Yelax yilaꞌ yaꞌ Ezequiel ispotxꞌlaxkamo makta chiyo isbꞌa tet ej tioxh
9
Lahwi tuꞌ, wabꞌenan huneꞌ mak awi yinh kaw ip yinh intxikinan, yalni: «Mahul ebꞌnaj chiꞌanayo isyaꞌtajil yibꞌanh konhobꞌ tiꞌ, haꞌ hunun ebꞌnaj tiꞌ, iqꞌbꞌil ischꞌen ebꞌnaj yet howal yul isqꞌabꞌ chiꞌuchkꞌanto sunil,» xhi. 2 Wilnihan istit wajwanh ebꞌnaj winaj yul isbꞌehal pulta ayko yinh yetkꞌulal norte, haꞌ hunun ebꞌnaj tuꞌ iqꞌbꞌil ischꞌen ebꞌnaj yet howal yul isqꞌabꞌ chiꞌuchkꞌanto sunil. Haꞌ xol ebꞌnaj tuꞌ ayko huneꞌ naj winaj ayko qꞌap lino xilo isqꞌap, haxa yinh yikta naj kꞌalbꞌiliko tzet chiꞌokniko yu ebꞌnaj tzꞌibꞌlom, yokto ebꞌnaj yul pulta yok linhno ebꞌnaj iskawilal ismexhahil xahanbꞌal bronce.a3 Yinhnhena tuꞌ, isyeni isbꞌa isqꞌaqꞌal yip Komam Jahawil, isDiosal Israel yibꞌanh yechel ebꞌnaj querubín, bꞌaytikꞌa isye isbꞌa yibꞌanh iswiꞌ pulta yul Yatut Komam. Yawten Komam Jahawil naj winaj ayko qꞌap lino xilo isqꞌap, yebꞌ kꞌalbꞌiliko tzetaj chꞌokniko yu ebꞌnaj tzꞌibꞌlom yinh yiktaj. 4 Yalni Komam tet naj: «Ekꞌanh yul konhobꞌ Jerusalén, chawaniko yechel ispalanh anma kaw bꞌiskꞌulal ye iskꞌul yu sunil isyahbꞌetajil chiswatxꞌe anma yul konhobꞌ tiꞌ,» xhi Komam.
5 Wabꞌenpaxojan yalni Komam tet hunteqꞌanxa ebꞌnaj winaj tuꞌ hakaꞌ tiꞌ: «Ekꞌanhwe yul konhobꞌ Jerusalén yinta naj, kat hepotxꞌnikamo makta machi yechel ispalanh, mach cheyaqꞌ nimankꞌulal yinh anma tuꞌ, mach chitzꞌaypaxo hekꞌul yinh. 6 Haꞌ ebꞌnaj ichamtaj, ebꞌnaj tzehtaj, ebꞌix qꞌopotaj, nixhte unin yebꞌ ebꞌix ix chepotxꞌkamo sunil; matxa hunu mak tuꞌ cheyakanoj, yajaꞌ wal sunil makta ayko yechel ispalanh, mach chexhitziko iskꞌatanh. Chetzabꞌiko hemaqꞌnikamo anma tuꞌ bꞌey watutan,» xhi Komam tet ebꞌnaj. Hak tuꞌ yu yichiko ebꞌnaj ispotxꞌnikamo ebꞌnaj ichamta winaj sata istiꞌ Yatut Komam Dios.
7 Lahwi tuꞌ, wabꞌenan yal-lax tet ebꞌnaj: «Bꞌakweto Yatut Komam Dios, kat henohtzenkanh yamaqꞌil Yatut Komam yu kamom, lahwi tuꞌ kat heyelto hepotxꞌnokamo anma yul konhobꞌ,» xhi tet ebꞌnaj. Hak tuꞌ yu yelto ebꞌnaj, yok ebꞌnaj ispotxꞌnokamo anma yul konhobꞌ. 8 Hayet lanhan ispotxꞌnikamo ebꞌnaj anma tuꞌ, inkankanojan inchukilan sata Komam, way jahnojan, way xulnojan sat txꞌotxꞌ. Yah wawan yu bꞌiskꞌulal tet Komam, walnihan: «Mam Wahawil, ¿tom chatanhtzekanilo sunil anma Israel kantokanoj, chawanayo hahowal yibꞌanh konhobꞌ Jerusalén tiꞌ?» kinchihan.
9 Istaqꞌwi Komam wetan: «Haꞌ istxꞌojal anma Israel yebꞌ anma Judá, kaw nimankanoj, kaw nohna sat txꞌo txꞌotxꞌ yu ischikꞌil anma potxꞌbꞌilkamoj, kaw nohna yul konhobꞌ yu istxꞌojal, yuto hak tiꞌ yalni anma: “Xaꞌisbꞌejkano Komam Jahawil kokonhobꞌ tiꞌ, yebꞌ xin mach chiyil tzet chikowatxꞌe,” xhi. 10 Yu huneꞌ tuꞌ xin mach chiwaqꞌ nimankꞌulalan yinh hunteqꞌan anma tiꞌ, yebꞌ mach chitzꞌaypaxo inkꞌulan yinh; wal xin chiwayojan isyaꞌtajil yibꞌanh hunteqꞌan anma tiꞌ hakaꞌtikꞌa istxꞌojal isbꞌeybꞌalnhe,» xhi Komam.
11 Lahwi tuꞌ, wilnihan ismeltzo naj winaj ayko qꞌap lino xilo isqꞌap, yebꞌ xin kꞌalbꞌiliko tzetaj chiꞌokniko yu ebꞌnaj tzꞌibꞌlom yinh yiktaj, wabꞌenan yalni naj hayebꞌ tzotiꞌ hakaꞌ tiꞌ: «Mamin, manwatxꞌehan sunil tzet maxawal wetan,» xhi naj.