam wetan. 13 Tzujan tuꞌ, yalnipaxo wetan: «Ayto hunteqꞌanxa isyahbꞌetajil chiswatxꞌe anma tiꞌ ekꞌbꞌalto txꞌoj sata hunteqꞌan tiꞌ chito hawilaꞌ,» xhi wetan.
14 Lahwi tuꞌ, kinyinitojan bꞌey ispultahil Yatut Komam Jahawil, huneꞌ pulta ayko yinh yetkꞌulal norte, wilnihan hunteqꞌan ebꞌix ix tzꞌonhanayoj lanhan yoqꞌ sata tioxh Tamuz. 15 Yalnipaxo Komam wetan: «Hach iskꞌahol naj winaj, ¿maxawil hunteqꞌan tiꞌ? Yajaꞌ xin ayto hunteqꞌanxa kaw ekꞌna yahbꞌeta chito hawilaꞌ,» xhi wetan.
16 Lahwi tuꞌ kinyinitojan bꞌey amaqꞌ yul Yatut Komam Jahawil, wilnihan yul Yatut Komam 25 (howebꞌ iskawinaj) ebꞌnaj winaj xolbꞌal bꞌay chonhokapno yul yatut yebꞌ ismexhahil yet xahanbꞌal. Haꞌ ebꞌnaj tuꞌ, haꞌ yichinh ebꞌnaj aykanto yinh Yatut Komam Jahawil, hakanto ebꞌnaj yinh yetkꞌulal bꞌay chiꞌahilo tzꞌayik, jahanayo ebꞌnaj, chiyinayo isbꞌa sata tzꞌayik.
17 Yalni Komam wetan: «Hach iskꞌahol naj winaj, ¿mamxawil hunteqꞌan tiꞌ? Haꞌ anma ah Judá tiꞌ maxhtikꞌa chiyiqꞌ iskꞌul iswatxꞌen hunteqꞌan isyahbꞌetajil tiꞌ, yebꞌpaxo xin kaw nohna yul konhobꞌ tiꞌ yu ej istxꞌojal chilaiswatxꞌe, kaw naunhe chiyaqꞌnitij inhowalan, kaw chihul sam tzet chiswatxꞌe anma tiꞌ yinh intxaman. 18 Yajaꞌ hanintiꞌan chiwayojan inhowalan yibꞌanh anma tiꞌ, mach chiwaqꞌ nimankꞌulalan yinh, waxanhka chꞌeliko yaw winhan yinh kaw ip, mach chiwabꞌehan tzet chisqꞌana,» xhi Komam.