Isqꞌaqꞌal yip Komam Dios isbꞌejkano Yatut Komam
10
Lahwi tuꞌ, wilnihan huneꞌ hakaꞌtanhe jilni tzꞌonhobꞌal, hakaꞌ jilni chꞌen zafiro yibꞌanh huneꞌ leyanto yibꞌanh iswiꞌ ebꞌnaj querubín. 2 Yalni Komam Jahawil tet naj winaj ayko qꞌap lino xilo isqꞌap hakaꞌ tiꞌ: «Okanhto xolbꞌal hunteqꞌan rueda ayko yalanh ebꞌnaj querubín, kat hawinilti hunu bꞌetx tzaqꞌaqꞌ kaw kaj txaltxonhe qꞌaꞌ yinh xolbꞌal ebꞌnaj querubín tuꞌ, kat hatixhnito yibꞌanh konhobꞌ,» xhi Komam. Lahwi tuꞌ yokto naj yinh insatan.3 Haꞌ ebꞌnaj querubín tuꞌ, ayko ebꞌnaj yinh yetkꞌulal kowatxꞌqꞌabꞌ yinh Yatut Komam Dios, yet yokto naj winaj ayko qꞌap lino xilo isqꞌap; isnohilo yamaqꞌil yul Yatut Komam yu huneꞌ moyan. 4 Hak tuꞌ yu yah isqꞌaqꞌal yip Komam Jahawil ayko yibꞌanh ebꞌnaj querubín, isto yibꞌanh iswiꞌta pulta, isnohilo yul Yatut Komam yu moyan, isnohpaxilo yamaqꞌil yu isqꞌaqꞌal yip Komam. 5 Apnita yel yaw isbꞌili xikꞌ ebꞌnaj querubín tuꞌ bꞌey yamaqꞌil yintalto Yatut Komam. Hayet chibꞌili tuꞌ lahan jabꞌen hakaꞌ yul isnuqꞌ Komam Dios, Komam sunil chisje yu, yet chitzoteli.
6 Hayet ischejni Komam naj winaj ayko qꞌap lino xilo isqꞌap yinolti tzaqꞌaqꞌ xolbꞌal hunteqꞌan rueda ayko xolbꞌal ebꞌnaj querubín, yokto naj, yok linhno naj xolbꞌal rueda. 7 Haꞌ xol ebꞌnaj querubín tuꞌ ay huneꞌ naj querubín anito isqꞌabꞌ, yinilti naj qꞌaꞌ ayko xolbꞌal ebꞌnaj querubín, yaqꞌni naj qꞌaꞌ tuꞌ yul isqꞌabꞌ naj winaj ayko qꞌap lino xilo isqꞌap, ischahnilo naj qꞌaꞌ, yelti naj bꞌey tuꞌ. 8 Haꞌ yalanh xikꞌ ebꞌnaj querubín tuꞌ, wilan isyeni isbꞌa huneꞌ hakaꞌ isqꞌabꞌ anma.
9 Wilnihan kanhebꞌ rueda iskꞌatanh ebꞌnaj querubín tuꞌ. Ay hunun rueda tuꞌ iskꞌatanh hunun querubín. Haꞌ hunteqꞌan rueda tuꞌ lahan jilni hakaꞌ istzejla chꞌen crisólito. 10 Kaw lahannhe jilni kanhebꞌ rueda tuꞌ, yebꞌ xin hakaꞌtanhe chꞌekꞌleto yul iskꞌul hunun iskanhebꞌal. 11 Haꞌ ebꞌnaj querubín tuꞌ chisje isbꞌelwi ebꞌnaj yinh iskanhebꞌal sat bꞌay chikaw istokoj, mach chismeltzo isbꞌa ebꞌnaj yet chibꞌelwi ebꞌnaj, toholnhetikꞌa isbꞌelwi ebꞌnaj bꞌay chikaw yijbꞌalax yu hunun. 12 Haꞌ sunil isnimanil ebꞌnaj querubín tuꞌ yebꞌ yichinh ebꞌnaj yebꞌ isqꞌabꞌ ebꞌnaj, yebꞌ xikꞌ ebꞌnaj nohnako isbꞌaqꞌ sat yinh, hakpax tuꞌ kanhebꞌ rueda tuꞌ, nohnako isbꞌaqꞌ sat yinh ishoyanil. 13 Wabꞌenan yal-lax tet hunteqꞌan rueda tuꞌ: «¡Ekꞌanhwej!» xhi. 14 Haꞌ ebꞌnaj querubín tuꞌ kanhebꞌ sat hunun ebꞌnaj. Haꞌ bꞌabꞌel sat lahan jilni hakaꞌ sat querubín, haꞌ iskabꞌ lahan jilni hakaꞌ sat winaj; haxa yox lahan jilni hakaꞌ sat noꞌ bꞌalam, haxa iskanh, hakaꞌ sat noꞌ tꞌiw.
15 Yah ebꞌnaj querubín tuꞌ satkanh. Haꞌ hunteqꞌan ebꞌnaj querubín tuꞌ, haꞌ ebꞌnaj wilan bꞌey istiꞌ haꞌ Quebar. 16 Hayet chibꞌelwi ebꞌnaj querubín, kat isbꞌelwipaxo hunteqꞌan rueda yebꞌ ebꞌnaj, haxa yet chiyinikanh ebꞌnaj xikꞌ yet chiꞌah satkanh, maxhtikꞌa chikanilo isbꞌa hunteqꞌan rueda yinh ebꞌnaj. 17 Hayet chꞌok linhno ebꞌnaj querubín, kat yok linhno hunteqꞌan rueda tuꞌ, haxa yet chꞌah ebꞌnaj querubín satkanh, kat yahpaxo rueda yinta ebꞌnaj, yuto yetbꞌi isbꞌa yespíritu ebꞌnaj querubín yebꞌ rueda tuꞌ.
18 Hak tuꞌ yu yah isqꞌaqꞌal yip Komam Jahawil yibꞌanh iswiꞌla ispultahil Yatut Komam Dios, yok linhno yibꞌanh ebꞌnaj. 19 Yinikanh ebꞌnaj querubín xikꞌ, yah ebꞌnaj sat txꞌotxꞌ isto ebꞌnaj satkanh yinh insatan. Hayet yah ebꞌnaj querubín, yahpaxo hunteqꞌan rueda tuꞌ yebꞌ ebꞌnaj, yok linhno ebꞌnaj yul ispultahil Yatut Komam Jahawil, huneꞌ pulta ayko yinh yetkꞌulal bꞌay chiꞌahilo tzꞌayik, wal isqꞌaqꞌal yip Komam Dios, isDiosal Israel, ayayo yibꞌanh ebꞌnaj querubín tuꞌ.
20 Haꞌ hunteqꞌan ebꞌnaj tiꞌ, haꞌ ton ebꞌnaj ayko yalanh isqꞌaqꞌal yip Komam Dios, isDiosal Israel wilan bꞌey istiꞌ haꞌ Quebar. Hak tuꞌ yu intxumnihan ta querubín ebꞌnaj. 21 Haꞌ ebꞌnaj tuꞌ kanhebꞌ sat hunun ebꞌnaj, kanhebꞌpaxo xikꞌ hunun ebꞌnaj, ay isqꞌabꞌ ebꞌnaj hakaꞌ isqꞌabꞌ anma yalanh hunun xikꞌ. 22 Haꞌ issat ebꞌnaj xin lahan hakaꞌ jilni sat ebꞌnaj wilan bꞌey istiꞌ haꞌ Quebar, kaw lahan jilni yebꞌ ebꞌnaj tuꞌ, kaw xin tohol isbꞌelwi hunun ebꞌnaj sataj.